OL RIPOT i soim olsem long graun olgeta, winim 700 milion man em ol i gat 15 krismas na i go antap i no save long rit na rait. Olsem na ol i no inap long kisim save long planti samting, na dispela i makim tu tok i tru na ol stretpela lo bilong Baibel em “ol i bin raitim bilong skulim yumi.” (Rom 15:4) Long sampela kantri, ol Witnes Bilong Jehova i mekim ol fri Baibel stadi kos wantaim ol man, na long dispela rot ol i skulim ol long rit na rait. Olsem wanem? Dispela kos i helpim ol man?

Yumi ken stori long wok bilong ol Witnes Bilong Jehova long Meksiko, em kantri we klostu olgeta man i mekim tok Spen. Kirap long yia 1946, ol Witnes i skulim winim 152,000 sumatin bilong Baibel long rit na rait, na bihain planti bilong ol dispela sumatin i skulim ol narapela. Gavman long Meksiko i luksave long gutpela wok ol Witnes i mekim, na ol i raitim planti pas bilong tok tenkyu long ol. Long wanpela pas bilong ol, ol i tok:  “Lain General Board of Education i amamas na i laik tok tenkyu long gutpela wok bilong yupela long helpim Adult Education Program.”

Long rot bilong dispela program ol yangpela na ol lapun i kisim helpim. Olsem, Josefina i gat 101 krismas taim em i putim nem long insait long program bilong rit na rait. Na insait long 2-pela yia em i pinisim dispela kos!

Maski planti man long Meksiko i mekim tok Spen, ol Witnes i no skulim ol man long rit na rait long tok Spen tasol, nogat. Long yia 2013, ol Baibel stadi kos i helpim 8-pela narapela narapela asples lain long Meksiko long lain long rit na rait long tokples bilong ol.

Tru tumas, taim yu save long rit na rait, nau rot i op long yu inap kisim save long planti samting. Na tu, pasin bilong rit na rait i helpim olgeta kain man long ritim Baibel. Na dispela i bikpela samting, long wanem, Baibel em buk i kam long God na em inap long helpim ol man long sakim ol tingting kranki na ol pasin nogut, na lusim olkain bilip giaman.—Jon 8:32.