Man i Mas Stap Singel Bilong Mekim Wok Lotu?
OL LOTU long graun olgeta, olsem Buda, Misin Katolik, ol Misin Otodoks, na ol arapela lotu i tok ol man i go pas long mekim wok lotu na ol pris pasto bilong ol i mas stap singel. Tasol planti man i ting ol i kamapim dispela lo, long wanem, ol bikman bilong planti lotu i mekim pasin pamuk wantaim ol wanlotu bilong ol, o ol i mekim pasin sem long ol pikinini.
Olsem na ol man i gat dispela askim, Baibel i tok ol man i mekim wok lotu i mas stap singel? Bilong bekim dispela askim, yumi laik save long olsem wanem misin i kamapim dispela lo na God i gat wanem tingting long dispela samting.
STAP SINGEL NA OL LOTU LONG BIPO
Buk Encyclopædia Britannica i tok man i stap singel, “em i no inap marit na mekim maritpasin, moa yet sapos em i go pas long mekim wok lotu.” Long 2006, Pop Benedict Namba 16 i raitim wanpela pas i go long Misin Katolik na tokaut olsem lo bilong stap singel “i bin kirap bihain liklik long taim bilong ol Aposel.”
Tasol ol Kristen long taim bilong ol aposel i no bin bihainim dispela lo em misin i kamapim. Aposel Pol i bin stap long dispela taim, na em i givim tok lukaut long ol bilipman olsem ol man bai mekim “ol tok giaman i kam long ol spirit” na “tambuim ol manmeri long marit.”—1 Timoti 4:1-3.
Kirap long 150 C.E. samting, ol lotu i tok ol i Kristen na bihain ol i kamap Misin Katolik, ol i bin bihainim dispela lo. Buk Celibacy and Religious Traditions i tok: “Ol i bihainim wankain lo bilong Gavman Rom olsem ol man i mekim wok lotu i mas stap singel.”
Insait long sampela handret yia bihain, ol bikman bilong lotu na ol man i tok ol i Tisa Bilong Misin i tok ol man i go pas long lotu i mas stap singel. Ol i ting maritpasin i mekim man i doti na i no stret long ol man i mekim wok bilong lotu i marit. Maski i olsem, buk Encyclopædia Britannica i tok “long pinis bilong yia 950 C.E. samting, planti pris na ol bisop i marit.”
Long yia 1123 na 1139, Lateran Kaunsil i mekim wanpela bung long Rom na ol i strongim dispela lo olsem ol man i mekim wok lotu i mas stap singel. Misin Katolik i strong long bihainim dispela lo i kam inap long nau. Long dispela rot, misin i gat strong na mani bilong bosim ol man, long wanem, ol pris husat i marit i no inap raitim nem bilong ol pikinini bilong ol long kisim ol mani kago bilong misin.
TINGTING BILONG GOD LONG STAP SINGEL
Long rot bilong Baibel God i kamapim tingting bilong em long pasin bilong stap singel. Jisas i bin stap singel, na em i tok sampela man i stap singel, “long wanem, ol i tingim Kingdom bilong heven.” (Matyu 19:12) Aposel Pol i mekim wankain tok long ol Kristen em ol i bihainim em na ol i stap singel “bilong helpim gutnius.”—1 Korin 7:37, 38; 9:23.
Tasol tok bilong Jisas na Pol i no makim olsem ol man i mekim wok lotu i mas stap singel. Jisas i tok pasin bilong stap singel em wanpela “presen,” na i no olgeta man i stap disaipel bilong em bai mekim olsem. Tok bilong Pol i go “long ol yangpela man na meri,” tasol em i tok: “Mi no kamapim tok i kam long Bikpela, nogat. Mi kamapim tingting bilong mi yet.”—Matyu 19:11; 1 Korin 7:25.
Baibel i kamapim olsem long taim bilong ol aposel, planti man i go pas long lotu Kristen i bin marit, na dispela i makim tu aposel Pita. (Matyu 8:14; Mak 1:29-31; 1 Korin 9:5) Long dispela taim pasin pamuk i go bikpela long Rom, olsem na Pol i tok sapos man i marit na em i go pas long mekim wok lotu, em i mas stap “man bilong wanpela meri tasol” na “ol pikinini bilong en i mas i gat gutpela tingting na ol i mas daun long em.”—1 Timoti 3:2, 4.
Dispela tok i bilong ol maritman na maritmeri na i no bilong ol lain i stap singel, Baibel i tok: “Maritman i mas givim long meri bilong en ol samting i stret meri i kisim,” na ol marit i no ken “pasim bodi bilong [ol]” long mekim maritpasin. (1 Korin 7:3-5) I klia tru olsem God i orait long ol man na meri i ken marit, dispela i makim tu ol man i go pas long mekim wok lotu.
HELPIM WOK BILONG AUTIM GUTNIUS
Pasin bilong stap singel i no wanpela lo ol man i mas bihainim. Jisas na Pol i tok amamas long ol lain i stap singel, long wanem, ol inap mekim bikpela wok moa bilong autim gutnius long ol arapela. Ol singel inap mekim olsem, bikos tingting bilong ol i no bruk nabaut olsem bilong ol lain i marit.—1 Korin 7:32-35.
Tingim, David i lusim gutpela wok mani bilong em long Mexico City na i go long wanpela liklik ples long Kosta Rika bilong skulim ol man long Baibel. Olsem wanpela singel man, yu ting David inap long mekim dispela senis? Em i tok: “Yes, i hatwok long go long wanpela ples na kisim pasin bilong ol na i stap wankain olsem ol, tasol mi stap singel na em i isi long mi mekim ol dispela senis.”
Claudia em meri singel i mekim wok long ol hap i sot long ol man bilong autim tok, em i tok: “Mi amamas long mekim wok bilong God. Mi luksave long ol samting God i mekim bilong lukautim mi, na dispela i strongim bilip bilong mi na pasin pren bilong mi wantaim God.”
“Yu marit o yu stap singel, dispela i no bikpela samting. Sapos yu givim bel long mekim wok bilong God Jehova, bai yu stap amamas.”—Claudia
Tru tumas, ol lain i stap singel ol i stap amamas. Claudia i tok: “Yu marit o yu stap singel, dispela i no bikpela samting. Sapos yu givim bel long mekim wok bilong God Jehova, bai yu stap amamas.”—Song 119:1, 2.
