“Mobeta em i wok hat na mekim ol gutpela wok long han bilong em bai em i gat ol samting bilong tilim long ol man i sot.” —EFESUS 4:28.

Krieta bilong yumi i kirapim yumi long holim stretpela tingting long pasin bilong wok. Bilong wanem? Man i save wok em i save stap amamas bikos em inap lukautim em yet na famili bilong em. Em inap helpim tu wanpela i sot long ol samting. Bosman bilong em bai amamas long em tu. So man i givim bel long mekim wok, bosman bilong em i no inap rausim em long wok. Baibel i kolim ol gutpela samting i kamap long hatwok bilong yumi i olsem “presen i kam long God.”—Eklisiastis 3:13.

“Mipela i bilip olsem maus bilong bel bilong mipela i stap stret, na long olgeta samting mipela i mekim, mipela i laik bihainim onest pasin.”—HIBRU 13:18.

Sapos yumi bihainim onest pasin, yumi bai rispektim yumi yet, bel bilong yumi bai stap isi, na yumi bai slip gut long nait. Na tu, ol narapela bai trastim yumi na rispektim yumi. Ol man i no save mekim onest pasin, ol i no inap kisim ol gutpela samting. Na tu, oltaim maus bilong bel bilong ol bai i gat tok, na ol bai pret olsem wanpela taim ol man bai kisim save long pasin giaman bilong ol.

“Long sindaun bilong yupela, yupela i no ken bihainim pasin bilong laikim tumas mani. Yupela i mas ting olsem ol samting yupela i gat pinis em inap long yupela.”—HIBRU 13:5.

Yumi mas i gat mani bilong baim kaikai na ol narapela samting yumi nidim. Tasol “pasin bilong laikim tumas mani” inap nogutim yumi. Man i laikim tumas mani em bai lusim bikpela haptaim na strong bilong em long kisim mani. Dispela pasin bilong wok strong long kisim mani bai putim hevi long marit bilong em, em bai no gat taim long stap wantaim ol pikinini, na em inap kisim sik tu. (1 Timoti 6:9, 10) Na tu, man i laikim tumas mani, traim inap painim em long mekim pasin giaman. Wanpela saveman i tok: “Gutpela man bai kisim planti blesing, tasol man i hariap long kamap maniman, em bai gat asua.”—Provep 28:20.

“Banisim gut savetingting na pasin bilong wokim gut tingting.”—PROVEP 3:21.

Save yumi kisim long skul i helpim yumi na ol man inap trastim yumi na yumi inap stap gutpela papamama. Tasol skul bilong graun tasol i no inap helpim yumi long stap gut o stap amamas oltaim. Sapos yumi laik olgeta samting long laip bilong yumi i kamap gut, yumi mas kisim skul i kam long God. Baibel i tok long man i bihainim tok bilong God olsem: “Olgeta samting em i mekim i save kamap gutpela.”—Buk Song 1:1-3.