1-2. Wanpela brata i kisim wanem skul long pasin bilong givim tok kaunsel?

 PLANTI yia i go pinis, tupela elda i bin visitim wanpela sista husat i bin lusim ol miting inap sampela haptaim. Elda husat i go pas long toktok, em i soim sampela skripsa long pasin bilong go oltaim long ol miting. Em i ting olsem visit bilong tupela i helpim sista, tasol taim em na poroman bilong em i laik i go, dispela sista i tok: “Yutupela i no save long hevi bilong mi.” Tupela brata i givim tok kaunsel, tasol tupela i no lusim haptaim long askim sista long ol hevi bilong em na sindaun bilong em. Dispela i mekim na sista i no pilim olsem tok kaunsel bilong tupela i helpim em.

² Elda i bin go pas long toktok, em i tingim bek na em i tok: “Long dispela taim, mi ting sista i no rispektim mitupela. Tasol taim mi wok long tingim, mi luksave olsem mi kamapim ol skripsa i stret, tasol mi no mekim ol askim i stret, kain olsem: ‘Wanem ol samting i kamap long sindaun bilong yu?’ ‘Mi ken helpim yu olsem wanem?’” Dispela elda i kisim wanpela bikpela skul long dispela ekspiriens. Long nau, em i stap olsem gutpela wasman, em i save pilim tru hevi bilong ol narapela na helpim ol.

3. Husat long kongrigesen inap givim tok kaunsel?

 ³ Ol elda ol i wasman na ol i gat wok long givim tok kaunsel taim i gat nid long mekim olsem. Tasol sampela taim, rot i op long ol narapela insait long kongrigesen inap givim tok kaunsel. Olsem, wanpela brata o sista inap yusim tok bilong Baibel long givim edvais long wanpela pren. (Sng. 141:5; Prov. 25:12) O wanpela lapun sista inap “givim gutpela tingting long ol yangpela meri” long ol samting olsem Taitus 2:3-5 i stori long en. Na planti taim papamama i mas givim tok kaunsel na stretim ol pikinini  bilong ol. Maski dispela atikol em bilong helpim ol elda long kongrigesen, yumi olgeta inap kisim helpim long ol tok bilong en. Em inap helpim yumi long skelim ol rot bilong givim tok kaunsel we inap helpim man na em ol tok we “i save mekim bel i amamas.”​—Prov. 27:9.

4. Yumi bai stori long wanem samting long dispela atikol?

⁴ Long dispela atikol, yumi bai kisim bekim bilong 4-pela askim i stori long tok kaunsel: (1) Wanem astingting bilong givim tok kaunsel? (2) I stret long givim tok kaunsel? (3) Husat i ken givim tok kaunsel? (4) Olsem wanem yu ken givim gutpela tok kaunsel?

5. Olsem wanem gutpela astingting inap helpim elda long givim tok kaunsel long gutpela pasin? (1 Korin 13:4, 7)

⁵ Ol elda i laikim ol bratasista bilong ol. Sampela taim, ol i soim dispela pasin laikim taim ol i givim tok kaunsel long wanpela husat i bihainim rot nogut. (Gal. 6:1) Paslain long wanpela elda i toktok long dispela man o meri, i gutpela em i skelim ol tok em aposel Pol i mekim long man i gat pasin laikim. Em i tok: “Man i gat pasin laikim em i no save les kwik, na em i save mekim gutpela pasin. . . . Em i no save larim wanpela samting i daunim em, em i save bilip long olgeta samting, em i save wetim ol gutpela samting i kamap, na em i save sanap strong long olgeta hevi i kamap long em.” (Ritim 1 Korin 13:4, 7.) Taim elda i tingim tingim ol dispela tok bilong Baibel, dispela bai helpim em long skelim gut astingting bilong em long givim tok kaunsel na bai em i toktok long brata o sista bilong em long gutpela pasin. Taim brata o sista i pilim olsem elda i tingim em, orait em bai redi long kisim dispela tok kaunsel na bihainim.​—Rom 12:10.

6. Aposel Pol i soim wanem gutpela eksampel?

⁶ Aposel Pol i soim gutpela eksampel olsem wanpela elda. Olsem, taim ol brata long Tesalonaika i nidim tok kaunsel, Pol i no surik long givim tok kaunsel long ol. Tasol long ol pas em i raitim long ol, pastaim em i tok amamas long ol gutpela wok bilong ol, ol hatwok em pasin laikim i kirapim ol long mekim, na pasin bilong ol long sanap strong. Na tu, em i tingim sindaun bilong ol, na long gutpela pasin em i tokim ol olsem em i save laip bilong ol i no isi na ol i sanap strong na karim hevi, maski ol man i mekim nogut long ol. (1 Tes. 1:3; 2 Tes. 1:4) Na em i tokim ol dispela brata olsem ol i stap gutpela eksampel long ol narapela Kristen. (1 Tes. 1:8, 9) Tru tumas, ol i amamas long kisim gutpela tok kaunsel bilong Pol! I klia tru olsem Pol i laikim tru ol brata bilong em. Olsem na em i mekim gutpela tok kaunsel long ol pas em i raitim long ol Kristen long Tesalonaika.​—1 Tes. 4:1, 3-5, 11; 2 Tes. 3:11, 12.

7. Wai na wanpela inap kisim tingting kranki long tok kaunsel?

⁷ Wanem samting inap kamap sapos yumi no givim tok kaunsel long gutpela pasin? Wanpela elda i gat ekspiriens i tok: “Sampela inap kisim tingting kranki long tok kaunsel bilong yu, i no bikos sampela samting i rong long edvais yu givim, nogat. Ol inap kisim tingting kranki sapos yu no toktok long pasin laikim.” Yumi inap kisim wanem skul long dispela? Em i isi moa long bihainim tok kaunsel taim man i toktok long pasin laikim, na i no belhat na toktok.

8. Wanpela elda i ken givim wanem ol askim long em yet taim em i laik givim tok kaunsel long wanpela?

⁸ Ol elda i no ken hariap long givim tok kaunsel. Paslain long givim tok kaunsel, wanpela elda i ken askim em yet olsem: ‘I stret long mi givim tok kaunsel? Mi save tru olsem samting em i mekim i no stret? Em i brukim wanpela lo  bilong Baibel? O tingting em i holim i narapela long tingting mi gat?’ Ol elda i bihainim savetingting taim ol i no “hariap long toktok.” (Prov. 29:20) Sapos elda i no kliagut olsem em i mas givim tok kaunsel long wanpela o nogat, orait em i ken toktok wantaim narapela elda na lukim sapos dispela brata o sista i brukim wanpela lo bilong Baibel na i stret em i kisim tok kaunsel o nogat.​—2 Tim. 3:16, 17.

9. Yumi kisim wanem skul long tok bilong Pol long pasin bilong bilas na mekim gut skin? (1 Timoti 2:9, 10)

⁹ Skelim wanpela eksampel. Sapos wanpela elda i tingting planti long pasin bilong wanpela wanbilip long bilas o mekim gut skin. Long kain taim, elda i ken askim em yet olsem, ‘Pablisa i brukim wanpela lo bilong Baibel na i stret em i kisim tok kaunsel long en?’ Elda i no laik kamapim tingting bilong em yet, olsem na em inap askim narapela elda o wanpela pablisa i strong long bilip long tingting bilong em. Ol inap sindaun wantaim na skelim gen tok bilong Pol long sait bilong bilas na mekim gut skin. (Ritim 1 Timoti 2:9, 10.) Pol i kamapim sampela stiatok tasol olsem ol Kristen i mas werim ol bilas i stret, soim pasin daun, na gutpela tingting. Tasol Pol i no kolim lista bilong ol samting Kristen i ken mekim na no ken mekim. Em i save olsem ol Kristen i gat rait long werim wanem samting ol i laikim, tasol bikpela samting em klos na bilas bilong ol i no brukim ol lo bilong Baibel. So taim ol elda i laik skelim sapos i stret ol i givim tok kaunsel o nogat, i gutpela ol i skelim sapos ol klos na bilas bilong dispela brata o sista i soim pasin daun na gutpela tingting.

10. Yumi mas holim wanem stretpela tingting long disisen bilong wan wan?

¹⁰ Em i bikpela samting long yumi mas save olsem tupela Kristen i gat strongpela bilip inap mekim narapela narapela disisen, na tupela disisen wantaim i orait. Yumi no ken kamapim ol lo bilong yumi yet long wanem samting i rait na rong na strong long ol wanbilip i bihainim.​—Rom 14:10.

11-12. Sapos i stret long givim tok kaunsel, orait elda i ken givim wanem ol askim long em yet, na bilong wanem?

¹¹ Sapos i stret long givim tok kaunsel, orait neks askim em olsem, Husat i ken givim tok kaunsel? Paslain long wanpela elda i givim tok kaunsel long wanpela sista i marit o wanpela pikinini, i gutpela em i toktok wantaim het bilong famili, ating het bilong famili yet bai laik stretim dispela hevi. * O ating het bilong famili inap askim sapos em orait long em i ken stap taim elda i givim tok kaunsel. Na olsem  paragraf 3 i stori long en, sampela taim wanpela sista i gat bikpela krismas inap givim tok kaunsel long wanpela yangpela sista.

¹² I gat narapela samting bilong tingim. Wanpela  elda inap askim em yet olsem, ‘I stret long mi givim dispela tok kaunsel, o em bai isi moa long pablisa i kisim tok sapos em i kam long narapela brata?’ Olsem, wanpela husat i karim hevi long pilim olsem em i no gutpela tumas, ating em bai redi long kisim tok kaunsel i kam long wanpela elda husat i bin karim wankain hevi, na i no wanpela elda husat i no bin bungim dispela hevi. Elda husat i bin bungim dispela hevi, em inap pilim tru hevi bilong pablisa, na em isi long pablisa i kisim ol tok em i givim na bihainim. Maski i olsem, olgeta elda i gat wok long kirapim na strongim ol bratasista bilong ol long mekim ol senis we i stret wantaim tok bilong Baibel. So taim man i mas kisim tok bilong stretim em, orait em i bikpela samting olsem em i kisim dispela tok kaunsel.

13-14. Bilong wanem em i bikpela samting long elda i putim gut yau?

¹³ Redi long putim gut yau. Taim wanpela elda i redi long givim tok kaunsel, orait em i ken askim em yet olsem: ‘Mi save long wanem samting long sindaun bilong brata bilong mi? Wanem samting i kamap long laip bilong em? Ating em i wok long karim ol hevi we mi yet i no save long en? Long nau stret em i nidim wanem samting?’

¹⁴ Ol man i save givim tok kaunsel, ol i ken bihainim stiatok i stap long Jems 1:19. Jems i tok: “Olgeta man i mas putim yau kwik long harim tok, na ol i no ken hariap long mekim toktok, na ol i no ken belhat hariap.” Ating wanpela elda inap ting olsem em i save long olgeta stori, tasol tru tru em i save long olgeta stori? Provep 18:13 i tokim yumi olsem: “Taim man i bekim tok hariap paslain long em i harim tok long as tru bilong wanpela hevi, dispela em i longlong pasin na i bringim sem long em yet.” I gutpela long harim olgeta stori long maus bilong dispela brata o sista yet. Dispela i makim olsem elda i ken putim gut yau paslain long em i toktok. Tingim elda em yumi bin stori long em long kirap bilong dispela atikol na skul em i bin kisim. Em i luksave olsem i gutpela moa long em i no hariap tasol long stori long ol samting em i redim, nogat, em inap long givim kain ol askim long sista olsem: “Wanem ol samting i kamap long sindaun bilong yu?” “Mi ken helpim yu olsem wanem?” Taim ol elda i lusim sampela haptaim long kisim gut ol stori, ol inap helpim na strongim gut ol bratasista bilong ol.

15. Olsem wanem ol elda i ken bihainim stiatok i stap long Provep 27:23?

¹⁵ Save gut long ol sipsip. Olsem yumi stori long kirap bilong dispela atikol, bilong givim gutpela tok kaunsel, yumi ken ritim sampela skripsa na kamapim wanpela o tupela samting em ol i ken bihainim, na yumi mas mekim sampela samting moa. Ol bratasista bilong yumi i mas pilim olsem yumi tingim ol, yumi kliagut long hevi bilong ol, na yumi laik helpim ol. (Ritim Provep 27:23.) Ol elda i mas mekim ol samting ol inap mekim bilong pas gut wantaim ol bratasista bilong ol.

16. Wanem samting bai helpim ol elda long givim gutpela tok kaunsel?

 ¹⁶ Ol elda i no laik bai ol bratasista i kisim tingting olsem ol i save toktok wantaim ol long taim ol i mekim rong na em tasol, na ol narapela taim nogat. Oltaim ol elda i ken toktok wantaim ol bratasista bilong ol, na soim ol olsem ol i tingim ol tru long ol hevi ol i karim. Wanpela elda i gat bikpela ekspiriens i tok: “Sapos yu mekim olsem, yu bai kamap gutpela pren bilong ol, na bihain taim yu laik givim tok kaunsel, yu bai luksave olsem em i isi moa long mekim olsem.” Na brata o sista husat i kisim tok kaunsel bai pilim olsem em i isi moa long kisim na bihainim tok kaunsel.

17. Long wanem taim elda i no ken les kwik na mekim gutpela pasin?

¹⁷ No ken les kwik na mekim gutpela pasin. Em i bikpela samting long elda i no ken les kwik na mekim gutpela pasin taim brata o sista i sakim tok kaunsel i kam long Baibel long namba 1 taim. Elda i mas was gut na em i no ken belhat hariap sapos brata o sista i no hariap long kisim o bihainim tok kaunsel. Baibel i tok profet long Jisas olsem: “Bai em i no krungutim pitpit i bruk liklik, na bai em i no kilim i dai lam em paia long wik bilong en i laik pinis.” (Mat. 12:20) Olsem na long ol beten em elda yet i mekim, em i ken askim Jehova long blesim brata o sista husat i nidim tok kaunsel na helpim em long kliagut long risen na em i mas kisim tok kaunsel na bihainim. Ating brata i kisim tok kaunsel inap nidim sampela haptaim long tingim tingim ol tok em i kisim. Sapos elda i no les kwik na em i mekim gutpela pasin, dispela inap mekim na em i isi long brata i putim gut yau na kisim tok kaunsel. Na yes, oltaim tok kaunsel i mas kam long Baibel.

18. (a) Yumi ken tingim wanem samting taim yumi givim tok kaunsel? (b) Olsem piksa long blok i soim, ol papamama i stori long wanem samting?

¹⁸ Kisim skul long ol popaia bilong yu. Yumi no gutpela olgeta, olsem na yumi no inap bihainim stret olgeta tok em yumi bin skelim long dispela atikol. (Jems 3:2) Yumi bai mekim ol popaia, tasol taim yumi mekim ol popaia, yumi mas kisim skul long ol popaia bilong yumi. Sapos ol bratasista  bilong yumi i pilim olsem yumi laikim ol, em bai isi moa long ol i fogivim yumi taim yumi mekim wanpela tok o pasin we i bagarapim bel bilong ol.​—Lukim tu blok “ Tok i Go Long Ol Papamama.”

19. Olsem wanem yumi ken mekim bel bilong ol bratasista bilong yumi i amamas?

¹⁹ Olsem yumi stori pinis, em i no isi long givim gutpela tok kaunsel. Yumi no gutpela olgeta, na tu, ol lain yumi laik givim tok kaunsel long ol, ol i no gutpela olgeta. So yumi mas tingim gut ol stiatok yumi bin skelim long dispela atikol. Yumi mas i gat gutpela astingting bilong givim tok kaunsel. Na tu, yumi mas skelim sapos tru tru i gat nid long givim tok kaunsel o nogat, na i stret long yumi yet i givim dispela tok kaunsel o narapela i ken givim. Paslain long yumi givim tok kaunsel, yumi ken givim ol askim na putim gut yau na bai yumi inap kliagut long wanem ol hevi em dispela brata o sista i karim. Yumi ken traim long luksave long tingting bilong em. Na yumi ken mekim pasin isi, na kisim pasin bilong pas gut wantaim ol bratasista bilong yumi. Tingim dispela mak: Yumi laik bai tok kaunsel bilong yumi i helpim brata o sista bilong yumi, na tu, “mekim bel i amamas.”​—Prov. 27:9.