Yu Luksave Olsem God i Stiaim Yumi?

LAIN Israel na lain Isip i no bin lukim kain samting olsem bipo. Taim ol Israel i lusim Isip, wanpela klaut i stap klostu long ol na i no lusim ol. Long nait em i kamap olsem paia. Em narakain samting tru! Tasol em i kam long we? Em i gat wanem wok? Yumi ol lain i stap 3,500 yia bihain long dispela, i kisim wanem skul long tingting em lain Israel i gat long dispela ‘klaut na paia’?—Kis. 14:24.

Baibel i tokaut long husat i kamapim dispela klaut na wanem wok bilong en, em i tok: “Long san Bikpela i stap insait long bikpela klaut na i go pas bilong soim rot long ol. Na long nait em i stap insait long bikpela paia na i go pas bilong givim lait long ol. Olsem na ol i inap wokabaut long san na long nait. Oltaim long san dispela klaut i save go paslain long ol manmeri, na long nait dispela paia i go paslain.” (Kis. 13:21, 22) God Jehova i yusim dispela paia na klaut bilong stiaim lain bilong em taim ol i lusim Isip na wokabaut long ples drai nating. Bilong bihainim dispela klaut, ol Israel i mas stap redi long wokabaut. Taim ami bilong Isip i bihainim lain bilong God na i laik pait long ol, klaut i kam na stap namel long dispela tupela lain na i lukautim lain Israel. (Kis. 14:19, 20) Maski klaut i no soim rot i go stret long Graun Bilong Promis, ol Israel i mas bihainim klaut bambai ol inap kamap long dispela hap.

Taim klaut i stap, dispela i helpim lain bilong God long tingim olsem Jehova i stap wantaim ol. Dispela klaut i makim Jehova, na sampela taim em i stap long klaut na toktok long ol. (Nam. 14:14; Sng. 99:7) Na tu, klaut i kamapim klia olsem Moses em i dispela man Jehova i bin makim bilong go pas long lain Israel. (Kis. 33:9) Na laspela taim Baibel i stori long dispela klaut, em taim Jehova i tokaut olsem Josua bai kisim ples bilong Moses. (Lo 31:14, 15) Tru tumas, sapos lain Israel i luksave olsem God i stiaim ol na ol i bihainim em, i stap bilong ol bihain long ol i lusim Isip bai kamap gutpela.

Ol i No Tingim Moa Samting Klaut i Makim

Taim lain Israel i lukim klaut long namba wan taim, ol i kirap nogut tru. Tasol sori tru, dispela klaut olsem mirakel em ol inap lukim long olgeta taim i no kirapim ol Israel long bilip strong long Jehova. Planti taim ol i sutim tok long wok bilong God long stiaim ol. Taim ami bilong Isip i ronim ol, ol i no bilip long strong bilong Jehova long kisim bek ol. Nogat. Ol i sutim tok long wokboi bilong God, Moses, long em i bin bringim ol i kam bilong i dai. (Kis. 14:10-12) Bihain long God i kisim bek ol long solwara Retsi, ol i toktok planti long Moses, Aron, na Jehova, long ol i no gat kaikai na wara. (Kis. 15:22-24; 16:1-3; 17:1-3, 7) Na sampela wik bihain long dispela, ol i subim Aron long wokim wanpela bulmakau gol. Tingim! Long wanpela hap bilong kem, ol Israel i lukim paia na klaut, dispela i makim Man i bin helpim ol long lusim Isip. Na long narapela hap bilong kem, ol i kirap lotuim wanpela imis nating na i tok: “Harim. Dispela em i god bilong yumi. Em i bin kisim yumi long Isip na bringim yumi i kam.” Ol dispela pasin i soim olsem ol i no rispek liklik long God!—Kis. 32:4; Neh. 9:18.

Ol pasin bikhet bilong lain Israel i soim olsem ol i no tingim wok bilong Jehova long stiaim ol. Ol inap lukim ol samting long ai tru  bilong ol, tasol ol i no tingim ol samting Jehova i mekim. Ol i lukim klaut, tasol ol i no tingim moa samting klaut i makim. Pasin bilong lain Israel i “mekim [God] i bel hevi,” tasol Jehova i marimari long ol na long rot bilong dispela klaut em i wok yet long stiaim ol i go inap long taim ol i kamap long Graun Bilong Promis.—Sng. 78:40-42, 52-54; Neh. 9:19.

Luksave Olsem God i Stiaim Yumi Long Nau

Long taim bilong yumi tu, oltaim Jehova i save stiaim lain bilong em. Em i no ting ol Israel i mas painim rot bilong ol yet, na olsem tasol long nau tu, em i no ting yumi yet i mas painim rot bilong i go long nupela taim. God i bin makim Jisas Krais olsem Lida bilong kongrigesen. (Mat. 23:10; Efe. 5:23) Em i bin givim sampela wok long gutpela wokboi, em ol Kristen God i bin makim ol long holi spirit. Na dispela lain i save makim ol wasman bilong kongrigesen Kristen.—Mat. 24:45-47; Tai. 1:5-9.

Olsem wanem yumi ken save long lain gutpela wokboi, o bosboi, ol i husat? Jisas yet i stori long dispela lain olsem: “Husat tru em i gutpela bosboi i gat savetingting? Bosman bilong en bai makim em long lukautim lain wokboi bilong en na long wok oltaim long givim kaikai inap long ol long taim stret. Dispela wokboi i ken amamas tru taim Bosman bilong en i kam na lukim em i mekim dispela wok!”—Luk 12:42, 43.

Lain bosboi i “gutpela,” dispela i makim olsem ol i no inap givim baksait o lusim Jehova, o Jisas, o ol tok i tru bilong Baibel, o lain bilong God. Lain bosboi i gat “savetingting,” dispela i makim olsem ol i bihainim gutpela tingting taim ol i stiaim bikpela wok bilong autim “gutnius bilong Kingdom” na kamapim “ol disaipel long olgeta lain man.” (Mat. 24:14; 28:19, 20) Lain bosboi i save bihainim tok na i givim kaikai bilong spirit “long taim stret,” em dispela kaikai i gutpela na i strongim ol man. Jehova i orait long ol na i blesim ol. Em i mekim lain bilong em i go bikpela tru, em i stiaim ol long wokim ol bikpela disisen, em i helpim ol long kliagut moa long ol tok i tru bilong Baibel, em i lukautim ol na bai ol birua i no inap bagarapim ol olgeta, na em i mekim ol i stap bel isi.—Ais. 54:17; Fili. 4:7.

Larim God i Stiaim Yu

Olsem wanem yumi ken soim olsem yumi amamas long God i stiaim yumi? Aposel Pol i tok: “Yupela i mas bihainim tok bilong ol man i go pas long yupela na stap aninit long ol.” (Hib. 13:17) Sampela taim dispela i hatwok. Olsem: Tingim olsem yu wanpela man Israel long taim bilong Moses. Yu bin wokabaut bihainim klaut inap sampela taim, na nau klaut i stop. Em bai stap olsem inap hamas de? Wanpela de? Wanpela wik? Sampela mun? Yu tingting, ‘Bai mi rausim ol kago bilong mi long ol mekpas?’ Ating pastaim yu rausim ol samting yu nidim. Tasol bihain long sampela de, yu les long painim ol samting, na yu kirap rausim ol narapela kago tu. Tasol taim yu rausim pinis olgeta samting, yu lukim klaut i kirap na go—na yu mas stat long putim ol kago i go bek! Dispela bai hatwok. Tasol lain Israel i mas “kisim ol samting na bihainim klaut i go.”—Nam. 9:17-22.

Yumi save mekim wanem taim yumi kisim tok i kam long God? Wantu yumi traim long bihainim dispela tok? O yumi save bihainim yet pasin bilong yumi long mekim ol samting? Yumi kliagut long ol tok yumi kisim long nau bilong stiaim yumi, em ol tok i stori long pasin bilong mekim ol Baibel stadi, autim tok long ol man i gat narapela tokples, mekim oltaim famili lotu, wok gut wantaim Hospital Lieson Komiti, na bihainim pasin i stret long ol kibung? Taim yumi bihainim tok bilong stretim yumi, yumi soim olsem yumi amamas long wok bilong God long stiaim yumi. Taim yumi mas wokim ol bikpela disisen, yumi no bilip long savetingting bilong yumi yet, nogat, yumi lukluk i go long Jehova na oganaisesen bilong em long soim rot long yumi. Pikinini i laik bai papamama bilong em  i lukautim em taim bikpela win na ren i kamap, na olsem tasol taim ol bikpela hevi bilong dispela graun i painim yumi, yumi painim ples hait insait long oganaisesen bilong Jehova.

Tru, ol brata i go pas long mekim ol wok insait long oganaisesen bilong God long graun ol i no gutpela olgeta—tasol Moses tu i no gutpela olgeta. Tasol maski i olsem, klaut i soim olsem God i bin makim Moses long go pas long lain Israel na Em i orait long em. Tingim tu olsem i no wok bilong ol wan wan Israel long makim wanem taim ol bai kirap na i go. Nogat. Lain Israel i mekim samting taim ‘Bikpela i givim tok long Moses na Moses i autim long ol.’ (Nam. 9:23) Olsem na Moses—em man God i makim bilong stiaim ol—i kirap tokim ol long ol i mas i go.

Long nau, lain bosboi bilong Jehova i save tokaut klia long taim bilong mekim ol samting. Ol i save mekim dispela olsem wanem? Ol i mekim olsem long rot bilong Wastaua na Wok Kingdom Bilong Yumi, ol nupela buk, na ol tok long ol kibung. Na tu, ol kongrigesen i save kisim tok long rot bilong ol wasman raun, ol pas, na sampela skul bilong ol brata i gat wok insait long kongrigesen.

Yu luksave olsem God i stiaim yumi? Jehova i yusim oganaisesen bilong em long stiaim yumi long dispela taim bilong las de bilong pasin nogut bilong graun bilong Satan. Olsem na yumi stap wanbel, pasin laikim i stap namel long yumi, na yumi stap gut.

Taim lain Israel i kamap long Graun Bilong Promis, Josua i tok: “Yupela i save pinis, God, Bikpela bilong yumi i bin givim yupela olgeta gutpela samting em i bin promis long givim yupela. Olgeta samting em i bin promis long mekim, ol i kamap pinis.” (Jos. 23:14) Lain bilong God long nau tu bai go long nupela graun em God i bin promis long en. Tasol bilong yumi ken stap long dispela hap, em i bikpela samting long yumi mas daunim yumi yet na larim God i stiaim yumi. Olsem na gutpela sapos yumi olgeta i luksave olsem Jehova i stiaim yumi!

[Ol Piksa long pes 5]

Oganaisesen bilong Jehova i stiaim yumi long nau

Ol nupela buk yumi kisim long kibung

Ol brata i kisim skul

Yumi kisim skul long ol bung bilong autim tok