1. Long ol pas em Pol i raitim i go long ol kongrigesen, em i bin kolim wanem tok planti taim?

 LONG ol pas em aposel Pol i bin raitim i go long ol Kristen long taim bilong em, planti taim em i tok olsem em i laik tru bai God na Krais i orait long pasin ol kongrigesen i mekim. Olsem, em i rait long ol Galesia na i tok: “Ol brata, bikpela pasin helpim bilong Bikpela bilong yumi Jisas Krais i ken i stap wantaim yupela, long wanem, yupela i save kamapim ol gutpela pasin. Amen.” (Gal. 6:18) Taim em i tok “yupela i save kamapim ol gutpela pasin,” dispela i makim wanem samting?

2, 3. (a) Taim Pol i kolim dispela tok “pasin,” sampela taim dispela tok i makim wanem? (b) Long tingting yumi holim, yumi ken mekim wanem ol askim long yumi yet?

² Long dispela ves, Pol i kolim dispela tok “pasin,” na dispela i makim tingting o pasin bilong man long wokim tingting. Dispela i save stiaim tok o ol samting yumi mekim. Wanpela man inap i gat tingting we i mekim na em i stap isi, tingim tru ol narapela, helpim narapela, givim ol samting, na lusim rong bilong man. Baibel i tok i gutpela long man i gat “pasin isi na bel isi” na “i no save belhat kwik” na bai em inap bosim tingting na laik bilong em. (1 Pita 3:4; Snd. 17:27) Narapela man inap i gat tingting i mekim na em i kolim ol tok we i bagarapim bel bilong narapela o mekim em i tingting tumas long mani. Ating em i save bel hevi kwik o em i no laik bai narapela i tokim em long samting em i mas mekim. Sampela narapela i gat tingting doti, ol i sakim tok, na ol i bikhet long God.

³ Olsem na taim Pol i kolim kain tok olsem “bai Bikpela i ken stap wantaim yu, long wanem, olgeta laik na tingting bilong yu i stret,” em i kirapim ol brata long bihainim pasin bilong Krais na holim tingting em God i amamas long en. (2 Tim. 4:22; ritim Kolosi 3:9-12.) Long nau, i gutpela long askim yumi yet olsem: ‘Pasin bilong mi i soim olsem mi gat wanem kain tingting? Mi ken mekim wanem na bai mi holim  tingting em God i amamas long en? Mi ken mekim wanem bilong kirapim ol narapela long kongrigesen tu long mekim olsem?’ Olsem: Long ples ol sanplaua i kamap long en, kala bilong olgeta wan wan sanplaua i save helpim long mekim ples olgeta i luk nais. Olsem wanem? Yumi kain olsem wan wan bilong ol dispela plaua? Yumi helpim long mekim kongrigesen olgeta i luk nais? Yumi mas wok strong long mekim olsem. Yumi ken stori nau long olsem wanem yumi inap holim tingting em God i amamas long en.

4. “Tingting bilong dispela graun” i makim wanem samting?

⁴ Baibel i tokim yumi olsem: “Yumi no bin kisim tingting bilong dispela graun, nogat, yumi kisim holi spirit i kam long God.” (1 Kor. 2:12) “Tingting bilong dispela graun” i makim wanem samting? Em wankain tingting olsem Efesus 2:2 i kolim, olsem: “Bipo yupela i bin wokabaut long pasin bilong dispela graun, na dispela i stret long laik bilong hetman bilong dispela win i save bosim ol manmeri. Dispela win o tingting i wok nau insait long bel bilong ol pikinini bilong sakim tok.” Dispela “win,” o “tingting bilong dispela graun” i makim pasin bilong ol man long wokim tingting. Em i wankain olsem win i stap long olgeta hap. Olsem, planti man long nau i gat dispela kain tingting olsem, ‘No gat man bai tokim mi long wanem samting mi mas mekim!’ o, ‘Yu mas strongim sait bilong yu!’ Ol dispela manmeri em “ol pikinini bilong sakim tok” na ol i bilong dispela graun em Satan i bosim.

5. Pasin bilong sampela long Israel i bin soim olsem ol i gat wanem kain tingting?

⁵ Long bipo yet ol manmeri i bin holim ol kain tingting olsem. Long taim bilong Moses, Kora i bin bikhet long ol man i gat wok long bosim lain Israel. Em i bikhet moa yet long Aron na ol pikinini man bilong Aron, em ol i mekim wok pris. Ating Kora i lukim sampela popaia bilong ol. O ating em i ting Moses i makim ol long mekim ol gutpela wok, long wanem, ol i wanblut bilong em. Yumi no save long tingting bilong Kora, tasol yumi ken save olsem em i no holim moa wankain tingting olsem Jehova. Kora i no soim rispek long ol man Jehova i makim taim em i tok: “Pasin bilong yutupela i no stret.” Bihain em i askim olsem: “Bilong wanem yutupela i litimapim yutupela yet na bosim mipela?” (Nam. 16:3) Long wankain pasin, Datan na Abiram i komplein long Moses olsem ‘em i laik bosim ol.’ Taim Moses i askim ol long i go bungim em, ol i bikhet na tok: “Mitupela i no ken i kam”! (Nam. 16:12-14) Jehova i no amamas long pasin bikhet bilong ol, olsem na em i kilim i dai olgeta dispela bikhet lain.—Nam. 16:28-35.

6. Olsem wanem sampela man long taim bilong ol aposel i soim olsem tingting bilong ol i no stret? Ating ol i bin gat wanem tingting?

⁶ Long taim bilong ol aposel tu, sampela i sutim tok long ol man i holim wok insait long kongrigesen, “ol i no daun long ol man i gat namba.” (Jut 8) Ating ol dispela man i ting olsem ol yet inap tru long mekim sampela wok moa. Na ol i kirapim ol narapela tu na bai ol i no ken rispektim ol man em God i givim namba long ol long lukautim gut kongrigesen.—Ritim 3 Jon 9, 10.

7. Yumi mas was gut na abrusim wanem kain tingting?

⁷ Dispela kain tingting i no ken stap insait long kongrigesen, olsem na yumi olgeta i mas was gut na abrusim dispela kain tingting. Ol elda i no gutpela olgeta, wankain olsem ol hetman long taim bilong Moses na long taim bilong aposel Jon. Ol elda inap mekim ol popaia we yumi wan wan i no amamas long en. Sapos dispela kain samting i painim yumi, yumi no ken bihainim tingting bilong ol man bilong dispela graun na tok, “Ol i no bin skelim gut!” o, “Ol i mas stretim dispela brata!” Yumi mas tingim olsem i gat sampela kain liklik popaia em ol elda i mekim na Jehova inap lusim tingting long en. Olsem wanem? Yumi tu inap mekim olsem? Sampela husat i bin mekim ol bikpela rong, ol i no laikim sampela pasin bilong ol elda husat i kisim wok bilong helpim ol. Olsem na ol i no laik bung wantaim ol dispela elda. Ol i olsem sikman husat i no laik kisim marasin bilong oraitim sik bilong em, long wanem, em i no laikim pasin bilong dokta.

8. Wanem ol skripsa inap helpim yumi long holim stretpela tingting long ol elda long kongrigesen?

 ⁸ Yumi inap abrusim dispela kain tingting sapos yumi tingim olsem Jisas i “holim 7-pela sta long han sut bilong en.” Ol “sta” i makim ol elda em God i bin makim ol long holi spirit, na wanem tok i go long ol, dispela tok i go tu long olgeta arapela elda long ol kongrigesen. Jisas inap mekim wanem wanem samting em i laik mekim long ol “sta” i stap long han bilong em. (Rev. 1:16, 20) Jisas em i Het bilong kongrigesen, olsem na em i save gut long olgeta samting i kamap namel long ol elda. “Ai bilong en i lait olsem paia i lait strong tru” na em inap lukim olgeta samting. Olsem na sapos wanpela elda i mas kisim tok bilong stretim em, Jisas bai stiaim ol samting na dispela elda i kisim dispela tok long taim stret na long stretpela pasin. (Rev. 1:14) Inap long taim Jisas i mekim olsem, yumi mas rispektim ol elda em ol i stap long “han sut” bilong Jisas. Pol i tok: “Yupela i mas bihainim tok bilong ol man i go pas long yupela na stap aninit long ol. Oltaim ol i was long yupela, na bihain ol i mas bekim tok long God long dispela wok ol i bin mekim. Yupela i mas stap aninit long ol, bai ol i ken mekim dispela wok wantaim amamas na ol i no ken bel hevi. Sapos ol i bel hevi, dispela inap bagarapim yupela.”—Hib. 13:17.

9. (a) Taim ol i stretim wanpela Kristen, em inap kisim wanem kain tingting? (b) Yumi mas mekim wanem taim yumi kisim tok bilong stretim yumi?

⁹ Taim ol elda i stretim wanpela o pinisim sampela wok em i holim, pasin bilong dispela man inap soim olsem em i holim stretpela tingting o nogat. Long gutpela pasin, ol elda i bin stretim wanpela yangpela brata, long wanem, em i pilaim ol vidio gem i soim pasin bilong pait na bagarapim man. Tasol sori tru olsem em i no amamas long tok kaunsel em i kisim. Na tu, em i no mekim  ol samting em Baibel i tok long ol kongrigesen sevan i mas mekim, olsem na em i no inap stap moa olsem kongrigesen sevan. (Sng. 11:5; 1 Tim. 3:8-10) Bihain, dispela brata i tokim ol arapela olsem em i no wanbel long disisen bilong ol elda. Em i raitim planti pas i go long brens ofis na em i mekim ol tok i bagarapim ol elda. Na tu, em i traim long kirapim ol arapela long kongrigesen long rait i go long brens ofis. Tasol samting yumi mas tingim em olsem: Sapos yumi givim ol eskius long ol rong yumi mekim, yumi bai bagarapim bel isi i stap insait long kongrigesen na dispela i no inap helpim wanpela. Taim yumi kisim tok bilong stretim yumi, yumi mas tingim dispela olsem gutpela rot bilong kisim save long ol pasin kranki bilong yumi yet, na long pasin isi yumi mas redi long kisim tok bilong stretim yumi.—Ritim Krai 3:28, 29.

10. (a) Tok bilong Jems 3:16-18 i givim wanem skul long yumi long tingting i stret na tingting i no stret? (b) Wanem samting bai kamap taim yumi bihainim savetingting i kam long God?

¹⁰ Tok bilong Jems 3:16-18 i skulim yumi long wanem tingting i stret na wanem tingting i no stret long kamapim insait long kongrigesen. Em i tok: “Pasin bilong jeles na kirapim kros i save mekim ol samting i paul nabaut na i kamapim olgeta samting nogut tru. Tasol savetingting i kam long heven i mekim man i stap klin, dispela em i nambawan bikpela samting. Na tu, em i mekim man i stap wanbel wantaim ol arapela, bihainim pasin isi, na i mekim man i redi long bihainim tok, na marimari tru long narapela na kamapim ol gutpela pasin. Na man i bihainim savetingting i kam long heven em i save mekim wankain pasin long olgeta man, na em i no man bilong tupela maus. Ol man husat i kamapim pasin wanbel i olsem ol i planim samting long taim bilong bel isi na ol bai kisim stretpela pasin olsem kaikai.” Sapos yumi bihainim savetingting i kam long God, yumi bai bihainim ol pasin bilong em. Long dispela rot, yumi strongim narapela narapela long kamapim tingting i stret, na dispela bai kamapim bel isi insait long kongrigesen.

11. (a) Sapos yumi gat stretpela tingting, yumi no inap mekim wanem? (b) Yumi kisim wanem skul long pasin bilong Devit?

¹¹ Yumi mas tingim olsem Jehova i laik bai ol elda i “lukautim kongrigesen bilong God.” (Apo. 20:28; 1 Pita 5:2) Maski yumi mekim wok elda o nogat, yumi mas soim rispek long rot God i makim bilong mekim ol samting. Sapos yumi gat stretpela tingting, yumi no inap tingting tumas long holim namba o mekim wok bos. Taim King Sol bilong Israel i kirap long tingim olsem Devit inap kisim ples bilong em na kamap king, Sol “i ting long dispela samting na i bel nogut long Devit.” (1 Sml. 18:9) King Sol i no gat stretpela tingting na em i laik kilim Devit. Yumi no ken bihainim pasin bilong Sol na tingting tumas long holim namba, nogat, em i gutpela moa long bihainim pasin bilong Devit. Maski planti taim Devit i karim hevi long han bilong ol narapela, oltaim em i soim rispek long ol man em God i givim namba long ol long mekim wok.—Ritim 1 Samuel 26:23.

12. Yumi inap mekim wanem bilong helpim kongrigesen long holim yet pasin wanbel?

¹² Yumi olgeta i gat narapela narapela tingting, olsem na sampela taim yumi inap sikirapim bel bilong narapela. Dispela inap kamap namel long ol elda tu. Baibel i tokim yumi long wanem kain tingting yumi mas holim: “Yupela i mas go pas long givim ona long ol arapela wanbilip,” na “Yupela i no ken ting yupela yet i gat save.” (Rom 12:10, 16) Dispela i makim olsem yumi no ken strong olsem tingting bilong yumi yet i stret, nogat, yumi mas luksave olsem i gat planti narapela tingting em ol tu i stret. Sapos yumi wok strong long kliagut long tingting bilong ol narapela, yumi inap helpim kongrigesen long holim yet pasin wanbel.—Fili. 4:5.

13. Yumi mas mekim wanem bihain long yumi kamapim tingting bilong yumi? Wanem stori bilong Baibel i helpim yumi long save long samting yumi mas mekim?

¹³ Yu ting dispela i makim olsem yumi no ken kamapim tingting bilong yumi sapos yumi pilim olsem i gat hevi insait long kongrigesen? Nogat.  Long taim bilong ol aposel, i gat wanpela samting em planti long kongrigesen i no bin wanbel long en. Ol brata “i stretim rot long Pol na Barnabas na sampela arapela bilong ol long i go long ol aposel na ol hetman long Jerusalem long stretim dispela tok.” (Apo. 15:2) Olgeta wan wan bilong ol dispela brata i gat tingting bilong ol yet long wanem samting i stret long mekim. Taim olgeta i kamapim pinis tingting bilong ol na ol i mekim disisen wantaim helpim bilong holi spirit, ol i no strong moa long tingting bilong ol yet. Taim kongrigesen i kisim pinis pas i kamapim disisen, “ol i amamas long dispela tok bilong strongim ol” na ol “i kamap strong moa long bilip.” (Apo. 15:31; 16:4, 5) Long nau tu, taim yumi toktok pinis wantaim ol elda long samting yumi tingting planti long en, yumi mas bilip olsem ol bai skelim dispela samting na makim olsem ol bai mekim sampela samting, o nogat.

14. Long pasin pren bilong yumi wantaim ol narapela, olsem wanem yumi ken soim olsem yumi gat stretpela tingting?

¹⁴ Long pasin pren bilong yumi wantaim ol narapela, i gat planti rot bilong soim olsem yumi gat stretpela tingting. Olsem, yumi olgeta wan wan inap strongim pasin pren sapos yumi lusim kwik rong taim ol narapela i bagarapim bel bilong yumi. Tok Bilong God i tokim yumi olsem: “Yupela i mas wok yet long karim hevi narapela i putim long yupela na amamas long fogivim narapela, na mekim olsem maski sapos i gat as na wanpela i gat tok long narapela. Jehova i amamas long fogivim yupela, olsem na yupela tu i mas mekim wankain pasin.” (Kol. 3:13) Dispela tok, “sapos i gat as na wanpela i gat tok,” i kamapim olsem sampela taim i gat as na yumi no amamas long samting narapela i mekim long yumi. Yumi no ken larim ol liklik pasin kranki bilong ol narapela i sikirapim bel bilong yumi. Dispela inap bagarapim bel isi bilong kongrigesen. Mobeta yumi mas traim long bihainim pasin bilong Jehova na redi long lusim rong bilong ol brata na mekim yet wok bilong God wantaim ol.

15. (a) Stori bilong Jop inap givim wanem skul long yumi long pasin bilong lusim rong? (b) Olsem wanem beten inap helpim yumi long bihainim stretpela tingting?

¹⁵ Stori bilong Jop inap skulim yumi long pasin bilong lusim rong. I gat 3-pela man em ol inap mekim gut bel bilong Jop, tasol ol i kolim planti tok i bagarapim bel bilong em. Maski ol i mekim olsem, Jop i lusim rong bilong ol. Wanem samting i helpim em long mekim olsem? Em i “beten bilong helpim ol pren bilong en.” (Jop 16:2; 42:10) Taim yumi tingim ol narapela long beten bilong yumi, dispela bai senisim tingting yumi bin gat long ol. Taim yumi tingim olgeta bratasista long beten, yumi bai kisim wankain tingting olsem Jisas i gat long ol. (Jon 13:34, 35) Na tu, yumi mas beten na askim God long holi spirit. (Luk 11:13) Holi spirit bai helpim yumi long bihainim ol pasin Kristen insait long pasin pren yumi gat wantaim ol narapela.—Ritim Galesia 5:22, 23.

16, 17. Yu laik bihainim wanem kain tingting?

¹⁶ Taim yumi olgeta wan wan i wok strong long bihainim stretpela tingting, dispela bai helpim kongrigesen olgeta. Ating dispela stadi i bin helpim yu long tingim olsem yu inap stretim tingting bilong yu na strongim moa ol bratasista. Sapos olsem, orait larim Tok Bilong God i helpim yu long mekim ol senis. (Hib. 4:12) Pol, em i bin laik stap olsem gutpela piksa long ol kongrigesen, em i tok: “Maus bilong bel bilong mi i no gat tok. Tasol dispela i no makim olsem mi stretpela man, nogat. Man i gat wok long skelim mi em Jehova tasol.”—1 Kor. 4:4.

¹⁷ Yumi olgeta inap strongim narapela narapela long bihainim stretpela tingting insait long kongrigesen. Yumi ken mekim olsem taim yumi bihainim ol pasin bilong God na yumi no strong long bihainim ol tingting bilong yumi yet o ting olsem i stret long yumi kisim sampela wok moa. Sapos yumi lusim kwik rong bilong ol narapela na holim stretpela tingting long ol, orait pasin wanbel bai stap namel long yumi na ol bratasista. (Fili. 4:8) Yumi ken bilip tru olsem sapos yumi mekim ol dispela samting, orait ol pasin yumi kamapim bai amamasim Jehova na Jisas.—File. 25.