STORI bilong Baibel long Stat 22:6 i tok, Abraham i laik i go long wanpela longwe hap na givim ofa, olsem na em i “givim paiawut bilong ofa long Aisak, na [Aisak] i karim. Na Abraham i karim paia wantaim naip. Na tupela i wokabaut i go.”

Baibel i no stori long hau ol man long bipo i save statim paia. Wanpela saveman i tok, “i hatwok long paia i lait yet inap longpela taim long rot” em Abraham na Aisak i wokabaut long en. Olsem na taim Baibel i kolim “paia,” ating dispela i makim ol samting bilong yusim long statim paia.

Ol narapela saveman i tok, long dispela taim bipo, i hatwok long mekim paia i lait inap longpela taim. Sapos ol man i laik mekim paia, ol bai i go long ol lain i stap klostu na kisim hap paiawut i gat paia long en. Planti saveman i tok Abraham i karim sospen graun i gat handel ol i wokim long sen. Sospen i gat ol sakol ol i kisim long paia bilong nait—paia i lait yet long ol dispela sakol. (Ais. 30:14) Taim man i laik i go long narapela hap na em i karim paia long kain rot olsem, em inap yusim ol liklik paiawut long kirapim paia.