“Was i Stap” Bilong Wanem Em i Bikpela Samting?

“WANEM sain bai kamap bilong soim olsem yu kam i stap na pinis bilong dispela taim i kamap pinis?” (Mat. 24:⁠3) Bilong bekim dispela askim, Jisas i tokaut long ol disaipel long wanpela sain bai kamap, dispela sain bai stap ples klia, bai i gat planti samting i insait long en, na em bai isi long luksave long en. Tok Jisas i mekim i stap long Matyu sapta 24, Mak sapta 13, na Luk sapta 21. Jisas i tok moa: “Yupela i mas was i stap.”​—⁠Mat. 24:⁠42.

Sapos sain bai stap ples klia tru, orait bilong wanem Jisas i tok long was i stap? Tingim tupela samting. Namba 1, ol samting bilong pulim tingting inap mekim na sampela bai sakim dispela sain, na bai ol i no tingting strong long pas gut wantaim God na was i stap. Namba 2, ating Kristen i luksave long sampela mak bilong dispela sain, tasol ples em i stap long en i no gat hevi. Ating em bai ting olsem “traipela hevi tru”​—⁠em laspela hap bilong tok profet bilong Jisas⁠—​i stap longwe yet na i no gat wok long “was i stap.”​—⁠Mat. 24:⁠21.

“Ol i No Luksave”

Jisas i kirapim ol disaipel bilong em long tingim ol lain i stap long taim bilong Noa. Wok autim tok bilong Noa, wok bilong wokim sip, na pasin nogut long taim bilong em, ol dispela samting i stap ples klia. Tasol klostu olgeta man i “no luksave long ol samting i wok long kamap.” (Mat. 24:​37-39) Ol man i gat wankain tingting long ol tok lukaut i kamap long nau. Olsem: Ol sain i makim spit bilong kar i stap ples klia, tasol planti man i sakim. Olsem na ol man i ting ol i mas putim ol hamp long rot bilong fosim ol man long draiv isi. Wankain samting tu inap kamap long wanpela Kristen, ating em i luksave long sain bilong las de, tasol ol samting em i insait long en i soim olsem em i no tingim samting dispela sain i makim. Dispela samting i bin kamap long Arielle, wanpela tineja bilong Wes Afrika.

Arielle i save amamas long lukim ol meri i pilai hanbal long TV. Taim skul bilong em i kamapim wanpela tim bilong pilaim hanbal, laik bilong em long pilai i mekim na em i no tingting tumas long ol samting we inap bagarapim pasin bilong em long pas gut wantaim Jehova. Em i putim nem long kamap goli. Wanem samting i kamap? Arielle i tok: “Sampela wanpilai bilong mi i gat ol boipren husat i save smok na kisim ol drak. Ol wanpilai i tok bilas long mi bikos mi stap narapela kain, tasol mi ting mi inap karim dispela hevi. Tasol mi kirap nogut olsem gem yet i wok long bagarapim pasin bilong mi long pas gut wantaim Jehova. Olgeta tingting bilong mi i stap long hanbal tasol. Long taim bilong ol miting Kristen, mi save salim tingting i go long pilaim hanbal. Pasin Kristen bilong mi tu i wok long bagarap. Bipo mi amamas long pilai, tasol nau mi laik tru long win tasol. Bilong inapim laik bilong mi long win mi save prektis planti. Mi kisim planti presa. Na hanbal i mekim na mi lusim sampela pren.

 “Mi luksave long hevi bilong mi taim narapela tim i kisim penolti sot long wanpela gem. Mi stap redi long pasim dispela penolti sot. Na mi kirap beten long Jehova long helpim mi pasim dispela sot! Dispela samting i mekim mi luksave olsem pasin bilong mi long givim bel long lotu i go slek. Orait mi mekim wanem bilong pas gut gen wantaim Jehova?

“Mi bin lukim DVD Young People Ask​—⁠What Will I Do With My Life?  a Tasol mi ting i gutpela long lukim gen na tingim tru tok bilong en. Mi pilim olsem hevi bilong mi i wankain olsem bilong André, em yangpela man long dispela DVD. Mi tingim moa yet tok wanpela elda i bin mekim long André, em i tokim André long ritim na skelim long bel tok bilong Filipai 3:⁠8. Mi bihainim dispela tok na mi lusim tim.

“Dispela i kamapim bikpela senis long mi! Pasin bilong mi long resis wantaim narapela na presa bilong dispela samting i pinis. Mi kisim bikpela amamas na mi pas gut moa wantaim ol pren Kristen bilong mi. Ol wok lotu i kamap bikpela samting moa long mi. Mi putim tingting olgeta i go long ol miting na mi amamas. Wok autim tok bilong mi i kamap gutpela moa. Nau mi save mekim wok olsem painia haptaim.”

Sapos wanpela samting i pulim tingting bilong yu na i kirapim yu long sakim sain Jisas i givim long yumi, orait mekim sampela bikpela senis, olsem Arielle i bin mekim. Ating yu ken traim ol dispela samting hia. Skelim Watch Tower Publications Index, em sampela i kolim olsem mep bilong painim ol samting i dia tumas. Bai yu painim ol gutpela skultok na stori bilong ol samting ol man i bin mekim taim traim i painim ol. Kisim bikpela helpim long ol miting Kristen long rot bilong redi gut na raitim sampela bikpela tok. Sampela i pilim olsem pasin bilong sindaun long fran i helpim ol. Taim brata i givim askim, traim long kirap hariap long bekim tok. Na tu, was i stap long rot bilong skelim ol nius i kamap long TV o redio samting i stret wantaim ol mak bilong sain na ol arapela samting i makim “taim bilong las de.”​—⁠2 Tim. 3:​1-5; 2 Pita 3:​3, 4; Rev. 6:​1-8.

‘Yupela i Mas Redi i Stap’

Sain bilong las de i kamap long “olgeta hap bilong graun.” (Mat. 24:​7, 14) Planti milion manmeri i stap long ol hap we i gat ol bikpela sik, bikpela hangre, guria, na ol arapela hevi em Baibel i tok profet long en. Tasol planti arapela i stap long ol hap we i no gat planti hevi tumas. Sapos yu yet i no bin kisim hevi long sampela samting i insait long dispela sain, orait yu ting taim bilong traipela hevi i stap longwe yet? Dispela i no savetingting.

Tingim tok profet bilong Jisas long “ol bikpela sik na bikpela hangre.” (Luk 21:11) Em i no tok ol dispela samting bai kamap long olgeta hap long wankain taim o skel bilong ol hevi bai wankain. Nogat, em i tok ol dispela samting bai kamap “long narapela narapela hap.” So yumi no ken ting wankain samting bai kamap long olgeta hap long seim taim. Na tu, bihain liklik long Jisas i stori long ol bikpela hangre, em i tok olsem sampela bilong lain bilong em bai i gat wok long abrusim pasin bilong kaikai planti tumas. Em i tok: ‘Was gut long yupela yet, nogut pasin bilong kaikai planti tumas i daunim yupela.’  (Luk 21:34) Olsem na ol Kristen i no ken ting olgeta samting bilong dispela sain bai kamap long ol. Jisas i tok: “Taim yupela i lukim ol dispela samting i kamap, yupela i mas save olsem Kingdom bilong God i kam klostu.” (Luk 21:31) Long rot bilong redio, TV, na Intenet, yumi inap lukim olgeta samting bilong dispela sain, maski ol i kamap long hap bilong yumi o nogat.

Tingim tu olsem Jehova i bin makim pinis ‘de na aua’ dispela traipela hevi bai kirap. (Mat. 24:36) Ol samting i wok long kamap long graun bai i no senisim taim em i bin makim.

Jisas i tokim ol Kristen long olgeta hap: “Yupela tu i mas redi i stap.” (Mat. 24:44) Oltaim yumi mas redi i stap. Tru, yumi no inap mekim wok bilong lotu inap 24 aua long olgeta de. Na tu, i no gat wanpela bilong yumi inap save yumi bai bisi long mekim wanem wok taim traipela hevi i kirap. Ating sampela bai wok long gaden o mekim ol wok long haus. (Mat. 24:​40, 41) Olsem na yumi mas mekim wanem bilong soim olsem yumi stap redi?

Emmanuel na Victorine wantaim 6-pela pikinini meri bilong ol i stap long wanpela hap long Afrika we ol i no pilim tumas bikpela hevi bilong ol samting i insait long dispela sain. Olsem na ol i pasim tok long stori long sampela tok bilong Baibel long olgeta de bilong helpim ol long redi i stap. Emmanuel i tok: “Mipela i bin hatwok long makim taim i stret long mipela olgeta. Bihain mipela i makim hap aua long moning kirap long 6 klok. Bihain long mipela i skelim teks bilong de, mipela i redim sampela paragraf bilong buk ol i makim bilong stadi long kongrigesen namel long wik.” Olsem wanem? Dispela i helpim ol long was i stap? Yes! Emmanuel em kodineta bilong lain elda bilong kongrigesen. Victorine i save mekim wok painia haptaim na em i bin helpim planti man long kisim tok i tru. Ol pikinini meri bilong ol i wok long pas gut moa wantaim Jehova.

Jisas i tokim yumi: “Yupela i mas was i stap, no ken slip.” (Mak 13:33) No ken larim wanpela samting i pulim tingting bilong yu na daunim pasin bilong yu long was i stap. Yumi mas bihainim pasin bilong Arielle na tingim ol gutpela skultok yumi kisim long ol buk na nius bilong yumi na ol miting bilong kongrigesen. Na olsem famili bilong Emmanuel, traim long mekim ol samting long olgeta de bilong soim olsem yu redi na “was i stap.”

[Futnot]

[Piksa long pes 4]

Pasin bilong stori long sampela tok bilong Baibel long olgeta de i helpim Emmanuel na famili bilong em long “redi i stap”