Jisas i lainim ol gutpela pasin, olsem na taim em i kam wok wantaim ol narapela long graun, em i stap olsem gutpela eksampel tru long pasin bilong wok gut wantaim ol narapela. Yumi inap kisim wanem skul long eksampel bilong Jisas? Taim yumi skelim gut eksampel bilong em, yumi inap luksave long 3-pela stiatok bilong helpim yumi long kamap gutpela wanwok. Ol dispela stiatok bai helpim yumi long stap wanbel wantaim ol brata bilong yumi na wok gut wantaim ol.

Gutpela wanwok i save daunim em yet na tingim tru ol narapela wanwok na em i no save hambak. Dispela kain pasin daun em pasin Jisas i lainim long Papa bilong em. Jehova wanpela tasol i gat rait long kisim ona olsem Krieta, tasol em i helpim ol narapela long tingim wok em Pikinini bilong em husat i stap olsem wanwok bilong em i bin mekim. Yumi lukim dispela long tok God i mekim, em i tok: “Nau yumi mas wokim man i kamap olsem yumi yet.” (Stt. 1:26) Taim Jehova i mekim dispela tok, Jisas i save tru olsem Jehova i gat pasin daun.—Sng. 18:35.

Taim Jisas i stap long graun, em i mekim wankain pasin daun olsem. Taim ol man i litimapim nem bilong em long wok em i mekim, em i tok i stret God wanpela tasol i kisim biknem. (Mak 10:17, 18; Jon 7:15, 16) Jisas i save wok strong long stap wanbel wantaim ol disaipel bilong em na em i tingim ol olsem ol pren na i no ol wokboi nating. (Jon 15:15) Na tu, em i wasim lek bilong ol bambai  em i ken skulim ol long kisim pasin daun. (Jon 13:5, 12-14) Yumi tu mas givim ona long ol wanwok bilong yumi, na yumi no ken tingim laik bilong yumi yet tasol. Taim yumi givim ona long narapela narapela na yumi no wari tumas long kisim biknem, yumi inap pinisim gut planti wok.—Rom 12:10.

Man i gat pasin daun i luksave tu olsem “gutpela samting i kamap taim man i kisim tingting bilong planti edvaisa.” (Prov. 15:22) Maski yumi gat bikpela ekspiriens o yumi save gut long mekim wok, yumi mas tingim olsem yumi ol man i no gat olgeta save. Jisas i bin tokaut tu olsem i gat sampela samting em i no save long en. (Mat. 24:36) Na tu, em i gat laik long save long ol samting em ol disaipel i save o tingting long en, maski ol disaipel i no gutpela olgeta. (Mat. 16:13-16) Em as na ol dispela wanwok bilong em i save amamas long stap wantaim em! Olsem tasol, taim yumi daunim yumi yet na luksave olsem yumi no gat olgeta save na yumi larim ol narapela i kamapim tingting bilong ol, yumi bai wok wantaim long pasin wanbel na “gutpela samting i kamap.”

Em i bikpela samting long ol elda i mas bihainim pasin daun bilong Jisas taim ol i wok wantaim. Taim ol i mekim miting bilong ol elda, holi spirit inap stiaim wanpela elda long kamapim wanpela sajesten we inap helpim olgeta long mekim gutpela disisen. Long ol miting bilong ol, sapos ol elda i toktok gut wantaim na larim olgeta i pilim fri long kamapim tingting bilong ol, ol bai mekim ol gutpela disisen bilong helpim kongrigesen.

Gutpela wanwok i save bihainim gutpela tingting taim em i wok wantaim ol narapela. Em i redi long mekim senis na putim laik bilong ol narapela i go pas long laik bilong em yet. Planti taim Jisas i lukim Papa bilong em i bihainim gutpela tingting long pasin em i mekim. Olsem, Jehova i salim em i kam bilong kisim bek ol manmeri long kalabus bilong indai.—Jon 3:16.

Jisas i redi long bihainim tingting bilong narapela taim i gat as long mekim olsem. Tingim hau em i bin helpim meri Fonisia, maski em i kam bilong helpim lain Israel. (Mat. 15:22-28) Em i bihainim gutpela tingting long ol samting em i laik ol disaipel bilong em i mas mekim. Maski gutpela pren bilong em Pita i tokaut long ai bilong ol narapela olsem em i no save long Jisas, em i redi long fogivim Pita. Bihain em i givim ol bikpela wok  long Pita. (Luk 22:32; Jon 21:17; Apo. 2:14; 8:14-17; 10:44, 45) Eksampel bilong Jisas i soim klia olsem yumi mas larim “olgeta man i mas save olsem [yumi] i save bihainim gutpela tingting” taim yumi redi long putim laik bilong narapela i go pas long laik bilong yumi yet.—Fili. 4:5.

Taim yumi bihainim gutpela tingting, yumi bai redi long mekim ol senis bambai yumi ken wok gut wantaim olgeta kain man. Jisas i save mekim gutpela pasin long olgeta man, olsem na ol jeles birua bilong em i sutim tok giaman long em olsem “em i pren bilong ol takisman na ol sinman.” (Mat. 11:19) Olsem Jisas, yu ting yumi ken wok gut wantaim ol narapela? Louis, em wanpela brata i bin mekim wok wasman raun na em wok long Betel wantaim ol narapela narapela bratasista, em i tok: “Mi traim long tingim olgeta lain mi wok wantaim olsem wanpela wol em ol i wokim long ston. Taim yu slipim gut ol ston, dispela inap helpim yu long wokim wanpela wol i sanap stret tru i go antap. Mi traim long senisim ol pasin bilong mi tu na bai mi ken stap olsem wanpela ston i helpim wol long sanap stret.” Em gutpela pasin tru!

Long wanem kain taim yumi ken wok gut wantaim ol narapela long kongrigesen bilong yumi? Yumi gat rot long mekim olsem taim yumi insait long bung bilong autim tok. Yumi ken wok wantaim ol pablisa i gat narapela narapela sindaun o krismas. Yu ting yumi ken mekim senis long pasin bilong yumi long autim tok na bai ol i ken amamas long wok wantaim yumi?

Gutpela wanwok i save “redi long serim ol samting.” (1 Tim. 6:18) Taim Jisas i wok wantaim Papa bilong em, Jisas i luksave olsem Papa bilong em i no save haitim ol samting long em. Taim Jehova i “redim skai,” Jisas i “bin stap” na em i kisim skul long Em. (Prov. 8:27) Bihain Jisas i amamas long tokim ol disaipel bilong em long “olgeta samting [em] bin harim” long Papa bilong em. (Jon 15:15) Yumi ken bihainim pasin bilong Jehova long rot bilong serim save yumi gat wantaim ol wanwok bratasista bilong yumi. Tingim, wanpela gutpela wanwok i no inap haitim save o holim bek infomesen em ol narapela i nidim bambai em i ken i gat kontrol long wok, nogat. Em bai amamas long tokim ol narapela long ol gutpela samting em i lainim.

Yumi ken mekim tu ol tok bilong strongim ol narapela wanwok. Yumi save belgut taim wanpela i luksave long ol wok yumi mekim na tok amamas long yumi, a? Jisas i lusim haptaim long tokim ol wanwok bilong em long ol gutpela samting em i lukim long ol. (Skelim Matyu 25:19-23; Luk 10:17-20.) Em i tokim ol tu olsem ol bai mekim “ol wok i winim ol wok” em i bin mekim. (Jon 14:12) Long nait paslain long em i dai, em i tok amamas long ol gutpela aposel bilong em olsem: “Yupela i bin pas wantaim mi taim ol traim i painim mi.” (Luk 22:28) Piksaim long tingting hau ol tok bilong em i strongim tru bel bilong ol na kirapim ol long mekim wok! Sapos yumi tu i lusim haptaim long tok amamas long ol wanwok bilong yumi, ol bai amamas na ol bai mekim bikpela wok moa.

Wanpela brata nem bilong em Kayode, em i tok: “Gutpela wanwok i no makim olsem em i mas gutpela olgeta, nogat. Tasol em i save amamas wantaim ol narapela na dispela i mekim na ol narapela i pilim isi long wok wantaim em.” Yu dispela kain wanwok? I gutpela yu askim sampela wanwok Kristen bilong yu long save long tingting ol i gat long yu wanem kain wanwok. Sapos ol i amamas long wok wantaim yu, wankain olsem ol disaipel bilong Jisas i amamas long wok wantaim em, orait yu ken mekim wankain tok olsem aposel Pol, em i tok: “Mipela ol wanwok bilong yupela bilong mekim yupela i amamas.”—2 Kor. 1:24.