MI BON long Szerencs siti, na mi go bikpela long taun Tiszaladány long not is bilong Hangari. Long Jun 1991, mi na sampela pren i go waswas long wara Tisza. Mi ting olsem wara i dip, olsem na mi kalap i go insait long wara. Tasol mi popaia tru, wara i no dip! Mi brukim bun bilong baksait bilong mi na tripela bun long nek. Pren bilong mi i lukim olsem mi no muv liklik, olsem na isi isi em i apim mi kam antap long wara na bai mi no ken draun.

Mi inap harim ol man i toktok na mi tingting olsem wanpela bikpela hevi i mas painim mi. Wanpela man i ringim ol imejensi lain, na ol i salim wanpela helikopta i kam na kisim mi i go long haus sik. Ol dokta i mekim operesen long stretim bun bilong baksait bilong mi. Bihain, ol i salim mi i go long biktaun Budapest, na mi go stap long wanpela haus sik bilong helpim ol man em bun bilong ol i bruk. Inap 3-pela mun olgeta, mi slip tasol long bet. Mi inap muvim het bilong mi, tasol mi no inap long muvim ol narapela hap bilong bodi. Maski long dispela taim mi gat 20 krismas tasol, mi nidim ol arapela bilong helpim mi. Mi pilim olsem laip bilong mi i nogat as bilong en, na mi ting olsem i gutpela mi dai.

Taim ol dokta i tok orait long mi ken i go bek long haus, papamama bilong mi i kisim trening, olsem na ol inap long lukautim mi. Tasol ol i mas mekim bikpela wok tru, olsem na ol i save pilim taiet, na tu, ol i wari na tingting planti long mi. Ol dispela samting i mekim na bihain long wanpela yia mi kisim sik dipresen, em sik bilong tingting planti. Long dispela taim ol dokta bilong sik dipresen i helpim mi long kisim stretpela tingting long hevi bilong mi.

Na tu, mi tingting planti olsem laip bilong mi i gat as bilong en? Bilong wanem dispela hevi i kamap long mi? Mi ritim ol nius na buk long painim bekim bilong ol dispela askim. Na mi kirap long ritim Baibel, tasol mi no kliagut long ol tok bilong en. So mi stop long ritim Baibel. Na tu, mi bin go toktok wantaim wanpela pris, tasol em i no bekim ol askim bilong mi.

Long 1994, tupela Witnes Bilong Jehova i kam lukim papa bilong mi, olsem na em i askim ol long stori wantaim mi. Ol i tokim mi long ol samting God i tingting pinis long mekim, olsem em bai mekim graun i kamap wanpela ples paradais, na tu, em bai pinisim sik na olgeta pen na hevi. Mi amamas tru long ol tok mi harim, tasol mi gat tupela tingting olsem ol dispela  samting bai kamap tru o nogat. Maski i olsem, mi orait long kisim 2-pela buk bilong ol na ritim. Bihain long mi ritim ol dispela buk, mi tok orait long ol Witnes i ken stadi long Baibel wantaim mi. Na tu, ol i kirapim mi long beten.

Long rot bilong stadi, ol Witnes i yusim Baibel long bekim planti askim bilong mi. Na tu, mi bilip olsem God i pilim tru hevi bilong mi. Long Septemba 13, 1997, tupela yia bihain long mi stadi long Baibel, mi kisim baptais long haus bilong mi long bathtub, em tab bilong waswas. Dispela de em wanpela spesel de long laip bilong mi.

Long 2007, mi go stap long Budapest long wanpela haus we ol i save lukautim ol man i gat bagarap long bodi. Long dispela hap, rot i op long mi inap stori long ol narapela long ol gutpela samting mi bin kisim save long en. Long taim bilong san, mi inap go ausait long haus na bai mi ken toktok wantaim ol man. Mi amamas tru olsem mi inap mekim olsem, long wanem, mi gat wanpela wilsia i gat moto long en na mi save kontrolim long wasket bilong mi.

Wanpela famili long kongrigesen bilong mi i helpim mi long baim wanpela liklik kompiuta ol i kolim laptop, na mi inap operetim long rot bilong muvim het. Dispela laptop i helpim mi long ringim ol man long rot bilong Intenet, na tu, mi save raitim ol pas long ol man em ol bratasista i go long haus bilong ol tasol ol i no bungim ol. Dispela i helpim pasin bilong mi long toktok wantaim ol narapela, na tu, mi no tingim tumas sik bilong mi.

Na tu, nau mi inap long go long ol miting Kristen. Taim mi go long Haus Kingdom, ol brata i save apim wilsia bilong mi i go long rum antap we mipela i save mekim ol miting long en. Long ol hap bilong miting we odiens i ken bekim tok, brata husat i sindaun klostu long mi i save apim han na bai ol inap makim mi. Na em i save holim Baibel na ol buk samting na bai mi inap lukim taim mi bekim tok.

Oltaim mi save pilim pen long bodi bilong mi na ol narapela i mas helpim mi long mekim ol samting. Olsem na sampela taim mi save bel hevi. Tasol bel bilong mi i stap isi, long wanem, mi stap pren bilong God Jehova na mi save olsem em i save harim ol beten bilong mi. Long olgeta de mi save ritim Baibel, na tu, ol wanlotu bilong mi i save strongim mi. Ol i stap olsem ol gutpela pren, na ol i save beten long God i ken strongim mi na bai bel na tingting bilong mi i ken stap isi.

Jehova i helpim mi long taim mi nidim stret helpim. Na tu, em i helpim mi long wetim nupela taim long bihain we helt bilong mi bai gutpela. Olsem na mi luk fowed long taim we mi inap “wokabaut, kalap kalap, na litimapim nem bilong God” long gutpela pasin na pasin laikim bilong em.—Aposel 3:6-9.