Kisim Holi Spirit, No Ken Kisim Tingting Bilong Graun
Kisim Holi Spirit, No Ken Kisim Tingting Bilong Graun
“Yumi no bin kisim tingting bilong dispela graun, nogat, yumi kisim holi spirit i kam long God. Olsem bai yumi inap save long ol samting God i bin amamas long givim long yumi.”—1 KOR. 2:12.
1, 2. (a) Olsem wanem ol Kristen tru i insait long wanpela pait? (b) Bai yumi skelim wanem ol askim?
OL Kristen tru i insait long wanpela pait! Birua bilong yumi i gat bikpela strong, em i gat pasin trik, na em i no gat sori. Em i gat wanpela samting bilong pait i wok gut na i bin daunim klostu olgeta man bilong dispela graun. Tasol yumi inap sakim dispela samting. (Ais. 41:10) Yumi gat wanpela samting bilong helpim yumi na birua i no inap winim yumi.
2 Pait yumi insait long en i no wanpela pait tru tru; em i pait bilong spirit. Satan em i birua bilong yumi, na nambawan samting bilong pait em i yusim, em “tingting bilong dispela graun.” (1 Kor. 2:12) Wanpela bikpela samting bilong helpim yumi long sakim em—em holi spirit. Bilong abrusim bagarap long dispela pait na stap strong long ol samting bilong spirit, yumi mas askim God long givim holi spirit long yumi na kamapim ol pasin bilong en long laip bilong yumi. (Gal. 5:22, 23) Orait, husat i as bilong tingting bilong dispela graun, na olsem wanem planti man tru i kirap bihainim dispela tingting? Olsem wanem yumi inap save olsem tingting bilong graun i stiaim yumi o nogat? Na yumi inap kisim wanem skul long Jisas long olsem wanem yumi ken kisim holi spirit na sakim tingting bilong dispela graun?
Tingting Bilong Graun—Bilong Wanem Ol Man Long Olgeta Hap i Bihainim?
3. Husat i as bilong tingting bilong graun? Dispela tingting i stiaim ol man long mekim wanem?
3 Satan—“hetman bilong dispela graun”—em i as bilong tingting bilong graun, na dispela tingting i pait long holi spirit. (Jon 12:31; 14:30; 1 Jon 5:19) Dispela tingting i stiaim ol man long mekim ol samting i no stret wantaim laik bilong God na ol samting em i tingting pinis long mekim.
4, 5. Olsem wanem planti man tru i kirap bihainim dispela tingting em Satan i as bilong en?
4 Olsem wanem planti man tru i kirap bihainim dispela tingting em Satan i as bilong en? Pastaim, Satan i giamanim Iv long gaden Iden. Satan i kirapim Iv long bilip olsem sapos em i sakim wok bos bilong God, orait em bai stap gutpela moa. (Stt. 3:13) Satan i giaman tru! (Jon 8:44) Na long rot bilong dispela meri, Satan i pulim Adam long givim baksait long Jehova. Pasin bilong Adam i mekim na sin i kisim olgeta lain man, olsem na ol man i save bihainim pasin bilong Satan long sakim tok.—Ritim Efesus 2:1-3.
5 Satan i pulim tu planti ensel, em ol i kamap ol spirit nogut. (Rev. 12:3, 4) Dispela pasin bilong givim baksait long God i kamap paslain long Bikpela Tait long taim bilong Noa. Ol dispela ensel i ting sapos ol i lusim ples God i givim long ol long heven na inapim ol laik nogut bilong ol long graun, orait ol bai stap gutpela moa. (Jut 6) Long nau ol dispela spirit nogut i stap long ples spirit, na ol i helpim Satan long “giamanim olgeta manmeri bilong graun.” (Rev. 12:9) Sori tru, klostu olgeta manmeri i no luksave long ol samting ol spirit nogut i mekim bilong stiaim ol man.—2 Kor. 4:4.
Tingting Bilong Graun i Stiaim Yu?
6. Long wanem rot tasol tingting bilong graun inap stiaim yumi?
6 Planti man i no luksave long ol samting Satan i mekim bilong stiaim ol, tasol ol Kristen tru i save long ol trik bilong em. (2 Kor. 2:11) I gat wanpela rot tasol we dispela tingting bilong graun inap stiaim yumi—em sapos yumi larim em long stiaim yumi. Orait nau yumi ken skelim 4-pela askim em ol bai helpim yumi long save wanem samting i stiaim yumi—holi spirit o tingting bilong dispela graun.
7. Wanem wanpela rot we Satan i traim long pulim yumi i go longwe long Jehova?
7 Amamas mi laikim i kamapim klia wanem samting long pasin na tingting bilong mi? (Ritim Jems 3:14-18.) Satan i traim long pulim yumi i go longwe long God long rot bilong kirapim yumi long laikim pasin bilong pait na bagarapim man. Satan i save olsem Jehova i nolaik tru long ol man husat i laikim pasin bilong pait. (Sng. 11:5) Olsem na bilong kirapim ol laik nogut bilong bel, Satan i save yusim ol buk na nius, ol muvi, musik, na kompiuta gem—na long sampela gem i olsem ol pilaia yet i mekim pasin pamuk nogut tru o pait na bagarapim man. Satan i no wari sapos long hap bel yumi laikim stretpela pasin, tasol em i laik bai yumi mas laikim tu pasin nogut em i save kirapim ol man long mekim.—Sng. 97:10.
8, 9. Yumi mas mekim wanem ol askim long yumi yet long ol samting bilong amamas?
8 Tasol holi spirit i kirapim ol man husat i kisim dispela spirit long bihainim klinpela pasin, stap wanbel wantaim ol arapela, na marimari tru long ol man. Yumi mas askim yumi yet olsem, ‘Ol amamas mi laikim i kirapim mi long bihainim ol gutpela pasin?’ Man i gat savetingting i kam long heven, “em i no man bilong tupela maus.” I no stret sapos ol man em holi spirit i stiaim ol, ol i autim tok long ol man olsem ol i mas bihainim klinpela pasin na stap wanbel wantaim, na long wankain taim long haus bilong ol yet ol i lukim ol piksa bilong pasin pamuk na pait na bagarapim man.
9 Jehova i tok yumi mas lotuim em wanpela tasol. Tasol Satan bai amamas sapos inap wanpela taim tasol yumi mekim lotu long em, olsem em i bin traim long kirapim Jisas long mekim. (Luk 4:7, 8) Yumi inap askim yumi yet: ‘Ol amamas mi makim i helpim mi long lotu long God wanpela tasol? Ol amamas mi makim, dispela i mekim na i hatwok long mi long sakim tingting bilong dispela graun o em isi long sakim? Mi mas senisim ol amamas mi laik kisim?’
10, 11. (a) Tingting bilong graun i strongim ol man long kisim wanem kain tingting long mani kago? (b) Tok Bilong God i strong yumi long kisim wanem kain tingting?
10 Mi gat wanem kain tingting long mani kago? (Ritim Luk 18:24-30.) Tingting bilong dispela graun i strongim “pasin bilong aigris” long rot bilong kirapim ol man long mangal na laikim tumas mani kago. (1 Jon 2:16) Tingting bilong graun i bin strongim laik bilong planti man long kamap maniman. (1 Tim. 6:9, 10) Dispela tingting i laik kirapim yumi long bilip olsem sapos yumi gat planti gutpela samting bilong skin, orait bai yumi stap gutpela oltaim. (Snd. 18:11) Tasol sapos yumi larim pasin bilong laikim tumas mani i daunim pasin bilong laikim tru God, orait Satan bai win. Yumi mas askim yumi yet, ‘Bikpela samting long laip bilong mi, em long kisim ol amamas na ol gutpela samting bilong skin?’
11 Tasol Tok Bilong God i strongim yumi long kisim stretpela tingting long mani na long wok strong long lukautim yumi yet na famili long ol samting bilong skin. (1 Tim. 5:8) Holi spirit i helpim ol man husat i kisim dispela spirit long kamapim pasin bilong Jehova long amamas long givim ol samting. Ol kain man olsem ol i man bilong givim, na ol i no man bilong kisim tasol. Long tingting bilong ol, ol manmeri i bikpela samting moa, winim ol samting bilong skin, na ol i amamas long givim ol samting ol inap long givim. (Snd. 3:27, 28) Na ol i no larim wok bilong kisim mani i go pas long wok bilong God.
12, 13. Tingting bilong graun i save kirapim ol man long mekim olkain pasin nogut, tasol holi spirit inap helpim yumi olsem wanem?
12 Pasin bilong mi i soim olsem mi gat holi spirit o tingting bilong graun? (Ritim Kolosi 3:8-10, 13.) Tingting bilong graun i strongim ol laik nogut bilong bel. (Gal. 5:19-21) Taim yumi gat hevi, olsem wanpela brata o sista i pulim nus long yumi, o bagarapim bel bilong yumi, o rongim yumi, orait pasin yumi mekim inap soim olsem tingting bilong graun o holi spirit i stiaim yumi, tasol taim yumi no gat hevi, dispela i no stap ples klia. Na tu, pasin yumi mekim taim yumi stap long haus, inap kamapim klia wanem samting i save stiaim tingting bilong yumi. Ating yumi gat wok long skelim yumi yet. Askim yu yet, ‘Insait long 6-pela mun i go pinis, mi bihainim moa yet pasin bilong Krais o mi kirap gen long mekim sampela toktok na pasin i no stret em bipo mi save mekim?’
13 Holi spirit i ken helpim yumi long “rausim olpela bel wantaim ol pasin bilong en” na kisim “nupela pasin.” Dispela bai helpim yumi long mekim moa yet pasin laikim na pasin helpim. Bai yumi strong moa long fogivim man, maski i luk olsem i gat as na yumi gat tok long em. Sapos yumi ting wanpela i mekim pasin i no stret, bai yumi no “bel nogut na kros na belhat na bikmaus na tok nogut,” nogat. Bai yumi strong long kamapim moa yet pasin bilong “sori tru” long ol narapela.—Efe. 4:31, 32.
14. Planti man i gat wanem tingting long Tok Bilong God?
14 Mi save rispek na laikim tru ol lo bilong Baibel long stretpela pasin? (Ritim Sindaun 3:5, 6.) Tingting bilong graun i save pait wantaim Tok Bilong God. Ol manmeri em tingting bilong graun i stiaim ol, ol i no laik bihainim ol tok bilong Baibel em ol i ting i givim hatwok long ol. Ol i laikim moa ol pasin ol man i save bihainim na save bilong ol man. (2 Tim. 4:3, 4) Sampela i givim baksait olgeta long Tok Bilong God. Sampela i tok yumi no ken bilip long Baibel na tok bilong en i no inap helpim yumi, ol i ting save bilong ol yet i win. Ol i daunim ol klinpela lo bilong Baibel long pasin adaltri, pasin sodom, na pasin bilong katim marit. Ol i skulim ol man olsem “pasin nogut em i gutpela na gutpela pasin em i nogut.” (Ais. 5:20) Olsem wanem? Yumi tu i kisim dispela tingting bilong graun? Taim ol hevi i painim yumi, yumi bilip long savetingting bilong ol man, na long tingting bilong yumi yet? O yumi wok strong long bihainim ol gutpela tok bilong Baibel?
15. Yumi no ken bilip long savetingting bilong yumi yet, olsem na yumi mas mekim wanem?
15 Holi spirit i save kirapim yumi long rispek long Baibel. Olsem man bilong raitim song, yumi tingim tok bilong God olsem lam i helpim yumi long wokabaut stret na lait i soim rot long yumi. (Sng. 119:105) Yumi no bilip long savetingting bilong yumi yet, nogat, yumi bilip olsem Baibel bai helpim yumi long save long wanem ol pasin i stret o i no stret. Yumi lain long rispek long Baibel, na tu, laikim tru ol lo bilong God.—Sng. 119:97.
Kisim Skul Long Pasin Bilong Jisas
16. Yumi mas mekim wanem bilong kisim “tingting bilong Krais”?
16 Bilong kisim holi spirit, yumi mas kisim “tingting bilong Krais.” (1 Kor. 2:16) Bilong kisim “wankain tingting olsem bilong Krais Jisas,” yumi mas save long tingting na pasin bilong em na bihainim dispela. (Rom 15:5; 1 Pita 2:21) Tingim sampela rot bilong mekim olsem.
17, 18. (a) Yumi kisim wanem skul long Jisas long pasin bilong beten? (b) Bilong wanem yumi mas “wok yet long askim”?
17 Beten askim God long givim holi spirit. Paslain long traim i kamap, Jisas i beten askim God long givim holi spirit bilong helpim em. (Luk 22:40, 41) Yumi tu i mas askim God long givim holi spirit long yumi. Jehova i save amamas long givim holi spirit long olgeta man husat i bilip na askim em long en. (Luk 11:13) Jisas i tok: “Wok yet long askim, na yupela bai kisim. Wok yet long painim, na yupela bai lukim. Wok yet long paitim dua, na dua bai op long yupela. Long wanem, olgeta man i save askim long samting, ol i save kisim. Na olgeta man i save painim samting, ol i save lukim. Na olgeta man i paitim dua, dua bai op.”—Mat. 7:7, 8.
18 Taim yumi wok long askim Jehova long givim yumi holi spirit na helpim yumi, yumi no ken givap hariap long mekim olsem. Yumi mas beten planti taim moa na beten longpela taim. Sampela taim Jehova i save larim ol man i beten long em bilong kamapim klia olsem ol i bilip tru long em na pilim tru ol samting ol i beten long en, na bihain em i mekim samting ol i askim long en. a
19. Oltaim Jisas i mekim wanem? Bilong wanem yumi mas bihainim pasin bilong em?
19 Bihainim olgeta tok bilong Jehova. Oltaim Jisas i mekim ol samting Papa bilong em i laikim. Long wanpela taim, samting Jisas i tingting long en i no wankain long samting Papa bilong em i laikim. Tasol em i bilip tru long Papa bilong em na i tok: “Laik bilong mi i no ken kamap, nogat, laik bilong yu i mas kamap.” (Luk 22:42) Askim yu yet, ‘Mi save bihainim tok bilong God maski i hatwok long mekim olsem?’ Bilong kisim laip, yumi mas bihainim tok bilong God. Em Man i wokim yumi, As bilong laip, na Man i helpim olgeta samting long i stap laip, olsem na i stret yumi bihainim tru olgeta tok bilong em. (Sng. 95:6, 7) Yumi mas bihainim tok, sapos yumi no mekim olsem, orait God i no inap orait long yumi.
20. Wanem nambawan samting long laip bilong Jisas? Olsem wanem yumi ken bihainim pasin bilong em?
20 Save gut long Baibel. Taim Satan i traim bilip bilong Jisas, Jisas i kolim ol tok bilong Baibel bilong sakim em. (Luk 4:1-13) Taim Jisas i toktok wantaim ol man bilong lotu i birua long em, em i kamapim Tok Bilong God olsem as bilong ol tok bilong em. (Mat. 15:3-6) Nambawan samting long laip bilong Jisas, em long save long lo bilong God na inapim dispela lo. (Mat. 5:17) Yumi tu i laik wok yet long putim ol Tok Bilong God long tingting bilong yumi, em ol tok i save strongim bilip. (Fili. 4:8, 9) Ating sampela bilong yumi i hatwok long painim taim bilong mekim stadi bilong yumi yet o bilong famili. Tasol yumi no ken wet inap long yumi gat taim long mekim stadi, nogat, yumi mas lusim sampela samting na makim taim bilong mekim stadi.—Efe. 5:15-17.
21. Lain wokboi i stretim wanem rot bilong helpim yumi long save gut moa long Tok Bilong God na bihainim?
21 “Gutpela wokboi i gat savetingting” i stretim rot bilong yumi long mekim Famili Lotu long olgeta wik, olsem na yumi gat taim long mekim stadi bilong yumi yet na famili stadi. (Mat. 24:45) Olsem wanem? Yu yusim gut dispela taim bilong mekim stadi? Bilong helpim yu long kisim tingting bilong Krais, yu ken makim ol tok bilong Jisas em yu laik save long en, na stadi gut long ol dispela tok. Yu ken yusim Wastaua Buk na Nius Skripsa Indeks, o sapos yu save long tok Inglis, orait lukim Watch Tower Publications Index bilong painim sampela tok moa long samting yu laik kisim save long en. Olsem: Kirap long 2008 i go inap 2010, Wastaua bilong pablik i gat 12-pela stori i gat het tok “Skul Yumi Kisim Long Jisas.” Yu ken yusim ol dispela stori bilong mekim stadi. Stat long 2006 na i kam, nius Kirap! i gat dispela hap “Bai Yu Bekim Olsem Wanem?” Ol askim bilong dispela hap em bilong helpim yumi long save gut moa long Tok Bilong God. Gutpela sapos sampela taim long Famili Lotu bilong yupela, yupela i skelim dispela hap.
Yumi Inap Winim Strong Bilong Dispela Graun
22, 23. Yumi mas mekim wanem bilong winim strong bilong dispela graun?
22 Sapos yumi laik bai holi spirit i stiaim yumi, yumi mas sakim tingting bilong dispela graun. Tasol i no isi long mekim olsem. Yumi mas hatwok na pait strong long sakim. (Jut 3) Tasol yumi inap winim dispela pait! Jisas i tokim ol disaipel bilong em: “Long graun yupela i karim pen na hevi, tasol strongim bel! Mi winim pinis strong bilong dispela graun.”—Jon 16:33.
23 Yumi tu inap winim strong bilong dispela graun sapos yumi sakim tingting bilong en na mekim olgeta samting yumi inap mekim bilong kisim holi spirit. Tru tumas, “sapos God i stap long sait bilong yumi, orait husat bai birua long yumi?” (Rom 8:31) Taim yumi kisim holi spirit na larim em i stiaim yumi long rot bilong ol tok i stap long Baibel, bai yumi stap belgut, bel isi, amamas, na yumi ken bilip olsem yumi inap kisim laip oltaim long nupela taim klostu nau em bai kamap.
[Futnot]
a Bilong kisim sampela save moa long dispela, lukim pes 170-173 bilong buk Tru Tru Baibel i Tok Wanem?
Yu Tingim Yet?
• Bilong wanem ol man long olgeta hap i bihainim tingting bilong graun?
• Yumi mas givim wanem 4-pela askim long yumi yet?
• Wanem 3-pela samting yumi lainim long Jisas long pasin bilong kisim holi spirit?
[Askim Bilong Stadi]
[Piksa long pes 8]
Olsem wanem sampela ensel i kamap ol spirit nogut?
[Piksa long pes 10]
Satan i yusim tingting bilong graun long kontrolim ol man, tasol yumi inap sakim dispela tingting
