TAIM wanpela i givim gutpela smail long yu, yu save mekim wanem? Ating bai yu amamas na smail long em. Yes, sapos yu amamas na smail long ol pren bilong yu o long ol man em yu no save long en, ol inap pilim tru na ol tu i smail. Wanpela meri nem bilong en Magdalena i tok: “Georg, em man bilong mi i dai pinis, em i man bilong smail. Taim mi lukluk long em, bel bilong mi i stap isi na mi save olsem em bai lukautim mi.”

Taim yu amamas na smail, dispela i soim olsem wanpela gutpela samting i kamap na yu stap amamas. Wanpela atikol bilong nius Observer bilong lain Association for Psychological Science i tok: “Man i kisim pasin bilong smail . . . long taim em i bon.” Dispela atikol i tok tu olsem ol nupela bebi inap “pilim olsem yu laikim ol long taim yu smail. Ol man inap kisim sampela save long yu taim ol i lukim yu i smail, na tu, smail bilong yu inap helpim ol long tingim pasin ol bai mekim.”

Ol saveman bilong Harvard University long Amerika i mekim wok painimaut long sampela lapun long tingting bilong ol long taim ol i lukim ol man i save lukautim ol i smail. Ol saveman i tok taim ol man i lukautim ol i smail, “dispela i soim olsem ol i tingim ol, ol i gat laik tru long helpim ol, na ol i pilim tingting bilong ol.” Em risen na ol lapun i gat gutpela helt na ol i stap amamas. Tasol taim ol man i lukautim ol i no tingim ol na ol i no toktok long ol, ol dispela lapun i save sik na ol i no gat strong long skin.

 Taim yu smail dispela i helpim yu yet tu. Ol wok painimaut i soim olsem taim yu smail, yu pilim olsem yu inap mekim gut ol wok, bai yu stap amamas, na dispela inap daunim presa. Na sapos yu no smail, yu bai ting olsem yu no inap mekim gut wok na yu pilim presa.

Magdalena, em yumi stori long en long pastaim, em wanpela Witnes Bilong Jehova long taim bilong Wol Woa 2. Ol i salim em na sampela long famili bilong em i go kalabus long Ravensbrück long Jemani. Ol i salim ol i go long dispela hap bikos ol i no bihainim ol tingting na pasin bilong ol Natsi. Em i tok: “Sampela taim ol gad i pasim mipela long toktok long narapela narapela. Tasol ol i no inap long pasim mipela long smail. Taim mi lukim mama na susa bilong mi i smail, dispela i strongim mi na mi laik stap gut long God inap oltaim.”

Ating sampela taim yu pilim olsem ol wari bilong laip i putim hevi long yu na yu no laik smail. Tasol tingim, samting yu tingting long en inap mekim yu amamas o bel hevi. (Sindaun 15:15; Filipai 4:8, 9) Olsem na maski sampela taim i hatwok, i gutpela long tingim tingim ol gutpela samting. * Pasin bilong ritim Baibel na beten i bin helpim planti man long mekim olsem. (Matyu 5:3; Filipai 4:6, 7) Dispela tok “amamas” i stap planti handret taim long Baibel! I gutpela yu ritim wanpela o tupela pes bilong Baibel long olgeta de! Ating dispela inap helpim yu long smail long olgeta taim.

Na tu, no ken wet long ol narapela long smail long yu. Go pas long mekim olsem, helpim wanpela long i stap amamas long dispela de. Yes, smail em presen God i givim bilong helpim yu na yu inap givim long ol narapela.