Yumi Mas i Stap Holi
“Yupela i mas i stap holi.”—WKP. 11:45.
1. Buk Wok Pris inap helpim yumi olsem wanem?
LONG Buk Wok Pris, dispela tok, holi, i stap planti taim moa winim ol narapela buk bilong Baibel. Olgeta man i lotuim Jehova, ol i mas i stap holi, olsem na sapos yumi kliagut na pilim tru ol tok i stap long Buk Wok Pris, dispela bai helpim yumi long i stap holi.
2. Wanem sampela gutpela tok i stap long Buk Wok Pris?
2 Profet Moses i bin raitim Buk Wok Pris, na dispela buk em hap bilong “olgeta tok i stap long Rait Holi” na i gutpela long skulim ol man. (2 Tim. 3:16) Taim ol i raitim Baibel long namba 1 taim, nem bilong Jehova i stap inap olsem 10-pela taim long olgeta wan wan sapta bilong dispela buk. Sapos yumi kisim stretpela save long ol tok i stap long Buk Wok Pris, dispela bai strongim yumi long abrusim olgeta kain samting we inap nogutim nem bilong God. (Wkp. 18:21) Taim ol i raitim Baibel long namba 1 taim, planti taim Buk Wok Pris i yusim dispela hap tok, “Mi Jehova,” na dispela i mas kirapim yumi long bihainim tok bilong God. Long dispela stadi na long neks stadi, yumi bai stori long sampela gutpela tok i stap long Buk Wok Pris—dispela buk i olsem presen i kam long God na i helpim yumi long bihainim pasin holi long wok lotu bilong yumi.
YUMI MAS I STAP HOLI
3, 4. Taim Moses i wasim Aron na ol pikinini man bilong Aron, dispela i makim wanem samting? (Lukim piksa long kirap bilong stadi.)
3 Ritim Wok Pris 8:5, 6. Jehova i makim Aron long mekim wok olsem hetpris bilong lain Israel, na ol pikinini man bilong em bai mekim wok pris na helpim lain Israel. Aron i stap olsem piksa na i makim Jisas Krais, na ol pikinini man bilong Aron i stap olsem piksa na i makim ol disaipel bilong Jisas, em ol Kristen God i bin makim. Taim Moses i wasim Aron, yu ting dispela i makim olsem God i gat wok long mekim Jisas i kamap klin? Nogat. Jisas i no gat sin na em “i gutpela olgeta,” olsem na i no gat wok long God i mekim em i kamap klin. (Hib. 7:26; 9:14) Bihain long Moses i wasim Aron na mekim em i kamap klin, dispela i olsem piksa bilong makim olsem Jisas i stap klin na pasin bilong em i stret olgeta. Taim Moses i wasim ol pikinini man bilong Aron, dispela i makim wanem samting?
4 Taim Moses i wasim ol pikinini man bilong Aron, dispela i olsem piksa bilong makim samting God i mekim bilong klinim ol lain husat bai mekim wok pris long heven. Taim Moses i wasim ol pikinini man bilong Aron, yu ting dispela i olsem piksa bilong makim baptais bilong ol Kristen God i bin makim? Nogat. Taim man i kisim baptais, dispela i no makim olsem sin bilong em i pinis, nogat. Dispela i makim olsem long laik bilong em yet em i dediket long God Jehova. God i save yusim “tok bilong [Em]” long wasim ol Kristen Em i bin makim, olsem na ol i mas givim bel olgeta long bihainim tok bilong Krais. (Efe. 5:25-27) Long dispela rot, God i mekim ol i kamap klin na holi. Tasol olsem wanem long “ol arapela sipsip”?—Jon 10:16.
5. Wai na yumi ken tok olsem God i yusim tok bilong Baibel long mekim ol arapela sipsip i kamap klin?
5 Ol pikinini man bilong Aron i no stap olsem piksa bilong makim “bikpela lain manmeri,” em ol arapela sipsip bilong Jisas. (Rev. 7:9) Orait, yu ting Tok Bilong God i helpim lain arapela sipsip husat i baptais pinis na ol i kamap klin na holi? Yes! Ol i bilip na wet long kisim laip long graun, na taim ol i ritim tok bilong Baibel olsem blut bilong Jisas i bikpela samting na i helpim tru yumi, dispela i kirapim ol long bilip long dispela tok na “long san na long nait ol i mekim wok bilong [God].” (Rev. 7:13-15) Ol Kristen God i bin makim na lain arapela sipsip i “mekim yet ol gutpela pasin,” na dispela i soim klia olsem God i wok yet long klinim ol. (1 Pita 2:12) Jehova i amamas tru taim em i lukim olsem ol Kristen Em i bin makim na lain arapela sipsip i stap klin na stap wanbel, na ol i stap gut long bihainim tok bilong Jisas, em Wasman bilong ol!
6. Olsem wanem yumi ken skelim yumi yet?
6 God i laik bai ol pris bilong lain Israel i stap klin long skin, na dispela inap helpim tru lain bilong Jehova long nau. Ol man i stadi long Baibel wantaim yumi i luksave olsem ples lotu bilong yumi i stap klin, na yumi tu i stap klin na bilas gut. Pasin bilong lain pris long i stap klin i helpim yumi long luksave olsem sapos man i laik kam long maunten bilong lotuim Jehova, orait “bel bilong en i [mas i stap] klin.” (Ritim Song 24:3, 4; Ais. 2:2, 3.) Taim yumi mekim wok bilong God, yumi mas i stap klin long tingting, bel, na bodi. Dispela i makim olsem oltaim yumi mas skelim yumi yet, na sampela taim yumi mas mekim ol bikpela senis na bai yumi inap i stap holi. (2 Kor. 13:5) Sapos wanpela man i baptais pinis na em i save lukim ponografi, orait em i mas askim em yet olsem, ‘Mi bihainim pasin holi o nogat?’ Em i mas kisim helpim long lusim dispela pasin doti.—Jems 5:14.
BIHAINIM TOK NA STAP HOLI
7. Olsem Wok Pris 8:22-24 i kamapim, Jisas i soim wanem gutpela pasin em ol narapela i ken bihainim?
7 Taim lain pris bilong Israel i kirap long mekim wok, Moses i kisim blut bilong sipsip man na putim long Het Pris Aron na ol pikinini man bilong em, em i putim blut long yau bilong ol long rait sait, na long namba 1 pinga bilong han sut, na long namba 1 tou bilong lek long rait sait. (Ritim Wok Pris 8:22-24.) Dispela i makim olsem ol pris bai bihainim tok na mekim gut wok bilong ol. Olsem tasol, Het Pris Jisas i soim gutpela pasin em ol Kristen God i bin makim na ol arapela sipsip i ken bihainim. Oltaim em i putim yau long Tok Bilong God, na em i yusim han bilong em long mekim laik bilong Jehova, na oltaim lek bilong em i bihainim pasin holi.—Jon 4:31-34.
8. Olgeta man husat i lotuim Jehova, ol i mas mekim wanem?
8 Ol Kristen God i bin makim na ol arapela sipsip bilong Jisas i mas bihainim pasin bilong Het Pris bilong ol long stap gut long God. Olgeta man i lotuim Jehova i mas bihainim tok bilong Baibel, na bai ol i no ken mekim holi spirit bilong God i bel hevi. (Efe. 4:30) Ol i mas “wokabaut yet long stretpela rot.”—Hib. 12:13.
9. (a) Tripela brata husat i bin wok gut wantaim ol memba bilong Gavening Bodi, ol i tok wanem? (b) Hau bai tok bilong ol dispela brata inap helpim yu long soim olsem yu wok yet long bihainim pasin bilong i stap holi?
9 Skelim tok bilong 3-pela brata husat i bilip na wet long kisim laip long graun na ol i bin wok planti yia wantaim ol memba bilong Gavening Bodi. Wanpela i tok: “Dispela wok i olsem gutpela blesing tru, tasol mipela i pas gut wantaim ol na mipela i luksave olsem maski God i makim ol long holi spirit, ol tu i sinman. Insait long ol dispela yia, mi wok strong long bihainim tok bilong ol man i go pas long mekim wok.” Namba 2 brata i tok: “Kain skripsa olsem 2 Korin 10:5 i stori long pasin bilong ‘bihainim tok bilong Krais,’ na dispela i bin helpim mi long bihainim tok na wok gut wantaim ol brata husat i go pas long mekim wok. Mi pilim tru long bel na bihainim tok bilong ol.” Namba 3 brata i tok: “Taim yumi laikim ol pasin em Jehova i laikim na heitim ol pasin Jehova i heitim, na oltaim yumi larim em i stiaim yumi na yumi mekim ol samting em i amamas long en, dispela i makim olsem yumi bihainim tok i kam long oganaisesen bilong em na ol man em i yusim long mekim wok bilong em long graun.” Dispela brata i lukim olsem Nathan Knorr, em memba bilong Gavening Bodi, em i orait long ol tok i kamap long wanpela atikol (“Birth of the Nation”) long Was Taua bilong 1925, tasol sampela brata i bin kisim 2-pela tingting. Dispela brata i pilim tru pasin bilong Brata Knorr long bihainim tok. Taim yu tingim tingim tok bilong ol dispela 3-pela brata, dispela inap helpim yu long kisim pasin bilong bihainim tok na bai yu inap i stap holi.
BIHAINIM TOK BILONG GOD LONG BLUT
10. Wai na yumi mas bihainim lo bilong God long sait bilong blut?
10 Ritim Wok Pris 17:10. Jehova i tokim lain Israel long ol i no ken “kaikai mit i gat blut i stap yet long en.” Ol Kristen tu i no ken kaikai mit i gat blut i stap long en o kisim blut bilong narapela man. (Apo. 15:28, 29) Yumi no laik tru bai God i ‘birua long yumi’ na rausim yumi long lain bilong em. Yumi laikim em na yumi laik bihainim tok bilong em. Maski bikpela hevi tru i laik painim yumi, yumi tingting strong olsem yumi no inap bihainim tok bilong ol man husat i no save long Jehova na ol i no laik bihainim tok bilong em. Yumi abrusim blut, olsem na ol man bai tok bilas long yumi, tasol yumi yet i laik bihainim tok bilong God. (Jut 17, 18) Yumi mas holim wanem kain tingting na dispela bai strongim yumi long “no ken kaikai abus wantaim blut bilong en” o kisim blut?—Lo 12:23.
11. Olsem wanem na pasin ol i bihainim long Bikpela De Bilong God i Tekewe Sin Bilong Ol Manmeri em i no samting nating?
11 Long olgeta yia, Het Pris bilong lain Israel bilong bipo i save yusim blut bilong animal long Bikpela De Bilong God i Tekewe Sin Bilong Ol Manmeri, na dispela i helpim yumi long kliagut long tingting bilong God long blut. Blut i gat bikpela wok bilong en. Em i bilong tekewe sin bilong ol man husat i laik bai Jehova i tekewe sin bilong ol. Het Pris i save putim pinga bilong em long blut bilong bulmakau na meme na tromoi blut long pes bilong Bokis Kontrak. (Wkp. 16:14, 15, 18, 19) Dispela i opim rot long Jehova inap lusim sin bilong lain Israel. Na tu, Jehova i tok olsem sapos wanpela man i laik kaikai abus na em i kilim animal, orait em i mas kapsaitim blut bilong animal na karamapim long graun bikos “blut i save givim laip long olgeta man na animal.” (Wkp. 17:11-14) Yu ting dispela pasin em samting nating? Nogat. Wok em Het Pris i mekim long blut long Bikpela De Bilong God i Tekewe Sin Bilong Ol Manmeri, na tok bilong Jehova long lain Israel i mas kapsaitim blut bilong animal long graun, dispela i stret wantaim tok em pastaim Jehova i bin givim long Noa na lain tumbuna pikinini bilong em. (Stt. 9:3-6) God Jehova i tambuim ol man long kisim blut bilong helpim ol long i stap laip. Olsem wanem ol Kristen inap bihainim dispela tok?
12. Long pas Pol i raitim i go long ol Kristen bilong lain Juda, hau na em i kamapim klia olsem blut i gat strong bilong tekewe sin?
12 Taim aposel Pol i raitim pas i go long ol Kristen em ol i bilong lain Juda na em i stori long ol long strong bilong blut long tekewe sin, em i tok: “Olsem Lo i makim, blut i save mekim klostu olgeta samting i kamap klin. Sapos ol i no kapsaitim blut, orait God i no inap lusim sin bilong ol manmeri.” (Hib. 9:22) Na tu, Pol i kamapim klia olsem maski ofa bilong animal i gat strong long en, dispela i bilong kirapim lain Israel long tingim olsem ol i sinman na ol i nidim wanpela samting i gat bikpela strong moa bilong pinisim tru sin bilong ol. “Lo i olsem sedo tasol bilong ol gutpela samting bai kamap bihain, tasol lo yet i no ol dispela gutpela samting, nogat.” (Hib. 10:1-4) Hau bai God i lusim sin bilong ol?
13. Yu yet i pilim olsem wanem long pasin Jisas i mekim taim em i kapsaitim blut bilong em olsem ofa na givim pe bilong en long Jehova?
13 Ritim Efesus 1:7. Taim Jisas Krais i dai bilong givim laip bilong em olsem ofa, em i ‘givim em yet bilong helpim yumi,’ na dispela i helpim tru olgeta husat i laikim em na Papa bilong em. (Gal. 2:20) Tasol samting Jisas i mekim bihain long em i dai na kirap bek, dispela i opim rot na God inap fogivim ol sin bilong yumi. Lo Bilong Moses i makim olsem ol i mas mekim Bikpela De Bilong God i Tekewe Sin Bilong Ol Manmeri, na dispela i olsem piksa bilong samting em Jisas i mekim. Long dispela de, ol i save givim ol animal olsem ofa na het pris i save kisim sampela blut bilong ol dispela ofa i go insait long Rum Tambu Tru bilong haus lotu sel, na bihain em i bringim i go insait long tempel bilong Solomon na ofaim long God. (Wkp. 16:11-15) Long wankain pasin, Jisas i bin kapsaitim blut bilong em olsem man bilong graun, na bihain em i go antap long heven na givim pe bilong dispela blut long Jehova. (Hib. 9:6, 7, 11-14, 24-28) Yumi bilip long ofa bilong blut bilong Jisas, olsem na yumi amamas tru olsem God inap fogivim ol sin bilong yumi na bel bilong yumi i no gat tok!
14, 15. Bilong wanem yumi mas kliagut na bihainim lo bilong Jehova long sait bilong blut?
14 Olsem wanem? Nau yu kliagut long as na Jehova i tokim yumi long rausim “olgeta blut” long abus? (Wkp. 17:10) Yu luksave nau long as na God i tingim blut olsem samting i holi? Long tingting bilong God, blut i wankain olsem laip. (Stt. 9:4) Yu ting i stret long yumi holim wankain tingting olsem God long sait bilong blut na bihainim tok bilong em long sakim blut? Wanpela rot tasol bilong yumi ken stap wanbel wantaim God em olsem, yumi mas bilip long ofa bilong Jisas long baim bek yumi na pilim tru olsem blut em samting i dia tumas long ai bilong Krieta.—Kol. 1:19, 20.
15 Yumi olgeta inap bungim hevi long sait bilong blut, na yumi no save wanem taim dispela hevi inap kamap. Ating wanpela wanblut o wanpela gutpela pren inap bungim hevi we em i mas mekim disisen olsem em bai kisim blut o nogat. Long kain taim olsem, yumi mas mekim disisen olsem yumi bai kisim ol liklik samting i stap insait long blut o nogat, na yumi laik bai dokta i bihainim wanem kain wei taim ol i mekim operesen long yumi. Olsem na em i bikpela samting tru long mekim wok painimaut na redi gut long bungim kain hevi olsem. Taim yumi mekim ol dispela samting na beten, dispela bai helpim yumi long sanap strong na mekim gutpela disisen. Yumi no laik tru long mekim samting em Baibel i tambuim na mekim Jehova i bel hevi! Planti dokta na ol wokman bilong haus sik i save kirapim ol man long givim blut na bai ol i ken yusim dispela blut long seivim laip bilong ol narapela. Tasol lain bilong Jehova i save olsem God i bin wokim ol na em i gat rait long tokim ol long ol i mas holim wanem kain tingting long blut. Long tingting bilong Jehova, “olgeta blut” i holi. Yumi mas tingting strong long bihainim lo bilong em long sait bilong blut. Taim yumi bihainim pasin holi, yumi soim klia long God olsem yumi pilim tru bikpela strong i stap long blut bilong Jisas—dispela blut tasol i opim rot long God inap fogivim ol sin bilong yumi na yumi inap kisim laip oltaim.—Jon 3:16.
Yu tingting strong long bihainim lo bilong Jehova long sait bilong blut? (Lukim paragraf 14, 15)
JEHOVA I LAIK BAI YUMI MAS I STAP HOLI
16. Wai na lain bilong Jehova i mas i stap holi?
16 Taim God i kisim bek lain Israel long wok kalabus long Isip, em i tokim ol olsem: “[“Mi Jehova,” NW] mi bin kisim yupela long Isip na bringim yupela i kam, bilong mi stap God bilong yupela. Olsem na yupela i mas i stap holi na bihainim ol gutpela na stretpela pasin tasol, long wanem, mi yet mi holi na pasin bilong mi em i gutpela na stretpela olgeta.” (Wkp. 11:45) Lain Israel i mas i stap holi bikos Jehova em i holi. Yumi stap olsem ol Witnes Bilong Jehova, olsem na yumi tu i mas i stap holi. Buk Wok Pris i kamapim klia dispela samting.
17. Nau yu pilim olsem wanem long ol tok i stap long Buk Wok Pris?
17 Yumi bin skelim sampela tok bilong Buk Wok Pris na dispela i helpim tru yumi. Dispela stadi i kirapim yumi long pilim tru ol tok i stap long dispela buk bilong Baibel. Ating yu bin tingim tingim ol gutpela tok i stap long Buk Wok Pris, na dispela i helpim yu long kliagut moa long as na yumi mas i stap holi. Tasol wanem sampela gutpela tok moa i stap long dispela buk? Dispela buk inap givim wanem skul long yumi long pasin bilong mekim wok bilong Jehova? Yumi bai skelim ol dispela askim long neks stadi.
