1. Wai na yumi mas redi long ol birua i mekim nogut long yumi?

LONG nait paslain long Jisas i dai, em i tok ol birua bai heitim olgeta manmeri husat i kamap disaipel bilong em. (Jon 17:14) Kirap long bipo yet i kam inap long nau, ol birua i bin mekim nogut long ol Kristen husat i stap olsem ol Witnes Bilong Jehova. (2 Tim. 3:12) Pinis bilong haptaim nogut bilong nau i kam klostu tru, olsem na yumi redi long karim bikpela hevi moa long han bilong ol birua.—Mat. 24:9.

2-3. (a) Pasin bilong pret inap mekim wanem long yumi? (b) Long dispela atikol, yumi bai stori long wanem ol samting?

² Olsem wanem yumi inap redim yumi yet paslain long ol birua i mekim nogut long yumi? I no gat wok long yumi tingting planti long ol samting nogut inap kamap long yumi. Sapos yumi tingting planti, dispela bai pretim yumi moa yet na daunim tru yumi. Nogut yumi stop long mekim wok bilong Jehova paslain long hevi i kamap. (Prov. 12:25; 17:22) Pasin bilong pret em strongpela tul bilong “Devil, dispela birua” bilong yumi. (1 Pita 5:8, 9) Long nau, yumi ken mekim wanem bilong strongim yumi yet?

³ Long dispela atikol, yumi bai stori long olsem wanem yumi inap strongim pasin bilong yumi long pas gut wantaim Jehova, na wai na em i bikpela samting long yumi mekim olsem long nau. Yumi bai stori tu long ol samting yumi inap mekim bilong strongim bel bilong yumi. Na tu, yumi bai stori long ol samting yumi ken mekim na bai yumi inap sanap strong taim ol birua i mekim nogut long yumi.

4. Olsem Hibru 13:5, 6 i kamapim, yumi mas bilip tru long wanem samting? Bilong wanem?

⁴ Bilip tru olsem Jehova i laikim yu na em i no inap tru long givim baksait long yu. (Ritim Hibru 13:5, 6.) Planti yia i go  pinis, Wastaua i tok: “Sapos man i save gut tru long God, em bai trastim tru God long taim bilong hevi.” Dispela tok i tru olgeta! Sapos yumi laik sanap strong long taim bilong hevi, yumi mas laikim na trastim tru Jehova na tingim oltaim olsem em i laikim tru yumi.—Mat. 22:36-38; Jems 5:11.

5. Yu mas mekim wanem na bai yu inap pilim pasin laikim bilong Jehova?

⁵ Ritim Baibel long olgeta de na mekim ol samting bilong i go klostu moa long Jehova. (Jems 4:8) Taim yu rit, tingim ol gutpela pasin bilong Jehova, olsem pasin laikim, pasin marimari, na pasin helpim. Pilim pasin laikim bilong em taim yu ritim stori bilong ol tok na ol samting em i mekim. (Kis. 34:6) Sampela inap pilim hatwok long bilip olsem God i laikim ol bikos i no gat man i bin soim pasin laikim long ol. Sapos yu pilim olsem, orait long olgeta de yu ken mekim lista bilong ol samting i kamap na i soim olsem Jehova i gat pasin marimari na pasin helpim. (Sng. 78:38, 39; Rom 8:32) Taim yu tingim ekspiriens bilong yu yet na tingim tingim ol stori yu ritim long Baibel, yu inap listim planti samting em Jehova i mekim bilong helpim yu. Taim yu pilim tru ol samting Jehova i mekim, dispela bai strongim yu long pas gut moa wantaim em.—Sng. 116:1, 2.

6. Olsem Song 94:17-19 i tok, taim yu beten na autim tingting tru bilong yu, hau bai dispela i helpim yu?

⁶ Beten oltaim. Tingim filings bilong liklik boi taim Papa i hagim em. Pikinini bai pilim olsem em i stap seif, olsem na em bai stori long Papa long olgeta samting i kamap long em long dispela de, ol gutpela samting na ol samting nogut tu. Yu inap kisim wankain amamas sapos long olgeta de yu go klostu long Jehova long rot bilong beten. (Ritim Buk Song 94:17-19.) Taim yu beten long Jehova, “kamapim olgeta bel hevi bilong yu olsem yu kapsaitim wara” na tokim Papa long olgeta samting i pretim yu na mekim yu tingting planti. (Kra. 2:19) Dispela bai helpim yu olsem wanem? Yu bai kisim “bel isi bilong God [we] i winim tru tingting bilong man.” (Fili. 4:6, 7) Sapos yu bihainim dispela pasin bilong beten, yu bai pilim olsem yu go klostu moa long Jehova.—Rom 8:38, 39.

7. Wai na yu mas bilip tru long ol tok promis i stori long ol blesing em Kingdom Bilong God bai kamapim?

⁷ Bilip tru olsem Kingdom Bilong God bai kamapim ol blesing. (Nam. 23:19) Sapos yu holim tupela tingting long ol tok promis bilong God, em bai isi tru long Satan na lain bilong em i pretim yu. (Prov. 24:10; Hib. 2:15) Long nau, hau bai yu inap strongim bilip bilong yu long Kingdom Bilong God? Yu ken stadi long ol tok promis bilong God long Kingdom, na stadi tu long ol risen bilong yu long bilip long truim bilong ol dispela tok promis. Dispela bai helpim yu olsem wanem? Skelim eksampel bilong Stanley Jones, em wanbilip bilong yumi na ol birua i kalabusim em inap 7-pela yia. * Wanem samting i helpim  em long stap strong yet long bilip? Em i tok: “Mi bilip tru long kingdom bilong God, na mi save long ol samting dispela kingdom bai kamapim, na mi no holim tupela tingting, olsem na i no gat wanpela man inap pulim mi long lusim bilip.” Sapos yu bilip tru long ol tok promis bilong God, yu bai go klostu moa long Jehova na yu no inap larim pret i daunim yu.—Prov. 3:25, 26.

8. Laik bilong yumi long i go long miting em gutpela samting bilong helpim yumi olsem wanem? Eksplenim.

⁸ Go oltaim long ol miting Kristen. Ol miting i helpim yumi long i go klostu moa long Jehova. Laik bilong yumi long i go long miting em gutpela samting bilong helpim yumi long sanap strong taim ol birua i mekim nogut long yumi. (Hib. 10:24, 25) Bilong wanem? Sapos long nau yumi larim ol liklik hevi i pasim yumi long go long miting, long bihain yumi bai mekim wanem sapos gavman i tambuim ol miting bilong yumi? Sapos long nau yumi gat strongpela laik bilong go oltaim long miting, yumi no inap givap taim ol birua i laik stopim yumi long bung wantaim. Nau em taim bilong kisim pasin bilong laikim tru ol miting. Taim yumi kisim dispela pasin, i no gat wanpela pasin birua o gavman bai stopim yumi long bihainim tok bilong God.—Apo. 5:29.

9. Wai na em gutpela long tingim tingim ol skripsa na putim long tingting?

⁹ Tingim tingim ol feiveret skripsa na putim long tingting. (Mat. 13:52) Em tru olsem yu no inap tingim gut olgeta samting, tasol Jehova inap yusim holi spirit long kirapim yu long tingim gen ol skripsa. (Jon 14:26) Long Is Jemani, ol birua i bin kalabusim wanpela brata na em i stap wanpis long rum kalabus. Brata i tok: “Mi amamas tru olsem mi bin tingim tingim moa long 200 skripsa na putim long tingting! Mi yusim olgeta wan wan de long tingim tingim planti gutpela samting em Baibel i stori long en.” Ol dispela skripsa i helpim brata long stap klostu long Jehova—na em inap sanap strong yet long bilip.

10. Wai na yumi mas tingim tingim ol song na putim long tingting?

¹⁰ Tingim tingim na singim ol song bilong givim biknem long Jehova. Taim Pol na Sailas i stap kalabus long Filipai, tupela i singim ol song bilong lotu em ol inap tingim. (Apo. 16:25) Olsem tasol, taim ol birua i kisim ol bratasista long olpela Soviet Yunion na salim ol i go bilong stap kalabus long Saibiria, ol bratasista i mekim wanem bilong strongim ol yet? Sista Mariya Fedun i tok: “Mipela i singim olgeta song mipela i save long en, ol song bilong song buk.” Em i tok  ol dispela song i strongim olgeta bilong ol na helpim ol long pilim olsem ol i stap klostu tru long Jehova. Olsem wanem long yu yet? Yu save kisim nupela strong taim yu singim feiveret lotu song bilong yu? Sapos olsem, orait long nau yu mas tingim tingim na putim tok bilong ol dispela song long tingting!—Lukim blok “ Givim Mi Strong.”

11-12. (a) Olsem 1 Samuel 17:37, 45-47 i kamapim, wai na Devit inap strongim bel? (b) Yumi kisim wanem bikpela skul long eksampel bilong Devit?

¹¹ Yu mas strongim bel na bai yu inap sanap strong taim ol birua i mekim nogut long yu. Sapos yu pilim olsem yu no gat pasin bilong strongim bel, orait yu ken mekim wanem? Tingim, sapos yu laik kisim pasin bilong strongim bel, dispela i no makim olsem yu mas i gat bikpela sais, strong, o save, nogat. Tingim yangpela man Devit taim em i go pait long Goliat. Devit i liklik tru, em i no gat bikpela strong, na em i no gat olgeta tul bilong pait. Na tu, Devit i no gat bainat. Tasol em i strongim tru bel na em i no pret. Devit i ran spit i go long pait long hambakman Goliat.

¹² Wai na Devit i strongim bel na em i no pret? Em i bilip tru olsem Jehova i stap wantaim em. (Ritim 1 Samuel 17:37, 45-47.) Em tru olsem Goliat i gat bikpela strong moa winim Devit. Tasol Devit i no tingting long dispela, nogat. Em i tingim olsem strong bilong Jehova i bikpela moa winim strong bilong Goliat. Dispela stori i givim wanem skul long yumi? Yumi bai strongim bel sapos yumi bilip tru olsem Jehova em God i Gat Olgeta Strong, na em i stap wantaim yumi, na strong bilong em i winim tru strong bilong ol birua. (2 Sto. 20:15; Sng. 16:8) Long nau, olsem wanem yumi inap kisim pasin bilong strongim bel—paslain long ol birua i mekim nogut long yumi?

13. Olsem wanem yumi inap kisim pasin bilong strongim bel? Eksplenim.

¹³ Long nau, yumi inap kisim pasin bilong strongim bel sapos yumi no surik long autim tok long ples klia. Bilong wanem? Taim yumi autim tok, dispela i skulim yumi long trastim Jehova na daunim pasin bilong pret long ol man. (Prov. 29:25) Taim yumi mekim eksasais, dispela i save strongim ol masol long bodi. Olsem tasol, yumi inap kisim pasin bilong strongim bel taim yumi autim tok long haus bilong ol man, long pablik ples, long bisnis teritori, na long olgeta kain taim na ples. Sapos yumi strongim bel na autim tok long nau, yumi bai wok yet long  autim tok maski gavman i tambuim wok bilong yumi.—1 Tes. 2:1, 2.

14-15. Yumi inap kisim wanem skul long ekspiriens bilong Nancy Yuen na Valentina Garnovskaya?

¹⁴ Yumi inap kisim gutpela skul long eksampel bilong 2-pela sista husat i bin strongim bel tru long taim bilong hevi. Nancy Yuen em sotpela meri (1 na hap mita), tasol em i no pret long ol birua. * Em i no laik tru long lusim pasin bilong autim gutnius bilong Kingdom Bilong God. Olsem na lain komiunis bilong Saina i kalabusim em inap olsem 20 yia. Ol polis i kolim em “strongpela het meri”!

¹⁵ Long Soviet Yunion bilong bipo, inap 3-pela taim olgeta ol birua i kalabusim Valentina Garnovskaya, na em i bin stap long banis kalabus inap olsem 21 yia olgeta. * Bilong wanem? Em i tingting strong long mekim yet wok autim tok, olsem na ol polis i kolim em olsem “wanpela bikhet raskol.” Wanem samting i mekim na dispela 2-pela sista inap strongim tru bel? Ol i bilip tru olsem Jehova i sambai long ol.

16. Yumi mas mekim wanem na bai yumi inap tru long strongim bel?

¹⁶ Olsem yumi stori pinis, sapos yumi laik kisim pasin bilong strongim bel, orait yumi no ken tingting tasol long strong na save bilong yumi yet, nogat. Yumi mas bilip olsem Jehova i sambai long yumi na em i stap long sait bilong yumi na mekim pait bilong daunim ol birua. (Lo 1:29, 30; Sek. 4:6) Sapos yumi holim dispela bilip, yumi bai inap tru long strongim bel.

17-18. Olsem Jon 15:18-21 i kamapim, Jisas i givim wanem tok lukaut? Eksplenim.

¹⁷ Yumi amamas taim ol narapela i rispektim yumi, tasol sapos ol manmeri i heitim yumi, orait yumi no ken larim dispela i daunim yumi. Jisas i tok: “Yupela i ken amamas taim ol man i heitim yupela, na givim baksait long yupela, na tok nogut long yupela na bagarapim nem bilong yupela olsem em i samting nogut. Sapos nem bilong mi i as na ol i mekim olsem, orait yupela i ken amamas.” (Luk 6:22) Wanem mining bilong tok bilong Jisas?

¹⁸ Tok bilong Jisas i no makim olsem yumi  bai amamas long ol manmeri i heitim yumi, nogat. Em i tok lukaut long hevi inap painim yumi. Yumi no insait long wok bilong dispela graun. Yumi bihainim tok bilong Jisas na autim wankain tok em i bin autim. Olsem na ol manmeri bilong graun i heitim yumi. (Ritim Jon 15:18-21.) Yumi laik amamasim Jehova. Sapos yumi laikim Papa bilong yumi na ol manmeri i heitim yumi, orait yumi no ken larim dispela i daunim yumi.

19. Hau bai yumi inap bihainim eksampel bilong ol aposel?

¹⁹ No ken tru larim toktok o pasin bilong wanpela man i mekim na yu pilim sem long i stap olsem wanpela Witnes Bilong Jehova. (Mai. 4:5) Yumi inap daunim pasin bilong pret taim yumi skelim samting ol aposel long Jerusalem i mekim bihain stret long ol birua i kilim i dai Jisas. Ol i save olsem ol lida bilong lotu Juda i heitim ol. (Apo. 5:17, 18, 27, 28) Tasol long olgeta de, ol i go long tempel na tokaut long pablik olsem ol i disaipel bilong Jisas. (Apo. 5:42) Ol i no larim pret i daunim ol. Yumi tu inap daunim pasin bilong pret taim yumi autim tok oltaim na tokaut klia olsem yumi Witnes Bilong Jehova—long ples wok, long skul, na long ples yumi stap long en.—Apo. 4:29; Rom 1:16.

20. Wai na ol aposel i amamas maski ol man i heitim ol?

²⁰ Wai na ol aposel i amamas? Ol i save olsem ol birua i heitim ol bikos ol i bihainim laik bilong Jehova, na em samting i stret long ol i ken amamas long en. (Luk 6:23; Apo. 5:41) Aposel Pita i tok: “Sapos yupela i mekim stretpela pasin na yupela i karim pen long dispela, orait yupela i ken amamas.” (1 Pita 2:19-21; 3:14) Taim yumi save olsem yumi bihainim stretpela pasin na long dispela risen ol man i heitim yumi, dispela bai strongim yumi na yumi no inap pret.

21-22. (a) Yu tingting pinis long mekim wanem bilong redi long taim bilong bikpela hevi? (b) Long neks atikol, yumi bai stori long wanem samting?

²¹ Yumi no save wanem taim stret ol birua bai mekim nogut long yumi o tambuim wok lotu bilong yumi. Tasol yumi save olsem sapos yumi strongim pasin bilong pas gut wantaim Jehova, na kisim pasin bilong strongim bel, na sanap strong yet taim ol man i heitim yumi, dispela bai redim yumi long sanap strong taim ol birua i mekim nogut long yumi. Yumi bai mekim yet wok bilong God long taim bilong hevi.

²² Tasol olsem wanem sapos gavman i tambuim wok lotu bilong yumi? Long neks atikol, yumi bai stori long sampela stiatok we inap helpim yumi long mekim yet wok bilong Jehova.