1. Wai na planti man long nau i no bilip long Baibel?

 PLANTI manmeri long nau ol i no trastim wanpela man. Ol i no save long husat ol bai trastim. Ol i tingting planti olsem ol lain em ol i save rispektim, kain olsem lain politik, ol saientis, na ol bisnisman, ol i no tingim ol. Na tu, ol i no rispektim ol pris pasto bilong lotu Kristendom. So yumi no kirap nogut olsem ol i no bilip long Baibel, em buk ol dispela pris pasto i tok ol i bihainim.   

2. Olsem Buk Song 119:160 i kamapim, yumi mas bilip tru long wanem samting?

² Yumi olgeta wokman bilong Jehova, yumi bilip tru olsem em i “God bilong mekim pasin tru tasol” na oltaim em i laik bai gutpela samting i painim yumi. (Sng. 31:5; Ais. 48:17) Yumi save olsem yumi ken trastim ol tok yumi ritim long Baibel na yumi bilip olsem “as bilong tok bilong [God] em i tru tasol.” (Ritim Buk Song 119:160.) Yumi wanbel long tok em wanpela saveman bilong Baibel i raitim, em i tok: “I no gat wanpela tok em God i mekim em i tok giaman o i no inap kamap tru, nogat. Ol manmeri bilong God i ken trastim ol tok em i mekim bikos ol i trastim God husat i mekim ol dispela tok.”

3. Yumi bai stori long wanem samting long dispela atikol?

³ Hau yumi ken helpim ol narapela long holim wankain bilip olsem yumi gat long Tok Bilong God? Yumi ken stori long 3-pela risen na yumi ken trastim Baibel. Yumi bai stori long olsem wanem ol tok bilong Baibel i stret, hau ol tok profet bilong en i save kamap tru, na olsem wanem Baibel i gat strong long senisim laip bilong ol man.

4. Wai na sampela man i gat tupela tingting olsem ol tok bilong Baibel i no stret?

⁴ God Jehova i yusim olsem 40 man long raitim ol buk bilong Baibel. Maski i olsem, i no gat wanpela bilong ol olpela manuskrip i stap yet inap long taim bilong yumi. b Ol tok yumi gat long nau em ol kopi ol i wokim long ol kopi. Dispela i mekim na sampela man i gat tupela tingting olsem ol tok yumi ritim long Baibel long nau ol i kamapim stret ol tok olsem ol dispela man i bin raitim long bipo, o nogat. Olsem wanem yumi ken save ol tok bilong Baibel i gat ol wankain tok olsem ol rait bilong bipo?

5. Hau ol i wokim ol kopi bilong Ol Skripsa Hibru? (Lukim fran pes piksa.)

⁵ Bilong lukautim tok bilong em, Jehova i tokim lain bilong em long wokim ol kopi bilong en. Em i tokim ol king bilong Israel long raitim ol kopi bilong Lo, na em i makim ol Livai long skulim ol manmeri long dispela Lo. (Lo 17:18; 31:24-26; Neh. 8:7) Bihain long ol Juda i lusim kalabus long Babilon, wanpela grup bilong ol sekreteri em ol i gat save long wokim ol kopi bilong ol rait ol i kirap long mekim planti kopi bilong Ol Skripsa Hibru. (Esr. 7:6) Ol dispela sekreteri i lukaut gut na mekim gut dispela wok. Ol i kaunim olgeta wan wan tok, na ol i kaunim tu ol leta na bai ol i ken save olsem ol i raitim stret olgeta tok. Maski i olsem, ol i no gutpela olgeta olsem na sampela bilong ol dispela kopi i gat ol liklik popaia long en. Tasol ol i bin mekim planti kopi bilong ol dispela tok, olsem na bihain ol inap luksave long ol popaia ol i bin mekim. Hau ol inap luksave long dispela?

6. Hau ol inap luksave long ol popaia ol i mekim long ol kopi bilong Baibel?

⁶ Ol saveman long nau i gat gutpela wei long luksave long ol popaia em ol lain husat i bin mekim ol kopi bilong ol tok bilong Baibel i bin mekim. Yumi ken tok piksa olsem: Tingim olsem ol i askim 100 man long wokim kopi bilong ol tok i stap long wanpela pes na ol i mas rait long han. Wanpela bilong ol dispela man inap mekim liklik popaia long kopi em i raitim. Wanpela rot yumi ken luksave long popaia bilong em, em long rot bilong skelim kopi bilong em wantaim ol kopi ol narapela i bin raitim. Olsem tasol, taim ol saveman i skelim planti Baibel manuskrip, ol inap luksave long ol popaia o ol tok em ating wanpela sekreteri i bin rausim.

7. Olsem wanem planti sekreteri bilong Baibel i lukaut gut na raitim ol kopi?

⁷ Ol man em ol i bin wokim ol kopi bilong Baibel manuskrip, ol i bin wok strong na bai ol inap raitim stret ol tok. Skelim wanpela eksampel i kamapim klia dispela. Ol i bin raitim olpela manuskrip bilong Ol Skripsa Hibru olgeta long 1008 o 1009 C.E. Ol i kolim olsem Leningrad Codex. Tasol long nau, ol i bin painim planti manuskrip bilong Baibel na ol hap bilong ol manuskrip em ol i olpela olsem 1,000 yia moa long Leningrad Codex. Wanpela inap ting olsem, bihain long ol i wokim ol kopi na ol narapela kopi gen bilong dispela manuskrip long winim 1,000 yia, ating ol tok i stap long Leningrad Codex bai i no wankain olgeta long ol tok i stap long ol olpela manuskrip. Tasol dispela em i no tru. Ol saveman em ol i bin skelim ol manuskrip bilong bipo na ol manuskrip em ol i bin raitim bihain long en, ol i luksave olsem maski i gat sampela liklik senis long ol tok, astok bilong Baibel i stap stret na i stap wankain yet.

8. Olsem wanem ol kopi bilong Ol Skripsa Grik i no wankain long ol narapela buk bilong bipo?

⁸ Ol Kristen long taim bilong ol aposel i bihainim pasin bilong ol sekreteri bilong Ol Skripsa Hibru. Ol i wokim gut kopi bilong 27 buk bilong Ol Skripsa Grik, em ol i bin yusim long ol miting na long wok autim tok bilong ol. Wanpela  saveman husat i bin skelim ol manuskrip bilong Ol Skripsa Grik wantaim ol narapela buk em ol i bin raitim long wankain taim, em i tok: “Planti kopi bilong Ol Skripsa Grik i stap long nau winim ol narapela buk, . . . na olgeta tok bilong ol i stap stret.” Buk Anatomy of the New Testament, i tok: “Yumi ken bilip olsem ol tok yumi ritim long wanpela gutpela trenslesen long nau [bilong Ol Skripsa Grik] i kamapim ol wankain tok olsem ol man bilong bipo i bin raitim.”

9. Olsem Aisaia 40:8 i kamapim, wanem samting i tru long tok bilong Baibel?

⁹ Long planti handret yia i go pinis, planti man bilong wokim ol kopi bilong Baibel i givim bel tru long raitim stret ol tok bilong Baibel em yumi ritim na stadi long en long nau. c Tru tumas, Jehova yet i bin mekim ol samting na bai ol man i ken lukautim gut tok bilong em. (Ritim Aisaia 40:8.) Sampela inap tok olsem, maski ol tok bilong Baibel i stap gut na i no bagarap dispela i no makim olsem God em i As bilong ol tok bilong en. Orait nau yumi ken skelim sampela evidens i soim olsem God em i As bilong ol tok bilong Baibel.

10. Stori long wanpela tok profet i bin kamap tru na dispela i soim olsem tok bilong 2 Pita 1:21 em i tru. (Lukim ol piksa.)

¹⁰ Baibel i gat planti tok profet we i bin kamap tru, sampela bilong ol dispela tok profet em ol i bin raitim planti handret yia paslain long ol i bin kamap tru. Histori i kamapim klia olsem ol dispela tok profet i bin kamap tru. Yumi no kirap nogut long dispela bikos yumi save olsem Jehova yet em i As bilong ol tok profet bilong Baibel. (Ritim 2 Pita 1:21.) Tingim ol tok profet i stori long bagarap bilong biktaun Babilon bilong bipo. Namel long yia 778 na 732 B.C.E., God i bin kirapim profet Aisaia long mekim tok profet olsem ol birua bai daunim dispela strongpela biktaun bilong Babilon. Na tu, Em i kolim nem bilong man husat bai bagarapim dispela biktaun, em Sairus, na em i tok profet tu long hau ol birua bai mekim olsem. (Ais. 44:27–45:2) Na tu, Aisaia i tok profet olsem Babilon bai bagarap na i no gat man bai stap moa long dispela ples. (Ais. 13:19, 20) Dispela samting i bin kamap  tru. Lain Midia na Pesia i daunim Babilon long 539 B.C.E., na hap em bipo dispela biktaun i bin stap long en, nau ol hip pipia ston tasol i stap.​—Lukim vidio Baibel i Tok Profet Long Babilon Bai Bagarap long elektronik edisen bilong buk Stap Amamas Oltaim!, lesen 03 poin 5.

11. Stori long olsem wanem tok profet bilong Daniel 2:41-43 i kamap tru long nau.

¹¹ Ol tok profet bilong Baibel i bin kamap tru long bipo, na tu, yumi wok long lukim truim bilong ol long nau. Olsem, skelim narakain truim bilong tok profet bilong Daniel we i stori long strongpela Gavman Inglan-Amerika. (Ritim Daniel 2:41-43.) Dispela tok profet i kolim stret olsem dispela tupela gavman em ol i wok bung wantaim bai i gat “strong long wanpela samting” olsem ain na “long narapela samting, em bai malumalum” olsem graun. Na long nau, yumi ken lukim olsem dispela tok em i tru. Gavman Briten na Amerika i soim olsem ol i gat bikpela strong olsem ain taim ol i go pas long mekim ol samting bilong winim Wol Woa 1 na Wol Woa 2, na ami bilong ol i wok long kamap strong moa. Maski i olsem, ol manmeri bilong ol yet i wok long daunim strong bilong dispela tupela gavman, ol i mekim olsem long rot bilong ol leiba yunion, ol sivil raits kempein, na ol indipendens muvmen. Wanpela saveman bilong ol wok politik bilong graun, em i tok: “Amerika em wanpela strongpela demokratik kantri, tasol wok politik bilong en i bruk nabaut winim ol narapela kantri long nau.” Na long ol yia i go pinis, Briten em narapela hap bilong dispela strongpela gavman i bruk nabaut bikos ol i kamapim ol narapela narapela tingting na ol i no wanbel long wanem kantri long Yuropian Yunion ol i ken poromanim. Ol dispela samting i mekim na i hatwok tru long Gavman Inglan-Amerika i sanap strong long ol disisen em i wokim.

12. Tok profet bilong Baibel i strongim bilip bilong yumi long wanem samting?

¹² Planti tok profet bilong Baibel em ol i bin kamap tru i strongim bilip bilong yumi long ol tok promis bilong God long ol samting bai kamap bihain. Yumi pilim wankain olsem man bilong raitim song husat i bin beten long Jehova olsem: “Mi laikim tumas bai yu kisim bek mi, tok bilong yu i mekim mi i bilip na wetim gutpela samting i kamap bihain.” (Sng. 119:81) Long rot bilong ol tok i stap long Baibel, Jehova i promis olsem em bai givim “gutpela sindaun long [yumi] em [yumi] ken bilip na wet long en.” (Jer. 29:11) Ol gutpela samting yumi bilip na wet long en, ol i no inap kamap long strong bilong ol man, nogat. Ol bai kamap long rot bilong ol tok promis bilong Jehova. Yumi ken wok yet long strongim pasin bilong yumi long trastim Tok Bilong God long rot bilong stadi gut long ol tok profet bilong Baibel.

13. Olsem Buk Song 119:66, 138 i kamapim, wanem narapela evidens i soim olsem yumi ken trastim ol tok bilong Baibel?

¹³ Narapela evidens i soim olsem yumi ken trastim ol tok bilong Baibel em taim yumi luksave long gutpela samting i kamap taim ol manmeri i bihainim tok bilong en. (Ritim Buk Song 119:66, 138.) Olsem, ol marit em ol i bin gat hevi na klostu ol i bin divos, nau ol i stap amamas na stap wanbel. Ol pikinini bilong ol i amamas long kamap bikpela insait long famili Kristen we ol i pilim olsem ol i stap gut, na papamama i laikim ol.​—Efe. 5:22-29.

14. Stori long wanpela eksampel i soim olsem pasin bilong bihainim ol tok i tru bilong Baibel i save helpim man?

¹⁴ Pasin bilong bihainim tok bilong Baibel i bin helpim ol man nogut tu long senisim laip bilong ol. Skelim olsem wanem tok bilong Baibel i helpim wanpela kalabusman nem bilong em Jack. d Em wanpela man i save pait na bagarapim man, na em i gat nem olsem wanpela bilong  ol kriminal nogut tru i stap laip-yia long kalabus na ol i makim pinis taim bilong kilim em i dai. Wanpela taim Jack i sindaun long Baibel stadi bilong wanpela wankalabus. Jack i pilim tru gutpela pasin em ol brata i mekim long Baibel stadi, olsem na em tu i kirap long stadi. Taim em i wok long bihainim ol tok i tru bilong Baibel long laip bilong em, dispela i senisim tingting na ol pasin bilong em na i helpim em tru. I no longtaim, Jack i winim mak na em i kamap wanpela pablisa i no baptais, na em i kisim baptais. Em i givim bel tru long autim tok long ol wan kalabus bilong em long Kingdom Bilong God na em i helpim 4-pela bilong ol long kisim save long tok i tru. Taim de bilong kilim em i kamap, Jack i bin mekim bikpela senis long laip bilong em. Wanpela loya bilong em i tok: “Jack i no dispela wankain man mi bin bungim em 20 yia i go pinis. Ol samting ol Witnes Bilong Jehova i skulim ol man long en i senisim tru laip bilong em.” Maski ol i bin kilim i dai Jack, eksampel bilong em i soim klia olsem yumi ken trastim Tok Bilong God na em i gat strong long helpim man.​—Ais. 11:6-9.

15. Olsem wanem pasin bilong bihainim ol tok i tru bilong Baibel i mekim lain bilong Jehova i stap narapela kain long nau? (Lukim piksa.)

¹⁵ Lain bilong Jehova i stap wanbel bikos ol i save bihainim ol tok i tru bilong Baibel. (Jon 13:35; 1 Kor. 1:10) Ol man inap luksave olsem yumi stap bel isi na wanbel, long wanem, ol wok politik, skin kala, na sindaun bilong ol man long dispela graun i mekim na ol manmeri i no stap wanbel. Wanpela yangpela man nem bilong em Jean, em i pilim tru dispela pasin wanbel i stap namel long lain bilong Jehova. Em i kamap bikpela long wanpela kantri long Afrika. Taim pait i kamap insait long kantri, em i joinim ami, tasol bihain em i ranawe i go long narapela kantri i stap klostu. Long dispela hap em i bungim ol Witnes Bilong Jehova. Jean i tok: “Mi kisim save olsem ol man i bihainim lotu i tru ol i no save insait long wok politik na ol i no save bruk nabaut, nogat. Ol i save laikim narapela narapela.” Em i tok moa olsem: “Mi bin dediketim laip olgeta bilong mi long sapotim wanpela kantri. Tasol taim mi kisim save long ol tok i tru bilong Baibel, dispela i kirapim mi long dediketim  laip bilong mi long Jehova.” Jean i senisim tru pasin bilong em. Nau em i no pait moa long ol manmeri i gat narapela bekgraun, nogat. Em i save tokim ol man em i bungim ol long ol tok i tru bilong Baibel we i mekim ol man i stap wanbel. Ol tok i tru bilong Baibel i save helpim ol man bilong narapela narapela bekgraun na dispela em wanpela strongpela evidens i soim olsem yumi ken trastim Tok Bilong God.

16. Wai na em i bikpela samting long yumi mas strongim pasin bilong yumi long trastim Tok Bilong God?

¹⁶ Pasin bilong dispela graun i wok long i go nogut na nogut moa, na dispela bai traim pasin bilong yumi long bilip long tok i tru. Ol man inap traim long mekim yumi kisim tupela tingting long tok i tru bilong Baibel o kisim tupela tingting long gutpela wokboi i gat savetingting em Jehova i bin makim bilong stiaim lain bilong em long nau. Tasol sapos yumi bilip olsem oltaim Tok Bilong Jehova em i tru, orait yumi bai sanap strong na sakim ol kain traim we inap bagarapim bilip bilong yumi. Yumi bai “pasim tok long bihainim ol lo bilong [Jehova] long olgeta taim i go inap long [yumi] dai.” (Sng. 119:112) Yumi “no inap sem” long tokim ol narapela long tok i tru na kirapim ol long bihainim ol tok bilong Baibel long laip bilong ol. (Sng. 119:46) Na yumi bai sanap strong na karim ol bikpela hevi tru, olsem taim ol man i mekim nogut long yumi, na yumi bai “i no les kwik, na . . . mekim wantaim amamas.”​—Kol. 1:11; Sng. 119:143, 157.

17. Yiateks bilong yumi bai kirapim yumi long tingim wanem samting?

¹⁷ Yumi amamas tru olsem Jehova i bin kamapim klia tok i tru long yumi! Dispela tok i tru i helpim yumi long i stap gut, laip bilong yumi i gat as bilong en na em i stiaim yumi long dispela graun we ol manmeri i no save long wanem samting ol bai mekim na ol samting i go nogut moa. Em i helpim yumi long bilip na wet long gutpela sindaun aninit long wok bos bilong Kingdom Bilong God. Yiateks bilong 2023 i ken helpim yumi long sanap strong na bilip tru olsem olgeta Tok Bilong God—as bilong tok bilong em—em i tru tasol!​—Sng. 119:160.