1. (a) Devit i pilim olsem wanem long Jehova? (b) Dispela i kirapim em long mekim wanem?

KING DEVIT i tok: “Jehova em i nambawan tru na yumi mas litimapim nem bilong em.” (Sng. 145:3) Devit i laikim Jehova, olsem na em i litimapim nem bilong God “namel long ol lain manmeri i bung.” (Sng. 22:22; 40:5) Ating yu tu yu laikim Jehova na yu wanbel long dispela tok bilong Devit: “O Jehova, God bilong papa bilong mipela Israel, oltaim oltaim mipela i mas litimapim nem bilong yu.”—1 Sto. 29:10-13.

2. (a) Olsem wanem yumi inap litimapim nem bilong Jehova? (b) Sampela bratasista i gat wanem hevi? (c) Yumi bai skelim wanem ol samting?

² Wanpela rot bilong litimapim nem bilong Jehova em long bekim tok long ol miting. Tasol sampela bratasista i pret long bekim tok. Ol inap mekim wanem bilong daunim pret? Wanem ol samting inap helpim yumi olgeta long mekim ol bekim we inap strongim ol narapela? Paslain long yumi bekim ol dispela askim, yumi ken skelim 4-pela bikpela risen bilong bekim tok long miting.

3-5. (a) Hibru 13:15 i kolim wanem risen bilong bekim tok long miting? (b) Yu ting yumi olgeta i mas mekim wankain bekim? Stori long dispela.

³ Jehova i opim rot long yumi olgeta inap litimapim nem bilong em. (Sng. 119:108) Taim yumi bekim tok long miting, dispela i olsem “sakrifais” yumi olgeta wan wan i mas givim long God. (Ritim Hibru 13:15.) Yu ting Jehova  i laik bai yumi olgeta i givim wankain sakrifais o bekim wankain tok? Nogat, i no olsem!

⁴ Jehova i save olsem skel bilong save na sindaun bilong yumi i no wankain, olsem na em i pilim tru ol ofa yumi inap givim long em. Tingim ol sakrifais em i amamas long kisim long lain Israel. Sampela i givim sipsip na sampela i givim meme. Tasol man i stap rabis inap givim “2-pela wel pisin balus o 2-pela yangpela pisin balus.” Sapos wanpela man i no gat ol dispela pisin, orait Jehova i amamas long kisim “10 pesen bilong 1-pela ifa bilong gutpela plaua.” (Wkp. 5:7, 11) Plaua i gat liklik pe, tasol Jehova i amamas sapos man i givim “gutpela plaua.”

⁵ God i holim wankain tingting long nau tu. Taim yumi bekim tok, i no olsem toktok bilong yumi i mas nambawan tru olsem bilong Apolos. Na tu, yumi no ken pilim olsem toktok bilong yumi i mas i gat strong long kirapim man, olsem toktok bilong Pol. (Apo. 18:24; 26:28) Jehova i laik bai yumi givim bel tru na bekim tok inap long skel bilong yumi. Tingim wido husat i givim 2-pela liklik koin olsem ofa. Jehova i amamas tru long em bikos em i givim olgeta samting em i holim.—Luk 21:1-4.

6. (a) Olsem Hibru 10:24, 25 i tok, yumi inap pilim olsem wanem taim yumi harim bekim bilong ol narapela? (b) Olsem wanem yu inap soim olsem yu pilim tru bekim bilong ol narapela?

⁶ Yumi strongim narapela narapela taim yumi bekim tok. (Ritim Hibru 10:24, 25.) Yumi olgeta i amamas long harim narapela narapela i bekim tok. Yumi amamas taim liklik pikinini i pilim tok long bel na mekim sotpela bekim. Taim wanpela i amamas wantaim na stori long nupela skul em i kisim, dispela i save strongim yumi. Na tu, yumi amamas long ol lain i “strongim bel” na bekim tok, maski ol i sem o lain yet long tokples bilong yumi. (1 Tes. 2:2) Olsem wanem yumi inap soim olsem yumi pilim tru hatwok bilong ol? Bihain long miting, yumi inap tok tenkyu long ol long naispela bekim bilong ol. Narapela rot bilong tok tenkyu em long taim yumi yet i bekim tok. Yumi no kisim tasol tok bilong strongim yumi, nogat, yumi tu i mekim tok bilong strongim ol narapela.—Rom 1:11, 12.

7. Olsem wanem pasin bilong bekim tok i helpim yumi?

 ⁷ Yumi helpim yumi yet taim yumi bekim tok. (Ais. 48:17) Namba 1: Sapos yumi laik bekim tok, dispela bai kirapim yumi long redim gut miting. Taim yumi redi gut, yumi bai kliagut moa long Tok Bilong God, na yumi bai bihainim gut skul yumi kisim. Namba 2: Taim yumi bekim tok, dispela bai givim amamas long yumi. Namba 3: Yumi lusim sampela haptaim long redim na bekim tok, olsem na maski miting i pinis, yumi inap tingim yet ol tok yumi kolim long bekim bilong yumi.

8-9. (a) Olsem Malakai 3:16 i kamapim, yu ting Jehova i save pilim olsem wanem taim yumi bekim tok? (b) Ating sampela i pret yet long mekim wanem?

⁸ Yumi amamasim Jehova taim yumi autim bilip. Yumi ken bilip tru olsem Jehova i save putim yau na pilim tru hatwok bilong yumi long bekim tok long miting. (Ritim Malakai 3:16.) Olsem na em i save blesim hatwok bilong yumi.—Mal. 3:10.

⁹ I gat ol gutpela risen long bekim tok. Tasol sampela i pret yet long apim han. Sapos yu pilim olsem, orait no ken bel hevi. Yumi bai skelim sampela stiatok bilong Baibel, na eksampel bilong sampela bilipman, na sampela samting we inap helpim yumi olgeta long insait moa long bekim tok.

10. (a) Planti bilong yumi i pret long mekim wanem? (b) Sapos yumi pret long bekim tok, bilong wanem dispela kain pret em gutpela?

¹⁰ Olsem wanem? Yu save bel sut taim yu laik apim han na bekim tok? Ol narapela tu i save pilim olsem. Planti bilong yumi i save pret taim yumi bekim tok. Sapos olsem, i gutpela long luksave long samting i mekim yu pret. Ating yu pret olsem yu bai lusim tingting long ol tok yu laik bekim o yu bai kolim rong bekim. O ating yu wari olsem bekim bilong yu bai i no gutpela olsem bekim bilong ol narapela. Dispela kain pret em gutpela bikos em i makim olsem yu gat pasin daun na  yu holim tingting olsem ol narapela i winim yu. Jehova i laikim man i gat pasin daun. (Sng. 138:6; Fili. 2:3) Tasol Jehova i laik bai yu litimapim nem bilong em na strongim ol bratasista long taim bilong miting. (1 Tes. 5:11) Em i laikim yu na em bai strongim yu.

11. Wanem ol stiatok bilong Baibel inap helpim yumi?

¹¹ Skelim sampela stiatok bilong Baibel. Yumi olgeta i save popaia long ol tok yumi mekim na wei bilong yumi long tromoi tok. (Jems 3:2) Jehova na ol bratasista i save olsem sampela taim yumi bai popaia. (Sng. 103:12-14) Ol bratasista i stap olsem famili bilong yumi na ol i laikim yumi. (Mak 10:29, 30; Jon 13:35) Ol i save olsem sampela taim yumi popaia na kolim ol tok yumi no minim long kolim.

12-13. Yumi kisim wanem skul long stori bilong Nehemia na Jona?

¹² Tingim sampela eksampel long Baibel we inap helpim yu long daunim pasin bilong pret. Wanpela em Nehemia. Em i stap wokman bilong wanpela strongpela king. Nehemia i bel hevi bikos em i harim olsem ol banis na ol geit bilong Jerusalem i bagarap i stap. (Neh. 1:1-4) Taim king i askim Nehemia long wai na em i no luk amamas, ating Nehemia i pret nogut tru na tingting planti! Kwiktaim em i beten na bekim tok bilong king. King i harim stori bilong Nehemia na em i mekim planti samting bilong helpim ol manmeri bilong God. (Neh. 2:1-8) Tingim tu Jona. Taim Jehova i askim em long i go tokaut long kot bai painim lain Ninive, Jona i pret nogut tru, olsem na em i ranawe i go long narapela ples. (Jna. 1:1-3) Tasol Jehova i helpim Jona long inapim asainmen bilong em. Jona i autim tok long lain Ninive na dispela i kirapim ol long lusim ol pasin nogut. (Jna. 3:5-10) Stori bilong Nehemia i skulim yumi olsem em i bikpela samting long beten paslain long yumi bekim tok. Stori bilong Jona i skulim yumi olsem Jehova inap helpim yumi long mekim wok bilong em maski sampela samting i mekim yumi pret. Jona i pret long lain Ninive bikos ol i bihainim kain kain pasin nogut, tasol yumi no gat wok long pret long ol bratasista long kongrigesen.

¹³ Yu ken mekim wanem ol samting na bai yu inap mekim ol gutpela bekim long miting? Yumi ken stori long sampela rot bilong mekim olsem.

14. (a) Bilong wanem yu mas redim gut ol miting? (b) Yumi ken redim miting long wanem taim?

¹⁴ Redim miting. Taim yu plenim na redim gut ol miting, yu bai amamas moa long bekim tok. (Prov. 21:5) Yumi olgeta i gat narapela narapela sediul bilong redim miting. Eloise, wanpela wido sista husat i winim pinis 80 krismas, em i save redim Stadi Wastaua taim wik i kirap. Em i  tok: “Mi save amamas moa long i go long ol miting sapos mi stadi gut paslain tru long taim bilong miting.” Joy i mekim wok mani fultaim, na em i save lusim sampela haptaim long Sarere long redim Wastaua. Em i tok: “Mi laik bai olgeta tok i stap klia yet long tingting bilong mi.” Ike em elda na em i mekim wok painia, na em i tok: “Mi skelim olsem i gutpela moa long stadi sotpela sotpela haptaim insait long wik, na i no stadi planti aua long wanpela taim tasol.”

15. Yu ken mekim wanem na bai yu inap redim gut miting?

¹⁵ Yu ken mekim wanem na bai yu inap redim gut miting? Paslain long yu redim miting, beten askim Jehova long givim yu holi spirit. (Luk 11:13; 1 Jon 5:14) Lusim sampela minit long skelim het tok, ol liklik het tok, ol piksa, na ol blok. Taim yu stadim ol paragraf, traim long ritim olgeta skripsa. Ritim ol tok na tingim tingim, na skelim gut moa ol poin yu laik kolim long bekim bilong yu. Sapos yu redi gut, dispela bai helpim yu tru na yu bai i no pret long bekim tok.—2 Kor. 9:6.

16. (a) Yu inap yusim wanem ol tul? (b) Olsem wanem yu save yusim ol dispela tul?

¹⁶ Yusim ol elektronik tul i stap long tokples yu save long en. Jehova i yusim oganaisesen bilong em long givim ol elektronik tul bilong helpim yumi long redim miting. Yumi inap yusim JW Library^® app long daunlodim ol stadi pablikesen long mobail fon o teblet. Olsem na long olgeta kain taim na long olgeta kain ples, yumi inap ritim pablikesen o harim odio rekoding bilong en. Sampela i yusim JW Library app taim ol i malolo long belo taim long ples wok o long skul, o long taim ol i raun. Watchtower Library na Wastaua INTENET LAIBRERI^™ i helpim yumi long mekim sampela moa wok painimaut long ol poin i stap long Wastaua stadi.

17. (a) Bilong wanem i gutpela long redim 2-pela o 3-pela bekim? (b) Yu kisim wanem skul long vidio Kamap Pren Bilong Jehova—Redim Ol Miting?

¹⁷ Redim 2-pela o 3-pela bekim long olgeta stadi. Bilong wanem? Sampela taim, kondakta i no inap makim yu long bekim tok. Ating ol narapela bai apim han long seim taim, na kondakta inap makim wanpela bilong ol. Na tu, kondakta bai makim sampela tasol long bekim tok na bai miting inap pinis long taim stret. Olsem na yu no ken kros o bel hevi sapos em i no makim yu. Sapos yu redim 2-pela o 3-pela bekim, yu bai i gat planti sans moa long bekim tok. Yu ken redi tu long ritim skripsa. O yu ken bekim tok long toktok bilong yu yet. *

18. Bilong wanem yumi mas mekim ol sotpela bekim?

 ¹⁸ Mekim ol sotpela bekim. Yu inap strongim tru ol narapela taim yu mekim sotpela bekim. Olsem na putim mak long mekim olsem. Traim long bekim tok insait long 30 seken. (Prov. 10:19; 15:23) Sapos yu bekim tok long ol miting inap planti yia pinis, em i bikpela samting long mekim ol sotpela bekim na bai ol narapela inap bihainim eksampel bilong yu. Sapos yu bekim tok na stori long planti samting insait long sampela minit, ol narapela bai pret na pilim olsem ol i no inap bekim gut tok olsem yu save mekim. Sapos yu mekim sotpela bekim, bai i gat taim long planti moa inap bekim tok. Taim kondakta i makim yu paslain long ol narapela, mekim sotpela bekim na kolim stret poin. No ken kolim olgeta poin i stap long paragraf. Taim wanpela i stori pinis long bikpela poin bilong paragraf, orait yu ken stori long ol sait poin.—Lukim blok “ Hau Bai Mi Bekim Tok?”

19. (a) Hau bai kondakta inap helpim yu? (b) Yu yet i mas mekim wanem?

¹⁹ Tokim kondakta long paragraf yu laik bekim tok long en. Yu mas tokim em paslain long miting i kirap. Taim kondakta i givim askim long dispela paragraf, putim han i go antap kwiktaim na bai em inap lukim yu.

20. Bilong wanem ol miting i olsem bung bilong kaikai yumi mekim wantaim ol pren?

²⁰ Taim yu kam long miting bilong kongrigesen, i olsem yu bung long kisim kaikai wantaim ol gutpela pren. Sapos sampela pren long kongrigesen i laik mekim babakiu na ol i askim yu long redim sampela kaikai, yu bai mekim wanem? Ating yu bai tingting planti, tasol yu bai traim bes long redim kaikai em olgeta bai amamas long en. Jehova i invaitim yumi long i go long ol miting, na em i redim planti gutpela kaikai yumi inap kisim. (Sng. 23:5; Mat. 24:45) Em i save amamas tru taim yumi redim gut wanpela liklik presen na bringim i go. Olsem na redi gut na sapos yu inap, bekim tok planti taim. Long dispela rot, yu bai kisim kaikai long tebol bilong Jehova, na tu, yu bringim presen bilong serim wantaim kongrigesen.