LESEN 31
Kingdom Bilong God Em i Wanem Samting?
Kingdom Bilong God em i bikpela astok bilong Baibel. Jehova bai yusim Kingdom bilong mekim ol samting em i tingting pinis long mekim long pastaim long dispela graun. Kingdom em i wanem samting? Olsem wanem yumi save em i mekim wok long nau? Em i mekim pinis wanem ol samting? Na em bai mekim wanem long bihain? Dispela lesen na tupela neks lesen bai bekim ol dispela askim.
1. Kingdom Bilong God em i wanem samting, na husat i stap King bilong en?
Kingdom em i wanpela gavman em Jehova God i kamapim. King bilong en, Jisas Krais, em i mekim wok king long heven. (Matyu 4:17; Jon 18:36) Baibel i tok long Jisas olsem: “Em bai stap King . . . inap oltaim oltaim.” (Luk 1:32, 33) Jisas em i King bilong Kingdom Bilong God, so em bai bosim olgeta man long graun.
2. Husat bai mekim wok king wantaim Jisas?
Jisas wanpela tasol i no inap mekim wok king. Wan wan man na meri bilong ‘olgeta traib, tokples, lain pipol, na kantri bai stap king na bosim graun.’ (Revelesen 5:9, 10) Hamas manmeri bai wok king wantaim Krais? Taim Jisas i kam long graun, planti milion Kristen i kamap disaipel bilong em. Tasol 144,000 tasol bai go long heven bilong wok king wantaim Jisas. (Ritim Revelesen 14:1-4.) Olgeta narapela Kristen bai stap long graun aninit long Kingdom.—Buk Song 37:29.
3. Olsem wanem Kingdom Bilong God i winim ol gavman bilong ol man?
Tru ol lida i traim bes long mekim ol gutpela samting, tasol ol i no gat strong long mekim olgeta samting ol i laik. Bihain ol narapela lida i senisim ol, ol i no mekim ol samting bilong helpim lain bilong ol. Tasol i no gat wanpela man bai senisim Jisas, em King bilong Kingdom Bilong God. God i bin “kamapim wanpela kingdom we i no inap bagarap.” (Daniel 2:44) Jisas bai bosim graun olgeta, na em bai no inap mekim wansait pasin. Em i gat pasin laikim, pasin helpim, pasin i fea, na em bai skulim ol man long mekim wankain pasin long narapela narapela—ol bai mekim pasin laikim, pasin helpim, na pasin i fea.—Ritim Aisaia 11:9.
KISIM SAMPELA SAVE MOA
Skelim wai na Kingdom Bilong God i winim ol gavman bilong ol man.
4. Wanpela strongpela gavman bai bosim graun olgeta
Jisas Krais i gat bikpela strong moa long bosim ol man, winim ol narapela lida long bipo yet na i kam. Ritim Matyu 28:18, na stori long dispela askim:
-
Olsem wanem namba Jisas i holim i winim tru namba bilong ol lida bilong graun?
Ol gavman bilong ol man i save senis senis, na wan wan i save bosim wanpela hap tasol bilong graun. Olsem wanem long Kingdom Bilong God? Ritim Daniel 7:14, na stori long ol dispela askim:
-
Bilong wanem i gutpela olsem Kingdom Bilong God bai “i no inap bagarap”?
-
Bilong wanem i gutpela olsem em bai bosim graun olgeta?
5. I mas i gat senis bilong ol gavman bilong ol man
Wai na Kingdom Bilong God i mas senisim ol gavman bilong ol man? Pilaim VIDIO, na stori long dispela askim.
-
Wanem samting i kamap long wok bos bilong ol man?
Ritim Eklisiastis 8:9, na stori long ol dispela askim:
-
Yu ting Kingdom Bilong God i mas senisim ol gavman bilong ol man? Wai na yu tok olsem?
6. Kingdom Bilong God i gat ol lida em ol i kliagut long yumi
King bilong yumi, Jisas, i bin stap olsem man long graun, olsem na em inap “pilim tru ol samting i save traim yumi.” (Hibru 4:15) Dispela 144,000 man na meri bai wok king wantaim Jisas em Jehova yet i kisim ol namel ‘long olgeta traib, tokples, lain pipol, na olgeta kantri.’—Revelesen 5:9.
-
Bel bilong yu i stap isi taim yu save olsem Jisas na lain i wok king wantaim em ol i bin stap olsem ol man long graun? Bilong wanem?
Jehova i makim ol man na meri bilong kain kain lain na sindaun bilong wok king wantaim Jisas
7. Ol lo bilong Kingdom Bilong God i gutpela moa
Ol gavman i save putim ol lo bilong helpim na lukautim ol manmeri i stap aninit long ol. Kingdom Bilong God tu i gat ol lo bilong ol manmeri i stap aninit long en i mas bihainim. Ritim 1 Korin 6:9-11, na stori long ol dispela askim:
-
Yu ting graun bai stap olsem wanem sapos olgeta man i bihainim ol lo bilong God? a
-
Yu ting i stret Jehova i laik bai ol man i stap aninit long Kingdom i rispektim ol dispela lo? Bilong wanem?
-
Wanem samting i soim olsem ol manmeri i no bin bihainim ol dispela lo, ol inap senisim pasin bilong ol?—Lukim ves 11.
Ol gavman bilong ol man i putim ol lo bilong lukautim na helpim ol manmeri i stap aninit long ol. Kingdom Bilong God i gat ol lo i gutpela moa bilong lukautim na helpim ol man i stap aninit long en
SAPOS WANPELA I ASKIM: “Kingdom Bilong God em i wanem samting?”
-
Bai yu bekim olsem wanem?
OL BIKPELA POIN
Kingdom Bilong God em i wanpela gavman tru i stap long heven na em bai bosim graun olgeta.
Riviu
-
Husat ol bai stap king long Kingdom Bilong God?
-
Olsem wanem Kingdom Bilong God i gutpela moa winim ol gavman bilong ol man?
-
Wanem sampela samting em Jehova i laik ol man i stap aninit long Kingdom i mekim?
MEKIM WOK PAINIMAUT
Skelim tok Jisas i mekim long ples we Kingdom bai stap long en.
“Yu Ting Kingdom Bilong God i Stap Long Bel Bilong Yu?” (Atikol long websait)
Wai na ol Witnes Bilong Jehova i mekim disisen long stap gut long Kingdom Bilong God winim ol gavman bilong ol man?
Skelim tok Baibel i mekim long 144,000 em Jehova i makim bilong wok king wantaim Jisas.
Wanem samting i mekim na wanpela meri i stap long kalabus i bilip olsem God tasol bai stretim olgeta samting long graun?
“How I Found the Answer to Injustice” (Awake!, November 2011)
Ating Yu Bai Laikim Tu
OL ASKIM PLANTI MAN I SAVE MEKIM
Baibel Stadi Kos Em Ol Witnes Bilong Jehova i Save Mekim Em Wanem Samting?
Ol Witnes Bilong Jehova i mekim fri Baibel stadi program, yu ken yusim wanpela trenslesen bilong Baibel em yu yet laikim. Yu ken invaitim famili olgeta bilong yu o ol pren bilong yu long joinim yu long stadi.
