1. (a) Bilong wanem yumi mas daunim Satan na winim pait long nau? (b) Hau na yumi save olsem yumi inap winim pait?

 SATAN i pait long liklik hap lain bilong ol Kristen God i bin makim em ol i stap yet long graun, na “ol arapela sipsip.” (Jon 10:16) Satan i gat sotpela taim tasol, olsem na em i tingting strong long daunim planti wokman bilong Jehova. (Ritim Revelesen 12:9, 12.) Yu ting yumi inap daunim Satan na winim pait? Yes! Baibel i tok: “Yupela i mas sakim Satan, na em bai lusim yupela na ranawe.”—Jems 4:7.

2, 3. (a) Ol man i holim tingting olsem Satan i no stap tru, olsem na Satan i mekim wanem? (b) Hau na yu save olsem Satan i stap tru?

² Planti man i ting Satan i no stap tru. Ol i ting Satan na ol ensel nogut i olsem ol lain insait long ol stori nating bilong ol buk, ol muvi, na ol vidio gem. Ol i ting ol longlong man tasol i bilip olsem ol spirit nogut i stap. Yu ting Satan i bel hevi olsem ol man i holim dispela tingting? Nogat tru! Satan i amamas, long wanem, dispela em rot bilong em long pasim tingting bilong ol manmeri. (2 Kor. 4:4) Satan i yusim planti rot long giamanim ol man, na wanpela rot em olsem: Em i kirapim ol long holim tingting olsem ol spirit nogut i no stap tru.

³ Yumi stap olsem ol wokman bilong Jehova, olsem na yumi no pundaun long tok giaman bilong Satan. Yumi save olsem Satan i  stap tru bikos em i yusim snek long toktok long Iv. (Stt. 3:1-5) Satan i tok bilas long Jehova long wokman bilong em Jop. (Jop 1:9-12) Satan yet i bin traim Jisas. (Mat. 4:1-10) Taim Kingdom Bilong God i kirap long 1914, Satan i kirapim “pait” long liklik hap lain bilong ol Kristen God i bin makim, em ol i stap yet long graun. (Rev. 12:17) Satan i mekim yet dispela pait. Em i laik bagarapim bilip bilong ol memba bilong lain 144,000 em ol i stap yet long graun na ol arapela sipsip. Sapos yumi laik winim pait, orait yumi mas sakim Satan na stap strong yet long bilip. Dispela stadi bai stori long 3-pela rot bilong sakim Satan na winim pait.

4. Olsem wanem Satan i soim olsem em i gat pasin bilong litimapim nem bilong em yet?

⁴ Satan i no gat pasin daun. Em i no surik long salensim rait bilong Jehova long i stap nambawan bos, na em i mekim em yet i kamap birua bilong God, olsem na em i stap olsem papa tru bilong pasin antap na pasin bikhet. Wanpela rot bilong sanap strong na sakim Satan em olsem, yumi mas kisim pasin daun na no ken litimapim nem bilong yumi yet. (Ritim 1 Pita 5:5.) Yu ting olgeta taim i no stret long yumi litimapim nem bilong yumi yet, nem bilong narapela man, o nem bilong wanpela samting?

5, 6. (a) Bilong wanem na sampela taim i no gat rong long litimapim nem bilong yumi yet, nem bilong narapela man, o nem bilong wanpela samting? (b) Wanem hevi inap kamap sapos yumi bihainim dispela pasin? Stori long sampela eksampel i stap long Baibel.

⁵ Sapos yu litimapim nem bilong yu yet, nem bilong narapela man, o nem bilong wanpela samting, yu bai rispektim yu yet. Yu bai belgut, long wanem, yu na ol wanblut na ol gutpela pren i mekim sampela gutpela wok o yupela i gat sampela gutpela samting. I no gat rong long yu pilim olsem. Aposel Pol i tokim ol Tesalonaika olsem: “Mipela yet i litimapim nem bilong yupela long ol kongrigesen bilong God. Long wanem, yupela i sanap strong na holimpas bilip maski ol man i mekim nogut long yupela na yupela i karim pen na hevi.” (2 Tes. 1:4) Sapos yumi amamas long wok ol narapela i mekim na wok yumi yet i mekim, helt bilong yumi bai i stap gut. Yumi no ken sem long wanem kain famili yumi kam long en, laip bilong ples, na ples yumi kamap bikpela long en.—Apo. 21:39.

⁶ Tasol sapos yumi litimapim tumas nem bilong yumi yet, nem bilong narapela man, o nem bilong wanpela samting, dispela inap bagarapim pasin bilong yumi long i stap pren bilong Jehova. Taim ol narapela i givim tok kaunsel long yumi, yumi no inap daunim yumi yet na kisim dispela tok kaunsel. (Sng. 141:5) Wanpela dikseneri i tok, sapos man i gat dispela pasin, em bai “tingim em yet olsem man i gat biknem tru,” na “em bai hambak na tingim em yet olsem man i gat bikpela strong moa winim ol narapela.” Jehova i heitim tru pasin bilong ol man long hambak na litimapim nem bilong ol yet. (Ese. 33:28; Amo. 6:8) Tasol Satan i amamas tru bikos dispela em ol pasin tru bilong em. Ating Satan i amamas tru taim Nimrot, Fero, na Apsalom i kisim pasin antap na litimapim nem bilong ol yet! (Stt. 10:8, 9; Kis. 5:1, 2; 2 Sml. 15:4-6) Kein tu i bin kisim pasin antap na litimapim nem bilong em yet. God i bin givim tok kaunsel bilong stretim Kein, tasol Kein i kisim pasin antap na em i no bihainim dispela tok kaunsel. Kein i sakim tok kaunsel bilong Jehova, olsem na hevi i painim em.—Stt. 4:6-8.

7, 8. (a) Olsem wanem pasin bilong tingim tumas skin kala i makim olsem man i gat pasin antap? (b) Sapos man i gat pasin antap, olsem wanem dispela inap bagarapim bel isi insait long kongrigesen?

⁷ Long nau, pasin antap i save kamapim planti hevi. Sampela taim ol man i mekim pasin antap, long wanem, ol i tingim tumas skin kala bilong ol. Wanpela dikseneri i tok, taim ol man i tingim tumas skin kala bilong ol, ol bai “luk daun o birua long ol manmeri i gat narapela skin kala,” na ‘ol bai holim tingting olsem pasin na save  bilong ol i winim ol manmeri bilong narapela skin kala.’ Pasin bilong tingim tumas skin kala i kirapim ol raiot, ol woa, na ol man bilong wanpela lain i kilim i dai planti man bilong narapela lain.

⁸ Dispela kain pasin i no ken kamap insait long kongrigesen. Sampela taim pasin bilong tingim tumas skin kala inap kirapim tok pait namel long ol wanbilip, na bikpela hevi inap kamap. Dispela hevi i kamap long taim bilong ol aposel, olsem na Jems i givim dispela askim long ol: “Wanem samting i as bilong ol kros na pait i kamap namel long yupela?” (Jems 4:1) Sapos yumi heitim tru ol man i gat narapela skin kala na yumi pilim olsem yumi gat bikpela strong na save winim ol, dispela bai kamap klia long toktok na pasin bilong yumi, na em inap bagarapim tru bel bilong ol narapela. (Snd. 12:18) Tru tumas, pasin antap inap bagarapim bel isi insait long kongrigesen.

9. Olsem wanem Baibel i helpim yumi long sakim pasin bilong luk daun long ol manmeri i gat narapela skin kala? (Lukim piksa long kirap bilong stadi.)

⁹ Sapos yumi holim tingting olsem yumi winim ol narapela, yumi mas tingim olsem Jehova “i no laikim tru ol man i save hambak na litimapim nem bilong ol yet.” (Snd. 16:5) Yumi mas skelim gut tingting yumi holim long ol manmeri bilong ol narapela skin kala, kantri, na ples. Sapos yumi luk daun long ol, dispela i soim olsem yumi no tingim tok bilong Baibel olsem, “long rot bilong wanpela man [God] i kamapim olgeta lain man.” (Apo. 17:26) Yumi inap tok, Adam i stap olsem tumbuna bilong olgeta lain manmeri. Olsem na i no stret long ol manmeri bilong wanpela lain i holim tingting olsem ol i winim ol manmeri bilong narapela lain. Dispela kain tingting inap opim rot long Satan long bagarapim pasin laikim na pasin wanbel insait long kongrigesen. (Jon 13:35) Sapos yumi laik daunim Satan na winim pait, yumi mas sakim olgeta kain tingting we inap kirapim yumi long mekim pasin antap.—Snd. 16:18.

10, 11. (a) Wai na em isi tru long yumi inap kisim pasin bilong laikim ol samting bilong graun? (b) Olsem wanem Demas i soim olsem em i laikim ol samting bilong graun?

¹⁰ Satan em “hetman bilong dispela graun,” na dispela graun i stap aninit long strong bilong em. (Jon 12:31; 1 Jon 5:19) Olsem na planti samting bilong graun i no stret wantaim ol tok bilong Baibel. Tasol sampela samting i gutpela. Satan bai yusim ol samting bilong graun long kirapim ol laik nogut bilong yumi na pulim yumi long mekim sin, na tu, em inap kirapim yumi long laikim ol samting bilong graun na lusim pasin bilong lotuim Jehova.—Ritim 1 Jon 2:15, 16.

¹¹ Long taim bilong ol aposel, sampela Kristen i kirap laikim ol samting bilong dispela graun. Pol i tok: “Demas i lusim mi pinis, long wanem, em i laikim tumas ol samting bilong dispela graun.” (2 Tim. 4:10) Baibel i no kolim stret wanem samting i kirapim Demas long lusim Pol. Ating Demas i laikim tumas mani kago na em i no givim bikpela haptaim tumas long mekim wok bilong God. Demas i lus long kisim ol gutpela blesing long sait bilong bilip. Yu ting ol samting bilong graun inap helpim Demas long kisim ol blesing i gutpela moa winim ol blesing em Jehova inap givim sapos em i stap yet olsem wanwok bilong Pol?—Snd. 10:22.

12. Wanem ol samting inap makim olsem yumi pundaun long “strong bilong mani long giamanim man”?

¹² Wankain hevi inap painim yumi. Yumi ol Kristen i amamas long lukautim yumi yet na ol wanfamili long sait bilong klos na kaikai. (1 Tim. 5:8) Yumi save olsem Jehova i laik bai yumi gat gutpela sindaun, long wanem, em i bin putim Adam na Iv long naispela ples. (Stt. 2:9) Tasol mani i gat ‘strong bilong giamanim man,’ na Satan inap yusim dispela long pundaunim yumi. (Mat. 13:22) Planti man i ting olsem sapos ol i gat planti mani kago, ol bai gat gutpela sindaun na i stap amamas. Kain tingting olsem inap giamanim  yumi na pulim yumi long lusim gutpela samting yumi holim pinis, em pasin bilong i stap pren bilong Jehova. Jisas i tokim ol disaipel olsem: “I no gat wanpela man inap stap wokboi bilong tupela bosman. Em bai laikim wanpela na i no laikim narapela, o em bai pas long wanpela na les long narapela. Yupela i no inap stap wokboi bilong God na mani wantaim.” (Mat. 6:24) Sapos yumi lusim bikpela haptaim long bungim planti mani kago, dispela i makim olsem yumi no mekim wok bilong Jehova, na Satan i laik tru bai yumi mekim olsem! Pasin bilong laikim tumas mani kago i no ken pasim yumi long i stap pren bilong Jehova. Sapos yumi laik daunim Satan na winim pait, orait yumi mas holim stretpela tingting long pasin bilong bungim mani kago.—Ritim 1 Timoti 6:6-10.

13. Olsem wanem ol manmeri i paulim stretpela lo bilong God long sait bilong marit na maritpasin?

¹³ Pasin pamuk em narapela rot bilong Satan long pundaunim yumi. Long nau, planti man i pilim olsem sapos ol i marit na stap gut long poroman marit, dispela em pasin bilong ol tumbuna na em bai kalabusim ol. Wanpela meri bilong ektim ol muvi i tok: “Man na meri i no inap i stap gut long wanpela poroman marit tasol. Mi no save long wanpela husat i stap gut long poroman marit o em i holim dispela tingting.” Wanpela ekta i tok: “Mi no ting em nomol long yumi inap i stap wantaim wanpela poroman marit tasol long laip olgeta bilong yumi.” Ating Satan i amamas taim ol manmeri i gat biknem i mekim nabaut long dispela presen God i givim long sait bilong marit. Satan i no laik tru bai ol manmeri i bihainim lo bilong God long sait bilong marit. Sapos yumi laik daunim Satan na winim pait, yumi mas bihainim ol stretpela lo bilong God long sait bilong marit.

14, 15. Olsem wanem yumi inap sakim pasin pamuk?

¹⁴ Maski yumi marit o yumi stap singel, yumi mas taitim bun tru long sakim olgeta kain pasin pamuk. Yu ting em isi long mekim olsem? Nogat tru! Sapos yu wanpela yangpela, ating yu harim ol wanskul i litimapim nem bilong ol yet bikos ol i mekim maritpasin, na ol i salim teks mesis i stori long dispela pasin. Long sampela kantri, dispela pasin i save kirapim ol yangpela long tilim ol piksa nogut bilong ponografi. Baibel i tok: “Man i save mekim pasin pamuk, em i mekim sin long bodi bilong em yet.” (1 Kor. 6:18) Ol manmeri i mekim pasin pamuk na ol i kisim ol sik nogut, na dispela i givim bikpela hevi long ol na ol i lusim laip bilong ol. Planti yangpela husat i mekim maritpasin taim ol i no marit yet, ol i tok ol i gat bikpela rigret long rong ol i mekim. Ol piksa na muvi i soim olsem taim ol manmeri i insait long pasin pamuk, ol i save kisim gutpela sindaun na i stap amamas, na dispela inap kirapim yumi long kisim tingting olsem hevi i no inap kamap sapos yumi brukim ol lo bilong God. Dispela kain tingting inap mekim man i pundaun long “strong bilong sin long giamanim man.”—Hib. 3:13.

¹⁵ Sapos traim i painim yu long insait long pasin pamuk, orait yu inap mekim wanem? Luksave long ol samting we inap pundaunim yu. (Rom 7:22, 23) Beten askim God long strongim yu. (Fili. 4:6, 7, 13) Abrusim ol samting we inap pulim yu long mekim pasin pamuk. (Snd. 22:3) Taim traim i laik kamap, kwiktaim yu mas mekim sampela samting bilong sakim dispela traim.—Stt. 39:12.

16. (a) Jisas i mekim wanem taim Satan i traim em? (b) Yumi inap kisim wanem skul long pasin bilong Jisas?

¹⁶ Jisas i stap gutpela piksa tru long pasin bilong sakim traim. Em i no bilipim ol tok promis bilong Satan, na tu, em i no lusim sampela haptaim long wokim tingting olsem em bai bilipim dispela tok, o nogat. Kwiktaim em i bekim tok olsem: “Rait Holi i tok.” (Ritim Matyu 4:4-10.) Jisas i save gut long ol rait i stap insait long Tok Bilong God, olsem na kwiktaim em inap kolim ol  skripsa na bekim tok bilong Satan. Sapos yumi laik daunim Satan na winim pait, orait yumi no ken pundaun long ol traim bilong mekim pasin pamuk.—1 Kor. 6:9, 10.

17, 18. (a) Satan i yusim wanem ol narapela rot bilong pundaunim yumi? Bilong wanem yumi no ken kirap nogut long dispela? (b) Wanem samting bai painim Satan? (c) Olsem wanem dispela i helpim yu long sanap strong na karim hevi?

¹⁷ Pasin antap, pasin bilong laikim tumas mani kago, na pasin pamuk em 3-pela rot we Satan i yusim bilong pundaunim yumi. Tasol i gat planti narapela samting em Satan i yusim. Sampela Kristen i bungim hevi we ol wanfamili i birua long ol, ol wanskul i tok bilas long ol, o gavman i tambuim wok autim tok. Yumi no kirap nogut long ol dispela hevi, long wanem, Jisas i tok lukaut long ol disaipel olsem: “Ol man bai heitim yupela, long wanem, nem bilong mi i stap long yupela. Tasol man i sanap strong i go inap long pinis, God bai kisim bek em.”—Mat. 10:22.

¹⁸ Olsem wanem yumi inap daunim Satan na winim pait? Jisas i tokim ol disaipel olsem: “Pasin bilong yupela long sanap strong bai mekim na yupela i holimpas laip bilong yupela.” (Luk 21:19) Maski ol man i mekim wanem long yumi, ol i no inap pinisim yumi inap oltaim oltaim. I no gat man inap bagarapim pasin bilong yumi long i stap pren bilong God—yumi yet inap larim dispela samting i kamap sapos yumi no was gut. (Rom 8:38, 39) Sampela gutpela wokman bilong Jehova i dai, tasol dispela i no makim olsem Satan i win, long wanem, Jehova bai kirapim bek ol! (Jon 5:28, 29) Klostu nau Satan bai bagarap na pinis olgeta. Ol manmeri bilong nau i no bihainim ol pasin bilong God, olsem na bagarap bai painim ol. Bihain, Satan bai kalabus inap 1 tausen yia. (Rev. 20:1-3) Long pinis bilong Wan Tausen Yia, ol manmeri bai kamap gutpela olgeta. Satan bai “lusim kalabus” inap sotpela haptaim tasol bilong mekim laspela traim long ol manmeri. Bihain, Satan bai bagarap na pinis olgeta. (Rev. 20:7-10) I no gat rot long Satan bai abrusim bagarap, tasol yu inap abrusim bagarap! Yu mas sanap strong long bilip na sakim Satan. Yu inap daunim Satan na winim pait!