“TAIM MI PIKININI, FAMILI BILONG MI I GAT PASIN BILONG TOK NOGUT NA BIKMAUS,” dispela em tok bilong Patricia. Na tu, em i tok: “Mi no lain long fogivim narapela. Maski mi kamap bikpela, mi save tingim tingim ol popaia bilong ol narapela na mi no save slip gut.” Yes, sapos oltaim yu belhat na bel nogut long ol narapela, yu no inap amamas na dispela inap bagarapim helt bilong yu. Ol wok painimaut i soim olsem ol lain i no fogivim ol narapela inap . . .

• Larim belhat i bagarapim pasin pren, na dispela bai mekim na man i laik i stap wanpis

• Bel hevi kwik, tingting planti, na wari inap daunim ol tru

• Tingting tasol long wanpela rong na i no amamas long laip bilong ol

• Pilim olsem ol i no bihainim ol lo bilong God

• Kisim bikpela presa na em inap kisim bikpela sik, kain olsem hai blut presa, sik bilong lewa, na pen long bodi olsem atraitis na het pen *

FOGIVIM OL NARAPELA I MAKIM WANEM? Fogivim narapela i makim olsem yu lusim tingting long rong man i mekim, no ken holim bel kros, na no ken bekim rong. Dispela i no makim olsem man i orait long rong narapela i mekim o em i giaman olsem dispela rong i no bin kamap. Pasin bilong fogivim man i kamapim klia olsem man i laik kamap wanbel na stap bel isi na strongim pasin pren wantaim ol narapela.

Taim man i fogivim narapela, dispela i soim olsem em i gat gutpela tingting. Man i gat pasin bilong fogivim narapela i tingim olsem yumi olgeta i gat sin na yumi save mekim ol tok na pasin i bagarapim bel bilong narapela. (Rom 3:23) Baibel i tok: “Yupela i mas wok yet long karim hevi narapela i putim long yupela na amamas long fogivim narapela, na mekim olsem maski sapos i gat as na wanpela i gat tok long narapela.”—Kolosi 3:13.

Yumi mas fogivim narapela bikos em i insait long pasin laikim, na dispela “em i nambawan gutpela rot bilong mekim ol man i kamap wanbel.” (Kolosi 3:14) Web-sait bilong Mayo Clinic i tok pasin bilong fogivim man bai mekim na . . .

•   Em bai stap gutpela pren bilong ol narapela, kliagut long ol samting i kamap, na sori long man i rongim em

• Tingting bai i stap gut na em bai stap strong long bilip

• Em bai no tingting planti, pilim presa, na bel nogut long ol narapela

• Sik dipresen i no daunim em

FOGIVIM YU YET. Nius Disability & Rehabilitation i stori olsem i “hatwok tru” long man i fogivim em yet, tasol “dispela i bikpela samting long helt”—tingting na bodi. Wanem samting bai helpim yu long fogivim yu yet?

• No ken ting olsem olgeta samting yu mekim mas stret olgeta, wankain olsem olgeta narapela—yu bai mekim popaia.—Saveman 7:20

• Kisim skul long ol popaia bilong yu na no ken mekim wankain popaia

• No ken les kwik; sampela haptaim i mas lus pastaim na yu bai lusim sampela pasin nogut bilong yu.—Efesus 4:23, 24

• Bung wantaim ol pren i gat stretpela tingting na ol bai strongim yu, mekim gut long yu, na tokaut stret long ol popaia bilong yu.—Sindaun 13:20

• Sapos yu mekim wanpela i bel hevi, orait yu yet i mas go pas long tok sori. Taim yu kamap wanbel wantaim ol narapela, yu bai stap bel isi.—Matyu 5:23, 24

Patricia em yumi stori long kirap bilong atikol i tok bihain long em i kirap stadi, em i kisim pasin bilong fogivim ol narapela. Em i tok: “Mi no kalabus moa long pasin bilong belhat. Dispela pasin i no givim hevi moa long mi na ol narapela. Ol stiatok bilong Baibel i kamapim klia tru olsem God i laikim yumi na em i laik bai yumi stap gut.”

Wanpela man em Ron, i tok: “Mi no inap kontrolim tingting na pasin bilong ol narapela. Tasol mi inap kontrolim bilong mi. Sapos mi laik i stap bel isi, mi no ken bel nogut long ol narapela. Mi tingim pasin bilong i stap bel isi na pasin bilong bel nogut olsem not na saut. Mi luksave olsem mi no inap mekim dispela 2-pela pasin long wankain taim. Nau maus bilong bel bilong mi i stap isi.”