Jisas i kam long graun long autim gutnius bilong Kingdom Bilong God. Jehova i givim holi spirit long Jisas long wokim ol mirakel, na dispela i soim samting Jisas bai mekim olsem King. Em inap oraitim olgeta kain sik. Olgeta hap em i go, ol sikman i kam bilong kisim helpim, na em i oraitim ol. Ol aipas inap lukluk, yaupas inap harim, ol man i paralais inap wokabaut, na ol man em ol dimon i kontrolim i kamap fri. Maski ol i tatsim tasol arere bilong klos bilong em, ol i kamap orait. Ol manmeri i bihainim Jisas long olgeta hap em i go. Maski sampela taim Jisas i laik stap wanpis, em i no save salim ol man i go.

Wanpela taim, ol man i bringim wanpela paralais man i kam long haus we Jisas i stap long en. Tasol ol man i pas pas tru na ol i no inap go insait. Olsem na ol i wokim hul long rup na slekim bet man i slip long en i go daun long Jisas. Na Jisas i tokim dispela man: ‘Kirap sanap na wokabaut.’ Taim em i mekim olsem, ol manmeri i kirap nogut.

Narapela taim, Jisas i go insait long wanpela liklik taun, na 10-pela lepraman i sanap longwe na singaut: ‘Jisas, helpim mipela!’ Long dispela taim, i tambu long ol lepraman long go klostu long ol narapela man. Jisas i tokim ol long go long tempel, em samting Lo Bilong Jehova i tok ol lepraman i mas mekim taim ol i kamap orait. Taim ol i wokabaut i go, sik bilong ol i pinis. Wanpela bilong ol dispela lepraman i luksave  olsem sik bilong em i pinis, so em i kam bek long tenkyu long Jisas na preisim God. Wanpela bilong dispela 10-pela man, em tasol i tok tenkyu long Jisas.

Wanpela meri i bin sik inap 12-pela yia i laik tru long kamap orait. Em i kam baksait long Jisas namel long planti manmeri na tatsim arere bilong klos bilong Jisas. Wantu, em i kamap orait. Taim dispela i kamap, Jisas i tok: “Husat i tatsim mi?” Meri i pret, tasol em i kam na tokaut long Jisas olsem em i tatsim klos bilong em. Jisas i mekim gut bel bilong em na tok: ‘Pikinini, go wantaim bel isi.’

Wanpela ofisa nem bilong em Jairus i askim Jisas: ‘Kam long haus bilong mi! Liklik pikinini gel bilong mi i sik nogut tru.’ Tasol paslain long Jisas i kamap long haus bilong Jairus, liklik gel i dai pinis. Taim Jisas i kamap, em i lukim planti manmeri i krai sori wantaim famili bilong Jairus. Jisas i tokim ol: ‘No ken krai; em i slip tasol.’ Na em i kisim han bilong liklik gel na tok: “Liklik gel, yu kirap!” Wantu em i kirap sindaun, na Jisas i tokim papamama bilong em long givim em sampela kaikai. Ating papamama bilong em i amamas tru!