1, 2. (a) Jehova i tok wanem samting bai kamap long taim bilong yumi? (b) Bai yumi skelim wanem ol askim long dispela stadi? (Lukim piksa long kirap bilong stadi.)

JEHOVA i tingim samting bai kamap long taim bilong yumi long nau na em i tok profet olsem: “Long dispela taim 10-pela man bilong ol longwe ples bai i kam holim wanpela Juda man na bai ol i tok olsem, ‘Mipela i harim olsem God i stap wantaim yupela Juda. Olsem na mipela i laik kamap wanlain wantaim yupela.’” (Sek. 8:23) Dispela 10-pela man long tok profet i makim ol lain husat i bilip na wet long kisim laip long graun. Ol i amamas long wok bung wantaim ol Kristen em God i makim long holi spirit, em “lain Israel bilong God,” long wanem, ol i save olsem Jehova i blesim dispela lain Kristen. Long dispela rot, i olsem ol i holim “wanpela Juda man.”—Gal. 6:16.

² Wankain olsem profet Sekaraia i bin mekim, Jisas i stori long pasin wanbel i stap namel long ol manmeri bilong God. Em i tok ol disaipel bilong em bai i stap olsem 2-pela grup, “liklik lain sipsip” na “ol arapela sipsip.” Tasol ol bai stap olsem “wanpela lain sipsip i gat wanpela wasman.” (Luk 12:32; Jon 10:16) Dispela i kamapim sampela askim: (1) Yu ting i stret ol manmeri bilong lain arapela sipsip i save  long nem bilong olgeta Kristen long nau em God i makim ol long holi spirit? (2) Ol Kristen God i makim i mas holim wanem tingting long ol yet? (3) Bai yu mekim wanem sapos wanpela long kongrigesen bilong yu i kisim bret na wain long bung bilong Memorial? (4) Yu ting i stret long yu tingting planti long namba bilong lain i kisim bret na wain i go antap? Orait, yumi ken skelim ol dispela askim.

3. Bilong wanem na i no gat rot long yumi inap save long husat bai stap insait long grup bilong lain 144,000?

³ Yu ting i stret long ol manmeri bilong lain arapela sipsip i mas save long nem bilong olgeta Kristen long nau em God i makim? Yumi ken tok, nogat. Bilong wanem? Long wanem, sapos Kristen i kisim strongpela tingting bilong kisim laip long heven, dispela i olsem wanpela invatesen God i givim long em, tasol em i no kisim yet laspela mak. Olsem na Satan i kirapim “ol giaman profet . . . bilong giamanim ol manmeri, na sapos ol inap, ol bai giamanim tu ol manmeri God i bin makim.” (Mat. 24:24) I no gat wanpela man inap save sapos Kristen em God i makim bai kisim laip long heven, o nogat. Jehova yet bai skelim sapos dispela Kristen i winim mak bilong kisim dispela prais. Sapos dispela Kristen i holimpas bilip, Jehova bai givim em laspela mak paslain liklik long em i dai, o paslain long taim bilong “traipela hevi tru.” (Rev. 2:10; 7:3, 14) Olsem na long nau, i no gat wok long ol man i stap laip long graun long save long husat ol wokman bilong God bai stap long grup bilong lain 144,000. ^[1]

4. Yumi no save long nem bilong olgeta Kristen em God i makim na ol i stap laip long graun long nau, olsem na hau bai yumi inap “kamap wanlain wantaim” ol?

⁴ Em tru olsem ol arapela sipsip i no gat rot long save long nem bilong olgeta Kristen long nau em ol i stap long grup bilong lain Israel bilong God. Maski i olsem, hau bai ol arapela sipsip inap “kamap wanlain” wantaim ol? Tingim samting em 10-pela man long tok profet bilong Sekaraia i mekim. Ol i “holim wanpela Juda man na bai ol i tok olsem, ‘Mipela i harim olsem God i stap wantaim yupela Juda. Olsem na mipela i laik kamap wanlain wantaim yupela.’” Dispela tok profet i kolim wanpela man Juda, tasol dispela tok i makim planti man. Olsem na dispela man Juda i no makim wanpela man tasol, nogat. Em i olsem tok piksa bilong makim wanpela grup i gat planti man long en! Olsem na dispela i makim olsem yumi no gat wok long painimaut long olgeta wan wan memba bilong lain Israel bilong God na yumi go wantaim ol, nogat. Yumi mas save long dispela lain Juda olsem wanpela grup, na yumi mas sapotim ol. I no gat wanpela skripsa i kirapim yumi long bihainim wanpela man tasol. Jisas tasol em i Lida bilong yumi.—Mat. 23:10.

5. Ol Kristen God i makim i mas tingim wanem tok lukaut? Bilong wanem?

⁵ Ol lain husat i kisim bret na wain long Memorial, ol i mas tingim tok lukaut i stap long 1 Korin 11:27-29. (Ritim.) Aposel Pol i kamapim klia olsem sapos Kristen God i makim i no stap gut long Jehova na em i kisim bret na wain, dispela i no stret. (Hib. 6:4-6; 10:26-29) Dispela tok lukaut i helpim ol Kristen God i makim long tingim olsem, ol i no kisim yet prais. Ol i mas wok yet long “ran strong i go bilong kamap long mak bilong kisim prais. Dispela prais em singaut bilong i go antap, na em i kam long God long rot bilong Krais Jisas.”—Fili. 3:13-16.

6. Ol Kristen God i makim i mas holim wanem tingting long ol yet?

⁶ Holi spirit i kirapim Pol long tokim ol Kristen God i makim “long wokabaut long pasin i stret long dispela singaut [ol] i bin kisim.” Pol i tok: “Oltaim yupela i mas mekim wantaim pasin daun, pasin isi, na pasin bilong i no les kwik, na  karim hevi ol arapela i putim long yupela na mekim wantaim pasin laikim. Na wok strong long holimpas pasin wanbel bilong holi spirit na stap bel isi, em pasin i save bungim yumi wantaim.” (Efe. 4:1-3) Spirit bilong Jehova i kirapim man long mekim pasin daun, na i no pasin antap. (Kol. 3:12) Long pasin daun, ol Kristen God i makim i luksave olsem ol i kisim wankain strong long holi spirit olsem ol Kristen husat bai kisim laip long graun. Ol i no holim tingting olsem ol i gat bikpela save moa na ol tasol i save long sampela samting. Na tu, ol i no inap tokim ol narapela long kisim bret na wain bilong soim olsem God i makim ol, nogat. Ol i tingim olsem Jehova yet i save makim ol Kristen husat bai kisim laip long heven.

7, 8. Ol Kristen God i bin makim i sakim wanem ol tingting? Bilong wanem?

⁷ Taim God i makim ol Kristen long kisim laip long heven, dispela i olsem wanpela gutpela blesing, tasol ol i no holim tingting olsem ol narapela i mas givim biknem long ol. (Efe. 1:18, 19; ritim Filipai 2:2, 3.) Spirit bilong Jehova yet i tokaut long ol long dispela samting. Ol i no tokim olgeta manmeri long dispela samting. Olsem na ol i no kirap nogut taim sampela manmeri i no holim dispela tingting. Ol i tingim tok lukaut bilong Baibel olsem sapos wanpela man i tokaut olsem God i makim em long holi spirit, orait ol i no ken hariap tumas long bilipim em. (Rev. 2:2) Sapos God i makim ol long holi spirit, i no gat wok long ol i toksave long ol narapela, long wanem, ol i no laik bai ol narapela i givim biknem long ol. Na tu, ol i no laik apim nem bilong ol yet long presen ol bai kisim long bihain.—1 Kor. 1:28, 29; ritim 1 Korin 4:6-8.

⁸ Ol Kristen God i makim, ol i no tingim ol yet olsem ol memba bilong wanpela grup i gat biknem, nogat. Ol i no tingting long painim ol narapela Kristen em God i makim long holi spirit bambai ol yet i ken poroman, o kamapim Baibel stadi grup bilong ol yet. (Gal. 1:15-17) Dispela pasin inap brukim kongrigesen na kongrigesen i no inap bihainim ol pasin em holi spirit i save kamapim, em pasin bilong i stap wanbel na stap bel isi.—Ritim Rom 16:17, 18.

9. Bilong wanem yu mas tingting gut long pasin yu mekim long ol Kristen husat i kisim bret na wain long Memorial? (Lukim blok “Man i Gat Pasin Laikim ‘i No Save Bikhet Nabaut.’”)

⁹ Yu mas soim wanem kain pasin long Kristen husat i kisim bret na wain long Memorial? Jisas i tokim ol disaipel olsem: “Yupela olgeta i stap brata brata.” Em i tok moa: “Man i litimapim em yet, em bai kisim sem. Tasol man i daunim em yet, em bai kisim biknem.” (Mat. 23:8-12) Olsem na i no stret long yumi givim biknem long ol narapela, maski em i wanpela Kristen God i bin makim. Baibel i kirapim yumi long bihainim bilip bilong ol lain i go pas, em ol elda, tasol Baibel i no tokim yumi long givim biknem long wanpela man olsem lida bilong yumi. (Hib. 13:7) Em tru olsem Baibel i tok ol Kristen “i mas givim bikpela rispek” long sampela hetman. Tasol dispela i no makim olsem ol Kristen i tingim blesing bilong ol dispela hetman olsem God i makim ol long holi spirit, nogat. Ol Kristen i tingim pasin bilong ol dispela hetman long “mekim gut wok” na “wok hat long tokaut long tok bilong God na skulim ol man long en.” (1 Tim. 5:17) Olsem na sapos ol narapela i litimapim nem bilong ol Kristen em God i makim ol long kisim laip long heven, dispela bai semim ol. Na tu, dispela bai kirapim ol long kisim pasin antap. (Rom 12:3) Yumi no laik mekim wanpela samting bilong pundaunim wanpela brata bilong Krais!—Luk 17:2.

10. Olsem wanem yu inap soim olsem yu rispektim ol Kristen God i bin makim?

¹⁰ Olsem wanem yumi inap soim rispek long ol Kristen Jehova i makim long holi spirit? Yumi no ken askim ol long ol samting em yumi no gat wok long save long en. Yumi no laik save long samting i kamap long laip bilong ol narapela. (1 Tes. 4:11;  2 Tes. 3:11) Yumi no ken ges nating olsem God bai makim tu papamama, poroman marit, o wanblut bilong dispela Kristen em i bin makim. Taim God i makim wanpela Kristen, dispela i no makim olsem em bai makim tu ol wanfamili o poroman marit. (1 Tes. 2:12) Sapos yumi bungim poroman marit bilong Kristen God i bin makim, yumi no ken askim long em i pilim olsem wanem long poroman marit bai lusim em na i go long heven na em tasol bai i stap long Paradais long graun. Yumi no ken kamapim askim we bai mekim narapela i bel hevi, nogat. Yumi olgeta i ken bilip tru olsem Jehova bai opim han bilong em na “inapim laik bilong olgeta samting i gat laip.”—Sng. 145:16, NW.

11. Olsem wanem yumi lukautim yumi yet taim yumi sakim “ol switpela tok bilong grisim ol man”?

¹¹ Ol man husat i mekim stretpela pasin long ol Kristen God i bin makim, ol i lukautim ol yet. Baibel i tok olsem “ol giaman brata” inap kam insait long kongrigesen. (Gal. 2:4, 5; 1 Jon 2:19) Ol dispela giaman lain inap tok olsem God i makim ol long holi spirit. Na tu, sampela Kristen em God i bin makim, ol inap lusim bilip. (Mat. 25:10-12; 2 Pita 2:20, 21) Sapos yumi sakim “ol switpela tok bilong grisim ol man,” yumi no inap larim ol dispela tok i pulim yumi long lusim tok i tru. Na tu, yumi no inap pundaun long bilip sapos wanpela Kristen God i bin makim i no stap gut moa long God, maski sapos em i holim bikpela wok insait long oganaisesen o em i stap planti yia insait long tok i tru.—Jut 16.

12, 13. Bilong wanem yumi no ken tingting planti long namba bilong lain i kisim bret na wain long Memorial?

¹² Long ol yia i go pinis, namba bilong ol lain i kisim bret na wain long Memorial i go antap. Dispela em bikpela senis tru taim yumi skelim wantaim liklik namba bilong lain i kisim bret na wain inap planti yia i go pinis. Yu ting i stret long yumi tingting planti long dispela samting? Nogat. Yumi ken skelim sampela bikpela samting.

¹³ “Jehova i save gut long ol manmeri bilong em yet.” (2 Tim. 2:19) Ol man husat i kaunim namba bilong ol manmeri i kam long Memorial, ol i no gat wok long skelim olsem husat tru bai kisim laip long heven. Ol lain husat i popaia na kisim bret na wain, namba bilong ol tu i insait long namba bilong lain i kisim bret na wain. Sampela i kirap long kisim bret na wain, tasol bihain ol i stop long kisim. Ating sampela i gat sik long tingting o bel hevi i daunim ol, olsem na ol i kisim tingting olsem ol bai mekim wok king wantaim Krais long heven. Olsem na yumi no inap  save stret long hamas Kristen God i bin makim ol i stap yet long graun.

14. Baibel i tok wanem long namba bilong ol Kristen God i bin makim em ol bai stap long graun taim traipela hevi tru i kirap?

¹⁴ Ol Kristen God i bin makim bai stap long olgeta hap bilong graun taim Jisas i kam bilong bungim ol na kisim ol i go long heven. Baibel i stori long samting em Jisas bai mekim: “Bikpela krai bilong trampet bai kamap na em bai salim ol ensel bilong en i go. Na ol bai bungim lain bilong em, em lain God i bin makim, na ol bai kam long 4-pela hap bilong graun. Long arere tru bilong wanpela sait bilong skai i go olgeta long narapela sait.” (Mat. 24:31) Baibel i tok, liklik hap lain tasol bilong lain God i makim bai stap long graun long haptaim bilong las de. (Rev. 12:17) Tasol Baibel i no kolim namba stret bilong hamas lain bai stap taim traipela hevi tru i kirap.

15, 16. Yumi kisim wanem stretpela save long lain 144,000 em Jehova i makim?

¹⁵ Jehova i makim taim stret bilong makim ol man long holi spirit. (Rom 8:28-30) Bihain long taim Jisas i dai na kirap bek, Jehova i stat long makim ol Kristen husat bai kisim laip long heven, na i luk olsem olgeta Kristen long dispela taim bipo, ol i bilip na wet long kisim laip long heven. Kirap long taim bilong ol aposel na i kam inap long yia 1914, planti manmeri husat i tok ol i stap disaipel bilong Krais, ol i giaman Kristen. Jisas i tok ol i kain olsem “ol gras nogut.” Maski i olsem, Jehova i wok yet long makim ol Kristen husat bai kisim laip long heven na ol i stap olsem “ol wit.” (Mat. 13:24-30) Long haptaim bilong las de, Jehova i makim ol Kristen bilong inapim namba bilong lain 144,000. ^[2] Em i wet inap long haptaim bilong las de na em i makim sampela husat bai kisim laip long heven, tasol yumi no gat rait long askim em long risen bilong em long mekim olsem. (Ais. 45:9; Dan. 4:35; ritim Rom 9:11, 16.) ^[3] Yumi mas was gut bambai yumi no ken toktok planti wankain olsem ol wokman husat i komplein long pe em bosman i givim long ol wokman husat i kam wok long namba 11 aua.—Ritim Matyu 20:8-15.

¹⁶ I no olgeta husat bai kisim laip long heven i stap olsem “gutpela wokboi i gat savetingting.” (Mat. 24:45-47) Long taim bilong ol aposel, Jehova na Jisas i yusim liklik lain tasol long givim kaikai bilong strongim bilip bilong planti manmeri, na ol i mekim wankain samting long nau. Na tu, em i bin yusim sampela tasol bilong ol dispela Kristen long raitim Ol Skripsa Grik. Olsem tasol, long nau Jisas i yusim sampela tasol bilong ol Kristen God i bin makim long redim na “givim kaikai long ol [arapela wokboi] long taim stret.”

17. Yu kisim wanem ol save long dispela stadi?

¹⁷ Long dispela stadi, yumi kisim save long wanem ol samting? Jehova bai givim 2-pela kain prais—Ol Kristen husat i stap olsem man Juda, ol bai kisim laip long heven, na ol Kristen husat i stap olsem 10-pela man bilong ol longwe ples, ol bai kisim laip long graun. Tasol 2-pela lain wantaim i gat wok long stap gut long God, maski ol bai kisim laip long heven o long graun. Tupela grup wantaim i mas bihainim pasin daun. Tupela grup wantaim i mas i stap wanbel. Tupela grup wantaim i mas kamapim bel isi insait long kongrigesen. Klostu nau, haptaim bilong las de bai pinis, olsem na yumi olgeta i mas tingting strong long i stap olsem wanpela lain sipsip aninit long Krais.