1, 2. Long laspela nait bilong Jisas long graun, em i skulim ol aposel long wanem samting?

 EM LASPELA nait bilong Jisas long laip bilong em long graun, na em i stap wantaim ol aposel bilong em long rum antap long wanpela haus long Jerusalem. Taim ol i kaikai i stap, Jisas i kirap rausim saket bilong em na i pasim hap taul long bel bilong em. Na em i kapsaitim wara long wanpela dis na kirap long wasim lek bilong ol disaipel na draim wantaim taul. Em i mekim pinis na em i pasim gen saket bilong em. Bilong wanem Jisas i daunim em yet na mekim dispela wok i no gat nem?—Jon 13:3-5.

² Jisas yet i tok olsem: “Yupela i kliagut long samting mi mekim long yupela? . . . Mi Bikpela na Tisa na mi wasim lek bilong yupela, olsem na yupela tu i mas wasim lek bilong ol arapela. Mi soim pasin long yupela, samting mi mekim long yupela, yupela tu i mas mekim.” (Jon 13:12-15) Taim Jisas i mekim dispela wok i no gat nem, em i lainim ol aposel bilong em long wanpela samting em ol i no inap lusim tingting long en, na dispela bai kirapim ol long mekim pasin daun.

3. (a) Long 2-pela taim, Jisas i mekim wanem bilong kamapim olsem pasin daun i bikpela samting? (b) Long dispela stadi, bai yumi stori long wanem samting?

³ Taim Jisas i wasim lek bilong ol aposel, dispela i no namba 1 taim em i skulim ol long mekim pasin daun, nogat. Wanpela taim, sampela aposel i soim pasin resis long husat i nambawan namel long ol, na Jisas i bringim wanpela pikinini i kam klostu long em, na i tokim ol: “Man i tingim nem bilong mi na mekim gut long dispela liklik pikinini, em i mekim gut long mi tu. Na man i mekim gut long mi, em i mekim gut tu long Man i salim mi i kam. Man i save daunim em yet namel long yupela, dispela man em i nambawan.” (Luk 9:46-48) Jisas i save olsem ol Farisi i laik tru long kisim biknem, na em i tok: “Man i litimapim em yet, em bai kisim  sem. Na man i daunim em yet, em bai kisim biknem.” (Luk 14:11) Dispela i kamapim klia olsem Jisas i laik bai ol man i bihainim em, ol i mas i gat pasin daun, olsem daunim ol yet, na ol i no gat pasin antap na pasin hambak. Orait nau, yumi ken skelim gut ol samting Jisas i mekim bilong kamapim pasin daun bambai yumi ken bihainim pasin bilong em. Yumi bai skelim tu olsem wanem dispela pasin bai helpim yumi yet na ol narapela tu.

4. Taim Pikinini tru bilong God i no kam yet long graun, olsem wanem em i mekim pasin daun?

⁴ Jisas em i dispela Pikinini tru bilong God na em i bin soim pasin daun tu paslain long em i kam long graun. Paslain long Jisas i kamap man long graun, em i bin stap planti yia long heven wantaim Papa bilong em. Buk Aisaia i kamapim olsem Pikinini i pas gut wantaim Papa, na i tok: “God, Bikpela i bin skulim mi long gutpela pasin bilong toktok, olsem na mi inap mekim gutpela tok bilong strongim bel bilong ol manmeri i no gat strong. Olgeta moning em i save mekim mi i laikim tumas long harim ol nupela samting em i laik skulim mi long en. Bikpela i opim yau bilong mi long harim tok bilong em, na mi no bikhet long em na mi no surik long wok em i laik givim mi.” (Ais. 50:4, 5) Pikinini Bilong God i kamapim pasin daun na i lain gut long ol samting Jehova i skulim em. Em i redi na i laik tru long kisim skul i kam long dispela trupela God. Yumi ken ting olsem Jisas i bin kisim gut skul long pasin bilong Jehova long kamapim pasin daun taim em i marimari long ol sin man!

5. Jisas em i nambawan ensel Maikel, na olsem wanem em i soim pasin daun taim em i tok pait wantaim Satan?

⁵ I no olgeta ensel long heven i gat pasin daun olsem Jisas. Dispela ensel husat i kamap Satan, em i no laik kisim skul long Jehova, nogat, em i kisim pasin bilong tingim em yet na pasin antap na em i bikhet long Jehova. Tasol Jisas i no tingting long kisim bikpela namba long heven winim namba em God i bin givim long em, na tu, em i no tingting long yusim namba bilong em long mekim wok nogut. Jisas em i dispela nambawan ensel Maikel, tasol taim em “i toktok wantaim Satan na tok pait long bodi bilong Moses,” em i no mekim samting em i no gat namba long mekim. Pikinini Bilong God i kamapim pasin daun. Em i amamas long larim Jehova, Nambawan Jas bilong heven na graun, long stretim ol samting long rot na long taim em yet i makim.—Ritim Jut 9.

6. Olsem wanem Jisas i kamapim pasin daun taim em i orait long stap olsem Mesaia?

⁶ Taim Jisas i no kamap yet olsem man long graun, em i bin kisim skul long ol tok profet we i makim ol samting bai kamap long em taim em i kam stap long graun olsem Mesaia. Olsem na em i bin save olsem ol samting nogut bai painim em taim em i kam stap long graun. Maski i olsem, Jisas i orait long kisim asainmen bilong i kam na stap long graun na dai olsem Mesaia. Bilong wanem? Aposel Pol i tok pasin daun i kirapim Jisas long mekim olsem, em i tok: “Maski em i stap olsem God, em i no tingting liklik long kisim namba, olsem em i mas i gat wankain namba olsem God. Nogat. Em i lusim olgeta samting em i bin holim na em i kamap olsem wanpela wokboi. Na em i kamap wanpela man bilong graun.”—Fili. 2:6, 7.

7, 8. Olsem wanem Jisas i soim pasin daun long taim em i stap pikinini na taim em i mekim wok bilong em long graun?

⁷ Pol i tok: “Taim em [Jisas] i lukim olsem em i kamap wankain olsem ol man, em i daunim em yet na i bihainim tok i go inap long em i dai, yes, inap long em i dai long diwai pos.” (Fili. 2:8) Kirap long taim Jisas i liklik yet, em i stap gutpela piksa long pasin daun. Maski papamama bilong em Josep na Maria ol i gat sin, Jisas i “stap daun yet long tupela.” (Luk 2:51) Em i stap gutpela piksa tru long ol yangpela olsem, sapos ol i daun long ol papamama, God bai blesim ol!

 ⁸ Taim Jisas i kamap bikpela man, em i soim pasin daun taim em i daunim laik bilong em yet na putim laik bilong Jehova i stap namba 1. (Jon 4:34) Taim Jisas Krais i mekim wok bilong em long graun, em i yusim nem tru bilong God na helpim ol manmeri i gat gutpela bel long kisim stretpela save long ol pasin bilong Jehova na samting Em i tingting pinis long mekim bilong helpim ol man. Jisas i bihainim tu ol samting em i skulim ol man long en long Jehova. Olsem: Long beten em Jisas i skulim ol man long en, namba 1 samting em i kolim em: “Papa bilong mipela long heven, nem bilong yu i mas i stap holi.” (Mat. 6:9) Jisas i skulim ol disaipel bilong em olsem namba 1 wok bilong ol em long mekim nem bilong Jehova i stap holi. Jisas yet i bin mekim olsem. Klostu long pinis bilong wok em i mekim long graun, em i beten long Jehova olsem: “Mi bin kamapim nem bilong yu long ol [aposel] na mi bai kamapim moa yet.” (Jon 17:26) Long taim Jisas i mekim wok bilong em long graun, em i tokaut olsem Jehova yet i helpim em long mekim olgeta dispela wok.—Jon 5:19.

9. Sekaraia i mekim wanem tok profet long Mesaia? Olsem wanem Jisas i truim dispela tok profet?

⁹ Sekaraia i bin mekim tok profet long Mesaia olsem: “Yupela ol manmeri bilong taun Saion, yupela i mas amamas moa yet na singaut. Lukim. King bilong yupela em i kam nau. Em i gat biknem na em i bin winim ol birua long pait. Tasol em i no save litimapim nem bilong em yet. Nogat. Em i kam olsem man i no gat nem, na em i sindaun antap long wanpela donki. Em i sindaun long yangpela donki na i kam.” (Sek. 9:9) Truim bilong dispela tok profet i kamap taim Jisas i go insait long Jerusalem paslain long Pasova bilong yia 33 C.E. Bikpela lain manmeri i lainim ol saket bilong ol na ol han bilong diwai long rot. Ol manmeri i amamas tru taim ol i harim olsem em i kam insait long taun. Maski ol manmeri i givim biknem long Jisas olsem wanpela King, Jisas i daunim em yet.—Mat. 21:4-11.

10. Pasin bilong Jisas long bihainim tok i go inap long taim em i dai i kamapim klia wanem samting?

¹⁰ Taim Jisas Krais i stap long graun, em i soim pasin  daun na em i bihainim tok i go inap long taim em i dai long diwai pos. Em i kamapim klia olsem ol man inap stap gut long Jehova maski bikpela traim i painim ol. Jisas i kamapim klia olsem tok bilong Satan i no tru taim em i sutim tok olsem ol man i stap gut long Jehova, long wanem, ol i tingim ol samting ol inap kisim long em. (Jop 1:9-11; 2:4) Krais i bin stap gut tru long Jehova na long dispela rot em i kamapim klia olsem i stret Jehova i stap nambawan bos bilong heven na graun. Jehova i amamas tru taim em i lukim olsem Pikinini bilong em i daunim em yet na stap gut long Em.—Ritim Sindaun 27:11.

11. Jisas Krais i bin givim ofa bilong baim bek ol man na dispela i opim rot long ol bilipman inap kisim wanem samting?

¹¹ Taim Jisas i dai long diwai pos, em i givim laip bilong em olsem pe bilong baim bek ol man. (Mat. 20:28) Dispela ofa i inapim stretpela lo bilong Jehova na opim rot long ol sinman inap kisim laip oltaim. Pol i tok: “Long rot bilong stretpela pasin wanpela man i mekim, God i kolim olgeta kain man stretpela man na ol inap kisim laip.” (Rom 5:18) Dai bilong Jisas i opim rot long ol Kristen God i bin makim i ken kisim laip long heven na ol i no inap dai moa, na “ol arapela sipsip” inap kisim laip oltaim long graun.—Jon 10:16; Rom 8:16, 17.

12. Long pasin Jisas i mekim long ol man, olsem wanem em i soim pasin isi na pasin daun?

¹² Jisas i singautim olgeta “man i save hatwok nating na karim ol bikpela hevi” long kam long em. Em i tok: “Karim hap plang bilong mi na kisim skul long mi, long wanem, mi man bilong pasin isi na pasin daun, na yupela bai kisim nupela strong.” (Mat. 11:28, 29) Jisas i gat pasin daun na pasin isi, na dispela i kirapim em long mekim gutpela pasin long olgeta kain man. Em i bihainim stretpela tingting long ol samting em i laik ol disaipel bilong em i mas mekim. Jisas i tok amamas long ol na i strongim ol. Em i no mekim ol i pilim olsem ol i no gat save o ol i no gat nem. Jisas i no mekim hatpela pasin o daunim ol, nogat. Em i tokim ol disaipel olsem sapos ol i go klostu long em na mekim ol samting em i skulim ol long en, dispela bai givim nupela strong long ol, long wanem, ol samting em i tokim ol long mekim i no hatwok. Ol man na ol meri, ol yangpela na ol lapun, olgeta i amamas long stap klostu long Jisas.—Mat. 11:30.

13. Olsem wanem Jisas i soim pasin sori long ol man em hevi i daunim ol?

¹³ Jisas i sori long ol manmeri bilong lain Israel, long wanem, hevi i daunim ol na em i mekim olgeta samting em inap mekim bilong helpim ol. Klostu long Jeriko, em i bungim 2-pela aipas man husat i save singaut long mani, em Bartimeus na poroman bilong em. Ol i singaut singaut long Jisas bai helpim ol, tasol ol manmeri i kros na tokim tupela long pasim maus. Em isi tru long Jisas i no tingim singaut bilong dispela 2-pela aipas. Tasol Jisas i no mekim  olsem, nogat, em i tokim ol long bringim tupela i kam long em, na em i sori long tupela na em i oraitim bek ai bilong ol. Yes, Jisas i bihainim pasin bilong Papa bilong em Jehova, long kamapim pasin daun na marimari long ol man i gat sin.—Mat. 20:29-34; Mak 10:46-52.

14. Jisas i bihainim pasin daun, na dispela i kamapim wanem ol gutpela samting?

¹⁴ Jisas Krais i soim pasin daun, na dispela i helpim tru planti man na mekim ol i stap belgut. Jehova i amamas taim em i lukim Pikinini em i laikim tru i daunim em yet na mekim laik bilong Em. Jisas i mekim pasin isi na pasin daun, na dispela i givim nupela strong long ol aposel na ol disaipel. Pasin bilong em, ol tok em i skulim ol long en, na pasin bilong em long tok amamas i kirapim ol long kamap strong moa long bilip. Jisas i gat pasin daun na em i helpim ol manmeri nating, skulim ol, na strongim ol. Long rot bilong ofa bilong Jisas long baim bek ol man, olgeta man husat i bilip long em ol bai kisim blesing inap oltaim oltaim.

15. Pasin daun bilong Jisas i helpim em yet olsem wanem?

¹⁵ Olsem wanem long Jisas? Yu ting pasin daun bilong em i helpim em? Yes, long wanem, Jisas i tokim ol disaipel olsem: “Man i daunim em yet, em bai kisim biknem.” (Mat. 23:12) Dispela ol tok i kamap tru long em yet. Pol i tok: “God i givim bikpela namba moa long [Jisas] na i givim em wanpela nem i winim olgeta arapela nem. Na bai olgeta i ken brukim skru long nem bilong Jisas, em olgeta long heven na long graun na aninit long graun. Na olgeta maus i ken tokaut long ai bilong ol man olsem Jisas Krais em i Bikpela, na dispela i ken givim glori long God Papa.” Taim Jisas i stap long graun, em i bihainim pasin daun na stap gut long God, olsem na God Jehova i litimapim em na givim namba long em long bosim olgeta long heven na long graun.—Fili. 2:9-11.

16. Wanem samting i soim olsem Pikinini Bilong God bai wok yet long soim pasin daun long ol samting em i mekim?

¹⁶ Pikinini Bilong God bai bihainim yet pasin daun long ol samting em i mekim long bihain. Man bilong raitim song i tok profet long olsem wanem Jisas bai stap olsem King long heven na daunim ol birua bilong em, em i tok: “Yu nambawan king i gat biknem. Yu sindaun long hos na yu go long pait bilong sambai long tok i tru na ol manmeri i gat pasin daun na stretpela pasin.” (Sng. 45:4, NW) Long Armagedon, Jisas Krais bai mekim pait bilong sambai long ol manmeri i gat pasin daun, bihainim stretpela pasin, na ol i laikim tok i tru. Na wanem samting bai kamap long pinis bilong Wan Tausen Yia taim King Mesaia “i pinisim olgeta gavman na olgeta wok bos na olgeta samting i gat strong”? Yu ting em bai mekim pasin daun? Yes, em bai mekim olsem, long wanem, em bai “putim kingdom long han bilong God na Papa bilong em.”—Ritim 1 Korin 15:24-28.

17, 18. (a) Bilong wanem em i bikpela samting long ol wokman bilong Jehova long bihainim Jisas na mekim pasin daun? (b) Bai yumi skelim wanem samting long neks stadi?

¹⁷ Olsem wanem long yumi? Bai yumi bihainim gutpela pasin bilong Jisas na soim pasin daun? Yumi bai stap olsem wanem taim King Jisas Krais i kam bilong mekim kot long Armagedon? Taim em i sindaun long hos na i kam bilong mekim pait, em bai kisim bek tasol ol man i gat pasin daun na ol i bihainim stretpela pasin. Olsem na yumi mas kisim pasin daun bambai yumi inap abrusim bagarap. Na tu, wankain olsem pasin daun bilong Jisas i bin helpim em yet na ol narapela, pasin daun bilong yumi tu bai helpim yumi yet na ol narapela.

¹⁸ Wanem samting inap helpim yumi long mekim pasin daun olsem Jisas? Olsem wanem yumi inap wok strong long mekim pasin daun maski ol hevi i painim yumi? Bai yumi skelim bekim bilong ol dispela askim long neks stadi.