Wanpela samting we inap helpim tru yumi long karim hevi em long taim ol wanfamili, ol pren, na ol wanbilip i mekim gut bel bilong yumi.

Gutpela tok i kam long wanpela pren i kain olsem gutpela marasin bilong oraitim man na givim nupela strong long man. (Snd. 16:24; 18:24; 25:11) Tasol ol Kristen tru i no save tingim ol yet tasol, nogat, ol i save tingim tu ol narapela. Ol i save “mekim isi bel bilong ol arapela man em ol i gat kain kain hevi, olsem God i save mekim isi bel bilong [ol].” (2 Kor. 1:4; Luk 6:31) Antonio, em wanpela wasman distrik long Meksiko, em i bin pilim dispela samting.

Taim Antonio i painimaut olsem em i gat sik kensa bilong blut (lymphoma), em i bel hevi tru. Tasol em i wok strong tru long daunim dispela bel hevi. Em i mekim olsem wanem? Em i traim long tingim na singim ol song bilong Kingdom bambai em i ken harim na tingim tingim ol tok bilong en. Pasin bilong kolim beten long maus na ritim Baibel i bin mekim gut bel bilong em.

Tasol nau Antonio i luksave olsem ol wanbilip bilong em i bin givim bikpela helpim tru long em. Em i tok: “Taim mi na meri bilong mi i bel hevi tru, mipela i save singautim wanpela wanblut husat i mekim wok elda, long kam long haus na beten wantaim mipela. Dispela i bin mekim gut bel bilong mipela na bel i stap isi. Tru tumas, ol wanblut na ol bratasista long kongrigesen i bin helpim tru mipela, olsem na insait long sotpela haptaim tasol mipela inap daunim bel hevi.” Antonio i amamas tru olsem em i gat ol gutpela pren husat i laikim na tingim em tru!

Narapela helpim yumi kisim long taim bilong hevi, em holi spirit. Aposel Pita i tok holi spirit bilong God i olsem wanpela “presen.” (Apo. 2:38) Dispela i kamap ples klia long Pentikos bilong yia 33 C.E., taim God i bin kapsaitim holi spirit long planti manmeri. Tasol long nau tu yumi olgeta inap kisim holi spirit olsem presen. Oltaim God bai amamas long givim dispela presen long yumi, olsem na yumi ken askim em long mekim olsem.—Ais. 40:28-31.

Aposel Pol i bin karim planti hevi, na sampela taim klostu dai i painim em. (2 Kor. 1:8-10) Maski i olsem, dispela i no mekim na Pol i wari na tingting planti. Em i save olsem God i sambai long em, olsem na dispela i mekim gut bel bilong em. Em i tok: “Yumi litimapim nem bilong God na Papa bilong Bikpela bilong yumi Jisas Krais. Em Papa bilong marimari na God bilong mekim isi bel bilong ol man long olgeta kain taim. Long olgeta pen na hevi i kamap long yumi, em i save mekim isi bel bilong yumi.” (2 Kor. 1:3, 4) Pol i no larim bel hevi i daunim em, nogat. Ol dispela hevi i helpim em long pilim hevi bilong ol narapela, olsem na em i redi tru long mekim gut bel bilong ol narapela taim hevi i painim ol.

Bihain, sik bilong Antonio i pinis na em inap mekim gen wok olsem wasman raun. Oltaim em i save tingim gut ol wanbilip, tasol em na meri bilong em i wok strong moa long strongim bel bilong ol wanbilip husat i sik. Olsem: Wanpela taim Antonio i go visitim wanpela brata Kristen husat i gat bikpela sik, na em i painimaut olsem dispela brata i no laik i go long ol miting. Antonio i tok: “I no olsem dispela brata i no laikim Jehova na ol brata, nogat, tasol sik i mekim na em i pilim olsem em i no inap moa long mekim wanpela wok.”

Wanpela samting em Antonio i mekim bilong strongim bel bilong dispela brata em olsem, em i askim dispela brata long mekim beten long wanpela bung. Maski brata i pilim olsem em i no gat strong, em i tok orait long mekim beten. Antonio i tok: “Em i mekim naispela beten tru, na dispela i mekim gut bel bilong em. Em i pilim olsem em i gat strong gen long mekim wok.”

Tru tumas, yumi olgeta i save karim pen na hevi long kain kain rot. Tasol olsem Pol i tok, dispela inap helpim yumi long mekim gut bel bilong ol narapela long taim bilong hevi. Olsem na yumi mas pilim hevi bilong ol wanbilip Kristen na bihainim pasin bilong God bilong yumi, Jehova, na mekim gut bel bilong ol.