“Yupela inap long kamap tisa.” (Hib. 5:12) Tingim! Jehova—nambawan Tisa long heven na graun—i singautim yumi long skulim ol narapela long em! Wanem wanem wok yumi kisim bilong skulim ol man long tok i tru bilong Jehova, maski insait long famili, o insait long kongrigesen, o long wok autim tok, em wanpela wok i dia tumas na i bikpela wok. Olsem wanem yumi inap mekim gut dispela wok?

Bekim bilong dispela askim i stap long tok aposel Pol i raitim long pas i go long Timoti olsem: “Yu mas mekim yet wok bilong rit long ai bilong ol man, na givim ol gutpela tok, na skulim ol man.” Pol i tok moa olsem: “Long dispela rot yu bai kisim laip na ol man i harim tok bilong yu, ol tu bai kisim laip.” (1 Tim. 4:13, 16) Yu gat tok bilong helpim man long kisim laip. Olsem na em bikpela samting long mekim pasin bilong yu long rit na wok tisa bilong yu i kamap gutpela moa. Ol i wokim dispela buklet bilong helpim yu long mekim olsem. Yumi ken skelim sampela hap bilong en.

Jehova em i “Nambawan Bikpela Tisa.” (Ais. 30:20) Dispela buklet bai helpim yu long kamap gutpela moa long pasin bilong yu long rit na mekim wok tisa, tasol no ken lusim tingting olsem Jehova em i As bilong tok yumi kamapim na em i save kirapim ol man long i kam long em. (Jon 6:44) Olsem na oltaim beten long em i ken givim yu holi spirit. Oltaim kamapim tok bilong God, em Baibel. Stiaim tingting bilong man i go long Jehova, i no go long yu. Wok strong long helpim ol man i harim tok bilong yu long kisim pasin bilong laikim tru em.

Yu kisim wok bilong skulim ol man long wanpela bikpela tok. Mipela i bilip tru olsem taim yu mekim wok long “strong God i givim” yu, yu bai inapim wok bilong yu.—1 Pi 4:11.

Mipela ol wanwok bilong yupela,

Gavening Bodi Bilong Ol Witnes Bilong Jehova