1, 2. Husat inap kisim helpim taim ol i skelim gut ol tok i stap long Song Bilong Solomon? Bilong wanem? (Lukim piksa long kirap bilong stadi.)

 WANPELA elda i mekim pinis tok bilong marit na em i lukluk long tupela nupela marit na em i tingting olsem: ‘Tupela i lukluk na smail long ol yet, na holim gut narapela narapela! Pasin laikim bilong tupela i strong tru!’ Taim ol i mekim kaikai bilong marit, dispela tupela nupela marit i danis gut, na elda i tingting gen olsem: ‘Marit bilong tupela bai i stap strong yet long ol yia bihain, o nogat? Pasin laikim namel long tupela bai kamap strong moa, o dispela pasin laikim bai pinis?’ Sapos man na meri i laikim yet narapela narapela na pasin laikim bilong ol i stap strong, dispela bai helpim tru marit bilong ol. Tasol planti marit i bruk long nau, olsem na i stret long askim olsem, ‘Pasin laikim inap i stap strong yet, o nogat?’

² Long taim bilong King Solomon long bipo, i no olgeta manmeri i gat pasin bilong laikim tru narapela. Solomon i stori long pasin bilong ol manmeri long taim bilong em, na em i tok: “Namel long ol planti tausen manmeri, mi bin lukim wanpela wanpela gutpela man i stap. Tasol mi no lukim wanpela gutpela meri i stap. God i bin makim rot bilong ol manmeri, . . . tasol ol yet i kamapim planti kain tingting na pasin, na dispela i mekim wokabaut bilong ol i hat tumas.” (Sav. 7:26-29) Long taim bilong Solomon, ol meri bilong ol narapela kantri i lotuim god Bal na ol i pulim planti man long bihainim pasin bilong ol,  olsem na planti man na meri i no bihainim stretpela pasin. a Tasol 20 yia paslain long dispela hevi i kamap, Solomon i raitim naispela stori olsem tok piksa we i soim olsem pasin laikim namel long man na meri inap i stap strong yet. Dispela stori i kamapim klia ol pasin na toktok em man na meri i save mekim bilong soim olsem tupela i laikim tru narapela narapela. Olgeta wokman bilong Jehova, em ol lain husat i marit pinis na ol lain i stap singel yet, ol inap kisim planti skul long dispela kain pasin laikim taim ol i skelim gut ol tok i stap long Buk Solomon.

3. Olsem wanem na pasin laikim tru inap i stap namel long man na meri?

³ Ritim Solomon 8:6. Sampela Baibel i yusim dispela hap tok, “paia bilong Ja,” na dispela hap tok i gat bikpela mining. Pasin laikim tru i olsem “paia bilong Ja,” long wanem, Jehova yet em i Papa tru bilong dispela pasin laikim. Em i wokim ol man i kamap olsem em yet, olsem na ol inap kisim dispela pasin. (Stt. 1:26, 27) Taim God i bringim Iv i go long Adam, Adam i lukim Iv na em i mekim ol naispela tok i olsem tok piksa. Iv i pas gut wantaim Adam, bikos “God i wokim em long bun bilong [Adam].” (Stt. 2:21-23) Taim Jehova i wokim man, em i inapim man wantaim dispela laik bilong laikim ol narapela, olsem na pasin laikim namel long man na meri inap i stap strong yet.

4, 5. Stori long ol bikpela tok long Song Bilong Solomon.

⁴ Taim man na meri i laikim tru narapela narapela, dispela pasin laikim bilong ol inap i stap strong longpela taim. Na tu, pasin laikim namel long ol inap kirapim ol long mekim sampela moa gutpela pasin. Song Bilong Solomon i kolim sampela bilong ol dispela pasin. Dispela song i kolim ol tok long wankain pasin olsem ol tok i save kamap long wanpela drama. Em i stori long pasin laikim namel long yangpela meri bilong ples Sunem o Sulam, na man em i laikim tru—em wasman bilong sipsip. Solomon i wokim kem klostu long ol gaden wain em meri Sulam i lukautim, na em i lukim olsem dispela meri i luk nais tru. Olsem na em i tok na ol i bringim meri Sulam i go long em. Tasol kirap long namba 1 taim, meri i soim klia olsem em i laikim tru wasman bilong sipsip. Maski Solomon i grisim dispela meri long laikim em, meri i tokaut stret olsem em i laik tru long i stap wantaim wasman bilong sipsip. (Sol. 1:4-14) Wasman bilong sipsip i go lukim meri Sulam, na tupela i mekim ol naispela tok i soim klia olsem ol i laikim tru narapela narapela.—Sol. 1:15-17.

⁵ Taim Solomon i go bek long Jerusalem, em i kisim dispela meri i go wantaim em, na wasman bilong sipsip i bihainim em i go. (Sol. 4:1-5, 8, 9) Maski Solomon i traim bes long grisim meri Sulam long laikim em, olgeta hatwok bilong em i lus nating. (Sol. 6:4-7; 7:1-10) Olsem na king i larim em i go bek long ples. Long pinis bilong dispela song, meri i tok em i laik bai gutpela pren bilong em i “kam bek kwik” na ran i kam long em olsem “wanpela gutpela wel abus.”—Sol. 8:14.

6. Bilong wanem i hatwok long save long ol lain i mekim ol tok i stap long Song Bilong Solomon?

⁶ Solomon i raitim song we i “gutpela song na i winim olgeta song” na i gat naispela mining long en, tasol i hatwok long painimaut husat i mekim ol toktok i stap insait long dispela song. (Sol. 1:1) Wanpela dikseneri (The New Interpreter’s Dictionary of the Bible) i tok, man bilong raitim dispela song “i no raitim song long pasin we ol man inap save long toktok bilong husat i kamap paslain na toktok bilong husat i kamap bihain.” Taim Solomon i raitim dispela song, ating em i no kolim nem bilong ol man i mekim toktok, long wanem, em i no laik bai dispela i distebim ron bilong stori. Tasol yumi inap save long ol lain i mekim tok insait long dispela stori taim yumi skelim tok ol yet i mekim na tok ol narapela i mekim long ol.

7, 8. Long Song Bilong Solomon, wanem mining bilong ol tok i makim pasin “laikim”? Kolim sampela eksampel.

⁷ Song Bilong Solomon i gat planti tok i stori long pasin “laikim” namel long yangpela meri na wasman bilong sipsip. Ol dispela tok i kain olsem toktok bilong lain Esia inap 3 tausen yia i go pinis, na ol man long nau i no kliagut long dispela kain pasin bilong toktok. Tasol ol dispela tok i gat bikpela mining na yumi inap pilim tingting bilong ol lain i mekim ol dispela tok. Wasman i tokim meri olsem, “ai bilong yu i lait” na i luk nais tru olsem ai bilong ol pisin balus. (Sol. 1:15) Meri i tok, ai bilong wasman i lait tumas olsem pisin balus i waswas pinis na i sanap arere long wara. (Ritim Solomon 5:12.) Em i tok moa olsem, blakpela sekol long ai bilong wasman i luk nais tru na i luk olsem pisin i waswas long milk.

⁸ Taim wasman na meri Sulam i litimapim nem bilong narapela narapela, ol i no tingim tasol naispela skin bilong narapela narapela. Skelim tok wasman i mekim taim em i harim toktok bilong meri Sulam. (Ritim Solomon 4:7, 11.) Toktok bilong meri Sulam i olsem “hani i swit long maus,” na “i gutpela tumas olsem susu bilong dring.” Ol dispela hap tok i makim olsem toktok bilong em i nais tru olsem hani na milk. Olsem na taim wasman i tokim meri olsem, “yu naispela tumas [na] i no gat wanpela mak i stap long skin bilong yu,” dispela i makim olsem em i no tingim tasol gutpela skin bilong meri.

9. (a) Wanem ol pasin inap strongim pasin laikim namel long ol marit? (b) Bilong wanem ol marit i mas kamapim klia olsem ol i laikim tru narapela narapela?

⁹ Taim man na meri i mekim kontrak bilong marit, ol i mas i gat pasin laikim na pasin bilong tingim tru narapela narapela. Ol Kristen i mas i gat pasin laikim insait long marit bilong ol. Tasol pasin laikim bilong ol i wanem kain? Yu ting ol stiatok bilong Baibel i as bilong dispela pasin laikim? (1 Jon 4:8) Yu ting pasin laikim bilong ol i kain olsem pasin laikim i stap namel long ol wanfamili? Yu ting pasin laikim bilong ol i kain olsem pasin laikim i stap namel long 2-pela pren? (Jon 11:3) O yu ting pasin laikim bilong ol i kain olsem pasin laikim i stap namel long man na meri? (Snd. 5:15-20) Olgeta dispela pasin laikim i kirapim ol marit Kristen long laikim tru narapela narapela, na pasin laikim bilong ol i stap strong inap longpela taim. Toktok na pasin bilong man bai helpim meri long luksave olsem man i laikim em tru. Ol poroman marit i gat ol wok bilong mekim long olgeta wan wan de, tasol ol i no ken larim ol dispela samting i pasim ol long kamapim klia olsem ol i laikim tru narapela narapela! Dispela bai strongim marit na ol bai i stap amamas. Long sampela ples, ol papamama i save makim poroman marit bilong ol pikinini. Long ol kain marit olsem, ol poroman marit i no save gut yet long narapela narapela. Olsem na em i bikpela samting long man na meri i mas tokaut olsem ol i laikim narapela narapela, na dispela bai strongim pasin laikim namel long ol na marit bai i stap gut.

10. Taim man na meri i tingim bek ol gutpela tok na ol pasin em poroman marit i mekim, olsem wanem dispela inap helpim tupela?

¹⁰ Sapos ol poroman marit i kamapim klia olsem ol i laikim narapela narapela, dispela inap helpim ol long narapela rot tu. King Solomon i tok long “wokim sampela bilas gol na ol arapela bilas silva” na givim long meri Sulam. Solomon i litimapim tru nem bilong meri Sulam na em i tok: “Pes bilong en i olsem san i laik kamap na i lait olsem biksan, na pes bilong en i klia tru olsem lait bilong mun.” (Sol. 1:9-11; 6:10) Tasol yangpela meri i laikim tumas wasman bilong sipsip, na em i stap gut long dispela wasman. Wanem samting i strongim meri Sulam na mekim gut bel bilong em taim em i stap longwe long wasman? Meri Sulam yet i stori long dispela samting. (Ritim Solomon 1:2, 3.) Em i tingim yet ol toktok na ol pasin em wasman i mekim bilong  soim klia pasin laikim bilong em. Long tingting bilong meri Sulam, toktok na pasin bilong wasman i gutpela tumas na “i winim swit bilong gutpela wain” na i mekim bel bilong em i amamas, na nem bilong wasman i olsem “gutpela sanda” i gat switpela smel ol i kapsaitim long het bilong meri Sulam. (Sng. 23:5; 104:15) Tru tumas, taim man na meri i tingim bek ol gutpela tok na ol gutpela pasin bilong poroman marit, dispela inap strongim pasin laikim namel long tupela. Olsem na long olgeta taim, em i bikpela samting long ol poroman marit i mas mekim ol tok na ol pasin i soim klia olsem ol i laikim tru narapela narapela!

11. Meri Sulam i tokim ol narapela long mekim strongpela tok promis long ol i no ken kirapim bel bilong em long laikim wanpela man. Dispela i givim wanem skul long ol singel Kristen?

¹¹ Song Bilong Solomon i kamapim tu ol skultok we inap helpim ol Kristen i singel yet, na moa yet em ol Kristen husat i wok long painim poroman marit. Meri Sulam i no laikim Solomon, olsem na em i tokim ol meri long Jerusalem olsem: “Yupela i mas . . . mekim strongpela promis long mi, bai yupela i no ken kirapim bel bilong mitupela. Dispela i samting bilong mitupela yet.” (Sol. 2:7; 3:5) Em i mekim dispela tok, long wanem, i no stret long laikim nating wanpela man o meri. Olsem na sapos wanpela Kristen i laik marit, em i ken wet inap long em i bungim man o meri em i laikim tru.

12. Bilong wanem meri Sulam i laikim tru wasman bilong sipsip?

¹² Bilong wanem meri Sulam i laikim tru wasman bilong sipsip? Wasman i luk smat tru, na em i kain olsem “strongpela wel abus”; na ol han bilong em i “gutpela tumas” olsem gol; na ol lek bilong em i luk nais na i strong olsem “tupela pos ol i wokim long gutpela waitpela ston.” Tasol i gat narapela samting tu. Meri Sulam i tok: “Pren bilong mi i stap namel long ol arapela man olsem wanpela diwai i gat gutpela kaikai i stap namel long ol arapela diwai long bus.” Meri Sulam i stap gut long Jehova, olsem na tok bilong em i soim olsem dispela wasman i pas gut wantaim God.—Sol. 2:3, 9; 5:14, 15.

13. Bilong wanem wasman i laikim meri Sulam?

¹³ Meri Sulam i gat wanem ol pasin? Em i luk nais tru, olsem na king i laikim em maski king “i gat planti meri” pinis. Long dispela taim, king i gat “60 [meri] i stap kwin, na 80 [meri] ol i namba 2 lain meri [na] em i gat planti arapela yangpela meri tu.” Tasol meri Sulam i tingim em yet olsem wanpela plaua nating i save kamap long olgeta hap, olsem “plaua bilong bus i kamap long ples stret bilong Saron.” Dispela i soim olsem  meri Sulam i gat pasin daun. Olsem na long tingting bilong wasman, meri Sulam i no olsem plaua nating i save kamap long olgeta hap, nogat, em i olsem “plaua i stap namel long ol gras i gat nil”! Meri Sulam i stap gut long Jehova.—Sol. 2:1, 2; 6:8.

14. Song Bilong Solomon i stori long pasin laikim i stap namel long man na meri, na dispela i givim wanem skul long ol singel Kristen husat i laik marit?

¹⁴ Baibel i givim strongpela tok long Kristen i mas maritim man o meri husat i “bihainim Bikpela.” (1 Kor. 7:39) Sapos wanpela singel Kristen i laik marit, em i no ken laikim man o meri husat i no lotuim Jehova, nogat, em i mas painim poroman namel long lain i lotuim Jehova. Ol marit bai bungim ol hevi, tasol sapos tupela poroman wantaim i lotuim Jehova na givim bel tru long mekim wok bilong Em, dispela bai strongim marit na ol bai i stap wanbel. Olsem na sapos singel Kristen i laik marit, em i mas painim poroman husat i lotuim Jehova na givim bel tru long mekim wok bilong Em. Wasman na meri Sulam i bin skelim pasin bilong narapela narapela na lukim olsem ol i gat ol dispela pasin.

15. Olsem wanem ol singel Kristen inap bihainim pasin bilong meri Sulam?

¹⁵ Ritim Solomon 4:12. Taim wasman i stori long meri em i laikim tru, wai na em i kolim em olsem “gaden i gat banis”? Sapos gaden i gat banis na geit i lok, ol manmeri i no inap i go insait long en. Meri Sulam i olsem dispela gaden, long wanem, em i soim pasin laikim long wanpela man tasol, em wasman bilong sipsip. Em i no pundaun long ol tok gris bilong king. Em i stap strong olsem “banis bilong taun,” na em i no olsem “dua bilong taun” we i save op bikpela. (Sol. 8:8-10) Olsem tasol, ol singel Kristen i save wet inap long ol i bungim man o meri ol bai maritim, na long dispela taim ol i save soim pasin laikim bilong ol.

16. Ol man na meri husat i pren na i tingting long marit, ol inap kisim wanem skul long Song Bilong Solomon?

¹⁶ Taim wasman i askim meri Sulam long i go wokabaut wantaim em long taim bilong san, ol brata bilong meri Sulam i no tok orait. Ol i tokim susa bilong ol long lukautim gaden wain. Bilong wanem? Yu ting ol i no trastim em? Yu ting ol i saspek olsem em bai mekim pasin pamuk? Nogat. Ol i laik lukautim gut sista bilong ol na bai em i no ken pundaun long traim. (Sol. 1:6; 2:10-15) Dispela stori i givim skultok long ol singel Kristen, olsem: Taim man na meri i pren, ol i mas bihainim klinpela pasin. Ol i no ken i stap ol yet long ol hap i no gat man long en. Ol i ken mekim ol pasin i soim olsem ol i laikim narapela narapela, tasol ol i no ken mekim ol pasin we inap pundaun ol.

17, 18. Ol skultok long Song Bilong Solomon i helpim yu olsem wanem?

¹⁷ Paslain long ol Kristen i marit, ol i mas kisim pinis pasin bilong laikim tru na tingim tru narapela narapela. Jehova yet i bin kamapim marit na em samting we bai stap oltaim. Olsem na em i bikpela samting long ol marit i mas strongim pasin laikim namel long ol na mekim dispela pasin laikim i lait yet olsem paia.—Mak 10:6-9.

¹⁸ Taim yu painim poroman marit, yu laik painim wanpela em yu inap laikim tru na yutupela inap mekim pasin laikim namel long yutupela i kamap strong, olsem Song Bilong Solomon i stori long en. Maski yu no painim yet poroman marit o yu marit pinis, mipela i laik bai yu inap pilim pasin laikim tru, em paia bilong Ja.—Sol. 8:6.