“Mi bin mekim wanem na mi no helpim gut pikinini man bilong mi?” Michael, a bilong Saut Afrika, i bin tingting planti long dispela askim. Em i wok strong long mekim gut wok papa, tasol taim em i tingim bikhet pikinini man bilong em husat i gat 19 krismas, em i save tingting planti olsem em bin mekim gut moa wok papa o nogat.

Tasol Terry husat i stap long Spen, i luk olsem wok papa em i mekim i kamapim gutpela samting. Pikinini man bilong em, Andrew, i tok: “Mi inap tingim ol samting papa i save mekim wantaim mi taim mi liklik—em i save rit long mi, pilai wantaim mi, na kisim mi i go long wanpela hap we mitupela tasol i raun na mekim ol samting wantaim. Na mi amamas long pasin bilong papa long skulim mi.”

I hatwok long mekim gut wok papa. Tasol ol gutpela stiatok bilong Baibel inap helpim yu. Planti papa i luksave olsem taim ol yet na famili bilong ol i bihainim ol savetok i stap long Baibel, dispela i helpim ol. Yumi ken skelim sampela gutpela tok bilong Baibel em inap helpim ol papa.

Olsem wanpela papa, yu inap mekim wanem bilong soim ol pikinini olsem ol i bikpela samting long yu? Tru, i gat planti samting yu bin mekim long ol pikinini bilong yu, olsem lukautim ol long kaikai na haus samting. Yu no inap mekim ol dispela samting sapos ol pikinini i no bikpela samting long yu. Tasol sapos yu no lusim inap taim bilong stap wantaim ol pikinini, bai ol i ting olsem yu tingim moa yet ol narapela samting, olsem wok bilong yu, ol poroman bilong yu o ol narapela samting, na yu no tingim ol tumas.

Wanem taim papa i mas kirap long lusim sampela haptaim wantaim pikinini bilong em? Mama i kirap long pas gut wantaim pikinini taim pikinini i stap yet long bel. Inap olsem 16 wik bihain long mama i kisim bel, bebi i stap yet long bel inap harim toktok. Long dispela taim, papa tu inap kirap long pas gut wantaim pikinini i stap yet long bel. Em i ken harim klok bilong bebi i pairap, pilim em i muv, toktok long en, na singsing long en.

Stiatok Bilong Baibel: Long taim bilong ol man i bin raitim Baibel, ol papa i save insait long wok bilong skulim ol pikinini bilong ol. Long olgeta taim ol papa i mas lusim sampela haptaim bilong stap wantaim ol pikinini bilong ol, dispela i kamap ples klia long tok bilong Baibel long Lo 6:6, 7, em i tok: “Oltaim yupela i mas tingim ol dispela lo nau mi givim long yupela. Na yupela i mas lainim ol pikinini bilong yupela long ol dispela lo. Na tokim ol long taim yupela i stap long haus na long taim yupela i wokabaut long rot, na long taim yupela i malolo na long taim yupela i wok.”

Bilong toktok gut wantaim ol pikinini, yu mas putim gut yau. Yu mas kisim pasin bilong putim gut yau na no ken hariap long kros.

Sapos ol pikinini bilong yu i ting olsem yu bai belhat kwik na skelim ol, ol bai no gat laik long kamapim long yu ol tingting i stap long bel bilong ol. Tasol sapos yu stap isi na putim gut yau, yu bai soim olsem yu tingim ol tru. Ating bai ol i amamas long kamapim long yu ol tingting we i bikpela samting long ol na ol samting ol i pilim.

Stiatok Bilong Baibel: Ol savetingting i stap long Baibel i bin helpim sindaun bilong planti man. Olsem, Baibel i tok: “Olgeta man i mas putim yau kwik long harim tok, na ol i no ken hariap long mekim toktok. Na ol i no ken belhat hariap.” (Jems 1:19) Ol papa husat i bihainim dispela stiatok bilong Baibel ol inap long toktok gut wantaim ol pikinini bilong ol.

Maski yu belhat o kros, skultok yu givim bilong stretim ol i mas kamapim olsem yu laik bai dispela tok i helpim ol inap oltaim bihain. Wok bilong stretim na skulim ol pikinini i makim tu pasin bilong givim edvais, skulim, stretim, na tu, givim panismen sapos yu mas mekim olsem.

Na tu, sapos planti taim papa i mekim tok amamas long ol pikinini, bai ol i no bel hevi taim em i stretim ol. Wanpela savetok bilong bipo i tok: “Sapos man i autim klia tru wanpela gutpela tingting, orait tok bilong en i olsem gutpela piksa ol i wokim long gol na bilasim long silva.” (Sindaun 25:11) Tok amamas i save helpim ol pikinini long wok strong long kisim ol gutpela pasin. Ol pikinini i kamap gutpela man o meri taim ol i luksave olsem papamama i tingim na laikim tru ol. Papa husat i save mekim tok amamas long ol pikinini long olgeta taim em bai helpim ol long kisim pasin bilong strongim bel na kirapim ol long no ken givap long mekim ol pasin i stret.

Stiatok Bilong Baibel: “Yupela ol papa, yupela i no ken sikirapim bel bilong ol pikinini bilong yupela, nogut bel bilong ol i bagarap.”—Kolosi 3:21.

Pasin papa i mekim olsem man marit, dispela inap mekim sampela samting long ol pikinini. Wanpela lain saveman bilong ol pikinini, i tok: “Wanpela gutpela samting em papa inap mekim long ol pikinini em long rispektim mama bilong ol. . . . Papa na mama husat i save rispek long narapela narapela, pasin bilong ol i soim olsem ol i laik bai ol pikinini i stap amamas na pilim olsem papamama i laikim ol.”—The Importance of Fathers in the Healthy Development of Children. b

Stiatok Bilong Baibel: “Ol maritman, yupela i mas laikim yet ol meri bilong yupela . . . Yupela olgeta wan wan i mas laikim ol meri bilong yupela olsem yupela i save laikim yupela yet.”—Efesus 5:25, 33.

Ol papa husat i laikim tru God ol inap givim wanpela gutpela samting tru long ol pikinini bilong ol—em pasin bilong pas gut wantaim Papa bilong ol long heven.

Inap planti yia, Antonio, em wanpela Witnes Bilong Jehova, i bin wok strong tru long mekim bikpela long 6-pela pikinini bilong em, bihain em i kisim pas long wanpela pikinini meri bilong em, pikinini i tok: “Yes Papa, mi laik tok tenkyu long yu bin mekim bikpela long mi na helpim mi long laikim God Jehova, laikim ol narapela, na laikim mi yet, olsem na mi kamap gutpela pikinini na mi pas gut wantaim Jehova. Yu soim mi olsem yu laikim Jehova na yu tingim mi tru. Tenkyu Papa long putim Jehova i stap namba 1 long laip bilong yu na long mekim gut long ol pikinini bilong yu olsem presen i kam long God!”

Stiatok Bilong Baibel: “Yupela i mas laikim tumas God, Bikpela bilong yumi. Yupela i mas laikim em tru long bel bilong yupela na long tingting bilong yupela na long strong bilong yupela. Oltaim yupela i mas tingim ol dispela lo nau mi givim long yupela.”—Lo 6:5, 6.

Em i klia tru olsem i gat planti samting i insait long dispela wok papa na i no dispela 5-pela poin tasol. Maski yu traim bes long stap gutpela papa, wok yu mekim olsem papa bai i no kamap gutpela olgeta. Tasol taim yu bihainim ol dispela stiatok na laikim ol pikinini na givim samting ol i nidim, yu inap tru long mekim gut wok papa. c