“Yupela i mas was i stap, long wanem, yupela i no save long dispela de o dispela aua.”—MATYU 25:13.

“Yupela i mas was i stap, no ken slip, long wanem, yupela i no save long dispela taim God i makim.”—MAK 13:33.

So i no gat wanpela man long graun i save long wanem taim bai pinis i kamap. Tasol God i makim pinis “dispela taim”—“dispela de na dispela aua” stret—pinis bai kamap. (Matyu 24:36) Yu ting dispela i makim olsem i no gat rot long save long wanem taim pinis bai kamap? Nogat tru. Jisas i tokim ol disaipel long lukim ol samting bai kamap bilong soim olsem pinis i klostu nau.

Ol samting bai kamap bilong stap olsem ol sain bilong “pinis bilong dispela taim.” Jisas i tok: “Wanpela kantri bai pait long narapela kantri na wanpela kingdom bai pait long narapela kingdom. Na bai i gat taim bilong ol bikpela hangre na ol guria bai kamap long narapela narapela hap.” (Matyu 24:3, 7) Na tu, em i tok “ol bikpela sik” bai kamap long olgeta hap. (Luk 21:11) Yu wok long lukim ol samting Jisas i tok profet long en?

Long nau ol man i karim pen na hevi bikos i gat ol bikpela woa, hangre, ol guria, na ol sik. Olsem, long 2004, bikpela guria i mekim na sunami i kamap long Solwara India na dispela i kilim i dai klostu 225,000 manmeri. Na insait long 3-pela yia, COVID-19 pendemik i kilim i dai klostu 6.9 milion manmeri long olgeta hap bilong graun. Jisas i tok ol dispela samting bai soim olsem pinis bilong dispela taim i klostu.

Baibel i kolim haptaim paslain long pinis i kamap olsem “las de.” (2 Pita 3:3, 4) Namba 2 Timoti 3:1-5 i tok wanpela mak long taim bilong las de em ol man bai sakim stretpela pasin. (Lukim blok “ Paslain Long Pinis i Kamap.”) Yu lukim ol manmeri husat i gat pasin bilong tingim ol yet, gridi, belhat, na ol i no laikim ol narapela? Dispela tu em mak olsem yumi stap long arere tru long taim bilong pinis.

Las de bai stap inap wanem taim? Olsem Baibel i tok, inap “sotpela taim tasol.” Bihain, God bai bagarapim “ol man i wok long bagarapim graun.”—Revelesen 11:15-18; 12:12.

God i makim pinis de na aua we em bai pinisim dispela haptaim nogut bilong nau. (Matyu 24:36) Maski i olsem, i gat planti gutnius—God “i no laik bai wanpela i kisim bagarap.” (2 Pita 3:9) Em i opim rot long ol man long kisim save long laik bilong em na bihainim tok bilong em. Wai? Bikos em i laik yumi mas abrusim bagarap long taim pinis i kamap na stap long graun long nupela taim, em taim graun bai kamap wanpela ples paradais.

God i stretim rot bilong skulim ol man long olgeta hap long ol samting ol inap mekim na bai ol i stap long nupela taim aninit long Kingdom bilong em. Jisas i tok ol bai autim gutnius bilong Kingdom “long olgeta hap bilong graun.” (Matyu 24:14) Long olgeta hap bilong graun, ol Witnes Bilong Jehova i lusim planti bilion aua long autim tok na skulim ol man long tok bilong Baibel olsem i gat gutpela samting ol i ken bilip na wet long en. Jisas i tok ol bai autim tok long olgeta hap bilong graun paslain long pinis i kamap.

Klostu nau wok bos bilong ol man bai pinis. Tasol gutnius em yu inap abrusim bagarap long taim pinis i kamap na stap long Paradais long graun olsem God i bin tok promis. Neks atikol bai stori long ol samting yu inap mekim na bai yu ken stap long dispela nupela taim.