Ol i fosim ol Israel long wok hat olsem ol sleiv. Jehova i salim Moses na Aron i go long Fero na tok: ‘Larim ol manmeri bilong mi i go long ples nating na bai ol i ken lotu long mi.’ Fero i hambak na tok: ‘Wai bai mi harim tok bilong Jehova, mi no inap larim ol Israel i go.’ Na Fero i fosim ol long wok hat moa. Jehova bai skulim Fero long wanpela lesen. Yu save hau em bai mekim? Em i kamapim Tenpela Bikpela Hevi long Isip. Jehova i tokim Moses: ‘Fero i no harim tok bilong mi. Long moningtaim em bai stap long Wara Nail. Go na tokim em olsem bikos em i no larim ol lain bilong mi i go, olgeta wara long Nail bai tanim i kamap blut.’ Moses i harim tok na i go long Fero. Fero i lukluk i stap na Aron i paitim Wara Nail wantaim stik, na wara i tanim i kamap blut. Wara i stat long smel nogut tru, ol pis i dai, na i no gat gutpela wara long dring long Nail. Tasol Fero i no laik larim ol Israel i go.

 Bihain long 7-pela de, Jehova i salim Moses i go bek long Fero na tokim em: ‘Sapos yu no larim ol lain bilong mi i go, Isip bai pulap long ol frog.’ Aron i apim stik bilong em, na ol frog i stat long pulap long olgeta hap. Ol manmeri i painim ol frog long ol haus, long ol bet, na ol boul bilong ol. Ol frog i stap long olgeta hap! Fero i tokim Moses long askim Jehova long pinisim dispela hevi. Fero i promis olsem em bai larim ol Israel i go. So Jehova i pinisim dispela hevi, na ol Isip i bungim ol frog i dai pinis long planti hip. Graun i stat long smel nogut tru. Tasol Fero i strong yet na i no larim ol manmeri i go.

Bihain Jehova i tokim Moses: ‘Aron mas paitim graun wantaim stik bilong em, na das bai tanim i kamap moskito, o liklik binatang i save kaikai man.’ Kwiktaim ol moskito i pulap long olgeta hap. Sampela lain bilong Fero yet i tokim em: ‘Dispela bikpela hevi i kam long God.’ Tasol Fero i strong yet na i no larim ol Israel i go.