“Yu no stap longwe long Kingdom bilong God.”—Mak 12:34.

TOK OL MAN I MEKIM

Planti man i ting Kingdom Bilong God i makim olsem “God i bosim bel na tingting na laip bilong man,” dispela em tok wanpela bikpela lotu i skulim ol man long en.

TOK BAIBEL I MEKIM

Kingdom Bilong God em wanpela gavman i stap tru, na em i no wanpela tok piksa i makim olsem long bel man i aninit long God. Kingdom Bilong God bai bosim graun olgeta.—Song 72:8; Daniel 7:14.

Tasol olsem wanem long dispela tok bilong Jisas olsem “kingdom bilong God em i stap insait long yupela”? (Luk 17:21, King Jems Nupela Testamen) Dispela tok bilong Jisas i no makim olsem Kingdom i stap insait long bel bilong ol man. Bilong wanem? Bikos long dispela taim ol man husat i bin putim yau long tok bilong Jisas em ol Farisi. Jisas i tok ol bai i no inap go insait long Kingdom bikos ol i no save lotu tru long God na ol i man bilong tupela maus, olsem na God i no orait long ol. (Matyu 23:13) Tasol i stret Jisas i tok Kingdom Bilong God “i stap insait long yupela” o olsem Nupela Taim Baibel i tok “i stap namel long yupela.” Bilong wanem? Bikos em yet em King bilong dispela Kingdom na em i sanap i stap long ai bilong ol.—Luk 17:21.

“Kingdom bilong yu i mas i kam. Laik bilong yu i mas kamap long graun olsem em i save kamap long heven.”—Matyu 6:10.

TOK BAIBEL I MEKIM

Dispela Kingdom em wanpela gavman tru em God i bin kamapim na Jisas Krais i King bilong en. (Matyu 28:18; 1 Timoti 6:14, 15) Wok bilong en em bilong kamapim laik bilong God long heven na long graun. (Matyu 6:10) Olsem na long rot bilong Kingdom bilong em, God bai pinisim ol hevi bilong ol man. Dispela Kingdom bai mekim ol samting em ol gavman bilong ol man i no inap mekim.

Taim Kingdom Bilong God i bosim graun, olgeta manmeri bai stap bel isi, ol bai i no pret long wanpela samting, na ol bai sindaun gut wantaim long Paradais long graun. (Song 46:9; Aisaia 35:1; Maika 4:4) I no gat wanpela man bai sik o dai na olkain sik bai pinis olgeta. (Aisaia 33:24; Revelesen 21:4) Na tu, ol lapun bai kamap yangpela gen. Baibel i tok: “Orait bodi bilong dispela man bai i kamap gutpela na strongpela gen, wankain olsem em i bin i stap long taim em i yangpela man.”—Jop 33:25.

SAMTING YU KEN MEKIM

Maski yu bilong wanem ples o yu kamap bikpela long wanem kantri, yu inap stap aninit long Kingdom Bilong God sapos yu mekim ol samting God i laik yu mas mekim. Baibel i tok: “God i save mekim wankain pasin long olgeta man. Na em i save laikim man husat i save pret long em na bihainim stretpela pasin maski em i bilong wanem lain.”—Aposel 10:34, 35.

“God bai i kirapim wanpela kingdom na dispela kingdom bai i stap oltaim oltaim. Ol arapela king i no inap daunim kingdom bilong God.”—Daniel 2:44.

TOK OL MAN I MEKIM

Sampela man i ting olsem ol man bai kamapim Kingdom Bilong God long graun long rot bilong helpim ol narapela long kisim wankain bilip olsem bilong ol o ol bai wok bung wantaim bilong bringim bel isi na gutpela sindaun.

TOK BAIBEL I MEKIM

God i bin kamapim dispela Kingdom na i no ol man bilong graun. (Daniel 2:44) Taim God i kamapim pinis dispela Kingdom em i tok: “Mi makim pinis dispela man bilong i stap king.” (Song 2:6) Ol man i no kamapim Kingdom Bilong God na ol i no inap bagarapim wok bilong dispela Kingdom, long wanem, dispela Kingdom bai i stap long heven na bosim graun.—Matyu 4:17.

BILONG WANEM YU MAS TINGIM DISPELA?

Yumi gat laik long lukim ol lain man i stap bel isi na i stap wanbel wantaim. Yu inap lusim olgeta taim na strong bilong yu long kamapim kain sindaun, tasol yu bai bel hevi taim yu lukim olsem hatwok bilong yu i lus nating. Taim yu save olsem strong bilong God i as bilong Kingdom bilong em, dispela bai helpim yu long mekim ol gutpela wok na stap aninit long dispela Kingdom.