Yumi amamas olsem long rot bilong teknoloji, yumi inap long painim planti pren winim olgeta arapela taim bipo. Tasol ating yu no save gut long ol dispela pren. Wanpela yangpela man i gat 24 krismas i tok: “Mi pilim olsem pasin pren bilong mipela i bilong sotpela taim. Tasol papa bilong mi i gat ol pren em ol i pas gut wantaim inap planti yia!”

Long nau, wai na i hatwok long painim ol gutpela pren em yu inap pas gut wantaim inap longpela taim?

Teknoloji i no helpim ol man long painim ol gutpela pren. Ol man i save stap pren bilong ol arapela long rot bilong ol sosel netwok, salim e-mail na teks mesis samting maski ol i no bungim narapela narapela. Long nau, ol man i no save bung na toktok wantaim, nogat. Planti i salim mesis long mobail fon o toktok long rot bilong ol sosel netwok samting. Buk Artificial Maturity i tok: “Ol man i no save bung moa na toktok. Ol sumatin i lusim bikpela haptaim long yusim mobail fon na Intenet samting, na wan wan taim tasol ol i bung wantaim ol pren bilong ol.”

Sampela taim, teknoloji i mekim na yumi ting yumi pas gut wantaim narapela. Brian * i gat 22 krismas i tok: “Mi luksave olsem oltaim mi salim teks mesis long ol pren bilong mi long painimaut sapos ol i stap orait. Tasol bihain mi stop long mekim olsem na bai mi ken save husat i tingim mi na salim mesis. Sampela tasol i tingim mi. Nau mi luksave olsem sampela pren em mi tingim olsem ol gutpela pren, ol i no pren tru bilong mi.”

Long rot bilong sosel netwok na teks mesis, yu inap toktok wantaim ol pren bilong yu. Na tu, taim yu bung na toktok wantaim ol, dispela bai strongim pasin pren bilong yupela. Planti taim, ol sosel netwok i helpim yu long save long ol narapela, tasol yupela i no stap gutpela pren.

Gutpela pren i save mekim wanem. Baibel i tok ol gutpela pren i save “pas gut na i wanbel. Pasin bilong tupela i winim pasin namel long tupela brata.” (Sindaun 18:24) Olsem wanem? Yu laik painim kain pren olsem? Yu dispela kain pren? Bilong bekim ol dispela askim, raitim 3-pela pasin em yu laik bai pren bilong yu i gat. Bihain, raitim 3-pela pasin yu save mekim taim yu stap wantaim ol pren bilong yu. Askim yu yet: ‘Ol pren bilong mi long ol sosel netwok i save kamapim ol dispela pasin em mi laik bai ol pren bilong mi i gat? Ol pren bilong mi bai stori long wanem ol pasin bilong mi?’ —Stiatok bilong Baibel: Filipai 2:4.

Makim wanem ol samting i bikpela samting. Planti taim ol pren bilong yu long sosel netwok i gat wankain laik olsem yu. Maski i olsem, em i bikpela samting long yupela i gat ol wankain pasin, na i no ol wankain laik. Leanne i gat 21 krismas i tok: “Mi no gat planti pren, tasol ol pren mi gat i save helpim mi long kamapim ol gutpela pasin.”—Stiatok bilong Baibel: Sindaun 13:20.

Bung na toktok wantaim ol arapela. Em i bikpela samting long bung na toktok wantaim ol narapela. Long wanem, yu inap lukim pes na harim krai bilong nek bilong ol, na tu, yu inap lukim pasin bilong ol long wokim han. —Stiatok bilong Baibel: 1 Tesalonaika 2:17.

Raitim pas. Ol man i ting pasin bilong raitim pas em tingting bilong bipo. Tasol taim yu raitim pas, yu soim narapela olsem yu tingim em. Long nau, ol man i bisi tru long ol narapela wok na ol i nogat taim long mekim olsem. Long buk Alone Together, Sherry Turkle i stori long wanpela yangpela man i no bin kisim pas long ol pren o wanfamili long laip olgeta bilong en. Dispela yangpela i stori long pasin bilong ol man long raitim pas na em i tok: “Maski mi no stap long dispela taim bipo, mi ting em bai gutpela sapos dispela pasin i stap yet long nau.” Olsem wanem? Yu inap raitim ol pas bilong painim ol nupela pren?

Poin em olsem: Bilong i stap gutpela pren, yu mas toktok long rot bilong salim teks mesis na e-mail samting, tasol i gat ol narapela samting tu em yu mas mekim. Yupela i mas i gat pasin laikim, sori, i no les kwik na fogivim ol narapela. Ol dispela pasin bai strongim pasin pren bilong yupela. Tasol yu no inap long kamapim ol dispela pasin taim yu toktok wantaim pren bilong yu long rot bilong ol sosel netwok.