1, 2. Ol wokman bilong God i pilim olsem wanem long dispela taim nogut bilong nau? Olsem wanem ol i gat haus?

  OLSEM WANEM? Yu pilim olsem yu stap gut na i no gat hevi inap painim yu long dispela taim nogut bilong nau? Sapos nogat, orait yu pilim wankain olsem ol arapela wokman bilong Jehova. Kirap long bipo yet, olgeta manmeri husat i laikim tru Jehova ol i pilim olsem ol i no bilong dispela graun. Olsem: Ol man husat i lotuim God na ol i go sindaun long planti hap bilong Kenan, ol i bin pilim olsem. Baibel i tok ol i “tokaut olsem ol i man em ol arapela i no save long ol na ol i stap olsem tripman long ples ol i sindaun long en.”—Hib. 11:13.

² Ol disaipel bilong Krais em God i makim ol long holi spirit, ol i “sitisen bilong heven.” Ol tu i pilim olsem ol i “stap olsem ol man bilong narapela ples na ol tripman” long dispela graun. (Fili. 3:20, futnot; 1 Pita 2:11) Krais i gat “ol arapela sipsip” na ol tu “i no bilong dispela graun” wankain olsem Jisas. (Jon 10:16; 17:16) Tasol lain bilong God i gat wanpela haus bilong stap long en. Dispela em haus yumi no inap lukim long ai, tasol em i gutpela haus tru we i no gat hevi inap painim yumi na yumi bai laikim tru long stap long en. Dispela haus i stap we? Moses i tok: “Bikpela, yu olsem haus tru bilong mipela. Ol tumbuna i bin i stap long yu, na nau mipela tu i stap olsem.” a (Sng. 90:1) Jehova i stap olsem “haus tru” bilong ol wokman husat i stap gut long em. Yu save long olsem wanem Jehova i bin stap olsem haus bilong ol wokman bilong em long bipo? Olsem wanem em i stap olsem haus bilong ol manmeri bilong em long nau? Na long bihain, olsem wanem em tasol bai stap olsem haus em ol wokman bilong em bai stap long en na i no gat wanpela hevi bai painim ol?

3. Song 90:1 i tok Jehova i kain olsem wanem samting? Bilong wanem?

³ Taim Baibel i stori long Jehova, sampela taim Baibel i yusim  ol samting yumi lukim long ai bambai yumi inap kliagut long ol pasin bilong em. Olsem, Song 90:1 i tok Jehova i stap olsem wanpela “haus.” Yumi tingim haus olsem ples i gat pasin laikim, bel isi, na ples we hevi i no inap painim yumi. Bilong wanem Baibel i tok Jehova i stap olsem wanpela haus? Baibel i tok Jehova em pasin laikim. (1 Jon 4:8) Baibel i tok tu olsem Jehova em i God bilong bel isi na em i save lukautim ol wokman bilong em. (Sng. 4:8) Orait yumi ken skelim olsem wanem Jehova i stap olsem haus bilong ol gutpela wokman bilong em, Abraham, Aisak, na Jekop.

4, 5. Olsem wanem God i bin blesim na lukautim Abraham?

⁴ Ating Abraham i bin tingting planti taim Jehova i tokim em olsem: “Yu lusim graun bilong yu na ol brata bilong yu, na ol lain bilong papa bilong yu, na yu go long wanpela graun bai mi soim yu long en.” Tasol tok Jehova i mekim bihain i mekim gut bel bilong em, olsem: “Bai mi mekim ol lain tumbuna bilong yu i kamap bikpela lain tru. Na bai mi mekim gut long yu na mekim yu i gat biknem tru.” Na Jehova i tok moa olsem: “Bai mi mekim gut long ol man i save mekim gutpela pasin long yu. Tasol bai mi yet mi bagarapim ol man i tok long bagarapim yu.”—Stt. 12:1-3.

⁵ Jehova i tok promis olsem em bai blesim na lukautim Abraham na ol tumbuna pikinini bilong em, na tru tumas em i bin mekim olsem. (Stt. 26:1-6) Olsem: Em i bin pasim Fero bilong Isip na King Abimelek bilong Gerar long kilim i dai Abraham na kisim meri bilong em, Sera. Em i mekim wankain samting na lukautim Aisak na Rebeka. (Stt. 12:14-20; 20:1-14; 26:6-11) Baibel i tok Jehova “i no larim ol sampela lain i daunim ol. Nogat. Em i helpim ol na em i krosim ol king i laik mekim nogut long ol. Em i tokim ol dispela king olsem, ‘Mi makim ol dispela manmeri bilong mekim wok bilong mi na yupela i no ken mekim pasin nogut long ol. Yupela i no ken mekim nogut long ol profet bilong mi.’”—Sng. 105:14, 15.

6. Aisak i tokim Jekop long mekim wanem? Ating Jekop i bin pilim olsem wanem?

⁶ Na tu, Jehova i bin lukautim gut Abraham na tumbuna pikinini bilong em, Jekop. Taim Jekop i laik marit, papa bilong em Aisak i tokim em olsem: “Yu no ken maritim wanpela meri Kenan. Nogat. Yu mas i go long graun bilong Mesopotemia, long ples bilong Betuel, em papa bilong mama bilong yu. Na yu mas maritim wanpela pikinini meri bilong kandere bilong yu, Laban.” (Stt. 28:1, 2) Jekop i bihainim stret olgeta tok bilong papa. Em i lusim famili bilong em long Kenan na ating em wanpela i bin wokabaut inap 100 kilomita bilong i go long Haran. (Stt. 28:10) Ating em i bin tingting planti olsem: ‘Wanem taim bai mi kam bek? Ankol bilong mi bai amamas long lukim mi, o nogat? Bai mi inap painim meri husat i laikim Jehova?’ Tasol wanpela samting  i kamap long Lus, em ples i stap 100 kilomita longwe long Berseba, na dispela i helpim Jekop na em i no tingting planti. Wanem samting i kamap?

7. God i bin mekim wanem tok bilong mekim gut bel bilong Jekop?

⁷ Long Lus, Jehova i kamap long Jekop long rot bilong driman na tok: “Harim. Mi stap wantaim yu na bai mi lukautim yu long olgeta hap yu go long en. Na bai mi bringim yu i kam bek long dispela graun. Na bai mi no ken lusim yu inap mi mekim kamap olgeta samting mi bin tokim yu long en.” (Stt. 28:15) Ating dispela tok i bin mekim gut bel bilong Jekop! Bihain, ating Jekop i laik tru long lukim olsem wanem tok promis bilong Jehova bai kamap tru. Sapos yu bin lusim haus bilong yu, na yu go mekim wok long narapela kantri, ating yu tu yu tingting planti olsem Jekop i bin mekim. Tasol ating yu luksave pinis olsem Jehova i bin mekim planti samting bilong lukautim yu.

8, 9. Olsem wanem Jehova i stap olsem “haus tru” bilong Jekop? Stori bilong Jekop i givim wanem skul long yumi long Jehova?

⁸ Taim Jekop i go kamap long Haran, ankol bilong em Laban, i amamas long em na bihain em i givim Lea na Resel long em olsem ol meri bilong em. Tasol bihain long sampela yia, Laban i no mekim gut long Jekop na olgeta taim em i senisim pe bilong Jekop! (Stt. 31:41, 42) Tasol Jekop i sanap strong na karim olgeta dispela hevi, long wanem, em i bilip olsem Jehova bai lukautim em. Olsem na Jehova i blesim Jekop. Orait, taim God i tokim em long go bek long Kenan, Jekop i gat “planti lain sipsip na meme, na planti ol wokboi na wokmeri, na ol kamel na ol donki.” (Stt. 30:43) Jekop i tenkyu tru long Jehova na i beten olsem: “Mi no gutpela man, tasol yu bin marimari long mi na yu bin mekim gut tru long mi. Taim mi brukim wara Jordan na mi go bilong i stap wantaim Laban, mi no gat wanpela samting. Nogat. Mi holim tasol stik bilong wokabaut. Tasol nau mi kam bek wantaim dispela tupela lain.”—Stt. 32:10.

⁹ Ol dispela stori i kamapim olsem tok bilong Moses i tru, em i tok: “Bikpela, yu olsem haus tru bilong mipela. Ol tumbuna i bin i stap long yu, na nau mipela tu i stap olsem”! (Sng. 90:1) Pasin bilong Jehova i no senis. Em i save laikim, lukautim, na tingim tru ol wokman husat i stap gut long em. (Jems 1:17) Yumi ken stori long dispela samting.

10. Bilong wanem yumi ken bilip olsem Jehova i stap olsem “haus tru” bilong ol wokman bilong em?

¹⁰ Tingim olsem: Yu stap long kot olsem wanpela witnes bilong kamapim rong bilong wanpela man husat i gat bikpela save na bikpela strong. Em i gat hatpela pasin na em i man bilong tok giaman na kilim man i dai, na em i gat ol wokman long olgeta hap bilong graun. Bai yu pilim olsem wanem taim kot keis i pinis na yu lusim haus kot? Bai yu pilim olsem yu bai stap orait na hevi i no inap painim yu? Nogat tru! Olsem na yu bai askim long wanpela i mas lukautim yu. Long wankain pasin, yumi ol wokman bilong Jehova i stap olsem ol witnes bilong kamapim klia rong bilong Satan, em birua bilong Jehova. (Ritim Revelesen 12:17.) Satan i bin traim long pasim wok bilong lain bilong God. Tasol yu ting em i bin pasim wok bilong ol? Nogat tru! Yumi mekim yet wok bilong autim tok long planti manmeri tru long olgeta hap bilong graun. Olsem wanem dispela wok inap kamap? I gat wanpela bekim tasol: Jehova i stap olsem “haus tru” bilong yumi. Em i lukautim na blesim lain bilong em moa yet nau long dispela taim bilong las de. (Ritim Aisaia 54:14, 17.) Tasol Jehova bai stap yet olsem “haus tru” bilong yumi sapos yumi yet i no larim Satan i giamanim yumi.

11. Yumi inap kisim wanem narapela skul long stori bilong Abraham, Aisak, na Jekop?

¹¹ Orait nau yumi ken kisim narapela skul long stori bilong Abraham, Aisak, na Jekop. Maski ol i stap long Kenan, ol i stap narapela kain long ol manmeri bilong dispela hap, na ol i heitim ol pasin nogut em ol dispela manmeri i  mekim. (Stt. 27:46) Ol i no nidim longpela lista i kolim wanem ol samting i stret na wanem ol samting i no stret. Ol i save long samting Jehova i laikim tru na ol samting em i heitim. Olsem na ol i wok strong long stap narapela kain long ol manmeri bilong dispela graun. Pasin bilong ol i stap olsem gutpela piksa tru em yumi ken bihainim! Olsem wanem? Yu wok strong long bihainim pasin bilong ol dispela wokman em ol i stap gut long Jehova? Long rot bilong ol poroman na ol amamas yu makim, yu kamapim klia olsem yu laik stap narapela kain long ol manmeri bilong dispela graun? Sori tru olsem sampela long kongrigesen Kristen i amamas long bihainim sampela pasin bilong dispela graun em Satan i bosim. Sapos yu pilim olsem, orait beten askim Jehova long helpim yu. Tingim, Satan i bosim dispela graun, na em i tingim laik bilong em yet tasol na em i no tingim yumi.—2 Kor. 4:4; Efe. 2:1, 2.

12. (a) Jehova i save helpim ol wokman bilong em long wanem ol rot? (b) Yu pilim olsem wanem long ol samting Jehova i givim bilong helpim yumi?

¹² Sapos yumi no laik bai Satan i giamanim yumi, orait yumi mas kisim olgeta helpim em Jehova i givim long ol wokman bilong em. Olsem: Em i save givim helpim long yumi long rot bilong ol miting Kristen, famili lotu, na ol elda husat i save mekim gut bel bilong yumi na strongim yumi bambai yumi inap sanap strong na karim ol hevi bilong olgeta wan wan de. (Efe. 4:8-12) Brata George Gangas husat i stap memba bilong Gavening Bodi inap planti yia pinis, em i stori long em i save pilim olsem wanem taim em i stap namel long ol manmeri bilong God, na em i tok: “Taim mi stap wantaim ol, mi save pilim olsem mi stap long haus wantaim famili bilong mi.” Olsem wanem? Yu save pilim olsem?

13. Yumi inap kisim wanem bikpela skul long tok i stap long Hibru 11:13?

¹³ Narapela bikpela skul yumi kisim long Abraham, Aisak, na Jekop em olsem, yumi no ken pret long stap narapela kain long ol manmeri i stap klostu long yumi. Olsem yumi bin ritim long  paragraf 1, ol dispela bilipman i bin “tokaut olsem ol i man em ol arapela i no save long ol na ol i stap olsem tripman long ples ol i sindaun long en.” (Hib. 11:13) Olsem wanem? Yu kamapim klia olsem yu stap narapela kain long ol manmeri bilong dispela graun? Sampela taim i hatwok long mekim olsem. Tasol helpim yu kisim long God na long ol bratasista inap strongim yu long mekim olsem. Tingim, yu no stap wanpis. Olgeta man husat i laik mekim wok bilong Jehova, ol i pait long Satan na lain bilong em! (Efe. 6:12) Tasol yumi inap winim dispela pait sapos yumi trastim Jehova na mekim em i kamap olsem haus yumi ken stap long en.

14. Wanem dispela “taun” em Abraham i wetim?

¹⁴ Yumi mas bihainim pasin bilong Abraham na tingim prais yumi bai kisim. (2 Kor. 4:18) Aposel Pol i tok Abraham i “wetim dispela taun i stap  strong tru,” na “God em man husat i bin sanapim na wokim dispela taun.” (Hib. 11:10) Dispela “taun” i makim Kingdom Bilong God. Abraham i mas wet long dispela “taun” i kamap. Tasol yumi no wet olsem, long wanem, Kingdom i kamap pinis na i mekim wok nau long heven. Ol tok profet bilong Baibel i kamapim klia olsem klostu nau dispela Kingdom bai bosim olgeta hap bilong graun. Olsem wanem? Ol samting yu mekim long laip bilong yu i kamapim klia olsem yu bilip tru long dispela Kingdom? Yu putim Kingdom i stap namba 1 long laip bilong yu na yu stap narapela kain long ol manmeri bilong dispela graun?—Ritim 2 Pita 3:11, 12.

15. Wanem samting bai painim ol manmeri husat i putim bilip bilong ol long ol samting bilong dispela graun?

¹⁵ Ol hevi bilong dispela graun bai kamap nogut moa paslain long pinis i kamap. (Mat. 24:7, 8) Long taim bilong traipela hevi tru, sindaun bilong ol man bai kamap nogut moa. Long olgeta hap bilong graun, ol samting bai bagarap na ol manmeri bai paul na pret nabaut. (Hab. 3:16, 17) Baibel i tok ol manmeri bai painim stret ol ples bilong i go na hait long en, olsem na ol bai go long “ol keiv na namel long ol bikpela ston bilong ol maunten.” (Rev. 6:15-17) Tasol i no gat wanpela keiv, o wok bisnis, o lain politik bai lukautim ol.

16. Yumi mas i gat wanem tingting long kongrigesen? Bilong wanem?

¹⁶ Jehova bai lukautim yumi long taim bilong traipela hevi tru. Olsem profet Habakuk i bin mekim, yumi tu bai amamas long God husat bai kisim bek yumi. (Hab. 3:18) Long dispela taim nogut bilong planti hevi tru, Jehova bai lukautim yumi olsem wanem? Yumi mas wet na lukim. Tasol yumi ken bilip tru olsem lain bilong Jehova bai stap gut na wok bilong ol bai ron gut, na Jehova bai givim ol tok bilong stiaim ol, wankain olsem em i bin mekim long lain Israel taim ol i lusim Isip. (Ritim Kisim Bek 13:18; Rev. 7:9) Olsem wanem Jehova bai givim ol tok bilong stiaim yumi? Ating Jehova bai yusim kongrigesen long tokim yumi long ol samting yumi mas mekim. Aisaia 26:20 i kolim “ol haus” we bai lukautim ol manmeri bilong God. Dispela inap makim ol kongrigesen i stap long olgeta hap bilong graun. (Ritim Aisaia 26:20.) Olsem wanem? Yu laikim tru ol miting bilong kongrigesen? Oltaim yu save mekim ol samting em Jehova i tokim yu long en long rot bilong kongrigesen?—Hib. 13:17.

17. Olsem wanem Jehova i stap olsem “haus tru” bilong ol gutpela wokman bilong em husat i dai pinis?

¹⁷ Maski sampela gutpela bilipman i dai paslain long traipela hevi tru i kamap, Jehova i stap olsem “haus tru” bilong ol. Long wanem rot? Em bai kirapim bek ol. Maski planti yia i lus bihain long Abraham, Aisak, na Jekop i dai, Jehova i tokim Moses olsem em i stap yet olsem God bilong ol. (Kis. 3:6) Jisas i kolim gen dispela tok na em i tok moa olsem: “Em i no God bilong ol man i dai pinis, nogat, em i God bilong ol man i stap laip, long wanem, long tingting bilong em olgeta i stap laip.” (Luk 20:38) Jehova bai kirapim bek ol gutpela wokman bilong em, olsem na long ai bilong em i olsem ol i stap laip.—Sav. 7:1.

18. Olsem wanem Jehova inap stap olsem “haus tru” bilong ol manmeri bilong em long nupela taim?

¹⁸ Long nupela taim, Jehova bai stap olsem “haus tru” bilong ol manmeri bilong em. Revelesen 21:3 i tok: “Harim! Haus sel bilong God i stap wantaim ol manmeri, na God bai i stap wantaim ol.” Jehova bai yusim Jisas Krais long bosim graun long 1 tausen yia. Long pinis bilong dispela 1 tausen yia, Jisas bai inapim samting em Papa bilong em i tingting pinis long mekim long dispela graun, na em bai putim Kingdom i go bek long han bilong Jehova. (1 Kor. 15:28) Kirap long dispela taim, Jehova yet bai bosim ol manmeri husat i kamap gutpela olgeta. Gutpela samting tru i wetim yumi! Long nau, i gutpela yumi bihainim pasin bilong ol gutpela wokman bilong Jehova long bipo na mekim Jehova i stap olsem “haus tru” bilong yumi.