Jekop i save olsem ol man i mas givim bel olgeta long lotuim Jehova wanpela tasol, maski Jehova i no givim yet lo i tambuim pasin bilong lotuim ol imis. (Ki 20:3-5) Olsem na bihain long Jehova i tokim em long go bek long Betel, Jekop i tokim olgeta manmeri i stap wantaim em long rausim olgeta imis. Jekop i planim olgeta imis, na ol iaring tu, na ol paspas. (St 35:1-4) Yumi ken bilip tru olsem Jehova i amamas long pasin bilong Jekop.

Olsem wanem long nau tu yumi inap givim bel olgeta long lotuim Jehova wanpela tasol? Wanpela bikpela samting yumi mas mekim em olsem, yumi mas sakim olgeta samting i insait long wok bilong lotuim ol imis na wok bilong ol spirit nogut. Dispela i makim tu olsem yumi mas rausim ol samting i insait long wok bilong ol spirit nogut na skelim gut ol amamas yumi kisim. Askim yu yet: ‘Mi save amamas long ritim ol buk o watsim ol muvi i stori long ol vempaia, ol daiman, o ol samting i gat narakain bikpela pawa? O mi kisim amamas long ol samting i stori long mejik, marila posin, na wok sanguma?’ Yumi mas stap longwe long ol samting em Jehova i heitim.—Sg 97:10.

WATSIM VIDIO “SAKIM DEVIL,” NA BEKIM OL DISPELA ASKIM:

• Wanem hevi i painim Palesa em wanpela Baibel sumatin?

• Sapos yu o wanpela yu save long em o Baibel sumatin bilong yu i kisim hevi long wok bilong spirit nogut, bilong wanem i stret long kisim helpim long ol elda?

• Sapos yumi laik Jehova i helpim yumi orait yumi yet i mas mekim wanem?

• Palesa i mekim wanem bilong sakim wok bilong ol spirit nogut?

• Long hap yu stap long en, wanem sampela rot yu ken bihainim long sakim ol wok bilong spirit nogut?