OLSEM WANEM? Yu no bilip moa long ol lotu? Planti man i holim wankain tingting olsem bilong yu. Long planti kantri, namba bilong ol man husat i tok ol i no bilong wanpela lotu i go antap tru. Na dispela i soim olsem planti i no bilip moa long ol lotu. Mep i soim sampela bilong ol dispela kantri.

I gat planti risen na ol man i no bilip long ol lotu. Olsem, ol lotu i orait long pasin bilong pait na bagarapim man, ol bikman bilong lotu i mekim pasin pamuk, na i gat planti arapela risen. Yumi ken stori long sampela bilong ol dispela risen.

• Laikim tumas mani kago: Buk Global Index of Religion and Atheism i tok: “Taim man i kisim planti mani kago samting, em i no tingting moa long bung wantaim wanpela lotu.” Dispela em wanpela bikpela hevi, long wanem, long planti kantri ol man i gat gutpela sindaun na planti mani kago. John V. C. Nye em profesa bilong ekonomiks i tok, long sampela hap ol man i “gat gutpela sindaun winim ol king husat i stap 200 yia i go pinis.”

  BAIBEL I TOK: Baibel i tok profet olsem “long taim bilong las de,” ol man bai laikim tumas mani na kain kain amamas, na ol bai i no laikim God na ol narapela. (2 Timoti 3:1-5) Wanpela man bilong raitim Baibel i luksave long ol hevi em pasin bilong laikim tumas mani inap kamapim. Olsem na em i tok long God Jehova olsem: “Yu no ken larim mi i kamap maniman o rabisman. Nogat. . . . Nogut mi gat planti samting tumas na mi givim baksait long yu.”—Sindaun 30:8, 9.

• Pasin na bilip bilong ol lotu: Planti man, moa yet ol yangpela i ting lotu i no inap long helpim i stap bilong yumi. Ol narapela i ting ol lotu i save mekim pasin giaman. Tim Maguire, em niusman bilong lain Humanist Society Scotland i tok: “Inap planti handret yia ol bikman bilong lotu i no bihainim stretpela pasin, olsem na planti man i givim baksait long ol lotu.”

  BAIBEL I TOK: Jisas Krais i tok lukaut long ol giaman tisa olsem: “Kaikai ol i kamapim bai helpim yupela long luksave long ol. . . . Olgeta gutpela diwai i save karim gutpela kaikai na olgeta diwai nogut i save karim kaikai nogut.” (Matyu 7:15-18) Dispela tok “kaikai nogut” i makim pasin bilong insait long ol wok politik, na orait long ol pasin em God i no laikim, olsem man i maritim man o meri i maritim meri. (Jon 15:19; Rom 1:25-27) Na tu, ol i bihainim pasin bilong ol tumbuna na ol i sakim ol stretpela lo bilong Baibel. (Matyu 15:3, 9) Jisas i tok: “Givim kaikai long ol liklik sipsip bilong mi.” (Jon 21:17) Tasol long nau, ol lotu i no skulim ol man long tok bilong Baibel.

• Lotu na mani: Lain Pew Research Center i tok, planti man i ting ol lotu i tingting tasol long kisim mani. Na tu, sampela bikman bilong lotu i gat gutpela sindaun winim ol narapela wanlotu bilong ol. Olsem, long wanpela biktaun long Jemani, planti  man husat i save go long lotu i no inap baim ol samting ol i nidim olsem kaikai na klos samting. Tasol bisop i gat gutpela sindaun, olsem na ol man i sutim tok long en. Dispela kain pasin i mekim na planti Katolik i bel hevi. Na tu, wanpela ripot long nius GEO i tok, long Naijiria “inap 100 milion man i save kisim pe inap olsem 1 dola bilong Yurop long olgeta de, tasol ol pasto bilong ol i gat planti mani na gutpela sindaun.”

  BAIBEL I TOK: Pol em man bilong raitim Baibel i tok: “Mipela i no mekim wok bisnis long tok bilong God.” (2 Korin 2:17) Maski Pol i wanpela wokman long kongrigesen Kristen long taim bilong ol aposel, planti taim em i mekim wok bilong lukautim em yet na bai em i no ken givim hevi long ol narapela. (Aposel 20:34) Pasin bilong em i soim olsem em i bihainim tok bilong Jisas. Em i tok: “Yupela i kisim fri, olsem na yupela i mas givim fri.”—Matyu 10:7, 8.

Ol Witnes Bilong Jehova i bihainim dispela stiatok na ol i no save salim ol buk na nius bilong ol. Na tu, ol i no makim pe bilong skulim ol man long Baibel. Na long ol Kristen miting bilong ol, ol i no save salim plet o makim hamas mani man i mas givim, nogat. Ol man yet i save givim donesen long laik bilong ol bilong helpim wok bilong ol Witnes.—Matyu 6:2, 3.

Inap planti yia nau ol man i ting ol lotu inap long helpim ol. Tasol long rot bilong Baibel, God i tokaut long dispela samting long bipo yet. God i tok piksa long olgeta lotu giaman i olsem wanpela pamukmeri, em Baibel i kolim olsem “Bikpela Babilon.”—Revelesen 17:1, 5.

Dispela tok piksa i stret, long wanem, ol lotu giaman i tok ol i stap gut long God, tasol ol i wok bung wantaim ol bikman bilong graun na bai ol i ken kisim mani na biknem. Long Revelesen 18:9, Baibel i tok: “Ol king bilong graun i bin mekim pasin pamuk wantaim em.” I stret ol i kolim dispela tok “Babilon,” long wanem, planti lotu i skulim ol man long ol pasin na bilip giaman olsem, god triwan, yumi gat tewel i no save dai, na wok bilong ol spirit nogut. Ol man long Babilon bilong bipo tu i insait tru long wok bilong ol spirit nogut na ol i bihainim ol bilip giaman. a—Aisaia 47:1, 8-11.

Taim wara Yufretis i “drai,” ami bilong Midia na Persia i bihainim rot bilong dispela wara na kam insait long strongpela taun Babilon na ol i daunim na bagarapim dispela taun. (Jeremaia 50:1, 2, 38) Ol i mekim olsem insait long wanpela nait tasol!—Daniel 5:7, 28, 30.

Bikpela Babilon i “sindaun antap long planti wara.” Baibel i tok dispela i makim “ol manmeri bilong olgeta lain, na ol bikpela lain manmeri,” em planti milion man husat i sapotim lotu giaman. (Revelesen 17:1, 15) Baibel i tok profet olsem ol dispela wara bai drai, na Bikpela Babilon bai bagarap wantu tasol. Na dispela i makim olgeta lotu giaman long nau. (Revelesen 16:12; 18:8) Tasol husat bai bagarapim olgeta lotu giaman? Ol gavman husat i wok bung wantaim Bikpela Babilon bai  birua na bagarapim em, olsem ol bai kaikai mit bilong en.—Revelesen 17:16, 17. b

Klostu nau Bikpela Babilon bai bagarap, olsem na God i tok lukaut olsem: “Ol manmeri bilong mi, sapos yupela i no laik poroman wantaim em long ol sin bilong en, na sapos yupela i no laik kisim hap bilong ol pe nogut bilong en, orait yupela i mas lusim dispela ples na kam ausait.” (Revelesen 18:4) Tingim, 2-pela taim dispela ves i kolim dispela tok “sapos.” Olsem na God i tok lukaut long ol man husat i tingting planti, long wanem, ol lotu i skulim ol long ol bilip giaman, na ol i laik bai God i orait long ol. Em ol man olsem Gaffar na Hediye em yumi stori long ol long kirap bilong atikol.

Paslain long Gaffar i stadi long Baibel, em i ting ol man i bihainim tok bilong God, long wanem, ol i pret long en. Gaffar i tok: “Mi amamas tru long kisim save olsem Jehova em God i gat pasin laikim, na em i laik bai yumi bihainim tok bilong em, long wanem, yumi laikim em.” (1 Jon 4:8; 5:3) Na tu, Hediye i stap bel isi taim em i kisim save olsem em i no laik bilong God long em i stap olsem pikinini i no gat papamama, na God i no makim ol dispela samting long kamap long em. Tok bilong Baibel long Jems 1:13 i mekim gut bel bilong en. Dispela skripsa i tok, God i no save traim ol man long mekim pasin nogut. Hediye na Gaffar i bihainim tok bilong Baibel na ol i ranawe lusim “Babilon.”—Jon 17:17.

Taim Bikpela Babilon i bagarap, ol man husat i harim tok na lusim dispela ples bai i stap gut na ol bai “lotuim [Papa] long spirit na long pasin i tru.” (Jon 4:23) Ol i bilip na wet long lukim dispela taim we “olgeta samting long graun bai i save tru long Bikpela. Dispela save bai inapim olgeta hap graun olsem solwara i inapim mak bilong en olgeta.”—Aisaia 11:9.

Tru tumas, God “i no inap giaman,” olsem na em bai bagarapim olgeta lotu giaman na ol bilip na pasin nogut bilong ol tu bai pinis. (Taitus 1:2) Tasol long olgeta hap bilong graun, ol man bai kisim save long lotu i tru na ol bai i stap oltaim!