LAIP bilong nau i narapela kain long samting God i laik i mas kamap. Em i laik bai graun i pulap long ol man i rispektim wok bos bilong Krieta, kisim helpim long ol tok bilong em, na bihainim ol gutpela pasin bilong em. Ol i mas stap amamas na wok wantaim long lukautim famili bilong ol, painimaut ol nupela samting, na mekim graun olgeta i kamap wanpela paradais.

• “Em i save mekim i dai ol pait i kamap long olgeta hap bilong graun.”—Buk Song 46:9.

• “Taim i kamap . . . bilong bagarapim ol man i wok long bagarapim graun.”—Revelesen 11:18.

• “No gat wanpela man i stap long dispela ples bai tok: ‘Mi sik.’”—Aisaia 33:24.

• “Ol manmeri mi bin makim, ol bai amamas tru long ol wok em han bilong ol yet i mekim.”—Aisaia 65:22.

Ol dispela tok profet bai kamap tru olsem wanem? God i bin makim Pikinini bilong em, Jisas, olsem King bilong wanpela gutpela gavman we bai mekim wok king long heven na bosim graun. Baibel i kolim dispela olsem Kingdom Bilong God. (Daniel 2:44) Baibel i tok long Jisas: “[God] bai givim em sia king . . . , na em bai stap King.”—Luk 1:32, 33.

Taim Jisas i stap long graun, em i mekim planti strongpela wok bilong soim olsem taim em i stap King em bai mekim laip bilong ol man i kamap gutpela moa winim long nau.

• Em i oraitim olgeta kain sik, dispela i soim hau em bai pinisim ol sik bilong ol man.—Matyu 9:35.

• Em i mekim solwara i stap isi, dispela i soim hau em bai protektim ol man na kontrolim ol samting bilong graun.—Mak 4:36-39.

• Em i givim kaikai long planti tausen man, dispela i soim olsem em bai lukautim ol man long ol samting ol i nidim.—Mak 6:41-44.

• Em i tanim wara i kamap wain long wanpela weding, dispela i soim olsem em bai helpim ol manmeri long enjoim laip.—Jon 2:7-11.

Hau bai yu inap kisim dispela laip em God i redim bilong ol manmeri i laikim em? I gat wanpela “rot” yu mas bihainim. Baibel i kamapim olsem “rot i go long dispela hap em i liklik tru. Na wan wan manmeri tasol i save lukim na bihainim dispela rot.”—Matyu 7:14.

Rot i go long laip em wanem samting? God i tok: “Mi Jehova, mi God bilong yupela, mi tasol mi save skulim yupela long ol samting we inap helpim yupela, mi tasol mi save stiaim yupela long rot yupela i mas  wokabaut long en.” (Aisaia 48:17) Taim yu wokabaut long dispela rot, laip bilong yu bai kamap gutpela.

Jisas i tok: “Mi yet mi rot na tok i tru na laip.” (Jon 14:6) Taim yumi bilipim ol tok i tru em Jisas i skulim ol man na bihainim eksampel bilong em, yumi inap go klostu long God na laip bilong yumi bai kamap gutpela.

Hau bai yu inap painim rot i go long laip? I gat planti lotu, tasol Jisas i givim tok lukaut: “I no olgeta man husat i kolim mi, ‘Bikpela, Bikpela,’ bai i go insait long Kingdom bilong heven, nogat. Man i bihainim laik bilong Papa bilong mi long heven, em tasol bai i go insait.” (Matyu 7:21) Em i tok tu: “Kaikai ol i kamapim bai helpim yupela long luksave long ol.” (Matyu 7:16) Baibel inap helpim yu long luksave olsem lotu i tru i narapela kain long lotu giaman.—Jon 17:17.

Hau bai yu inap bihainim rot i go long laip? Dispela i makim olsem yu mas kisim save long Man i givim laip: Em i husat? Wanem nem bilong em? Em i gat wanem ol pasin? Em i mekim wanem bilong helpim yumi? Em i laik bai yumi mekim wanem? a

God i laik bai ol man i mekim wok, kaikai, pilai, lukautim famili, na mekim planti samting moa. Yumi inap kisim save long Krieta bilong yumi na kamap pren bilong em. Yumi inap soim olsem yumi laikim em taim yumi mekim laik bilong em. Jisas i tok: “Bilong kisim laip oltaim, ol i mas kisim save long yu, yu wanpela tasol yu God tru.”—Jon 17:3.

Bilong save long hau yu inap amamasim dispela wanpela God tru, yu mas mekim sampela senis. Ating yu bai pilim olsem i hatwok. Tasol taim yumi kirap long wokabaut long rot bilong laip, laip bilong yumi bai kamap gutpela. Bilong helpim yu long kisim bekim bilong ol bikpela askim long God, ol Witnes Bilong Jehova inap mekim fri Baibel stadi long taim na ples i stret long yu. Yu ken kontektim mipela long rot bilong yusim web-sait bilong mipela long www.dan124.com/tpi.