Stori bilong Leonard Smith

Taim mi yangpela tineja, 2-pela skripsa i kirapim tru tingting bilong mi. Nau, 70 yia bihain, mi tingim yet fes taim mi kliagut long mining bilong Sekaraia 8:23. Skripsa i stori long “10-pela man” i “holim wanpela Juda man.” Ol i tokim dispela Juda man: “Mipela i harim olsem God i stap wantaim yupela Juda. Olsem na mipela i laik kamap wanlain wantaim yupela.”

MAN Juda i piksaim ol Kristen God i bin makim, na “10-pela man” i piksaim “ol arapela sipsip,” o “ol Jonadap,” em nem ol i yusim long bipo. a (Jon 10:16) Taim mi kliagut long dispela, mi luksave olsem bilong kisim laip oltaim long graun, em samting mi wet long en, mi mas sapotim gut dispela lain God i makim.

Na tu, tok piksa bilong Jisas long “ol sipsip” na “ol meme,” i stap long Matyu 25:31-46, i kirapim tingting bilong mi. “Ol sipsip” i makim ol man husat i winim kot long taim bilong pinis, long wanem, ol i mekim gut long ol brata bilong Krais husat i stap yet long graun. Mi, olsem wanpela yangpela Jonadap, i toktok long mi yet olsem, ‘Len, sapos yu laik bai Krais i tingim yu olsem wanpela sipsip, yu mas sapotim ol brata bilong en, em God i bin makim, olsem stap aninit long wok bos bilong ol bikos God i stap wantaim ol.’ Dispela save i stiaim mi winim 70 yia.

‘WANEM WOK BILONG MI?’

Mama i baptais long 1925 insait long haus bung long Betel. Nem bilong dispela haus em London Tabernacle, na ol brata long dispela hap i save bung long en. Mi bon long Oktoba 15, 1926. Long Mas 1940, mi kisim baptais long wanpela kibung long Dover, em taun i stap long nambis bilong Inglan. Laik bilong mi long tok i tru bilong Baibel i go bikpela. Mama em wanpela Kristen God i makim, olsem na em i fes wan bilong dispela lain mi wok wantaim. Long dispela taim papa na bikpela susa i no lotuim Jehova. Mi na mama i go long Gillingham Kongrigesen long saut-is Inglan, na planti Kristen God i makim i save go long dispela kongrigesen. Mama i stap olsem gutpela piksa long pasin bilong givim bel long autim tok.

Wanpela kibung i bin kamap long Septemba 1941, long taun Leicester, na i gat wanpela tok i stori long husat i mas i stap nambawan bos bilong heven na graun, nem bilong tok em “Stap Gut.” Dispela tok i helpim mi long kliagut olsem yumi insait long dispela tok Satan i sutim long Jehova. Olsem na yumi mas stap gut long Jehova na sapotim wok bilong em olsem King Bilong Heven na Graun.

Long dispela kibung, ol i strongim pasin bilong mekim wok painia, na ol i kirapim ol yangpela long putim wok painia olsem mak bilong winim. Wanpela tok, “Wok Bilong Painia Insait Long Oganaisesen,” i kirapim mi long askim mi yet olsem, ‘Wanem wok bilong mi?’ Dispela kibung i kirapim mi  long bilip tru olsem mi gat wok, olsem wanpela Jonadap, long mekim olgeta samting mi inap mekim long wok autim tok bilong helpim ol Kristen God i bin makim. Long dispela taim stret, mi putim aplikesen long mekim wok painia oltaim.

WOK PAINIA LONG TAIM BILONG WOA

Long Disemba 1, 1941, taim mi gat 15 krismas, ol i makim mi long mekim wok painia salim. Mama em fes poroman bilong mi long mekim wok painia, tasol bihain long wanpela yia, sik i mekim na em i mas lusim wok painia. Brens ofis long London i makim Ron Parkin long wok wantaim mi. Long nau, dispela brata i stap long Brens Komiti bilong Pueto Riko.

Ol i salim mipela i go long 2-pela taun long nambis, em Broadstairs na Ramsgate long hap bilong Kent, we mipela i rentim wanpela rum. Long dispela taim, ol painia salim i save kisim 18 kina long mun. So taim mipela baim pinis rent, mipela i gat liklik mani tasol bilong baim kaikai samting, na sampela taim mipela i no save mipela bai kisim kaikai olsem wanem. Tasol long olgeta taim Jehova i lukautim mipela long ol samting mipela i nidim.

Mipela i raun planti long baisikol, tupela baisikol i pulap long kago na i gat strongpela win i kam long Solwara Notsi, olsem na mipela i mas taitim bun long ronim baisikol. Long dispela taim ol balus bilong Jemani i tromoi ol bom, na tu, ol i sutim ol V-1 roket bom we i flai klostu tru long Kent na i go bomim London. Wanpela taim mi mas wantu lusim baisikol na kalap i go long baret taim wanpela bom i flai antap tasol long het bilong mi na i go pairap long wanpela hap graun i stap klostu. Maski i olsem, mipela i amamas long ol yia mipela i painia long Kent.

MI KAMAP WANPELA “BETEL MANGI”

Planti taim mama i save amamas taim em i stori long Betel. Em i save tok, “Mi laik tru long yu mas kamap wanpela Betel mangi.” So mi amamas na kirap nogut taim mi kisim invatesen long go wok 3-pela wik long Betel long London, em long Janueri 1946. Bihain long 3-pela wik, Pryce Hughes, brata i lukautim brens, i askim mi long stap long Betel. Trening mi kisim long Betel i stiaim pasin mi bihainim long laip olgeta.

Long dispela taim i gat 30 bratasista i stap long London Betel famili, planti em ol yangpela singel brata na sampela em ol i bilong lain God i makim, olsem Pryce Hughes, Edgar Clay, na Jack Barr husat bihain i kamap memba bilong Gavening Bodi. Em gutpela samting long sapotim ol brata bilong Krais, olsem wanpela yangpela husat i stap aninit long wok bos bilong ol dispela “strongpela pos”!—Gal. 2:9.

Wanpela de, wanpela brata i tokim mi olsem wanpela sista i stap long fran dua bilong Betel na em i laik lukim mi. Mi kirap nogut long lukim mama na em i holim wanpela presen. Em i tok em i no laik kam insait na pasim mi long wok, tasol em givim presen long mi na go. Dispela presen em wanpela gutpela saket. Pasin laikim bilong em i kirapim mi long tingim Hana husat i bin bringim saket long Samuel taim em i mekim wok long haus lotu sel.—1 Sml. 2:18, 19.

GILEAT—EM NARAPELA KAIN TRU

Long 1947, ol i singautim 5-pela bilong mipela long Betel long go long Skul Gileat long Amerika, na long yia bihain mipela i insait klas namba 11. Taim mipela i kamap  long New York we skul i stap long en, em kol nogut tru. Mi amamas tru long gutpela saket mama i bin givim long mi!

Dispela 6-pela mun mi stap long Gileat, em narapela kain tru. Pasin bilong stap namel long ol klasmeit i kam long 16 narapela narapela kantri i opim tingting bilong mi. Skul i helpim mi long pas gut moa wantaim Jehova, na tu, pasin bilong bung wantaim ol strongpela Kristen i bin helpim mi. Wanpela klasmeit, em Lloyd Barry; na wanpela tisa, em Albert Schroeder; na John Booth, em wasman bilong Kingdom Fam (we Skul Gileat i kamap long en), olgeta i kamap memba bilong Gavening Bodi. Mi tingim tru gutpela skultok ol dispela brata i givim long mi na gutpela eksampel bilong ol long pas gut wantaim Jehova na oganaisesen bilong em.

WOK SEKIT NA BIHAIN GO BEK LONG BETEL

Taim mi lusim Gileat, ol i makim mi long mekim wok sekit long Ohio, long Amerika. Maski mi gat 21 krismas tasol, ol brata i amamas long mi givim bel long wok. Long dispela sekit, mi kisim planti skul long ol brata i gat save long mekim wok.

Sampela mun bihain, ol i singautim mi i kam bek long Brooklyn Betel long kisim sampela moa trening. Long dispela taim, mi bungim ol strongpela pos olsem Milton Henschel, Karl Klein, Nathan Knorr, T. J. (Bud) Sullivan, na Lyman Swingle, em olgeta i bin stap memba bilong Gavening Bodi. Mi kisim strong taim mi lukim wok ol i mekim na pasin Kristen ol i bihainim. Pasin bilong mi long bilip long oganaisesen bilong Jehova i go bikpela moa yet. Bihain ol i salim mi i go bek long Yurop long mekim wok.

Mama i dai long Februeri 1950. Bihain long fiuneral, mi toktok gut wantaim susa bilong mi, Dora, na papa bilong mi. Mi askim tupela olsem ol bai mekim wanem long tok i tru, long wanem, nau Mama i dai na mi no stap moa wantaim ol. Ol i save long Harry Browning na rispektim em, em wanpela lapun brata bilong liklik lain, na ol i orait long toktok wantaim em long tok i tru. Insait long wanpela yia bihain, Papa na Dora i kisim baptais. Bihain ol i makim Papa long stap wanpela sevan long Gillingham Kongrigesen. Bihain long Papa i dai, Dora i maritim wanpela gutpela elda, Roy Moreton, na Dora i stap gut long Jehova inap long em i dai long 2010.

HELPIM LONG FRANS

Long skul mi bin stadi long tok Frans, Jeman, na Latin. Na long dispela 3-pela tokples, tok Frans i givim hatwok moa long mi. So mi tingting planti taim ol i askim mi long go helpim wok long Paris Betel long Frans. Long dispela hap mi bin amamas long wok wantaim brata i lukautim brens, Henri Geiger, em lapun brata bilong liklik lain. Sampela taim wok mi mekim i no isi, na mi mekim planti popaia, tasol mi kisim planti save long pasin bilong ol man long wok wantaim.

Na tu, ol i laik wokim namba 1 kibung intenesenel long Paris bihain long woa, em long 1951, na mi helpim wok bilong oganaisim dispela bung. Wanpela yangpela wasman raun, Léopold Jontès, i kam long Betel bilong helpim mi. Bihain ol i makim Léopold long holim wok olsem wasman bilong brens. Mipela mekim kibung long stediam Palais des sports, em stap klostu long Eiffel Taua. Ol bratasista i kam long 28 narapela narapela kantri. Long laspela de bilong kibung, 6,000 Witnes bilong Frans i amamas tru long lukim 10,456 i kam bung!

Taim mi stap nupela long Frans, tok Frans bilong mi i no gutpela tumas. Narapela samting i putim hevi long mi, em mi no laik tru long popaia taim mi mekim tok Frans, olsem na mi no toktok tumas. Tasol  sapos yu no mekim ol popaia taim yu laik kolim sampela tok, orait i no gat man bai stretim yu na yu no inap lain gut long kolim stret ol tok.

Bilong stretim dispela hevi mi go long wanpela skul we i save lainim ol man long tok Frans. Mi save go long ol klas long ol nait i no gat ol miting. Mi kirap laikim tru tokples Frans, na insait long planti yia mi laikim moa yet. Dispela em i gutpela samting bikos mi inap helpim wok bilong tanim tok long brens ofis bilong Frans. Bihain, mi kamap trensleta, mi save tanim tok Inglis i go long tok Frans. Em wanpela gutpela wok mi kisim long helpim ol brata long olgeta hap husat i save mekim tokples Frans long kisim ol gutpela tok em gutpela wokboi i givim yumi.—Mat. 24:45-47.

MARIT NA SAMPELA GUTPELA WOK MOA

Long 1956, mi maritim Esther, wanpela painia bilong Swiselan mi bin bungim sampela yia paslain. Mipela marit long Haus Kingdom klostu long London Betel (em olpela London Tabernacle, we mama i bin kisim baptais). Brata Hughes i bin mekim weding tok bilong mitupela. Mama bilong Esther i stap, na em tu wanpela bilong i go long heven. Marit i mekim na mi kisim wanpela gutpela poroman husat i stap gut long mi na mekim gut long mi. Na tu, mi inap lusim planti aua long toktok wantaim tambu bilong mi, em wanpela gutpela sista i save tingim tru ol samting bilong lotu. Mi mekim olsem i go inap long em i dai na pinisim wok bilong em hia long graun long 2000.

Bihain long weding, mi na Esther i no stap long Betel. Mi wok yet long tanim tok long Betel, na Esther i wok painia salim long hap klostu long Paris. Em i bin helpim sampela manmeri long i kamap ol wokboi bilong Jehova. Long 1964 ol i singautim mitupela long i go stap long Betel. Na long 1976, taim ol i kirap kamapim ol Brens Komiti, ol i makim mi long holim dispela wok. Insait long ol yia mitupela i marit, Esther i bin givim bel long sapotim mi.

“MI BAI I NO STAP OLTAIM WANTAIM YUPELA”

Insait long ol dispela yia, sampela taim mi go bek long hetkota long New York. Long kain taim olsem, mi bin kisim ol gutpela skultok long ol narapela narapela memba bilong Gavening Bodi. Olsem, wanpela taim mi tokaut olsem mi tingting planti olsem mi inap pinisim wanpela wok long taim stret o nogat. Brata Knorr i smail na tok: “No ken tingting planti. Yu wok tasol!” Bihain long dispela, taim wok i hip i stap, mi no tingting planti. Mi kirap mekim wanpela wok na taim mi pinisim dispela wok, mi kirap mekim narapela wok i go inap long olgeta wok i pinis. Na klostu long olgeta taim mi pinisim ol wok long taim stret.

Paslain liklik long em i dai, Jisas i tokim ol disaipel: “Mi bai i no stap oltaim wantaim yupela.” (Mat. 26:11) Yumi lain arapela sipsip i save tu olsem, ol brata bilong Krais em God i bin makim ol, bai ol i no inap stap oltaim wantaim yumi hia long graun. Olsem na mi pilim em wanpela gutpela samting tru, winim 70 yia, mi bin wok wantaim planti bratasista em God i bin makim ol—i olsem mi bin holim wanpela Juda man.

[Futnot]

[Rait long pes 21]

Brata Knorr i smail na tok: “No ken tingting planti. Yu wok tasol!”

[Ol Piksa long pes 19]

(Han kais) Mama na papa bilong mi

(Han sut) Long skul Gileat long 1948, mi werim saket Mama i bin givim mi

[Piksa long pes 20]

Tanim tok Brata Lloyd Barry i mekim long dedikesen bilong brens long Frans, 1997

[Ol Piksa long pes 21]

(Han kais) Mi na Esther long de mitupela i marit

(Han sut) Mitupela i autim tok