Presa em samting bodi bilong yu i pilim taim wanpela bikpela samting i kamap. Kru i save kamapim planti homon na salim i go long olgeta hap bilong bodi. Dispela i mekim na hat i pam hariap, blut presa i go antap, lang i pulim bikpela win o hatwok long pulim win, na mekim ol masol i tait. Paslain long yu luksave, bodi i redi pinis long mekim samting. Taim presa i pinis, bodi bilong yu i pilim nomol gen.

Presa i helpim yu long redi long feisim ol salens na ol bikpela hevi i kamap. Presa i save kirap long kru bilong yu pastaim. Presa inap helpim yu long redi long mekim samting hariap. Em inap helpim yu long winim ol mak bilong yu o mekim gut samting, ating long eksem, wok intaviu, o pilai spots.

Tasol presa i stap longpela taim, bikpela presa, o presa i no save pinis inap nogutim yu. Sapos oltaim bodi bilong yu i pilim presa, dispela inap givim hevi long bodi, bel, na tingting. Pasin bilong yu na pasin yu mekim long ol narapela inap senis. Presa i no save pinis inap mekim na yu bagarapim bodi bilong yu na bihainim ol rot nogut bilong karim hevi. Em inap tu long kamapim dipresen, mekim yu taiet, o tingting long suasaid.

Presa i no mekim wankain samting long olgeta man, tasol em inap kamapim kain kain sik. Na em inap afektim klostu olgeta hap bilong bodi.