1, 2. (a) Wanem samting i bin helpim yu long mekim disisen long lotuim God? (b) Dispela stadi bai bekim wanem ol askim long blesing em Jehova i tok long givim yumi?

 PLANTI milion manmeri i bin mekim gutpela disisen long lotuim God Jehova na bihainim gut lek mak bilong Jisas Krais. (Mat. 16:24; 1 Pita 2:21) Taim yumi dediket long God, dispela em wanpela bikpela disisen. Yumi no mekim dispela disisen bihain tasol long yumi kisim save long sampela bikpela tok bilong Baibel, nogat. Yumi mekim dispela disisen taim yumi stadi gut pinis long Baibel na strongim bilip bilong yumi long blesing em Jehova i tok promis long en. Em bai givim dispela blesing long olgeta man husat i wok yet long kisim save long em na long Jisas Krais.—Jon 17:3; Rom 12:2.

² Sapos yumi laik pas gut yet wantaim Jehova, orait yumi mas mekim ol gutpela disisen em i amamas long en. Dispela stadi bai bekim ol dispela bikpela askim: Yumi kisim wanem blesing? Yumi mas holim wanem tingting long en? Yumi mas mekim wanem bambai yumi inap kisim dispela blesing? Wanem samting bai helpim yumi long mekim ol gutpela disisen?

3. (a) Ol Kristen God i bin makim, ol bai kisim wanem blesing? (b) “Ol arapela sipsip” bai kisim wanem blesing?

³ Blesing em liklik lain Kristen i bilip na wet long kisim em olsem, ol bai kisim laip oltaim long heven na ol i no inap i dai moa. Ol bai mekim gutpela wok tru, olsem ol bai mekim wok king wantaim Krais long Kingdom bilong em. (1 Pita 1:3, 4) Dispela lain husat bai kisim dispela blesing, ol i mas “bon gen.” (Jon 3:1-3) Orait, olsem wanem long planti milion manmeri em Jisas i kolim ol olsem “ol arapela sipsip,” em ol i wok wantaim ol Kristen God i bin makim long autim gutnius bilong Kingdom Bilong God? (Jon 10:16) Ol arapela sipsip bai kisim samting em Adam na Iv i no bin kisim, em laip oltaim long Paradais long graun, na ol bai i no inap pilim pen gen, o krai moa, na bai i no gat dai moa. (2 Pita 3:13; Rev. 21:1-4)  Taim Jisas i bin hangamap long diwai pos, em i tok promis long man i stap klostu long em olsem em bai kisim dispela blesing. Jisas i tok: “Mi tok tru long yu tude, Yu bai stap wantaim mi long Paradais.”—Luk 23:43.

4. Yumi kisim pinis wanem ol blesing?

⁴ Dispela blesing i makim tu sampela blesing yumi kisim long nau. Yumi bilip “long wok bilong Krais Jisas long givim pe bilong baim bek man,” olsem na yumi stap bel isi na yumi inap pas gut wantaim God. (Rom 3:23-25) Yumi kliagut long ol tok promis bilong Baibel long ol samting bai kamap bihain. Pasin laikim bilong ol brata na sista bilong yumi long olgeta hap bilong graun i mekim na yumi amamas tru. Taim yumi autim tok na tokim ol man long Jehova, dispela em i wanpela gutpela samting tru. Olsem na i gat gutpela as long yumi mas amamas tru long blesing yumi kisim!

5. Satan i laik pulim ol manmeri bilong God long mekim wanem? Wanem samting inap helpim yumi long sakim ol trap bilong Satan?

⁵ Bilong helpim yumi long holim yet blesing yumi kisim, yumi mas was gut na abrusim ol trap bilong Satan. Oltaim Satan i laik pulim ol manmeri bilong God long mekim ol disisen nogut bambai ol i lusim blesing ol i kisim. (Nam. 25:1-3, 9) Satan i save olsem klostu nau em bai bagarap, olsem na em i wok hat tru long pulim yumi long mekim ol pasin i no stret. (Ritim Revelesen 12:12, 17.) Sapos yumi laik “sanap strong na sakim ol pasin trik bilong Satan,” orait yumi mas amamas long blesing yumi kisim. (Efe. 6:11) Namba wan pikinini man bilong Aisak em Iso. Taim yumi skelim tingting bilong Iso long blesing bilong em, dispela inap givim skul long yumi long ol bikpela samting.

6, 7. Iso em i husat? Em inap kisim wanem gutpela blesing?

⁶ Inap olsem 4,000 yia i go pinis, Rebeka i karim twins pikinini, em Iso na Jekop. Pasin bilong tupela i no wankain. “Iso i kamap saveman tru bilong painim abus. Em i man bilong raun long bus. Tasol Jekop em i man bilong stap isi, na em i save stap long ples tasol.” (Stt. 25:27) Baibel i kolim Jekop olsem man bilong stap isi, long wanem, em i gat pasin bilong stap gut long God na i no bihainim pasin bilong mekim sin.

⁷ Iso na Jekop i gat 15 krismas taim bubu man bilong ol Abraham i dai. Tasol Jehova i tingim tok promis em i bin mekim long Abraham. Bihain Jehova i tokaut gen long Aisak long samting em i bin tok promis long en. God i tok olsem olgeta lain long graun bai kisim blesing long rot bilong “pikinini” bilong Abraham. (Ritim Aposel 3:25.) Long dispela rot, God i kamapim klia olsem wanpela tumbuna pikinini bilong Abraham bai kamap dispela “lain,” o pikinini, em Stat 3:15 i kolim, em Mesaia. Iso em namba wan pikinini bilong Aisak, olsem na em i gat rait long inapim promis em God i bin mekim long Abraham. Olsem na wanpela tumbuna pikinini bilong Iso inap kamap Mesaia. Dispela em wanpela gutpela blesing tru em Iso inap kisim. Tasol olsem wanem? Em i pilim tru dispela blesing em inap kisim?

8, 9. (a) Iso i bin mekim wanem disisen long blesing bilong em? (b) Planti yia bihain, Iso i luksave long wanem samting? Em i mekim wanem?

⁸ Wanpela taim Iso i raun long bus na kam bek long haus na em i lukim Jekop i “kukim sup” i stap. Iso i askim Jekop long givim sampela sup long em, na em i tok: “Mi hangre nogut tru. Givim mi sampela bilong dispela retpela sup nau yu kukim.” Jekop i tok: “Pastaim yu mas givim mi dispela namba bilong yu olsem namba wan pikinini man, na bihain mi ken givim sup long yu.” Orait Iso i mekim wanem? Em i tok dispela namba bilong em olsem namba wan pikinini em i samting nating na i no inap helpim em, olsem na em i kisim sup na larim Jekop i kisim namba bilong i stap olsem namba wan pikinini! Jekop i laik save olsem tru tru Iso i givim em namba bilong stap olsem namba wan pikinini o nogat, olsem na em i askim Iso long mekim tok tru antap. Jekop i tok: “Yu mas tok tru antap pastaim olsem bai yu givim namba bilong yu long mi”! Iso i no lusim sampela haptaim long skelim dispela  samting, nogat, kwiktaim em i givim namba bilong em olsem namba wan pikinini long Jekop. Bihain long dispela, “Jekop i givim em sampela bret wantaim sup em i bin wokim long bin. Iso i kaikai na em i dring, na bihain em i kirap na i go.” Pasin bilong Iso i soim olsem em i ting namba bilong em long stap olsem namba wan pikinini em i samting nating.—Stt. 25:29-34.

⁹ Planti yia bihain, taim Aisak i pilim olsem klostu nau em bai dai, Rebeka i helpim Jekop long kisim dispela blesing em Iso i bin lusim, em namba bilong i stap olsem namba wan pikinini. Bihain, Iso i luksave olsem em i bin mekim bikpela popaia long givim namba bilong em olsem namba wan pikinini long narapela, olsem na em i askim Aisak olsem: “Papa, givim blesing long mi tu. . . . Olsem wanem, papa? I no gat wanpela blesing moa i stap, em yu ken givim long mi?” Tasol Aisak i tokim Iso olsem em i no inap senisim blesing em i bin givim long Jekop, olsem na Iso i krai nogut tru.—Stt. 27:30-38.

10. Jehova i gat wanem tingting long Iso na Jekop? Bilong wanem?

¹⁰ Yumi inap kisim wanem skul long dispela stori bilong Iso? Em i tingting moa long inapim ol laik bilong em, na em i ting dispela i bikpela samting moa winim ol blesing em Jehova i tok promis long givim long em. Iso i no amamas long namba bilong em olsem namba wan pikinini na em i no laikim tru God. Na Iso i no tingting long olsem wanem disisen bilong em bai givim hevi long ol tumbuna pikinini bilong em. Tasol Jekop i bihainim narapela pasin. Em i amamas tru long blesing em i kisim na em i mekim ol gutpela disisen bilong lukautim dispela blesing. Olsem: Jekop i redi long bihainim tok bilong papamama taim em i laik makim meri bilong maritim, maski i gat bikpela hatwok bilong en. (Stt. 27:46–28:3) Jehova i blesim pasin bilong Jekop long bihainim tok, na em i larim Mesaia i kamap long lain tumbuna pikinini bilong Jekop. God i gat wanem tingting long Iso na Jekop? Jehova i tok: “Mi laikim Jekop . . . tasol mi no laikim Iso.”—Mal. 1:2, 3.

11. (a) Bilong wanem stori bilong Iso inap helpim yumi ol Kristen? (b) Taim Pol i stori long samting em Iso i mekim, bilong wanem em i kolim tu pasin pamuk?

¹¹ Stori bilong Iso inap helpim yumi. Aposel Pol i bin givim tok lukaut long ol Kristen long ol i mas was gut na em i tok: “Nogut wanpela namel long yupela i bihainim pasin pamuk, o nogut wanpela i no tingim ol samting i holi olsem Iso i bin mekim. Iso i bin lusim olgeta samting em i gat rait long kisim olsem fesbon pikinini bai em i ken baim kaikai inap wanpela taim tasol.” (Hib. 12:16) Yumi mas kisim skul long dispela tok lukaut. Oltaim yumi mas amamas long ol samting i holi bambai yumi inap sakim ol traim na lukautim blesing yumi kisim. Taim Pol i stori long samting Iso i mekim, bilong wanem em i kolim tu pasin pamuk? Long wanem, sapos yumi bihainim pasin bilong Iso na larim ol laik bilong skin i bosim yumi, orait em bai isi long yumi mekim sin olsem pasin pamuk, na dispela inap mekim na yumi lusim blesing yumi kisim.

12. (a) Olsem wanem Satan i traim long pulim yumi olgeta wan wan? (b) Wanem ol stori bilong Baibel inap helpim yumi taim wanpela traim i kamap na i laik pulim yumi long mekim rong?

¹² Yumi stap olsem ol wokman bilong Jehova, olsem na yumi mekim olgeta samting yumi inap mekim bilong abrusim ol traim we inap pulim yumi long mekim pasin pamuk. Na sapos wanpela man i traim long pulim yumi long mekim sin, orait yumi mas beten long God Jehova long helpim yumi long winim dispela traim. (Mat. 6:13) Dispela graun i pulap long pasin nogut, olsem na yumi wok strong long holimpas pasin bilong stap gut long God, tasol oltaim Satan i traim long bagarapim pasin bilong yumi long pas gut wantaim Jehova. (Efe. 6:12) Satan i stap olsem god bilong dispela taim nogut bilong nau, na em i save long olsem wanem em inap yusim ol traim long pulim ol man long inapim ol laik nogut bilong ol. (1 Kor. 10:8, 13) Em i traim long mekim olsem long yumi olgeta wan wan. Olsem wanem sapos wanpela traim i kamap long yu long bihainim rot nogut long inapim ol laik bilong yu? Bai yu mekim wanem? Yu bai bihainim pasin bilong Iso na kwiktaim yu pundaun long traim? O yu bai sakim traim na ranawe long en olsem Josep, em pikinini man bilong Jekop, i bin mekim taim meri bilong Potifar i laik pulim em?—Ritim Stat 39:10-12.

13. (a) Long nau, olsem wanem planti bratasista i bihainim pasin bilong Josep? Olsem wanem sampela i bihainim pasin bilong Iso? (b) Yumi mas mekim wanem na bai yumi no bihainim pasin bilong Iso?

¹³ Planti bratasista i bin bungim ol traim na ol i mas makim olsem ol bai stap olsem Iso o Josep. Planti i bihainim savetingting na dispela i mekim Jehova i belgut. (Snd. 27:11) Tasol sampela i bihainim pasin bilong Iso na ol i no lukautim blesing ol i kisim. Long olgeta yia, kongrigesen i save stretim o rausim sampela bratasista, long wanem, ol i pundaun long pasin pamuk. Em i bikpela samting long yumi mas bilip strong, na dispela i makim olsem yumi mas redim bel bilong yumi long nau bambai yumi gat strong long sakim olgeta kain traim! (Sng. 78:8) Yumi bai stori long 2-pela samting yumi ken mekim bilong redim yumi yet long sakim ol traim, na mekim ol gutpela disisen long bihain.

14. Wanem ol askim bai helpim yumi long heitim pasin nogut na laikim gutpela pasin?

¹⁴ Namba 1 samting: Yumi mas tingim ol hevi em pasin bilong mekim sin inap kamapim. Sapos yumi laikim tru Jehova, orait yumi bai amamas tru long blesing yumi kisim. Taim yumi laikim wanpela man, yumi no inap mekim em i bel hevi, nogat. Yumi bai wok strong long amamasim em. Olsem na yumi mas lusim sampela haptaim long tingim ol hevi em pasin bilong mekim sin inap kamapim. Yumi mas tingim olsem sapos yumi pundaun long traim, dispela bai givim bikpela bel hevi long yumi yet na long ol narapela. Olsem na yumi mas askim yumi yet olsem: ‘Olsem wanem pasin bilong tingim mi yet inap bagarapim pasin bilong mi long pas gut wantaim Jehova? Olsem wanem rong bilong mi inap givim hevi long famili bilong mi? Olsem wanem dispela inap givim hevi long ol brata na sista insait long kongrigesen? Pasin bilong mi bai bagarapim bel bilong ol narapela, o nogat?’ (Fili. 1:10) Na tu, yumi ken askim yumi yet olsem: ‘Sapos mi lusim sotpela haptaim bilong kisim amamas long pasin pamuk, mi bai kisim gutpela samting long bihain, o nogat? Mi laik bihainim pasin bilong Iso, em i bin krai nogut tru taim em i luksave long hevi em sin bilong em i kamapim?’ (Hib. 12:17) Sapos yumi tingim gut ol dispela askim, dispela bai helpim yumi long heitim pasin nogut na laikim gutpela pasin. (Rom 12:9) Taim yumi laikim tru Jehova, yumi bai wok strong long lukautim blesing yumi kisim.—Sng. 73:28.

15. Wanem samting bai helpim yumi long redim yumi yet long sakim ol traim na pas gut yet wantaim God?

¹⁵ Namba 2 samting: Yumi mas redim yumi yet long sakim ol traim. Jehova i givim planti samting em yumi ken yusim bilong redim yumi yet long sakim ol traim bilong dispela graun, na lukautim pasin bilong yumi long pas gut wantaim em. Olsem: Em i soim yumi long olsem  wanem yumi inap kisim helpim long pasin bilong stadi long Baibel, ol miting, wok autim tok, na beten. (1 Kor. 15:58) Long olgeta taim yumi beten long Jehova na tokim em long ol tingting i stap long bel bilong yumi na yumi wok strong long autim tok, ol dispela samting i redim yumi long sakim ol traim. (Ritim 1 Timoti 6:12, 19.) Yumi mas wok strong yet long mekim ol dispela samting bambai yumi inap redi long sakim ol traim. (Gal. 6:7) Buk Sindaun i stori gut long ol samting yumi mas mekim.

16, 17. Wanem samting bai helpim yumi long mekim ol gutpela disisen?

¹⁶ Buk Sindaun sapta 2 i kirapim yumi long wok hat long kisim gutpela tingting na save. Gutpela tingting na save bai helpim yumi long makim wanem pasin i stret na wanem pasin i no stret, na tu, dispela bai helpim yumi long bosim ol laik bilong yumi na i no bihainim rot nogut bilong inapim ol dispela laik. Yumi inap mekim olsem sapos yumi yet i redi long wok strong. Baibel i tok: “Pikinini, yu mas harim tok bilong mi na putim gut long tingting bilong yu. Yu mas putim yau gut long olgeta tok i save givim yu gutpela tingting. Na yu mas wok strong long kisim gutpela save. Na yu mas askim gutpela tingting na save long kam long yu, olsem yu singautim wanpela man i kam bilong helpim yu. Na yu mas wok hat long painim gutpela tingting, olsem man i wok long painim silva ol i bin haitim insait long graun na olsem man i wok long painim mani samting ol i bin haitim. Sapos yu mekim ol dispela samting, orait bai yu save tru long pasin bilong stap aninit long Bikpela, na bai yu save gut long God. Long wanem, Bikpela yet em i as bilong gutpela tingting. Na em i save givim gutpela tingting na save long yumi.”—Snd. 2:1-6.

¹⁷ Sapos yumi mekim ol samting em ol dispela ves i kolim, yumi bai inap long mekim ol gutpela disisen. Yumi inap sakim ol traim sapos yumi larim tok bilong Jehova i senisim pasin bilong yumi, sapos yumi wok yet long beten askim God long stiaim yumi, na sapos yumi wok yet long painim save i kam long God long wankain pasin olsem yumi painim mani samting i stap hait.

18. Yu bai wok yet long mekim wanem? Bilong wanem?

¹⁸ Taim ol man i wok strong long painim gutpela tingting na save, Jehova i redi long givim dispela samting long ol. Sapos yumi wok strong moa long painim gutpela tingting na save na mekim wok long en, orait pasin bilong yumi long pas gut wantaim God Jehova bai kamap strong moa. Taim yumi pas gut wantaim God, dispela bai helpim yumi long sakim ol traim. Sapos yumi stap klostu long Jehova na daun long em, dispela bai helpim yumi long abrusim pasin bilong mekim sin. (Sng. 25:14; Jems 4:8) Taim yumi pas gut wantaim Jehova na bihainim savetingting em i givim long yumi, dispela bai helpim yumi long mekim ol gutpela disisen em Jehova bai amamas long en, na yumi bai lukautim blesing yumi kisim.