1, 2. (a) Paslain long God i wokim ol narapela samting, em i bin wokim husat pastaim? Jehova i bin yusim em long mekim wanem wok? (b) Wanem samting i soim klia olsem God i oganaisim gut ol samting long heven na long graun?

 JEHOVA em Man i bin wokim olgeta samting long heven na long graun, na em i save oganaisim gut ol samting. Paslain long God i wokim ol narapela samting, em i bin wokim dispela wanpela Pikinini tru bilong em. Baibel i kolim dispela Pikinini olsem “Tok,” long wanem, em i stap olsem nambawan mausman bilong God. Dispela Pikinini i bin mekim wok bilong Jehova inap planti milion yia pinis, long wanem, Baibel i tok: “Long bipo tru, Tok i stap, na Tok i stap wantaim God.” Na tu, Baibel i tok: “Olgeta samting i kamap long rot bilong em [Tok], na i no gat wanpela samting i bin kamap long narapela rot.” Winim 2 tausen yia i go pinis, God i bin salim Pikinini bilong em i kam long graun, na dispela Pikinini i kamap Jisas Krais, em man i gutpela olgeta, na em i bin inapim olgeta samting Papa i laik bai em i mekim.—Jon 1:1-3, 14.

² Taim Pikinini Bilong God i no kamap yet olsem man long graun, God i bin makim em long stap olsem “saveman i bosim wok.” (Snd. 8:30, 31) Long rot bilong dispela saveman, Jehova i wokim planti milion ensel long heven. (Kol. 1:16) Baibel i stori long ol dispela ensel na  i tok, planti tausen bilong ol i mekim wok bilong Jehova, na planti milion bilong ol i sanap klostu long em. (Dan. 7:10) Baibel i kolim ol lain ensel bilong God olsem wanpela lain ami em Jehova yet i oganaisim ol, na ol i stap olsem “ol wokman” bilong em.—Sng. 103:21.

3. Namba bilong ol sta na ol planet i bikpela olsem wanem? Olsem wanem God i oganaisim ol?

³ Orait, olsem wanem long ol samting olsem planti milion sta na ol planet? Wanpela nius (Chronicle) bilong Texas long Amerika i stori long wanpela wok painimaut em ol saientis i mekim long nau, na dispela wok painimaut i kamapim olsem i gat “3 handret sekstilion [sta], na dispela namba i dabol inap 3-pela taim moa winim namba ol saientis i bin kolim long pastaim.” Nius i tok moa olsem: “I gat namba 3, na 23 siro. O, 3 trilion taims 1 handret bilion.” Ol sta i stap long ol grup ol i kolim galaksi, na olgeta wan wan galaksi i gat planti bilion o planti trilion sta, na tu, i gat planti planet. Planti galaksi i stap gen long ol grup ol i kolim olsem bikpela lain galaksi.

4. Bilong wanem i stret long tok olsem God i oganaisim ol wokman bilong em long graun?

⁴ God i oganaisim gut ol ensel long heven, na olsem tasol, em i bin oganaisim gut ol sta long ples antap. (Ais. 40:26) Olsem na i stret long tok olsem Jehova i oganaisim tu ol wokman bilong em long graun. Em i laik bai ol i mekim stret ol wok, long wanem, i gat planti bikpela wok ol i mas mekim. Gutpela wok em lain bilong Jehova i bin mekim long bipo na long nau i soim klia tru olsem Jehova i stap wantaim ol na “em i God bilong bel isi, em i no save mekim ol samting i paul nabaut.”—Ritim 1 Korin 14:33, 40.

5. God i oganaisim pinis rot bilong lain man long kamap planti na mekim graun olgeta i kamap ples paradais, tasol wai na dispela samting i no kamap yet?

⁵ Taim Jehova i wokim namba 1 man na meri, em i tokim ol olsem: “Yupela i mas kamap planti na i go sindaun long olgeta hap bilong graun na bosim olgeta samting i stap long en. Mi putim ol pis na ol pisin na olkain animal bilong graun aninit long yupela.” (Stt. 1:28) God i oganaisim pinis rot bilong ol man long graun long kamap planti, na ol i mas helpim wok na bai graun olgeta i kamap ples paradais. Tasol dispela samting i no kamap yet, long wanem, Adam na Iv i bin sakim tok. (Stt. 3:1-6) Bihain, Jehova “i lukim pasin bilong ol manmeri long olgeta hap i nogut tru. Ol manmeri i tingting tasol long ol samting nogut.” Dispela i mekim na “long olgeta hap bilong graun ol i wok long pait na bikhet tasol.” Olsem na God i tingting pinis long kamapim Bikpela Tait bilong bagarapim ol man nogut.—Stt. 6:5, 11-13, 17.

6, 7. (a) Bilong wanem Jehova i amamas long Noa? (Lukim piksa long kirap bilong stadi.) (b) Long taim bilong Noa, wanem samting i painim olgeta man husat i no stap gut long God?

⁶ Tasol, Jehova “i amamas long Noa,” long wanem, “em i gutpela man, na wokabaut bilong en i stret long ai bilong God.” Noa i stap “pren tru bilong God,” olsem na Jehova i tokim em long wokim wanpela traipela sip. (Stt. 6:8-10, 14-16) Dispela sip bai inap tru long lukautim laip bilong ol man na ol animal. Noa i bihainim tok na em “i mekim olgeta samting olsem Bikpela i tok,” na famili bilong em i wok bung wantaim, na em i oganaisim gut ol wok na pinisim wok bilong wokim dispela traipela sip. Bihain, ol i bringim ol animal i go insait long sip, na “Bikpela i pasim dua bilong sip.”—Stt. 7:5, 15, 16.

⁷ Winim 4 tausen yia i go pinis, long yia 2370 B.C.E., Jehova i mekim Bikpela Tait i kamap na “i pinisim tru olgeta samting long graun,” tasol em i lukautim bilipman Noa na famili bilong em insait long sip. (Stt. 7:23) Olgeta manmeri husat i stap long graun long nau, ol i tumbuna pikinini bilong Noa na ol pikinini man bilong em wantaim ol meri bilong ol. Tasol olgeta manmeri i bin stap ausait long sip, ol i dai, long wanem, ol i no laik putim yau long tok bilong Noa, “em man bilong tokaut long stretpela pasin.”—2 Pita 2:5.

8. Taim God i tokim lain bilong em long i go kisim Graun Bilong Promis, wanem samting i kamap na i soim klia olsem ol i bin oganaisim gut ol wok?

 ⁸ Winim 8 handret yia bihain long Bikpela Tait, God i oganaisim ol manmeri bilong Israel na ol i kamap olsem wanpela kantri. God i oganaisim olgeta samting ol i mas mekim long laip bilong ol, na moa yet em pasin bilong mekim lotu. Olsem: Lain Israel i gat planti pris na Livai, na tu, i gat “ol meri i save wok long dua bilong haus sel bilong bung wantaim God.” (Kis. 38:8) Taim God Jehova i tokim lain Israel long i go kisim graun Kenan, dispela lain i no stap gut long em, olsem na em i tokim ol olsem: “Mi bin promis long larim yupela i go i stap long dispela kantri, tasol nau yupela olgeta i no inap i go. Kalep wantaim Josua tasol bai i go,” long wanem, ol i bringim gutpela nius bihain long ol i go lukstil long Graun Bilong Promis. (Nam. 14:30, 36-38) Bihain, Moses i makim Josua long kisim ples bilong em, olsem God i bin tokim em long mekim. (Nam. 27:18-23) Taim Josua i redi long bringim lain Israel i go long graun bilong Kenan, God i tokim em olsem: “Yu mas sanap strong na yu no ken pret, na yu no ken surik long wanpela samting. Long wanem, mi God, Bikpela bilong yu, bai mi go wantaim yu long olgeta hap.”—Jos. 1:9.

9. Rahap i pilim olsem wanem long Jehova na lain bilong Em?

⁹ God Jehova i stap wantaim Josua long olgeta hap em i go long en. Olsem: Tingim samting i bin kamap taim ol Israel i kam stap klostu long Jeriko, em taun bilong Kenan. Long yia 1473 B.C.E., Josua i salim 2-pela man i go bilong lukstil long Jeriko, na long dispela hap ol i bungim Rahap, em wanpela pamukmeri. Rahap i kisim ol i go antap long rup long haus bilong em na haitim ol, na bai ol man em king bilong Jeriko i salim i go bilong painim tupela, ol i no inap lukim tupela. Rahap i tokim dispela 2-pela man Israel olsem: “Mi save, Bikpela i givim pinis dispela kantri long han bilong yupela Israel . . . , long wanem, ol i bin stori long mipela long Bikpela i mekim solwara Retsi i drai . . . na tu, mipela i harim pinis olsem yupela i kilim i dai . . . tupela king bilong ol Amor.” Rahap i tok moa olsem: “God, Bikpela bilong yupela, em i God bilong heven na graun.” (Jos. 2:9-11) Rahap i wok  bung wantaim oganaisesen bilong Jehova long dispela taim bipo, olsem na God i lukautim em na lain famili bilong em na ol i no kisim bagarap taim lain Israel i daunim Jeriko. (Jos. 6:25) Rahap i bilip long Jehova na stap daun long em, na soim rispek long lain bilong Jehova.

10. Jisas i tok wanem long ol lida bilong lotu Juda? Bilong wanem em i mekim dispela tok?

¹⁰ Taim Josua i stap lida bilong lain Israel, ol i bin daunim planti taun na kisim graun Kenan. Tasol bihain wanem samting i kamap? Inap planti handret yia, lain Israel i brukim ol lo bilong God inap planti taim. Taim Jehova i salim Pikinini bilong em i kam long graun, lain Israel i bikhet moa yet na ol i sakim tok bilong God na ol i no putim yau long mausman bilong God, olsem na Jisas i kolim Jerusalem olsem “taun bilong kilim ol profet i dai.” (Ritim Matyu 23:37, 38.) God i sakim ol lida bilong lotu Juda, long wanem, ol i no stap gut long em. Olsem na Jisas i tokim ol olsem: “God bai tekewe Kingdom bilong en long yupela na givim long wanpela lain i karim kaikai bilong dispela Kingdom.”—Mat. 21:43.

11, 12. (a) Wanem samting i soim klia olsem long taim bilong ol aposel, Jehova i tekewe blesing bilong em long lain Israel na givim long narapela oganaisesen? (b) Husat lain i stap insait long dispela nupela oganaisesen em God i orait long en?

¹¹ Long taim bilong ol aposel, Jehova i sakim lain Israel, long wanem, ol i no stap gut long em. Tasol dispela i no makim olsem Jehova i no inap oganaisim ol gutpela wokman bilong em hia long graun. Wanpela nupela oganaisesen i kamap, na dispela oganaisesen i mekim ol strongpela wok na i stap daun long Jisas Krais na bihainim ol tok bilong em, olsem na Jehova i blesim dispela oganaisesen. Dispela oganaisesen i bin kirap long Pentikos bilong yia 33 C.E. Long dispela taim, inap olsem 120 disaipel bilong Jisas i bin bung i stap long Jerusalem na “wantu wanpela nois i kam long skai na i krai olsem wanpela strongpela win i spit i kam, na i pulapim tru dispela haus ol i sindaun i stap long en.” Bihain, “ol i lukim samting i olsem ol liklik hap paia i kamap na i go i stap antap long olgeta wan wan. Holi spirit i pulap long olgeta na ol i stat long mekim kain kain tokples. Holi spirit i mekim na ol inap mekim ol dispela toktok.” (Apo. 2:1-4) Dispela samting i narapela kain tru na i soim klia olsem Jehova i sambai long dispela nupela oganaisesen we ol disaipel bilong Krais i insait long en.

¹² Long dispela de, “inap olsem 3,000 manmeri i joinim lain bilong ol” disaipel bilong Jisas. Na tu, “long olgeta de Jehova i wok long bringim sampela man moa i kam joinim lain bilong ol, em ol manmeri God i kisim bek ol.” (Apo. 2:41, 47) Ol Kristen long taim bilong ol aposel i bin mekim gut wok bilong autim tok, olsem na “tok bilong God i go long planti hap, na planti manmeri moa i wok long kamap disaipel long Jerusalem.” Na moa yet, “bikpela lain pris tu ol i bilip.” (Apo. 6:7) Olsem na planti manmeri husat i gat gutpela bel, ol i kisim tok i tru. Bihain, Jehova i mekim narapela samting bilong soim klia olsem em i sambai long dispela nupela oganaisesen—em i kirap long bringim “ol manmeri bilong ol arapela lain” i kam insait long kongrigesen Kristen.—Ritim Aposel 10:44, 45.

13. Nupela oganaisesen bilong God i bin mekim wanem wok?

¹³ Ol disaipel bilong Krais i bilip olsem God yet i bin givim wok long ol. Jisas yet i bin soim gutpela pasin ol i ken bihainim, long wanem, bihain stret long em i kisim baptais, em i kirap long autim tok long “Kingdom bilong heven.” (Mat. 4:17) Jisas i bin skulim ol disaipel long mekim wankain wok. Em i tokim ol olsem: “Yupela bai stap witnes bilong mi long Jerusalem na long olgeta hap bilong Judia na Samaria, na i go inap long olgeta hap bilong graun.” (Apo. 1:8) Ol disaipel bilong Krais long pastaim i bin kliagut long ol samting God i laik bai ol i mas mekim. Olsem: Long Antiok long Pisidia, Pol na Barnabas i tokim stret ol Juda husat i birua long ol, olsem: “I stret long ol i autim tok bilong God long yupela pastaim. Tasol yupela i givim baksait  long en na long dispela rot yupela i soim olsem yupela i no gutpela inap long kisim laip oltaim. Olsem na harim! Mipela bai go long ol manmeri bilong ol arapela lain. Jehova i bin givim tok long mipela olsem, ‘Mi makim yu olsem lait bilong olgeta lain bilong graun, na bai yu ken tokaut long olgeta hap long rot bilong mi long kisim bek ol man.’” (Apo. 13:14, 45-47) Kirap long taim bilong ol aposel, hap bilong oganaisesen bilong God long graun i bin tokaut long rot em God i stretim pinis bilong kisim bek ol man.

14. Long taim bilong ol aposel, wanem samting i bin kamap long Jerusalem? Husat i bin abrusim bagarap?

¹⁴ Lain Juda i no bilip long gutnius, olsem na bagarap i painim ol, long wanem, Jisas i bin tok lukaut long ol disaipel olsem: “Taim yupela i lukim ol ami i kam banisim Jerusalem, orait yupela i ken save olsem taim bilong em long bagarap i kam klostu. Long dispela taim ol manmeri long Judia i mas ranawe i go long ol maunten, na ol manmeri i stap long Jerusalem i mas lusim dispela hap. Na ol man i stap ausait long dispela taun ol i no ken i go insait long en.” (Luk 21:20, 21) Tok profet bilong Jisas i kamap tru. Lain Juda i bikhet long gavman, olsem na Sestius Galus i bringim lain ami bilong Rom na ol i go banisim Jerusalem long 66 C.E. Tasol kwiktaim, ol dispela ami i lusim Jerusalem na i go bek, na dispela i opim rot long ol disaipel bilong Jisas inap ranawe lusim Jerusalem na Judia. Saveman Eusebius i tok, planti disaipel i bin brukim wara Jordan na ranawe i go long Pela long Perea. Long 70 C.E., Jeneral Taitus i bringim lain ami bilong Rom i go bek na ol i bagarapim Jerusalem. Tasol ol gutpela Kristen i bin abrusim bagarap, long wanem, ol i bihainim tok lukaut bilong Jisas.

15. Wanem ol samting i bin kamap, tasol planti manmeri moa i bihainim lotu Kristen?

¹⁵ Em tru olsem ol disaipel bilong Krais i bin karim ol bikpela hevi, na ol man i mekim nogut long ol, na ol narapela bikpela traim i painim ol, tasol maski ol dispela samting i kamap, planti manmeri moa i kam bihainim lotu Kristen. (Apo. 11:19-21; 19:1, 19, 20) Long dispela taim bipo, ol Kristen i kamap strong moa long bilip, long wanem, God i givim blesing long ol.—Snd. 10:22.

16. Olgeta wan wan Kristen i mas mekim wanem na bai ol inap stap strong long bilip?

¹⁶ Olgeta wan wan Kristen i mas wok strong na bai ol inap stap strong long bilip. Ol i mas stadi gut long Tok Bilong God, go oltaim long ol miting, na givim bel tru long autim tok bilong Kingdom. Ol dispela samting i bin helpim lain bilong Jehova long dispela taim bipo long stap strong long bilip na stap wanbel, na wankain samting tu i kamap long nau. Long dispela taim bipo, ol kongrigesen i bin oganaisim gut wok bilong ol. Olsem na ol manmeri husat i stap insait long ol dispela kongrigesen, ol i bin kisim bikpela helpim long ol wasman na ol wokman husat i redi long helpim ol. (Fili. 1:1; 1 Pita 5:1-4) Na ating olgeta long kongrigesen i save amamas tru taim ol wasman raun, kain olsem Pol, i go visitim kongrigesen bilong ol! (Apo. 15:36, 40, 41) Planti samting i wankain long pasin bilong yumi long mekim lotu long nau na pasin bilong mekim lotu em ol Kristen i bin bihainim long taim bilong ol aposel. Yumi tenkyu tru olsem Jehova i bin oganaisim ol wokman bilong em long bipo na long nau tu! a

17. Yumi bai skelim wanem samting long stadi i kamap bihain long dispela?

¹⁷ Klostu nau ol manmeri em Satan i bosim, ol bai bagarap na pinis, tasol hap bilong oganaisesen bilong Jehova long graun i wok long kamap bikpela moa yet. Olsem wanem? Yu wok long bihainim gut olgeta tok i kam long dispela oganaisesen? Yu wok long kamap strong moa long bilip? Stadi i kamap bihain long dispela bai helpim yu long save long ol samting yu mas mekim bilong kamap strong moa long bilip.