1, 2. Bilong wanem i gutpela long yumi mas save long rot bilong mekim gut bel bilong ol man i bel hevi? (Lukim piksa long kirap bilong stadi.)

SUSI em wanpela sista, na em i tok: “Pikinini man bilong mipela i dai klostu wanpela yia i go pinis, na mipela i bel hevi tru.” Wanpela brata i tok, taim meri bilong em i dai, em i bel hevi tru. Planti manmeri i karim wankain hevi. Ating planti bratasista long kongrigesen i no bin ting ol lain ol i laikim tru bai dai paslain long Armagedon. Sapos wanpela yu laikim tru i dai o yu save long wanpela husat i krai sori na bel hevi, ating yu bai tingting, ‘Olsem wanem yumi inap helpim ol man i krai sori?’

² Ating yu harim ol man i tok olsem bel hevi bilong man i save pinis bihain long sampela haptaim i lus. Tasol yu ting dispela tok i tru? Wanpela wido meri i tok: “Mi luksave olsem sapos ol narapela i lusim haptaim long i go lukim man i krai sori, dispela bai daunim bel hevi bilong em.” Sua long bodi bilong man i save drai bihain long sampela haptaim sapos em i lukautim gut dispela sua. Olsem tasol, sapos ol narapela i lusim sampela haptaim long mekim gut bel bilong man i gat hevi, dispela bai  mekim isi bel bilong em. Wanem samting inap helpim man long kisim bel isi?

3, 4. Bilong wanem Jehova i save olsem man i bel hevi i nidim ol narapela long mekim gut bel bilong em?

³ Jehova em gutpela Papa bilong yumi long heven, na yumi ken bilip tru olsem em tasol inap mekim isi bel bilong ol man. (Ritim 2 Korin 1:3, 4.) Jehova em Man i save mekim gut bel bilong yumi, em i tok: “Mi yet mi save strongim bel bilong yupela na mekim olgeta hevi bilong yupela i pinis.”—Ais. 51:12; Sng. 119:50, 52, 76.

⁴ God yet i bin bel hevi tru taim ol man em i laikim tru i dai, olsem Abraham, Aisak, Jekop, Moses, na King Devit. (Nam. 12:6-8; Mat. 22:31, 32; Apo. 13:22) Tok Bilong God i helpim yumi long bilip tru olsem Jehova i gat bikpela laik tru long kirapim bek ol dispela bilipman. (Jop 14:14, 15) Ol bai stap amamas na i gat gutpela helt. Pikinini Bilong God i bin ‘mekim God i amamas,’ na em tu i karim bikpela pen na em i dai. (Snd. 8:22, 30, 31) Jehova i bel hevi tru taim Pikinini bilong em i karim bikpela pen.—Jon 5:20; 10:17.

5, 6. Olsem wanem Jehova inap mekim isi bel bilong yumi?

⁵ Yumi inap bilip tru olsem Jehova bai mekim gut bel bilong yumi. Olsem na yumi mas beten na kamapim bel na tingting bilong yumi long em. Yumi amamas long save olsem Jehova i pilim tru bel hevi bilong yumi na givim ol gutpela tok bilong mekim gut bel bilong yumi long taim stret! Em i save helpim yumi olsem wanem?

⁶ God i helpim yumi long “kisim bel isi long rot bilong holi spirit.” (Apo. 9:31) Holi spirit i gat bikpela strong long mekim isi bel bilong yumi. Jisas i tok olsem Papa long heven bai “givim holi spirit long ol man i askim em!” (Luk 11:13) Susi em yumi stori long em long paragraf 1, em i tok: “Planti taim yumi askim Jehova long mekim isi bel bilong yumi, na oltaim bel isi bilong God i save lukautim bel na tingting bilong yumi.”—Ritim Filipai 4:6, 7.

7, 8. Bilong wanem yumi ken bilip tru olsem Jisas bai mekim isi bel bilong yumi?

⁷ Taim Jisas i stap long graun, toktok na pasin em i mekim long ol manmeri i kamapim klia bikpela pasin sori bilong Jehova. (Jon 5:19) God i salim Jisas long mekim gut bel bilong “ol man i stap wantaim bikpela wari,” na “ol manmeri i sori na i krai.” (Ais. 61:1, 2; Luk 4:17-21) Dispela i soim olsem Jisas i sori tru na i pilim hevi bilong ol manmeri, na em i laik tru long mekim isi bel bilong ol.—Hib. 2:17.

⁸ Taim Jisas i stap tineja, ating em tu i bel hevi taim sampela wanfamili na pren bilong em i dai. Josep em waspapa bilong Jisas, na i luk olsem em i dai taim Jisas i stap tineja o em i gat 22 krismas samting. * Jisas em man i gat pasin sori. Ating em yet i bel hevi tru taim waspapa i dai. Na tu, taim em i lukim ol bratasusa na mama bilong em i bel hevi, em tu i bel hevi.

9. Wanem samting i soim olsem Jisas i bel hevi tru taim Lasarus i dai?

⁹ Taim Jisas i kirap mekim wok autim tok, em i pilim tru hevi bilong ol narapela. Jisas i pilim olsem wanem taim gutpela pren bilong em Lasarus i dai? Maski Jisas i save olsem em bai kirapim bek Lasarus,  em i pilim tru bel hevi bilong Maria na Marta. Jisas i sori tru na em i krai.—Jon 11:33-36.

10. Bilong wanem yumi ken bilip tru olsem Jisas bai mekim gut bel bilong yumi long nau?

¹⁰ Olsem wanem pasin bilong Jisas long sori tru na mekim gut bel bilong ol narapela inap helpim yumi long nau? Baibel i tok: “Jisas Krais i stap wankain long asde na long nau, na inap oltaim oltaim.” (Hib. 13:8) Jisas em “Nambawan Gopas Bilong Laip,” na em i save long bel hevi yumi gat taim wanpela yumi laikim tru i dai. Olsem na “em inap helpim ol man em traim i painim ol.” (Apo. 3:15; Hib. 2:10, 18) Yumi ken bilip tru olsem Krais i wok yet long pilim hevi bilong ol narapela, na mekim gut bel bilong ol long “taim stret.”—Ritim Hibru 4:15, 16.

11. Wanem ol skripsa i save mekim gut bel bilong yu?

¹¹ Baibel i stori long Jisas i bel sori tru taim Lasarus i dai. Ol kain stori bilong Baibel inap mekim isi bel bilong yumi. Olsem na i stret Baibel i tok: “Olgeta tok ol i bin raitim long bipo, ol i bin raitim bilong skulim yumi. Dispela tok i helpim yumi long sanap strong na i mekim isi bel bilong yumi long rot bilong Rait Holi. Na dispela i strongim yumi long wetim gutpela samting.” (Rom 15:4) Sapos yu krai sori, yu inap kisim bel isi long ol kain skripsa olsem:

• “God i save stap klostu long ol manmeri i gat hevi. Na em i save helpim ol manmeri bilip bilong ol i bagarap.”—Sng. 34:18, 19.

• “Taim mi bel hevi na mi gat planti tingting long ol samting, yu save mekim bel bilong mi i stap isi na yu mekim mi i amamas.”—Sng. 94:19.

• “God, Papa bilong yumi, em man i bin laikim yumi. Na long rot bilong bikpela pasin helpim em i bin givim yumi bel isi i save stap oltaim oltaim, na gutpela samting long bilip na wet long en. Em wantaim Bikpela bilong yumi Jisas Krais, ol i ken mekim isi bel bilong yupela na mekim yupela i stap strong.”—2 Tes. 2:16, 17. *

12. Wanem wanpela rot em yumi inap mekim isi bel bilong ol narapela?

¹² Kongrigesen Kristen inap helpim yumi long kisim bel isi. (Ritim 1 Tesalonaika 5:11.) Olsem wanem yu inap strongim na mekim gut bel bilong man em “tingting bilong [em] i bagarap”? (Snd. 17:22) Yu mas tingim olsem i gat “taim bilong pasim maus na taim bilong toktok.” (Sav. 3:7) Dalene em wanpela wido meri, na em i tok: “Em i bikpela samting long ol lain i bel hevi i mas kamapim tingting na filings bilong ol. Olsem na nambawan samting yu ken mekim em long putim gut yau na no ken katim tok bilong ol.” Junia em wanpela meri, na brata bilong em i bin suasaid. Em i tok: “Ating yu no inap kliagut long bel hevi ol i wok long karim, tasol bikpela samting em yu mas save gut long filings bilong ol.”

13. Yumi mas tingim wanem samting taim wanpela i bel hevi?

¹³ Ol man i save kamapim bel hevi bilong ol long narapela narapela pasin. Sampela taim, man husat i bel hevi i save long wanem samting i stap long bel na tingting bilong em yet, tasol i hatwok long em i tokim  ol narapela. Baibel i tok: “Man i save long bel hevi bilong em yet, na em i save long bel bilong em yet i amamas. Tasol em i no inap kamapim long ol arapela man.” (Snd. 14:10) Ating wanpela husat i bel hevi inap tokim ol narapela long filings bilong em, tasol ol bai hatwok long kliagut long hevi bilong em.

14. Olsem wanem yumi inap mekim isi bel bilong ol lain i krai sori?

¹⁴ Sampela taim yumi no save long wanem tok yumi bai kamapim bilong mekim isi bel bilong brata o sista husat i krai sori. Tasol Baibel i tok: “Tok bilong man i gat gutpela tingting i save helpim ol man olsem gutpela marasin.” (Snd. 12:18) Planti i kisim bel isi taim ol i ritim buklet Taim Wanpela Long Famili i Dai. * Planti taim i gutpela long “krai wantaim ol man i krai.” (Rom 12:15) Gaby em wanpela wido meri, na em i tok: “Oltaim mi save krai. Olsem na mi kisim bel isi taim ol pren i krai wantaim mi. Nau mi pilim olsem mi no stap wanpis taim mi krai sori.”

15. Olsem wanem yumi inap mekim isi bel bilong ol arapela sapos i hatwok long yumi toktok long ol? (Lukim blok “Ol Gutpela Tok Bilong Mekim Gut Bel Bilong Man i Bel Hevi.”)

¹⁵ Sapos i hatwok long yu toktok wantaim man i krai sori, yu ken kamapim bel sori bilong yu long rot bilong raitim wanpela kat, salim e-mail, teks mesis, o raitim wanpela pas. Yu ken kamapim sampela gutpela skripsa, stori long gutpela pasin bilong man i dai, o stori long sampela samting yupela i bin mekim wantaim em yu no inap lusim tingting long en. Junia i tok: “Taim mi kisim wanpela mesis o wanpela sista i singautim mi long bung wantaim em, dispela i save strongim mi tru. Ol tok  bilong ol bratasista i helpim mi long save olsem ol i laikim na tingim mi tru.”

16. Wanem wanpela gutpela rot bilong mekim gut bel bilong ol lain i bel hevi?

¹⁶ Em i bikpela samting long beten wantaim wanbilip husat i bel hevi. Maski em hatwok long beten long kain taim olsem, sapos yu beten long pasin i soim olsem yu sori tru na pilim hevi bilong em, dispela bai strongim bel bilong em. Dalene i tok: “Taim ol sista i kam bilong mekim isi bel bilong mi, mi save askim ol long beten wantaim mi. Taim ol i kirap long beten, ol i hatwok long kolim gut ol tok, tasol isi isi ol i strongim nek na kamapim tru tingting i stap long bel bilong ol. Ol i gat strongpela bilip, pasin laikim, na pasin bilong tingim ol narapela, na dispela i strongim tru bilip bilong mi.”

17-19. Bilong wanem yumi mas wok yet long mekim gut bel bilong ol lain i bel hevi?

¹⁷ Ol man i gat narapela narapela pasin long kamapim bel sori bilong ol. Olsem na oltaim yu mas mekim gut bel bilong man i krai sori. Mekim olsem long taim ol narapela i stap wantaim em na long taim em wanpela i stap. Baibel i tok: “Pren tru i save laikim yumi long olgeta taim, na em i olsem brata i save sambai long helpim yumi long taim bilong hevi.” (Snd. 17:17, NW ) Ol wanbilip Kristen inap mekim gut bel bilong narapela husat i krai sori i go inap long bel hevi bilong em i pinis.—Ritim 1 Tesalonaika 3:7.

¹⁸ Ol lain i bel hevi inap wari tru taim ol i tingim de ol i marit, ol samting ol i save mekim wantaim, wanpela kain smel, wanpela taim bilong yia, harim feiveret musik o nois bilong wanpela samting, na lukim ol poto. Taim man o meri bilong wanpela i dai na poroman marit i laik mekim wanpela samting em tupela wantaim i save mekim—kain olsem go long kibung o Memorial—dispela bai mekim em i wari tru. Meri bilong wanpela brata i dai, na brata i tok: “Mi ting olsem mi bai bel hevi tru taim de bilong weding aniveseri bilong mitupela i kamap. Tasol sampela bratasista i pasim tok long mekim liklik bung wantaim ol gutpela pren bilong mi bambai mi inap pilim olsem mi no stap wanpis.”

¹⁹ Ol lain i bel hevi i nidim tok bilong strongim ol long olgeta taim. Junia i tok: “Taim ol narapela i visitim mi na helpim mi long ol narapela taim, dispela i save mekim gut bel bilong mi. Mi no save lusim tingting long gutpela pasin ol i mekim.” Yumi no inap pinisim olgeta wari na bel hevi em dai i save kamapim, tasol yumi inap mekim sampela samting bilong mekim gut bel bilong ol man i krai sori. (1 Jon 3:18) Gaby i tok: “Mi tenkyu tru long Jehova olsem ol elda i bin helpim mi long olgeta taim mi stap bel hevi. Pasin ol i kamapim i mekim na mi pilim olsem Jehova i holimpasim mi na soim olsem em i laikim mi.”

20. Bilong wanem ol tok promis bilong Jehova inap mekim gut bel bilong ol lain i bel hevi?

²⁰ Yumi amamas tru long save olsem Jehova em God bilong mekim gut bel bilong ol lain i bel hevi na krai sori. Em bai givim bel isi long ol taim “olgeta man i stap long matmat ol bai harim nek bilong Pikinini na kam ausait”! (Jon 5:28, 29) God i tok promis long “pinisim dai tru na bai dai i no kamap moa long ol. God, Bikpela bai i pinisim krai bilong ol na mekim drai wara bilong ai bilong olgeta manmeri.” (Ais. 25:8) Long dispela taim, yumi no inap “krai wantaim ol man i krai,” nogat. Yumi bai “amamas wantaim ol man i amamas.”—Rom 12:15.