Yu lukim benk stetmen na yu luksave olsem yu no gat mani long akaun. Yu marit inap sotpela taim tasol na i hatwok long seivim mani. Ating bai yu tok em asua bilong poroman marit. Tasol i gutpela yutupela wantaim i skelim gut olsem wanem yupela inap yusim gut mani. a

Mekim sampela senis. Sapos yu stap wantaim papamama paslain long yu marit, ating pasin bilong baim wara na pawa samting, na pasin bilong helpim narapela narapela, em ol samting yu mas lain long en. Na tu, ating yu na poroman marit i gat narapela narapela tingting long pasin bilong yusim mani. Olsem, wanpela i gat pasin bilong tromoi mani, na narapela i gat pasin bilong seivim mani. Olsem na sampela haptaim i mas lus na bai tupela marit i ken wanbel long wanem rot i gutpela long basetim mani.

Surikim taim bilong baim ol bil. Jim em wanpela bisnisman i tok taim em i marit nupela, em i no save long pasin bilong baim ol bil long taim stret. Em i tok: “Mi save surikim taim bilong baim ol bil, olsem na mi na meri bilong mi i tromoi planti tausen dola long baim ol bil i leit pinis. Dispela i mekim na mipela i no gat mani!”

Yusim benk kat. Em i isi tru long tromoi planti mani sapos yu save yusim benk kat samting o baim ol samting long rot bilong Intenet. Na tu, pasin bilong kisim dinau mani inap mekim na ol nupela marit inap tromoi planti mani tru.

Sapos tupela marit i gat hevi bilong mani, dispela inap putim bikpela presa long ol. Buk Fighting for Your Marriage i tok: “Planti marit i tok hevi bilong mani em wanpela bikpela hevi maski ol i gat mani o nogat. Em as na planti taim ol marit i save bel hevi na kros pait.”

Redi long helpim poroman marit. No ken sutim tok long poroman marit, mobeta yutupela i toktok gut wantaim long rot bilong seivim mani. Pasim tok olsem yutupela i no inap larim hevi bilong mani i bagarapim pasin bilong yutupela long pas gut wantaim.—Stiatok bilong Baibel: Efesus 4:32.

Wokim Baset. Raitim hamas mani yupela i tromoi insait long wanpela mun, maski em i liklik mani. Dispela bai helpim yupela long luksave long ol samting yupela i baim na ol samting yupela i no nidim.

Wokim lista bilong ol samting yu nidim, olsem kaikai, klos, rent na ol bil, na rejistresen bilong kar samting. Tingim hamas mani yu bai tromoi insait long wanpela mun long baim ol samting, na wokim lista.—Stiatok bilong Baibel: Luk 14:28.

Basetim hamas mani yu bai tromoi long olgeta mun long baim kaikai, rent, petrol, na ol kain samting olsem. Sampela man i mekim olsem long rot bilong putim mani insait long ol envelop em ol i makim bilong baim samting. b Sapos mani long wanpela envelop i wok long pinis, ol bai stop long baim dispela samting o ol bai kisim mani long narapela envelop na putim long envelop we i no gat mani.

Holim stretpela tingting long ol samting yu gat pinis. Maski man i baim ol nupela samting, dispela i no makim olsem em i stap amamas. Jisas i tok: “Maski man i gat planti samting, em i no kisim laip long ol dispela samting em i holim.” (Luk 12:15) Pasin bilong yu long yusim gut mani inap kamapim klia olsem yu bilip long tok bilong Jisas.—Stiatok bilong Baibel: 1 Timoti 6:8.

Mekim sampela senis. Aaron husat i marit inap 2-pela yia i tok: “Pastaim bai yu amamas long tromoi mani long kebol TV na pasin bilong kaikai long restron samting, tasol bihain bai yu luksave olsem yu gat hevi bilong mani. Mipela i luksave olsem mipela i mas lusim sampela amamas bilong seivim mani.”