Jehova i wokim wanpela gaden na em i kolim Iden. Dispela gaden i gat planti plaua, diwai, na ol animal. Bihain God i wokim fes man, Adam, long graun na em i winim win i go insait long nus bilong em. Yu save wanem samting i kamap? Dispela man i kisim laip! Jehova i putim Adam bilong bosim dispela gaden, na God i tokim em long givim nem long olgeta animal.

Jehova i givim wanpela bikpela lo long Adam. Em i tokim Adam: ‘Yu ken kaikai prut bilong olgeta diwai, tasol i gat wanpela spesel diwai yu no ken kaikai prut bilong en. Sapos yu kaikai, bai yu dai.’

Bihain Jehova i tok: ‘Mi bai wokim wanpela helpim bilong Adam.’ Em i mekim Adam i slip i dai, na God i kisim wanpela rip bilong Adam na wokim meri bilong Adam. Nem bilong em Iv. Adam na Iv i kamap fes famili. Adam i pilim olsem wanem long nupela meri bilong em? Adam i amamas tru na em i tok: ‘Lukim samting  Jehova i wokim long rip bilong mi! Em nau! Em i wankain olsem mi.’

Jehova i tokim Adam na Iv long kamapim pikinini na pulimapim graun. Em i laik bai ol i amamas long wok wantaim na mekim graun i kamap wanpela paradais, o naispela pak, wankain olsem dispela gaden Iden. Tasol ol samting i no kamap olsem. Bilong wanem? Yumi bai kisim sampela save moa long neks sapta.