Askim

Wanem samting i mekim na “ol gutpela samting bilong olgeta lain” i kam insait long “haus” bilong mekim lotu i tru?​—⁠Hagai 2:​7, NW.

Long rot bilong profet Hagai, Jehova i tok profet olsem: “Bai mi seksekim olgeta lain man na bai ol gutpela samting bilong olgeta lain ol i mas i kam insait; na bai mi pulapim ol gutpela gutpela samting long haus bilong mi.” (Hagai 2:​7, NW ) Olsem wanem? Dispela wok bilong seksekim “olgeta lain man” i mekim na “ol gutpela samting bilong olgeta lain”​—⁠em ol manmeri i gat gutpela bel​—⁠ol i kam insait long lotu i tru? Nogat, i no olsem.

Yumi ken tingim samting i save seksekim ol lain man na wanem samting i kamap long en. Baibel i tok ‘olgeta lain manmeri i pasim tok bilong mekim pasin bikhet. Ol dispela manmeri i pasim tok nating bilong mekim ol pasin nogut.’ (Song 2:⁠1) Dispela samting ol i “pasim tok nating,” o tingting long mekim, em ol i laik holim yet wok bos bilong ol. Ol i save seksek tru taim wanpela samting i laik tekewe namba bilong ol long bosim ol samting.

Long olgeta hap bilong graun ol Witnes Bilong Jehova i autim tok long Kingdom Bilong God i kamap pinis, na dispela wok i kamap olsem samting i laik tekewe namba bilong ol lain man. Na tru tumas, Kingdom Bilong God long han bilong Jisas Krais bai ‘bagarapim ol arapela kingdom [ol gavman bilong ol man].’ (Daniel 2:44) Hap tok yumi autim, olsem kot bai painim ol lain man, dispela tok i seksekim ol lain man. (Aisaia 61:⁠2) Na taim wok bilong autim tok i go long planti hap moa na i kamap strong moa, ol lain man i seksek moa yet. Dispela tok profet long Hagai 2:7 (NW ) long God bai seksekim olgeta lain man, em i makim wanem samting bai kamap?

Hagai 2:6 (NW ) i tok: “Jehova bilong ol bikpela lain ami i bin tok olsem, ‘Wanpela taim gen​—⁠inap liklik hap taim​—⁠na bai mi seksekim skai na graun na solwara na ol hap graun i drai.’ ” Aposel Pol i kamapim tok bilong dispela ves na i tok: “Nau em i tokim yumi pinis olsem, ‘Wanpela taim moa bai mi mekim . . . graun na skai wantaim i guria.’ Em i tok long wanpela taim moa tasol, olsem na yumi save, taim God i mekim graun na skai i guria, em bai i rausim ol dispela samting em i bin wokim na ol bai i no i stap moa. Na ol samting em i no inap mekim ol i guria [em Kingdom], ol tasol bai i stap.” (Hibru 12:​26, 27) Tru tumas, pasin bilong dispela graun olgeta bai i seksek strong tru na em bai bagarap na pinis olgeta, na nau nupela taim God bai kamapim i kisim ples bilong en.

God i seksekim olgeta lain man, tasol i no long dispela as na ol manmeri i gat gutpela bel ol i kam long lotu i tru. Nogat. Samting i pulim ol i kam long Jehova na long lotu i tru, em dispela samting i mekim na ol lain man i seksek​—⁠em wok bilong autim tok long olgeta hap graun long Kingdom Bilong God i kamap pinis. Wok bilong autim “gutnius bilong i stap oltaim oltaim” em i pulim ol manmeri i gat gutpela bel i kam long lotuim God tru.​—⁠KTH 14:​6, 7.

Dispela tok bilong Kingdom i tok long kot bai painim ol lain man, na tu, em i tok long God bai kisim bek ol man. (Aisaia 61:​1, 2) Wok bilong autim dispela tok long olgeta hap i kamapim tupela samting​—⁠em i seksekim olgeta lain man, na ol gutpela samting bilong olgeta lain i kam insait na Jehova i kisim biknem long en.