Long yia bihain, ol brata i tokim Betel famili olsem Saut Afrika brens i nidim ol volantia bikos ol bai kisim nupela printing masin. Mi putim nem long volantia, na mi amamas tru taim ol i makim mi. Ol i makim tu 3-pela narapela Betelait long Kanada—Dennis Leech, Bill McLellan, na Ken Nordin. Ol i tokim mipela olsem mipela bai stap long Saut Afrika longpela taim tru!

Mi ringim mama bilong mi na tok: “Mama, mi gat nius long tokim yu. Mi bai go long Saut Afrika!” Mama i no meri bilong toktok, tasol em i gat strongpela bilip na em i pas gut wantaim Jehova. Em i no mekim planti toktok, tasol mi save em bai sapotim mi. Maski em na Papa i wari olsem mi bai go stap longwe tru, tupela i no komplein long disisen bilong mi.

Pastaim mipela fopela i go long Brooklyn Betel, na mipela i kisim trening inap 3-pela mun long mekim wok long wanpela kain printing masin—letapres printing. Bihain, mipela i kalap long wanpela kago sip bilong i go long Cape Town, Saut Afrika. Long dispela taim, mi gat 20 krismas. Em apinun tru taim mipela i kalap long tren na lusim Cape Town bilong i go long Johannesburg. Fes ples mipela i stop long en em long wanpela liklik taun long Karoo, em ples i stap long deset. Dispela ples i pulap long das na i hot nogut tru. Mipela fopela i lukluk i go ausait long windo na tingting, em wanem kain ples tru? Mipela i tingting planti long nupela asainmen bilong mipela. Long ol yia bihain, mipela i visitim dispela ples na amamas long lukim gen ol dispela liklik taun we ol man i stap bel isi na amamas.

Inap sampela yia, asainmen bilong mi em long wok long wanpela kain Linotaip masin, we i save redim ol lain bilong ol leta long prinim nius Wastaua na Kirap! Brens ofis i prinim ol dispela nius long planti tokples bilong Afrika na i no bilong Saut Afrika tasol, bilong planti narapela kantri tu long Afrika. Mipela i amamas olsem dispela nupela printing masin we i mekim na mipela i lusim Kanada na i kam wok long en, em i mekim gutpela wok tru!

Bihain mi wok long Faktori Ofis we i lukautim ol wok bilong printing, siping, na trenslesen wok. Mi bisi tru, tasol mi amamas olsem laip bilong mi i gat as bilong en.

Long 1968, mi maritim wanpela painia sista, Laura Bowen, husat i stap klostu long Betel. Em i wok long Trenslesen Dipatmen long Betel na em i save taipim ol tok. Long dispela taim, i no gat arensmen long ol nupela marit i ken stap long Betel, so mitupela i kisim asainmen olsem spesel painia. Mi tingting planti. Mipela i stap 10-pela yia long Betel na oltaim mipela i gat kaikai na ples slip, so hau bai mipela i lukautim mipela yet wantaim liklik alowens mipela i kisim olsem spesel painia? Mitupela wan wan i save kisim 25 rand (em 35 US dola long dispela taim) long olgeta mun sapos mipela i winim mak em oganaisesen i putim long ol aua, ol gobek, na ol litresa bilong tilim long dispela mun. Mipela i mas yusim dispela alowens long baim rent, kaikai, na trenspot, na tu, long baim haus sik fi na ol narapela samting.

Asainmen bilong mipela em long wanpela liklik grup klostu long taun Durban, long Solwara India. I gat bikpela populesen bilong ol lain India, planti bilong ol em ol tumbuna pikinini bilong ol wokman husat i go long Saut Afrika long wok long suga indastri long 1875 samting. Nau ol i mekim ol narapela wok, tasol ol i holim yet kalsa na stail bilong ol long kukim kaikai, dispela i makim tu switpela kari ol i save kukim. Na ol i mekim tok Inglis, so em isi long mipela ken autim tok long ol.

Ol spesel painia i mas lusim 150 aua long olgeta wan wan mun long autim tok, so mitupela Laura i wokim sediul olsem mipela bai lusim 6 aua long fes de long autim tok. Ples i hot nogut tru. Mipela i no gat ol gobek na Baibel stadi, so mipela i autim tok long haus bilong ol man 6-pela aua olgeta. Mipela i stat long autim tok, na liklik haptaim i lus na mi lukluk long wats—40 minit tasol i lus! Mi tingting, hau stret bai mipela inapim asainmen bilong mipela?

Bihain mipela i wokim gutpela sediul. Long olgeta wan wan de, mipela i redim bret na putim sup o kofi i go insait long temos. Taim mipela i laik malolo, mipela i save pakim liklik kar bilong mipela aninit long wanpela diwai—sampela taim ol naispela liklik pikinini India i save kam sanap raunim mipela na lukluk long mipela! Insait long sampela de, mipela i luksave olsem bihain long 2-pela o 3-pela aua, de i save ron hariap na i go pinis.

Mipela i amamas tru long autim tok i tru bilong Baibel long ol man i gat gutpela pasin long dispela teritori! Mipela i luksave olsem ol lain India i gat pasin rispek, gutpela pasin, na ol i laikim God. Planti man bilong lotu Hindu i putim yau long tok mipela i autim. Ol i amamas long kisim save long Jehova, Jisas, Baibel, na nupela taim we bai gat bel isi, na hop bilong lukim ol daiman i kirap bek. Bihain long 1-pela yia i lus, mipela i gat 20 Baibel stadi. Long olgeta de, mipela i amamas long kisim bikpela kaikai wantaim wanpela famili em mipela i save stadi wantaim ol. Mipela i amamas tru.

I no longtaim, mipela i kisim narapela asainmen—long wok sekit long naispela nambis bilong Solwara India. Long olgeta wan wan wik, mipela i stap wantaim wanpela famili long haus bilong ol taim mipela i visitim na wok wantaim ol pablisa long kongrigesen bilong strongim ol. Mipela i kamap olsem ol famili tru bilong ol dispela famili, na mipela i amamas long spendim taim wantaim ol pikinini bilong ol na ol animal ol i lukautim. Tupela yia i lus. Na wanpela taim brens ofis i ringim mipela. Ol i tok: “Mipela i laik bai yupela kam bek long Betel.” Mi tokim ol: “Mipela i amamas tru long stap long hia.” Maski i olsem, mipela i redi long mekim wanem asainmen mipela i kisim.

Long Betel ol i asainim mi long wok long Sevis Dipatmen, na mi amamas tru long wok wantaim planti brata i gat bikpela ekspiriens. Long dispela taim, olgeta wan wan kongrigesen i save kisim pas i stret wantaim ripot em wasman sekit i mekim bihain long em i visitim kongrigesen. Ol dispela pas i bilong strongim ol kongrigesen na stiaim ol long sampela samting ol i mas mekim. Dispela em bikpela wok long ol sekreteri bilong mipela husat i mas trensletim ol dispela pas long tokples Kosa, Sulu, na ol narapela tokples i go long tok Inglis, na bihain ol i mas trensletim long Inglis i go  long ol tokples bilong Afrika. Mi pilim tru gutpela wok bilong ol dispela trensleta na dispela i helpim mi tu long luksave long ol hatwok bilong ol bratasista long Afrika.

Long dispela taim, ol Saut Afrika i stap aninit long apatet sistem bilong gavman. Ol i makim ples bilong ol man bilong narapela narapela skin kala long stap long en, so ol man bilong kain kain skin kala i no save bung wantaim. Ol blakskin bratasista bilong yumi long Afrika i mekim ol tokples bilong ol yet, autim tok long ol tokples bilong ol yet, na go long ol kongrigesen long tokples bilong ol yet.

Mi no save long planti blakskin bratasista bilong Afrika bikos mi kisim ol asainmen long ol kongrigesen teritori we ol manmeri i save mekim tok Inglis. Tasol nau mi gat sans long save gut long ol blakskin lain bilong Afrika na kalsa na ol kastam bilong ol. Mi kisim save long ol hatwok ol brata i feisim long sait bilong ol kastam na ol bilip bilong lotu. Ol i strongim bel na lusim ol kastam em Baibel i no orait long en, na tu, ol famili na ol lain long viles bilong ol i birua nogut tru long ol bikos ol i no insait long wok bilong ol spirit nogut! Long ol ples i stap longwe long taun, ol manmeri i stap rabis tru. Planti i no go long skul, tasol ol i rispektim Baibel.

Mi amamas long wok long sampela ligol keis long sait bilong stap fri long mekim lotu na i no insait long ol woa na wok bilong gavman. Bilip bilong mi i kamap strong taim mi lukim pasin bilong ol yangpela pikinini Witnes long strongim bel na stap gut long God—skul i rausim ol bikos ol i no insait long ol beten na ol singsing lotu em skul i save mekim.

Ol brata i feisim narapela hevi long wanpela liklik kantri long Afrika, long dispela taim ol i kolim olsem Swasilan. Taim King Sobhuza Namba 2 i dai, gavman i tok olgeta sitisen i mas insait long sampela kastam em ol i save bihainim taim wanpela man i dai. Ol man i mas sevim olgeta gras long het bilong ol, na ol meri i mas katim gras bilong ol i go sot tru. Ol manmeri i mekim nogut long planti bratasista bikos ol i no bihainim ol dispela kastam we i insait long pasin bilong lotuim ol tumbuna. Pasin bilong ol long stap gut long Jehova i mekim mipela amamas tru! Mipela i kisim planti skul long pasin bilong ol Afrika bratasista long stap gut long God na i no les kwik, ol i strongim bilip bilong mipela.

Long 1981, ol i asainim mi long helpim wok bilong developim ol nupela wei bilong mekim printing long kompiuta. So mi go bek na wok long Printing Dipatmen. Dispela em taim bilong amamas! Wei bilong prinim ol buk na nius i senis. Wanpela man i givim brens wanpela nupela masin bilong traim, na i no gat wok long mipela baim. Dispela i opim rot long mipela i senisim 9-pela masin mipela i gat wantaim 5-pela bilong ol dispela nupela masin. Na mipela i kisim tu wanpela nupela printing masin. Nau mipela inap prinim planti moa buk na nius samting!

Ol kompiuta i helpim mipela long wokim ol nupela wei bilong oganaisim ol tok i stap long ol pes long rot bilong MEPS (Multilanguage Electronic Publishing System). Teknoloji i kamap gutpela moa winim taim mipela fopela Betelait brata long Kanada i bin kam long Saut Afrika! (Ais. 60:17) Mipela fopela i bin maritim ol gutpela painia sista husat i laikim tru Jehova. Mitupela Bill i wok yet long Betel. Ken na Dennis i stap klostu long Betel, na tupela wantaim ol meri bilong ol i mekim bikpela long ol pikinini bilong ol.

I gat planti wok moa long mekim long Betel. Ol i trensletim ol Baibel litresa na prinim long planti moa tokples, na ol i salim long sip i go long ol narapela brens. Na tu, ol i mas wokim wanpela nupela Betel. Ol brata i bildim wanpela Betel long wanpela naispela ples long hap wes bilong Johannesburg, na ol i dediketim long 1987. Mi amamas tru long insait long olgeta dispela wok na long stap insait long Brens Komiti bilong Saut Afrika inap planti yia.

Long 2001, mipela i kirap nogut taim ol i singautim mi long insait long Brens Komiti Bilong Amerika. Mipela i sori tru long lusim asainmen na ol pren bilong mipela long Saut Afrika, tasol mipela i luk fowed long statim nupela laip bilong mipela wantaim Betel famili long Amerika.

Tasol mipela i tingting planti long lusim lapun mama bilong Laura. Em bai hatwok long mipela lukautim em bikos mipela bai stap long New York, tasol 3-pela sista bilong Laura i tok ol bai lukautim mama bilong ol long sait bilong helt, bel na tingting, na long ol samting bilong skin. Ol i tok: “Mipela i no inap insait long fultaim sevis, tasol sapos mipela i lukautim Mama, dispela bai opim rot long yutupela inap mekim yet asainmen bilong yupela.” Mipela i pilim tru gutpela pasin bilong ol.

Wankain olsem ol, brata bilong mi na meri bilong em i stap long Toronto, Kanada, na ol i lukautim mama bilong mi husat i wido. Long dispela taim, Mama i stap wantaim ol winim 20 yia pinis. Mipela i pilim tru gutpela pasin laikim ol i soim long Mama i go inap long em i dai bihain liklik long mipela i kamap long New York. Em gutpela blesing tru long i gat ol wanfamili husat i redi long sapotim mipela na redi long senisim laip bilong ol long lukautim ol lapun papamama maski dispela inap putim bikpela presa long ol!

Inap sampela yia, asainmen bilong mi long Amerika em long litresa prodaksen, ol i mekim dispela wok i kamap simpol na isi tru. I no longtaim i go pinis, mi wok long Purchasing Dipatmen. Mi amamas tru olsem insait long 20 yia mi helpim wok long dispela bikpela brens, we nau i gat inap olsem 5,000 Betelait na klostu 2,000 komiuta!

Inap 60 yia i go pinis, mi no ting mi bai kam wok long brens long Amerika. Laura i sapotim mi gut tru long ol dispela yia i kam. Laip bilong mi i gutpela tru! Mipela i amamas tru long olgeta asainmen mipela i kisim na long wok wantaim planti naispela bratasista, sampela bilong ol em mipela i bungim ol long planti brens em mipela i bin visitim long taim mipela i mekim ol brens visit long planti hap bilong graun. Nau mi gat winim 80 krismas, so brens i no givim mi planti wok tumas long mekim bikos i gat planti yangpela brata em ol i kisim trening long mekim ol wok.

Man bilong raitim song i tok: “Lain manmeri God bilong ol em Jehova, ol i ken amamas.” (Sng. 33:12) Dispela tok i tru olgeta! Mi tenkyu tru olsem mi kisim amamas long wok wantaim lain bilong Jehova, em ol i lain bilong amamas.