Wanpela man bilong Siera Leon, nem bilong em Dauda, em i stori olsem: “Mi go bikpela long wanpela liklik ples long provins bilong not. Taim mi stap manki yet, wanpela taim famili bilong mi wantaim narapela famili i kros long graun. Tupela famili wantaim i tok, dispela hap graun em i bilong ol. Ol i singautim wanpela glasman i kam bilong stretim kros. Em i givim glas bilong lukim pes long wanpela man na em i karamapim waitpela laplap long dispela man. I no longtaim na dispela man insait long laplap em i kirap long guria na tuhat i kamap. Em i lukluk long glas na em i tok: ‘Mi lukim wanpela lapun i wokabaut i kam! Em i pasim waitpela klos. Em i longpela bun na lapun, na gras bilong em i waitpela; baksait bilong em i krungut liklik.’

“Dispela man i stori long bubu tasol! Nau em i pret nogut tru na em i singaut olsem: ‘Sapos yupela i no bilipim tok bilong mi, yupela yet i kam lukim!’ Tasol mipela olgeta i pret na i no laik lukim! Glasman i kisim wara em i bin tanim ol lip bilong diwai long en na pulimapim long wanpela skin kambang na em i tromoi dispela wara long man. Dispela kain wara bilong ol glasman i mekim na nau dispela man i stap isi.

“Long rot bilong dispela man i holim glas, ‘Bubu’ i tok dispela hap graun em i bilong famili bilong mipela. Em i tokim tumbuna mama bilong mi em i ken wokim gaden long dispela graun na em i no ken pret. Narapela famili i orait long dispela tok na kros i dai.”

 Kain samting olsem i save kamap planti taim long Wes Afrika. Long dispela hap, olsem long planti narapela hap bilong graun, planti milion manmeri i bilip olsem ol man i dai pinis ol i stap long wanpela ples spirit, na ol inap lukim ol samting i kamap long graun na mekim sampela samting long ol man. Tasol tru ol man i dai pinis ol i stap laip yet olsem tewel o spirit o nogat? Sapos nogat, orait husat ol dispela spirit i giamanim ol man na ol man i ting ol i tewel bilong man i dai pinis? Yu mas save long stretpela bekim bilong ol dispela askim. Dispela em i bikpela samting bilong helpim yu long abrusim bagarap na i stap laip.