Ol i No Surik Long Autim Gutnius!

Ol Kristen tru i kamapim olsem ol i gat strongpela bel na ol i no save surik taim ol arapela i birua long ol. Ol buk olsem “Bearing Thorough Witness” About God’s Kingdom na buk Jehovah’s Witnesses—Proclaimers of God’s Kingdom i stori long dispela. Olsem ol wanbilip bilong yumi long taim bilong ol aposel, yumi save beten askim Jehova long givim holi spirit long yumi na long helpim yumi long autim tok bilong em na i no pret.—Apo. 4:23-31.

Wanpela brata i stori long wok autim tok long taim bilong Wol Woa 1 olsem: “Ol wokman bilong God i wok strong long tilim buk The Finished Mystery, em volium 7 bilong ol buk Studies in the Scriptures. Ol i tilim planti tru. Ol i tilim Kingdom Nius Namba 1 long 1918. Bihain ol i tilim Kingdom Nius Namba 2, we i stori long as na gavman i laik tambuim dispela buk. Na bihain ol i tilim Kingdom Nius Namba 3. Ol Kristen God i bin makim i bin tilim planti bilong ol dispela buk na nius. Ol i mas i gat bilip na strongpela bel bilong tilim ol Kingdom Nius.”

Long nau ol nupela pablisa i save kisim trening long mekim wok autim tok, tasol long bipo i no olsem. Wanpela brata bilong Polan husat i stap long Amerika, i tingim namba 1 taim em i autim tok long 1922, em i tok: “Mi no save long pasin bilong tilim ol nius, na tu, mi no save tumas long tok Inglis, na mi wan i sanap na paitim dua bilong ofis bilong wanpela dokta. Wanpela nes i opim dua. Mi no lusim tingting long samting i bin kamap, long wanem, mi saikap na mi pret wantaim. Taim mi opim beg, olgeta buk i pundaun klostu long lek bilong nes. Mi no inap tingim tok mi mekim, tasol mi bin tilim wanpela buk long em. Taim mi lusim dispela ofis, mi pilim olsem mi gat strongpela bel na Jehova i blesim mi. Long dispela de mi bin tilim planti buklet long dispela strit we i gat planti bisnis.”

Wanpela sista i tok: “Long 1933 samting, planti brata i yusim ol kar i gat spika bilong autim tok.” Wanpela taim, em yet wantaim tupela marit Witnes i autim tok long ples maunten bilong California, Amerika. Em i tok: “Brata i kisim kar i go antap long maunten, na mipela i stap daunbilo long taun. Taim em i kirap pilaim toktok ol i rekodim, i kain olsem tok i kam long heven. Ol manmeri bilong taun i wok long painim dispela brata, tasol ol i no inap. Taim rekoding i pinis, mipela i autim tok long ol manmeri. Mi bin raun long tupela narapela kar i gat spika, na mi ken tok olsem planti man i no gat laik long harim tok mipela i autim. Tasol maski i olsem, ol dispela tok i kamap long yau bilong ol na ol i no inap pasim. Mipela i luksave olsem Jehova i stiaim mipela long yusim ol samting bilong mekim wok autim tok long taim i stret. Bilong autim tok long kain pasin olsem,  mipela i mas i gat strongpela bel, tasol wok i karim kaikai na Jehova i kisim biknem.”

Taim mipela autim tok long 1930 i go inap 1940 samting, mipela yusim ol masin pikap na ol tok bilong Baibel ol i bin rekodim. Wanpela meri Kristen i tok: “Wanpela yangpela sista i autim tok long ol haus wantaim masin pikap. Long wanpela haus em sanap long veranda na kirap pilaim rekoding. Papa bilong haus i belhat na kikim dispela pikap na pikap i punduan long graun. Tasol masin i no bruk. Tripela man husat i sindaun long kar na kaikai lans i lukim samting i bin kamap. Ol i singautim sista i kam pilaim rekoding long ol, na ol i kisim ol buk samting long em. Dispela i mekim na sista i no tingim pasin nogut narapela man i bin mekim long em.” Ol manmeri i autim tok i mas i gat strongpela bel bilong karim ol kain hevi olsem.

Dispela sista i tok moa olsem: “Mi tingim taim mipela i kirap tilim ol nius long rot, em long 1940. Paslain long 1940 mipela i bin holim ol sainbot na mats. Ol sainbot i gat tok olsem ‘Ol Lotu i Olsem Trap Bilong Giamanim Yu’ na ‘Mekim Wok Bilong God na King Krais Jisas.’ Long seim taim, mipela i tilim ol liklik nius i no gat pe long ol man. Ol man bilong autim tok i mas i gat strongpela bel bilong mekim ol dispela kain wok, tasol long rot bilong dispela wok ol manmeri i tingim nem bilong Jehova na lain bilong em.”

Narapela sista i tok: “Em hatwok long mekim wok magasin long ol liklik taun. Long dispela taim ol man i birua tru long ol Witnes. . . . Mipela i mas i gat strongpela bel long sanap long kona na holim ol magasin na kolim ol tok ol brata i laik bai mipela i mekim. Tasol klostu long olgeta Sarere, mipela i mekim dispela wok. Sampela taim ol man bai mekim gutpela pasin long mipela. Na sampela taim ol man husat i kros long mipela bai raunim mipela, olsem na mipela i mas lusim ol isi tasol na bai ol i no mekim nogut long mipela.”

Maski ol man i mekim nogut long ol Witnes Bilong Jehova long taim bilong Wol Woa 2, ol i strongim bel na autim tok. Insait long 43 de, kirap long Disemba 1, 1940, i go Janueri 12, 1941, moa long 50,000 pablisa long Amerika i tilim klostu 8 milion buklet. Ol i kolim dispela haptaim olsem Taim Bilong “Strongim Bel” na Autim Tok.

Planti lapun insait long oganaisesen bilong God inap tingim yet ol traim i bin kamap long bipo we ol i mas strongim bel. Sampela inap tingim tok ol i bin mekim inap planti yia, em tok i kamapim pasin bilong ol long strongim bel na no ken pret, em olsem, Karim pait i go inap long geit! Tok em God i laik bai yumi autim paslain long dispela taim nogut bilong nau i pinis, em yumi no save. Tasol Jehova bai helpim yumi, na long dispela rot yumi bai autim tok bilong em wantaim bilip na strongpela bel.

[Rait long pes 9]

Kirap long bipo yet na i kam inap nau ol lain i autim tok long Kingdom i mas i gat strongpela bel