1. Taim Jehova i wokim yumi, em i inapim yumi wantaim wanem ol presen?

JEHOVA i wokim yumi na em i inapim yumi wantaim planti gutpela presen. Yumi inap tingting gut na stretim ol hevi, na plenim ol samting yumi laik mekim. (Snd. 2:11) Yumi inap mekim ol samting yumi bin plen long mekim, na putim mak long mekim ol gutpela wok. (Fili. 2:13) Na tu, em i givim yumi maus bilong bel—yumi inap skelim wanem samting i stret na wanem samting i no stret. Dispela inap helpim yumi long abrusim ol pasin nogut na stretim ol pasin kranki bilong yumi.—Rom 2:15.

2. Jehova i laik bai yumi mekim wanem long ol presen em i bin givim long yumi?

² Jehova i laik bai yumi mekim gutpela wok long ol presen em i bin givim long yumi. Em i laikim yumi, na em i save olsem yumi bai belgut sapos yumi yusim gut ol dispela presen. Long rot bilong Baibel, oltaim Jehova i tokim yumi long yusim ol dispela presen long mekim ol gutpela wok. Long Ol Skripsa Hibru, Baibel i tok: “Ol man bilong wok ol i save tingting gut na mekim wok, olsem na wok bilong ol i kamap  gutpela na ol i gat planti samting.” Na em i tok moa olsem: “Sapos yu mekim wanpela wok, orait taitim bun na mekim save tru.” (Snd. 21:5; Sav. 9:10) Long Ol Skripsa Grik, Baibel i tok: “Taim rot i op yet, yumi mas mekim gutpela pasin long olgeta man”; na “yupela olgeta wan wan i bin kisim presen, olsem na yupela i mas yusim ol dispela presen bilong helpim ol arapela.” (Gal. 6:10; 1 Pita 4:10) Yumi inap luksave olsem Jehova i laik bai yumi mekim ol wok bilong helpim yumi yet na ol narapela.

3. Ol manmeri i no inap long mekim wanem?

³ Jehova i save olsem i gat sampela samting em ol manmeri i no inap long mekim. Yumi yet i no inap pinisim sin na dai, na tu, yumi no inap kontrolim ol narapela manmeri bikos yumi olgeta i stap fri long bihainim laik bilong yumi yet. (1 Kin. 8:46) Maski yumi gat bikpela save o yumi gat planti ekspiriens long mekim wanpela wok, oltaim yumi bai stap olsem ol pikinini long ai bilong Jehova.—Ais. 55:9.

4. Yumi bai skelim wanem samting long dispela stadi?

⁴ Yumi mas askim Jehova long stiaim yumi, na bilip olsem em inap strongim yumi long mekim ol gutpela wok, na em inap mekim ol samting yumi yet i no inap long mekim. Yumi mas mekim ol samting yumi inap long mekim—yumi ken stretim ol hevi na helpim ol narapela. (Ritim Song 37:3. *) Yumi “mas bilip tru long Jehova na mekim gutpela pasin,” na yumi “mas holimpas bilip.” Yumi ken skelim skul yumi inap kisim long stori bilong Noa, Devit, na ol narapela bilipman na bilipmeri em ol i askim Jehova long stiaim ol na ol i mekim ol samting i stret long ol i mekim. Ol i luksave long ol samting ol i no inap long mekim na ol samting ol inap long mekim.

5. Wanem ol samting i kamap long taim bilong Noa?

⁵ Noa i stap long taim we ol manmeri i “pait na bikhet” na mekim pasin pamuk. (Stt. 6:4, 9-13) Em i save olsem Jehova bai pinisim ol manmeri nogut. Maski i olsem, ating Noa i bel hevi long pasin nogut bilong ol manmeri. Noa i luksave olsem i gat sampela samting em i no inap long mekim, tasol i gat sampela samting em inap long mekim.

6, 7. (a) Noa i no inap long mekim wanem ol samting? (b) Olsem wanem ol samting Noa i no inap long mekim i wankain long ol samting yumi no inap long mekim?

⁶ Ol samting Noa i no inap long mekim: Noa i givim  bel tru long autim tok lukaut bilong Jehova long ol manmeri, tasol em i no inap fosim ol long bihainim tok bilong em, na tu, em i no inap mekim Bikpela Tait i kamap hariap. Noa i bilip olsem Jehova bai inapim tok promis bilong Em long taim stret na em bai pinisim pasin nogut.—Stt. 6:17.

⁷ Yumi stap long taim we pasin nogut i pulap tru long dispela graun, na yumi save olsem Jehova i tok promis pinis long bagarapim ol manmeri nogut. (1 Jon 2:17) Tasol yumi no inap fosim ol manmeri long harim “gutnius bilong Kingdom.” Na tu, yumi no inap mekim “traipela hevi tru” i kamap hariap. (Mat. 24:14, 21) Wankain olsem Noa, yumi mas i gat strongpela bilip olsem klostu nau God bai pinisim ol manmeri i mekim pasin nogut. (Sng. 37:10, 11) Yumi bilip tru olsem Jehova i no inap larim pasin nogut bilong dispela graun i stap longpela taim moa na abrusim taim em i makim pinis long pinisim ol pasin nogut.—Hab. 2:3.

8. Olsem wanem Noa i soim olsem em i tingting tasol long ol samting em inap long mekim? (Lukim piksa long kirap bilong stadi.)

⁸ Ol samting Noa inap long mekim: Noa i no tingting long ol samting em i no inap long mekim na em i givap, nogat, em i putim tingting i go long ol samting em inap long mekim. “Noa em man bilong tokaut long stretpela pasin,” olsem na em i givim bel tru long autim tok lukaut em God i tokim em long autim. (2 Pita 2:5) Taim Noa i mekim dispela wok, dispela i helpim em long holim yet strongpela bilip. Na tu, Noa i yusim strong na save bilong em long inapim asainmen God i givim long em long wokim sip.—Ritim Hibru 11:7.

9. Olsem wanem yumi inap bihainim eksampel bilong Noa?

⁹ Wankain olsem Noa, yumi wok strong long “mekim planti wok bilong Bikpela.” (1 Kor. 15:58) Kain olsem, wok konstraksen na meintenens bilong stretim ol ples bilong mekim lotu, volantia long helpim wok long ples kibung, o mekim wok long brens ofis o Rimot Trenslesen Ofis. Moa yet, yumi bisi long autim tok, na yumi save olsem dispela wok i strongim bilip bilong yumi long ol blesing yumi bai kisim long bihain. Wanpela sista i tok: “Taim yu toktok wantaim ol manmeri long ol blesing em Kingdom Bilong God bai kamapim, yu luksave olsem ol i no gat hop na ol i ting olsem hevi bilong ol bai stap oltaim.” Tru tumas, taim yumi autim tok, dispela i strongim yumi long holim stretpela tingting long ol samting bai kamap  long bihain, na yumi no givap long resis bilong kisim laip.—1 Kor. 9:24.

10. Devit i mekim wanem ol rong?

¹⁰ Jehova i tok King Devit “i save mekim ol samting i stret wantaim ol tingting i stap long bel bilong [God].” (Apo. 13:22) Long laip olgeta bilong Devit, em i holimpas bilip. Maski i olsem, em i bin mekim bikpela sin—em i mekim pasin adaltri wantaim Batseba. Tasol em i mekim narapela rong we i bikpela moa. Em i laik haitim rong em i mekim wantaim Batseba na em i stretim rot long ol birua long ples pait i ken kilim i dai Uria, em man bilong Batseba. Devit i raitim plen bilong em long wanpela pas na em i givim pas long Uria long kisim i go bek long ples bilong pait! (2 Sml. 11:1-21) Bihain, sin bilong Devit i kamap ples klia. (Mak 4:22) Devit i mekim wanem taim sin bilong em i kamap ples klia?

11, 12. (a) Taim Devit i mekim sin pinis, em i no inap mekim wanem? (b) Sapos yumi mekim bikpela rong na yumi tanim bel, yumi ken bilip olsem Jehova bai mekim wanem?

¹¹ Ol samting Devit i no inap long mekim: Devit i no inap senisim ol rong em i bin mekim. Na tu, em i no inap abrusim ol hevi bai kamap long pasin nogut em i bin mekim. Sampela bilong ol dispela hevi bai stap wantaim Devit long laip olgeta bilong em. (2 Sml. 12:10-12, 14) Olsem na Devit i mas bilip tru long God. Em i mas bilip olsem sapos em i tanim bel tru, Jehova bai fogivim em na helpim em long karim hevi bilong ol rong em i bin mekim.

¹² Yumi olgeta i gat sin, olsem na yumi save mekim rong. Sampela rong i bikpela moa winim ol narapela rong. Yumi no inap senisim sampela rong yumi bin mekim. Long laip olgeta bilong yumi, ating yumi bai karim hevi bilong rong yumi mekim. (Gal. 6:7) Tasol yumi bilipim tok bilong God long Baibel—sapos yumi tanim bel, Jehova bai sambai long yumi long taim bilong hevi maski yumi yet i kamapim ol dispela hevi.—Ritim Aisaia 1:18, 19; Aposel 3:19.

13. Olsem wanem Devit i kamap strong gen long bilip?

¹³ Ol samting Devit inap long mekim: Devit i larim Jehova i helpim em long kamap strong gen long bilip. Em i mekim olsem taim em i larim Jehova i stretim em long rot bilong profet Natan. (2 Sml. 12:13) Na tu, Devit i beten long Jehova na tokaut long ol sin bilong em, na em i tokaut tu olsem em i laik bai Jehova i orait long em. (Sng. 51:1-17) Devit i bel hevi tru long ol rong em i bin mekim. Tasol em i no larim bel hevi i daunim em olgeta, nogat. Em i luksave long ol hevi i kamap long ol rong em i mekim, olsem na em i no mekim gen ol dispela rong. Devit i stap laip inap planti yia moa na bihain em i dai, na Jehova i tingim pasin bilong Devit long i stap gut long em.—Hib. 11:32-34.

14. Yumi inap kisim wanem skul long eksampel bilong Devit?

¹⁴ Yumi inap kisim wanem skul long eksampel bilong Devit? Sapos yumi mekim bikpela rong, yumi mas tanim bel tru na askim Jehova long fogivim yumi. Yumi mas beten long God na autim ol sin bilong yumi. (1 Jon 1:9) Na tu, yumi mas i go lukim ol elda bambai ol inap helpim yumi long kamap strong gen long bilip. (Ritim Jems 5:14-16.) Sapos yumi kisim helpim long ol rot Jehova i makim, yumi soim olsem yumi bilipim tok promis bilong em long oraitim na fogivim yumi. Yumi mas luksave long ol hevi i kamap long ol rong yumi bin mekim, na wok strong moa long mekim wok bilong Jehova, na bilip tru olsem yumi bai kisim blesing long bihain.—Hib. 12:12, 13.

15. Yumi kisim wanem skul long eksampel bilong Hana?

¹⁵ Ating yu inap tingim sampela gutpela wokman na wokmeri bilong Jehova long bipo, em ol i bilip long em na ol i mekim ol samting i stret long ol i mekim. Kain olsem: Hana i no inap karim pikinini, na em i no inap winim dispela hevi long  strong bilong em yet. Tasol em i bilip olsem Jehova bai mekim gut bel bilong em, olsem na oltaim em i go long tempel na beten na kamapim bel hevi bilong em. (1 Sml. 1:9-11) Hana i stap gutpela eksampel long yumi. Sapos yumi karim hevi long sait bilong helt o yumi kisim narapela hevi we i winim strong bilong yumi, orait yumi mas putim hevi bilong yumi long han bilong Jehova, na bilip olsem em bai lukautim yumi. (1 Pita 5:6, 7) Yumi ken mekim ol samting yumi inap long mekim; yumi mas i go long ol miting bilong kongrigesen na kisim helpim long ol narapela samting em God i redim bilong helpim yumi.—Hib. 10:24, 25.

16. Ol papamama inap kisim wanem skul long pasin bilong Samuel?

¹⁶ Olsem wanem long ol papamama Kristen em ol pikinini bilong ol i lusim tok i tru? Samuel i kamap lapun na ol pikinini man bilong em i kamap bikpela man, olsem na em i no inap fosim ol long bihainim ol stretpela lo em i skulim ol long en. (1 Sml. 8:1-3) Em i larim dispela samting long han bilong Jehova. Samuel i holimpas bilip na amamasim Jehova, Papa bilong em long heven. (Snd. 27:11) Long nau, planti papamama Kristen i karim wankain hevi olsem Samuel. Ol i bilip olsem Jehova i wankain olsem papa long tok piksa bilong pikinini i lusim papa, na Em i redi oltaim long welkamim ol sinman husat i tanim bel. (Luk 15:20) Long wankain taim, ol dispela papamama i wok strong long stap gut long Jehova, na ol i bilip olsem gutpela eksampel bilong ol bai kirapim ol pikinini long kam bek long kongrigesen.

17. Yumi inap kisim wanem skul long eksampel bilong wido meri?

¹⁷ Tingim tu wido meri long taim bilong Jisas. (Ritim Luk 21:1-4.) Pasin korapsen i pulap long tempel, na dispela wido i no gat strong long stopim dispela hevi. (Mat. 21:12, 13) Na tu, em i sot long mani, tasol em i no gat strong long stretim dispela hevi. Maski i olsem, em i givim “tupela liklik koin” olsem kontribiusen, na dispela em “olgeta samting em i holim.” Em i soim olsem em i bilip tru long Jehova, na em i save olsem sapos em i putim wok lotu i stap namba 1 samting, God bai lukautim em long ol samting em i nidim. Bilip bilong dispela wido i kirapim em long sapotim wok bilong lotu i tru. Olsem tasol, yumi bilip olsem sapos yumi putim Kingdom i stap namba 1 samting long laip bilong yumi, Jehova bai lukautim yumi long ol samting yumi nidim.—Mat. 6:33.

18. Olsem wanem wanpela wokman bilong God i soim olsem em i holim stretpela tingting?

¹⁸ Long nau tu, planti bratasista i bilip long Jehova na ol i mekim ol samting i stret long ol i mekim. Tingim wanpela brata, nem bilong em Malcolm. Em i stap gut long God i go inap long em i dai long 2015. Malcolm na meri bilong em i mekim wok bilong Jehova inap planti yia, na ol i kisim ol blesing, na tu, ol i karim ol hevi. Malcolm i tok: “Sampela taim ol hevi i kamap wantu tasol, na sampela taim mipela i bungim ol hevi mipela i no bin tingim, na dispela i save putim bikpela presa long mipela. Tasol Jehova i save blesim ol manmeri husat i bilip olsem em bai helpim ol.” Malcolm i tok: “Beten askim Jehova long helpim yu bambai yu inap givim bel tru long mekim gut wok bilong em. Tingting long ol samting yu inap long mekim, na no ken tingting long ol samting yu no inap long mekim.” *

19.(a) Bilong wanem na yiateks bilong 2017 i stret tru long yumi? (b) Olsem wanem yu bai bihainim stiatok i stap long yiateks bilong 2017?

¹⁹ Long dispela haptaim nogut bilong nau, ol pasin nogut bai “i go nogut moa,” olsem na planti bikpela hevi bai painim yumi. (2 Tim. 3:1, 13) Olsem na em i bikpela samting tru olsem yumi no ken larim ol dispela hevi i pasim yumi long mekim wok bilong God. Yumi mas bilip tru long Jehova na mekim ol samting i stret long yumi inap mekim. Olsem na yiateks bilong 2017 i stret tru long yumi: “Yu mas bilip tru long Jehova na mekim gutpela pasin”!—Sng. 37:3, NW.