Tingim dispela: Brian i bel sut sut taim em i lukim tupela wanskul i kam long em. Tupela taim long dispela wik, ol i bin laik pulim em long smok. Dispela em namba 3 taim ol bai mekim olsem.

Fes boi i tok:

Taim em i kolim dispela tok “pren” em i blinkim wansait ai bilong em na rausim wanpela samting long poket na givim long Brian.

Brian i luksave long sigaret i stap namel long tupela pinga bilong dispela boi. Brian i pilim bel sut sut stret.

Sapos yu Brian, bai yu mekim wanem?

Yu ting ol wanskul bilong Brian i save long samting ol i mekim? Yu ting ol i bin mekim ol disisen bilong ol yet? I luk olsem nogat. Pasin bilong ol i soim olsem ol i bin bihainim tasol laik bilong ol arapela. Ol i laik bai ol narapela i laikim ol, olsem na ol i larim ol narapela i kontrolim pasin ol i mekim.

Sapos wankain samting i painim yu, wanem narapela samting yu inap mekim bilong sakim ol wanlain?

1.  

   Baibel i tok: “Man i gat gutpela tingting, em i save olsem, hevi i laik kamap long em na em i abrusim. Tasol man i no gat tingting, em i lukim trabel i stap long rot bilong en, na em i go na bungim na karim hevi.”​—Sindaun 22:3.

   Planti taim, yu bai luksave sapos hevi i laik kamap. Olsem: Sapos yu lukim sampela wanskul i bung antap long rot na ol i wok long smok, yu bai redim tingting, long wanem, yu save long samting ol bai mekim na yu bai redi long sakim ol.

2.  

   Baibel i tok: “Oltaim maus bilong bel bilong yupela i mas i stap stret long ai bilong God.”​—1 Pita 3:16.

   Askim yu yet, ‘Bai mi pilim olsem wanem sapos mi bihainim pasin bilong ol wanlain?’ Tru ol wanskul bai amamas long yu. Tasol bihain bai yu pilim olsem wanem? Yu laik lusim ol pasin tru bilong yu bambai yu ken amamasim ol wanskul?​—Kisim Bek 23:2.

3.  

   Baibel i tok: “Man i gat gutpela tingting i save lukaut gut na abrusim olkain trabel.”​—Sindaun 14:16.

   Sampela taim, yumi mas mekim ol disisen na feisim wanem samting i kamap long ol disisen bilong yumi. Baibel i stori long Josep, Jop, na Jisas em ol man i bin mekim ol gutpela disisen. Na tu, Baibel i stori long Kein, Iso, na Judas, em ol i bin mekim ol rong disisen. Yu bai mekim wanem?

Baibel i tok: “Mekim gutpela pasin.” (Song 37:3) Sapos yu tingim pinis ol hevi bai kamap na yu wokim tingting pinis, em bai isi long yu tokaut stret long disisen bilong yu na dispela bai kamapim gutpela samting.

No ken wari, i no gat wok long yu givim longpela eksplenesen long ol wanskul. Tokaut stret olsem NOGAT na em inap. O bilong kamapim klia olsem yu no inap toktok moa long dispela samting, yu ken tok:

• “Mi no laik!”

• “Mi no save mekim kain samting!”

• “Kamon, yu save pinis olsem mi no inap mekim olsem!”

Bikpela samting em olsem, yu mas tokaut hariap na soim olsem yu bilip long tok bilong yu. Sapos yu mekim olsem, yu bai kirap nogut long lukim olsem hariap tru ol wanlain bai lusim yu na go!

Olsem wanem sapos ol wanlain i tok bilas long yu? Sapos ol i tok, “Yu pret, a?” Yu mas luksave, ol i mekim kain tok bilong pulim yu long bihainim ol. Bai yu mekim wanem? I gat 2-pela samting yu ken mekim.

• Yu ken orait tasol long tok ol i mekim. (Tokim ol: “Yu tok tru, mi pret!” Na tokim ol long risen bilong yu.)

• Yu ken bekim pasin ol i mekim long yu. Tokaut long as na yu no laik smok, na nau traim save bilong ol. (Tokim ol: “Mi ting yu smat na yu no inap smok!”)

Sapos ol wanlain i wok yet long traim yu, lusim ol na go! Sapos yu sanap yet, ol bai putim bikpela presa moa long yu. Taim yu lusim ol na go, yu soim olsem yu no laik ol narapela i senisim pasin bilong yu.

Tru tru, yu no inap hait long ol wanlain i laik pulim yu. Tasol yu ken mekim disisen long ol samting yu laik mekim, tokaut stret long samting yu no inap insait long en, na bosim gut yu yet. Maski wanem samting i kamap, disisen i stap long han bilong yu!​—Josua 24:15.