Malolo Bilong God​—Yu Insait Pinis Long en?

“Tok bilong God i gat laip na i wok strong i stap.”​—⁠HIB. 4:⁠12.

1. Olsem wanem yumi go insait long malolo bilong God long nau? Bilong wanem sampela taim em i hatwok long bihainim tok?

 YUMI kisim save pinis olsem yumi go insait long malolo bilong God long nau sapos yumi bihainim tok bilong Jehova na wok wantaim oganaisesen bilong en. Pasin bilong yumi long bihainim tok i soim Jehova olsem yumi laik bai ol samting em i tingting pinis long mekim i mas kamap. Tasol sampela taim em i hatwok long bihainim tok. Olsem, taim yumi kisim save olsem Jehova i laik bai yumi lusim wanpela samting em yumi gat laik long mekim, ating i hatwok long bihainim kwik tok bilong em. Sapos dispela i painim yumi, yumi mas kisim pasin bilong “redi long bihainim tok.” (Jems 3:17) Long dispela stadi bai yumi stori long sampela samting em inap kamap na i givim rot long yumi long soim olsem yumi redi long bihainim tok long olgeta taim o nogat.

2, 3. Yumi mas wok yet long mekim wanem bilong Jehova i ken amamas long yumi?

² Olsem wanem? Taim yu kisim save long Baibel olsem yu mas mekim sampela senis long laip bilong yu, yu redi long bihainim tok? Tingim: Baibel i tok ol manmeri Jehova i laik bringim i kam insait long oganaisesen bilong en, ol i olsem “ol gutpela samting bilong olgeta lain.” (Hag. 2:​7, NW ) Dispela i soim olsem God i save makim ol manmeri em ol i dia tumas long em, long wanem, ol i laikim pasin i stret. Tru, ating planti bilong yumi i bin insait yet long pasin i no stret taim yumi kirap stadi long Baibel. Tasol yumi laikim God na Pikinini bilong em na yumi laik bai God i belgut long yumi, olsem na yumi amamas long mekim ol bikpela senis long pasin na tingting bilong yumi. Yumi beten askim Jehova long helpim yumi na yumi wok strong long mekim ol senis. Bihain, yumi kisim baptais na Jehova i orait long yumi.​—⁠Ritim Kolosi 1:​9, 10.

 ³ Tasol sin i stap yet long yumi. Na yumi gat wok yet long senisim sampela pasin bilong yumi na wok strong long mekim pasin i stret. Tasol Jehova i promis long helpim yumi sapos yumi traim bes bilong yumi long mekim em i amamas.

Taim Yumi Mas Mekim Ol Senis

4. Wanem 3-pela rot Jehova i save yusim bilong soim yumi olsem yumi mas mekim sampela senis?

⁴ Paslain long yumi mekim ol senis long laip bilong yumi, yumi mas kliagut long ol samting yumi mas senisim. Long kain kain rot Jehova i save helpim yumi. Em i ken yusim wanpela tok i kamap long Haus Kingdom o tok bilong wanpela nius bilong yumi bilong helpim yumi long luksave olsem sampela tingting o pasin bilong yumi i no stret. Sampela taim maski yumi harim wanpela tok o ritim wanpela nius, yumi no luksave olsem yumi mas mekim sampela senis, olsem na Jehova inap yusim wanpela brata o sista long kongrigesen bilong stretim yumi long gutpela pasin.​—⁠Ritim Galesia 6:⁠1.

5. Sampela taim yumi mekim wanem taim wanpela i givim tok bilong stretim yumi? Bilong wanem ol elda Kristen i mas wok yet long helpim yumi?

⁵ Taim wanpela sinman olsem yumi i stretim yumi, dispela inap givim hatwok long yumi, maski em i mekim long gutpela pasin. Tasol Jehova i tokim ol elda long ol “i mas traim long stretim” yumi long “pasin isi.” (Gal. 6:⁠1) Sapos yumi bihainim tok bilong ol, bai yumi kamap “gutpela samting” moa, olsem samting i dia tumas long Jehova. Planti taim long beten yumi save tokim Jehova olsem yumi gat sin na yumi save mekim planti popaia. Tasol taim wanpela elda i tok yumi popaia, sampela taim yumi mekim narapela kain pasin. Yumi save kamapim eskius long samting yumi mekim, o yumi tok samting yumi mekim i no bikpela samting. Ating yumi tok man i stretim yumi i no save laikim yumi, o em i no mekim ol tok long gutpela pasin. (2 Kin. 5:11) O ating yumi bai belhat tru sapos ol elda i tokim yumi long samting yumi no laik tru long harim. Olsem: Ating ol i tokim yumi olsem wanpela insait long famili bilong yumi i wok long mekim samting i no stret, o pasin bilong yumi long bilas i no stret. O ating ol i tokim yumi olsem yumi mas klinim gut moa skin bilong yumi, o Jehova i save heitim samting yumi save mekim bilong kisim amamas. Tok bilong ol i mekim yumi belhat, olsem na ating yumi mekim sampela tok i no stret. Dispela inap mekim yumi bel hevi, na brata husat i givim tok long yumi inap bel hevi tu. Tasol bihain, taim belhat i pinis, yumi luksave olsem tok bilong ol em bilong helpim yumi.

6. Olsem wanem tok bilong God “inap kamapim klia tingting na laik i stap long bel bilong man”?

⁶ Tim skripsa bilong dispela stadi, Hibru 4:​12, i tok olsem tok bilong God “i wok strong i stap.” Dispela i makim olsem tok bilong God i gat strong long helpim ol manmeri long senisim laip bilong ol. Tok bilong em i bin helpim yumi long mekim ol senis em yumi mas mekim paslain long yumi kisim baptais. Na em inap helpim yumi long mekim ol senis bihain long yumi baptais. Long pas Pol i raitim long ol Kristen Hibru, em i tok olsem Tok Bilong God i save “go insait tru long man na i kamapim ples klia insait bilong man na ausait bilong man” na “em inap kamapim klia tingting na laik i stap long bel bilong man.” (Hib. 4:12) “Insait bilong man” i makim yumi wanem kain tru long insait, em samting ol man i no inap lukim taim ol i lukluk long yumi. Na “ausait bilong man” i makim ol samting ol man inap lukim taim ol i lukluk long yumi. Pol i tok olsem taim yumi kliagut long ol samting God i laik bai yumi mekim, orait ol samting yumi mekim bai kamapim klia yumi wanem kain man tru. Olsem wanem? Samting yumi mekim long ai bilong ol man i narapela kain long pasin tru bilong yumi? (Ritim Matyu 23:​27, 28.) Tingim samting yu bai mekim sapos ol samting nau bai yumi stori long en i kamap long yu.

Wok i Go Yet Wantaim Oganaisesen Bilong Jehova

7, 8. (a) Bilong wanem sampela Kristen Hibru i laik bihainim yet sampela hap bilong Lo Bilong Moses? (b) I gat wanem as na yumi ken tok ol i sakim samting Jehova i tingting pinis long mekim?

⁷ Planti bilong yumi i save gut long dispela tok bilong Sindaun 4:18: “Rot bilong ol stretpela  man i lait olsem san i kamap long moningtaim, na lait i wok long kamap strong moa, inap long belo.” Dispela i makim olsem save bilong yumi long ol samting Jehova i laik bai yumi mekim i wok long kamap gutpela moa, na pasin bilong yumi long mekim ol samting i amamasim em, dispela tu i wok long kamap gutpela moa.

⁸ Yumi kisim save pinis olsem bihain long Jisas i dai, planti Kristen Hibru i laik bihainim yet Lo Bilong Moses. (Apo. 21:20) Pol i kamapim klia olsem ol Kristen i no gat wok long bihainim Lo Bilong Moses, tasol sampela i no wanbel long samting Jehova i laik bai ol i mekim. (Kol. 2:​13-15) Ating ol i ting olsem sapos ol i bihainim sampela hap bilong Lo Bilong Moses, ol man i bihainim lotu Juda bai i no mekim nogut long ol. Tasol Pol i tok klia long ol dispela Kristen Hibru olsem sapos ol i sakim samting God i tingting pinis long mekim, ol i no inap i go insait long malolo bilong God. a (Hib. 4:​1, 2, 6; ritim Hibru 4:11.) Bilong Jehova i ken orait long ol, ol i mas bihainim tingting bilong Jehova, olsem nau em i laik bai lain bilong em i lotuim em long narapela rot.

9. Yumi mas pilim olsem wanem taim wokboi i gat savetingting i kamapim sampela senis long tingting yumi gat long sampela tok bilong Baibel?

⁹ Sampela taim wokboi i gat savetingting i save helpim yumi long kliagut long wanpela tok bilong Baibel em bipo yumi gat narapela tingting long en. I stret yumi amamas long ol dispela senis. Ol senis i kamapim klia olsem Jehova i yusim wokboi i gat savetingting long skulim yumi long tok i tru. Sampela taim Gavening Bodi, em mausman bilong wokboi i gat savetingting, i save skelim gen sampela bilip bilong yumi. Sapos ol dispela brata i luksave olsem ol i mas mekim sampela senis, orait ol i no pret long stretim wei ol i bin eksplenim sampela bilip long bipo o mekim sampela tok i kamap klia moa. Ol i save olsem sampela bai tingim ol dispela senis na mekim sampela tok bilong daunim wokboi i gat savetingting, tasol Gavening Bodi i no ting dispela i bikpela samting. Nambawan bikpela samting long ol em long mekim ol wok i stret wantaim ol samting God i tingting pinis long mekim. Yu pilim olsem wanem taim wokboi i gat savetingting i kamapim sampela senis long tingting yumi gat long sampela tok bilong Baibel?​—Ritim Luk 5:​39.

10, 11. Sampela Sumatin Bilong Baibel i mekim wanem taim ol i save olsem ol i mas traim ol nupela rot bilong autim tok? Yumi kisim wanem skul long dispela eksampel?

¹⁰ Yumi ken stori long narapela eksampel. Klostu wan handret yia i go pinis, sampela Sumatin Bilong Baibel husat i save gut long mekim ol pablik tok ol i ting olsem pasin bilong givim ol pablik tok i nambawan rot bilong autim tok. Ol i amamas long mekim tok long ai bilong ol man. Sampela i amamas tru taim ol man i apim nem bilong ol long tok ol i mekim. Tasol bihain, lain bilong Jehova i kliagut moa olsem Jehova i laik bai ol i mekim sampela samting moa, i no ol pablik tok tasol. Em i laik bai ol i autim tok long ol haus na long ol arapela rot. Sampela i no laik mekim olsem. Ol pablik tok ol i givim i kirapim ol man long ting olsem ol i laikim tumas Jehova na ol i bihainim tok bilong em, tasol samting ol i mekim i soim olsem ol i no laikim Jehova. Yumi save Jehova i no amamas long samting ol i mekim. Ol i lusim oganaisesen bilong en.​—⁠Mat. 10:​1-6; Apo. 5:42; 20:⁠20.

¹¹ Na tu, planti Sumatin Bilong Baibel i bin hatwok long autim tok long ol haus, moa yet taim dispela wok i nupela. Tasol ol i bihainim tok na stap gut long oganaisesen bilong Jehova. Bihain, em i isi moa long ol i autim tok long ol haus. Jehova i blesim ol tru. Yu save mekim wanem taim wokboi i gat savetingting i tokim yu long traim narapela rot bilong autim tok em yu no bin traim bipo? Yu save bihainim tok maski dispela rot bilong autim tok i hatwok long yu?

Taim Wanfamili i Lusim Jehova

12, 13. (a) Bilong wanem Jehova i tokim yumi long “rausim man nogut” i stap namel long yumi? (b) Wanem samting inap givim hatwok long papamama Kristen?

¹² Yumi wanbel olsem bilong amamasim Jehova,  yumi mas bihainim tok bilong em long i stap klin long olgeta samting. (Ritim Taitus 2:​14.) Tasol sampela samting inap kamap na i hatwok long yumi bihainim dispela tok. Olsem: Tupela marit Kristen, husat i stap gut long God, ol i gat wanpela pikinini man tasol na em i lusim tok i tru. Em i laik “bihainim pasin bilong sin na kisim amamas bilong sotpela taim tasol,” na em i no laik stap pren bilong Jehova na papamama bilong em. Pasin bilong em i mekim na em i no inap stap insait long kongrigesen moa. So kongrigesen i rausim em long lain bilong God.​—⁠Hib. 11:25.

¹³ Papamama i bel hevi tru! Ol i save olsem Baibel i tok: “Lusim pasin bilong poroman wantaim wanpela man yupela i save kolim brata, husat i save mekim pasin pamuk, o gridi, o lotuim imis, o toknogutim narapela, o spak, o stil. Yupela i no ken kaikai wantaim kain man olsem.” Na Baibel i tok moa olsem: “Rausim man nogut i stap namel long yupela.” (1 Kor. 5:​11, 13) Na ol i kliagut olsem dispela tok “wanpela man” i makim tu ol wanfamili husat i no stap wantaim ol long haus. Tasol ol i laikim tru pikinini bilong ol, olsem na ol inap ting: “Mipela i mas toktok wantaim pikinini long olgeta taim. Sapos mipela i no toktok wantaim em, mipela i no inap helpim em long kam bek long Jehova.” b

14, 15. Papamama i mas tingim wanem samting sapos ol i tingting long toktok wantaim pikinini i raus?

¹⁴ Yumi sori long papamama i karim hevi. Pikinini bilong ol inap senisim pasin bilong em. Tasol laik bilong em long mekim yet pasin nogut i winim laik bilong em long stap wantaim papamama na kongrigesen. Papamama i laik helpim pikinini, tasol ol i no inap kontrolim samting em i laik mekim. Yumi pilim tru hevi bilong ol.

¹⁵ Brata na sista bilong yumi bai mekim wanem? Ol bai bihainim dispela tok bilong Jehova? Tru, ating i gat wan wan taim tasol we ol i mas toktok wantaim pikinini bilong ol long wanpela bikpela samting bilong famili. Tasol bai ol i ting i gat planti samting em ol i mas toktok wantaim em long en? Taim ol i wokim disisen bilong ol long dispela samting, ol i mas tingim laik bilong Jehova. Ol i mas tingim olsem Jehova i laik bai lain bilong en i stap klin. Em long dispela as tasol na em i tok “rausim man nogut” long kongrigesen. Na tu, em i laik bai man i mekim rong i senisim pasin bilong en na kam bek long kongrigesen. Olsem wanem papamama Kristen inap soim olsem ol i gat wankain tingting olsem Jehova?

16, 17. Yumi kisim wanem skul long eksampel bilong Aron?

¹⁶ Aron, brata bilong Moses, i kisim bikpela hevi long samting tupela pikinini man bilong em i mekim. Tupela pikinini bilong em, Nadap na Abihu i mekim ofa long pasin we Jehova i no orait long en. Jehova i salim paia i kam long heven na kilim ol. Tingim bikpela pen na hevi Aron i karim. Em i no inap toktok moa wantaim ol pikinini. Ol i dai pinis. Tasol i gat narapela samting i givim bikpela hevi moa long Aron na famili bilong en. Moses i tokim Aron na ol arapela pikinini man bilong en long ol i no ken krai sori. Moses i tok: “Yupela i mas komim gras long olgeta de.  . . . Na yupela i no ken brukim klos bilong makim sori bilong yupela. Sapos yupela i bihainim pasin bilong sori, orait bai Bikpela i kilim yupela i dai, na bai Bikpela i kros nogut long olgeta manmeri bilong yumi Israel.” (Wkp. 10:​1-6) Skul yumi kisim i klia tru. Yumi mas laikim Jehova moa yet, winim ol wanblut husat i no stap gut long Jehova.

¹⁷ Long nau, Jehova i no save kilim i dai wantu ol man i no bihainim ol lo bilong em. Em i save mekim pasin laikim long ol na givim rot long ol long lusim pasin nogut. Tasol Jehova i gat wanem tingting long ol papamama husat i no bihainim tok bilong en na ol i ting i gat planti samting em ol i mas toktok long en wantaim rauspela pikinini?

18, 19. Wanem ol gutpela samting inap painim famili sapos ol i stap gut long Jehova?

¹⁸ Planti rauspela i tok ol i kam bek long kongrigesen bikos ol pren na famili bilong ol i stap gut long Jehova na i no toktok long ol. Olsem, wanpela yangpela meri i tokim ol elda olsem samting i mekim na em i senisim pasin bilong en, em pasin brata bilong em i bin mekim long en. Taim susa i raus, brata i stap gut long Jehova na bihainim ol tok bilong Jehova. Dispela i mekim na yangpela meri i laik kam bek long kongrigesen.

¹⁹ Yumi mas mekim wanem? Yumi mas bihainim tok bilong Jehova long olgeta samting long laip bilong yumi. Yumi gat sin, olsem na sampela taim em bai hatwok. Tasol yumi mas bilip strong olsem samting Jehova i tokim yumi long mekim, oltaim dispela i nambawan gutpela rot long bihainim.

“Tok Bilong God i Gat Laip”

20. Tok bilong Hibru 4:12 inap makim wanem tupela samting? (Lukim futnot.)

²⁰ Long Hibru 4:​12, taim Pol i tok olsem “tok bilong God i gat laip,” em i no tok long Baibel. c Ol narapela ves long dispela sapta i soim olsem em i stori long ol tok promis bilong God. Pol i laik kamapim olsem, oltaim ol tok promis bilong God i save kamap tru. Jehova i stori long tok bilong em, olsem: “Tok bilong mi bai i no inap kam bek nating long mi. Nogat. Em bai i mekim ol samting i kamap olsem mi tok.” (Ais. 55:11) Sapos God i no truim ol tok promis bilong em long taim yumi yet i laikim, orait yumi mas stap isi na wet. Yumi ken bilip tru olsem Jehova i wok long inapim ol samting em i tingting pinis long mekim.​—⁠Jon 5:17.

21. Olsem wanem Hibru 4:12 inap helpim ol lapun long mekim yet wok bilong Jehova?

²¹ Planti bilong “bikpela lain manmeri” ol i bin mekim wok bilong Jehova inap planti yia. (Rev. 7:⁠9) Ol i no ting ol bai go lapun long dispela taim nogut bilong nau. Tasol ol i traim bes bilong ol long mekim yet wok bilong Jehova. (Sng. 92:14) Ol i save olsem tok bilong God i gat laip na ol promis bilong Jehova bai kamap tru. (Hib. 4:12) Ol i save em i wok long inapim ol samting em i tingting pinis long mekim long dispela graun na long ol man. Samting God i tok long mekim em i bikpela samting long em, na em i amamas taim yumi soim olsem em i bikpela samting long yumi tu. Nau long dispela namba 7 de bilong malolo, i no gat wanpela samting inap pasim Jehova long mekim ol samting em i tok long mekim. Em i save olsem lain bilong em bai mekim ol wok i stret wantaim ol samting em i tingting pinis long mekim. Olsem wanem long yu? Yu go insait pinis long malolo bilong God?

[Ol Futnot]

Yu Tingim Yet?

• Yumi mas mekim wanem bilong go insait long malolo bilong God?

• Taim yumi kliagut long tok bilong Baibel long ol samting God i laik bai yumi mekim, olsem wanem yumi soim olsem yumi laik amamasim God?

• Wanem samting inap kamap na em i hatwok long bihainim tok bilong Jehova? Tasol bilong wanem em i bikpela samting long bihainim tok bilong em?

• Tok bilong Hibru 4:12 inap makim wanem tupela samting?

[Askim Bilong Stadi]

[Piksa long pes 31]

Papamama i bel hevi tru!