1. Ol manmeri bilong Jehova i mekim wanem ol gutpela wok?

 LONG bipo, Baibel i tok profet olsem ol manmeri bilong God “bai amamas” long givim ol yet long mekim wok bilong Jehova aninit long daireksen bilong Pikinini bilong em. (Sng. 110:3) Yumi lukim truim bilong dispela tok profet long nau. Long olgeta yia, ol wokman bilong Jehova i givim bel tru long lusim planti handret milion aua long mekim wok autim tok. Ol i volantia long mekim dispela wok na ol i yusim mani bilong ol yet. Na tu, ol i yusim taim bilong ol long sapotim ol wanbilip bilong ol long sait bilong skin, bel na tingting, na bilip. Ol brata i gat wok insait long kongrigesen i lusim planti aua tru long redim ol hap bilong miting na mekim wok sepeding long ol wanbilip. Wanem samting i kirapim ol long mekim dispela wok? Pasin laikim—ol i laikim Jehova na ol narapela.​—Mat. 22:37-39.

2. Olsem Rom 15:1-3 i kamapim, hau Jisas i stap gutpela eksampel long yumi?

² Jisas i stap nambawan gutpela eksampel long putim laik bilong ol narapela i go pas long laik bilong em yet. Yumi traim bes long bihainim lek mak bilong em. (Ritim Rom 15:1-3.) Ol lain i bihainim eksampel bilong em bai kisim planti blesing. Jisas i tok: “Amamas bilong givim samting i winim amamas bilong kisim samting.”​—Apo. 20:35.

3. Yumi bai stori long wanem samting long dispela atikol?

³ Long dispela atikol, yumi bai stori long hau Jisas i daunim laik bilong em yet long helpim ol narapela, na hau yumi ken bihainim eksampel bilong em. Yumi bai stori tu long hau yumi inap strongim laik bilong yumi long helpim ol narapela.

4. Olsem wanem Jisas i putim laik bilong ol narapela i go pas long laik bilong em yet?

⁴ Jisas i helpim ol narapela maski em i pilim taiet. Tingim samting Jisas i mekim taim em i lukim bikpela lain manmeri i kam bungim em long maunten, ating em klostu long Kaperneam. Jisas i bin beten long nait olgeta. Na ating em i pilim taiet tru, tasol taim em i lukim dispela bikpela lain manmeri, em i sori tru long ol rabisman na ol man i sik. Em i oraitim ol, na tu, em i mekim wanpela bikpela tok we i helpim ol manmeri long dispela taim na i kam inap long nau—ol i kolim olsem Bikpela Tok Long Maunten.​—Luk 6:12-20.

5. Hau ol het bilong famili i bihainim eksampel bilong Jisas long daunim laik bilong ol yet maski ol i taiet?

⁵ Ol het bilong famili i bihainim eksampel bilong Jisas. Piksaim dispela samting: Het bilong famili i pinis long wok long apinun na em i kam long haus, na em i taiet nogut tru. Em i tingting long kenselim Famili Lotu long dispela nait olsem sediul bilong ol i makim, tasol em i beten strong long Jehova i ken givim strong long em long mekim olsem. Jehova i bekim beten bilong em, na famili i mekim stadi olsem ol i save mekim oltaim. Long dispela nait ol pikinini i lainim wanpela bikpela samting olsem, papamama bilong ol i tingim ol samting bilong bilip olsem bikpela samting moa winim olgeta narapela samting.

6. Stori long hau Jisas i yusim taim bilong em yet long helpim ol narapela.

⁶ Jisas i redi long yusim taim bilong em yet long helpim ol narapela. Yu inap piksaim long tingting Jisas i pilim olsem wanem taim em i save olsem ol i katim nek bilong pren bilong em Jon Bilong Baptais? Ating Jisas i bel hevi nogut tru. Baibel i tok: “Taim Jisas i harim [olsem Jon i dai], em i kalap long bot na lusim dispela hap na go long ples i no gat man bai em i ken stap em yet.” (Mat. 14:10-13) Yumi kliagut long as na Jisas i laik stap em yet. Planti bilong yumi i laik stap yumi yet taim yumi krai sori long wanpela i dai. Tasol i no gat rot long Jisas i stap em yet long dispela taim. Bikpela lain manmeri i bung pinis long dispela hap em i go long en. Jisas i mekim wanem? Em i tingim tru dispela bikpela lain manmeri, “em i sori tru long ol.” Em i lukim olsem ol i nidim tru ol gutpela tok bilong strongim ol long sait bilong bilip, na kwiktaim em i mekim olsem. “Em i  kirap skulim ol long planti samting,” na i no sampela samting tasol.​—Mak 6:31-34; Luk 9:10, 11.

7-8. Stori long wanpela eksampel i soim hau ol elda i bihainim pasin bilong Jisas taim i gat nid long mekim olsem.

⁷ Hau ol elda i bihainim eksampel bilong Jisas. Yumi pilim tru gutpela wok ol elda i save mekim long daunim laik bilong ol yet na helpim yumi! Planti wok ol i mekim em samting yumi ol pablisa insait long kongrigesen i no save lukim. Olsem, taim wanpela medikal imejensi i kamap, ol brata insait long Hospital Liesen Komiti i save go kwiktaim bilong helpim ol wanbilip. Planti taim ol kain imejensi i save kamap long biknait tru! Tasol ol dispela gutpela elda bilong yumi i sori tru long dispela brata o sista i karim hevi, na ol wantaim famili bilong ol i putim laik bilong ol wanbilip i go pas long laik bilong ol yet.

⁸ Ol elda i save insait tu long wok konstraksen bilong ol Haus Kingdom na ol narapela bilding, na tu, disasta rilif wok. Ol elda insait long ol kongrigesen bilong yumi i save lusim planti aua tru long skulim, strongim, na sambai long yumi olgeta. Yumi mas tok amamas na tok tenkyu long ol dispela brata na ol famili bilong ol. Jehova i ken blesim gutpela pasin bilong ol! Tasol wankain olsem yumi olgeta, ol elda i mas balensim gut ol samting. Ol i no ken lusim bikpela haptaim tumas long mekim ol wok tiokratik, na nau ol i no gat inap taim long stap wantaim famili bilong ol.

9. Olsem Filipai 2:4, 5 i kamapim, yumi ol Kristen i mas holim wanem kain tingting?

⁹ Ritim Filipai 2:4, 5. Em tru olsem yumi olgeta i no mekim wok elda, tasol yumi ken lain  long bihainim eksampel bilong Jisas long daunim laik bilong yumi yet. Baibel i tok “em i kamap olsem wanpela wokboi.” (Fili. 2:7) Tingim gut dispela tok. Wanpela wokboi bai painim olgeta kain rot bilong amamasim bosman bilong em. Yumi stap olsem wokboi bilong Jehova na wokboi bilong ol wanbilip bilong yumi, olsem na yumi laik tru long mekim ol wok bilong Jehova na mekim ol wok bilong helpim ol wanbilip bilong yumi. Yumi bai stori long sampela rot yumi ken mekim olsem.

10. Yumi mas givim wanem ol askim long yumi yet?

¹⁰ Skelim pasin bilong yu yet. Yu ken askim yu yet olsem: ‘Mi redi long daunim sampela laik bilong mi yet long helpim ol narapela? Mi bai mekim wanem sapos ol i askim mi long visitim wanpela lapun brata long haus bilong em o kisim wanpela lapun sista i go long miting? Mi bai redi long mekim olsem? Mi save redi long givim helpim taim ol i askim ol volantia long klinim ples kibung o stretim Haus Kingdom?’ Jehova i save amamas tru taim em i lukim yumi redi long yusim taim na ol samting yumi gat—em ol samting yumi dediketim long em—bilong helpim ol narapela. Sapos yumi luksave olsem i gat sampela samting yumi yet i mas stretim, orait yumi ken mekim wanem?

11. Olsem wanem beten i ken helpim yumi long kisim pasin bilong daunim laik bilong yumi yet?

¹¹ Beten strong long Jehova. Yu inap mekim wanem sapos yu luksave olsem i gat sampela samting em yu mas stretim, tasol yu no gat laik long mekim olsem? Long kain taim olsem, beten strong long Jehova. Tokim em long olgeta samting. Tokim Jehova long samting yu pilim, na askim em long givim yu “dispela laik na strong long mekim ol samting em yet i laikim.”​—Fili. 2:13.

12. Wanpela yangpela brata i baptais pinis i ken mekim wanem bilong helpim ol narapela?

¹² Sapos yu wanpela yangpela brata i baptais pinis, orait askim Jehova long helpim yu long kisim laik bilong mekim sampela wok moa insait long kongrigesen. Long sampela kantri, i gat planti moa elda winim ol kongrigesen sevan, na krismas bilong planti bilong ol dispela kongrigesen sevan i olsem 45 krismas samting na i go antap. Planti lain moa i wok long kam insait long oganaisesen, olsem na yumi nidim planti moa yangpela brata long helpim wok bilong lukautim lain bilong Jehova. Sapos yu redi long mekim wanem wanem ol wok i gat nid long mekim, yu bai amamas. Wai? Bikos yu amamasim Jehova, yu kisim gutnem, na yu kisim bikpela amamas long helpim ol narapela.

13-14. Yumi ken mekim wanem ol samting bilong helpim ol bratasista bilong yumi? (Lukim fran pes piksa.)

¹³ Luksave long helpim em ol narapela i nidim. Aposel Pol i tokim ol Hibru: “No ken lusim tingting long mekim gutpela pasin na serim ol samting wantaim ol arapela. Long wanem, God i save amamas long ol kain sakrifais olsem.” (Hib. 13:16) Dispela em gutpela edvais tru! Bihain liklik long ol Kristen long Judia i kisim dispela pas, ol i lusim ol haus na bisnis bilong ol na ol famili bilong ol husat i no wanbilip, na ol i “ranawe i go long ol maunten.” (Mat. 24:16) Long dispela taim, em i bikpela samting tru long ol i mas helpim narapela narapela. Paslain long dispela, sapos ol i wok long bihainim edvais bilong Pol long serim ol samting wantaim ol narapela, em bai isi long ol i lain long nupela sindaun bilong ol.

¹⁴ Sampela taim ol bratasista i no inap tokim yumi long ol samting ol i nidim helpim long en. Olsem, wanpela sista i dai na man bilong em i krai sori. Yu ting brata bilong yumi bai nidim helpim long sait bilong kaikai, trenspot, na ol wok bilong haus? Ating em i no inap askim yumi long helpim em bikos em i no laik givim hatwok long yumi. Tasol ating em bai pilim tru  gutpela pasin bilong yumi long go pas long helpim em long ol samting em i nidim helpim long en. Yumi no ken ting olsem brata o sista bilong yumi bai kisim olgeta helpim em i nidim o oltaim em bai tokim yumi long ol samting em i nidim helpim long en. Askim yu yet, ‘Sapos mi karim wankain hevi olsem em, mi bai amamas long kisim wanem kain helpim?’

15. Bilong daunim laik bilong yumi yet, yumi mas tingting strong long mekim wanem?

¹⁵ Soim olsem yu redi long helpim ol narapela. Ating yu save long ol brata na sista long kongrigesen bilong yu em oltaim ol i redi long helpim ol narapela. Ol i no save mekim yumi pilim olsem yumi givim hatwok long ol. Yumi save olsem ol i stap redi long helpim yumi taim yumi nidim helpim, na yumi laik tru long bihainim pasin bilong ol! Alan em wanpela elda i gat 45 krismas, na em i laik soim ol narapela olsem em i redi long helpim ol. Em i tingim eksampel bilong Jisas, na em i tok: “Jisas i bisi tru, tasol ol manmeri bilong kain kain krismas i laik toktok wantaim em, na ol i no pilim hatwok long askim em long helpim ol. Ol i luksave olsem em i tingim tru ol. Mi laik tru long bihainim pasin bilong Jisas na bai ol narapela i tingim mi olsem wanpela pren husat i tingim ol na i redi long helpim ol.”

16. Olsem wanem tok bilong Buk Song 119:59, 60 i ken helpim yumi long bihainim gut eksampel bilong Jisas?

¹⁶ Yumi no ken bel hevi sapos yumi no bihainim stret eksampel bilong Jisas. (Jems 3:2) Wanpela sumatin atis i no inap long bihainim stret wok bilong tisa atis. Tasol taim em i kisim skul long ol popaia bilong em na em i wok hat tru long bihainim gut wok bilong tisa atis, dispela bai helpim em long kamap gutpela moa long wok bilong em. Olsem tasol, sapos yumi bihainim ol tok yumi lainim long pesenel Baibel stadi bilong yumi na yumi wok hat long stretim sampela pasin kranki bilong yumi,  orait yumi inap bihainim gut eksampel bilong Jisas.​—Ritim Buk Song 119:59, 60.

17-18. Taim yumi bihainim pasin bilong Jisas long daunim laik bilong yumi yet, wanem ol gutpela samting bai kamap?

¹⁷ Taim yumi daunim laik bilong yumi yet na helpim ol narapela, ol arapela bai bihainim pasin bilong yumi. Tim em wanpela elda na em i tok: “Mipela i gat ol yangpela brata em ol i winim mak na kamap kongrigesen sevan—sampela i mekim olsem taim ol i yangpela tru—wanpela risen ol i mekim olsem em bikos ol i bihainim eksampel bilong ol narapela em ol i redi long daunim laik bilong ol yet na helpim ol narapela. Ol dispela yangpela i daunim laik bilong ol yet na helpim kongrigesen bilong mipela na ol i sapotim gut ol elda.”

¹⁸ Long nau planti man i gat pasin bilong tingim laik bilong ol yet. Tasol lain bilong Jehova ol i narapela kain. Yumi pilim tru gutpela pasin bilong Jisas long daunim laik bilong em yet long helpim ol narapela, na yumi tingting strong long bihainim eksampel bilong em. Em tru olsem yumi no inap bihainim stret lek mak bilong em, tasol yumi ken “bihainim gut lek mak bilong em.” (1 Pita 2:21) Taim yumi givim bel olgeta long bihainim pasin bilong Jisas long daunim laik bilong yumi yet long helpim ol narapela, yumi tu bai amamas long save olsem Jehova i orait long yumi.