1. Yumi save tru long wanem samting, na bilong wanem?

 TAIM yu lukim ol hevi i kamap long graun, yu pilim hatwok long tingim olsem gutpela samting bai kamap bihain? I no gat pasin laikim moa insait long ol famili. Pasin bilong ol man long pait, tingim ol yet, na belhat i go nogut moa. Planti man i hatwok long trastim ol man i gat namba. Tasol ol dispela samting i ken strongim yu. Bilong wanem? Long wanem, ol man i bihainim ol pasin em Baibel i tok profet long ol bai kamap “long taim bilong las de.” (2 Tim. 3:1-5) Man i gat gutpela tingting bai luksave olsem dispela tok profet i wok long kamap tru, na truim bilong en i kamapim klia olsem Jisas Krais i kirap pinis long mekim wok king long Kingdom Bilong God. Tasol dispela em wanpela bilong planti tok profet i stori long Kingdom. Bilip bilong yumi bai kamap strong taim yumi skelim ol narapela tok profet em ol i bin kamap tru long ol yia i go pinis.

2. Yumi bai stori long wanem samting long dispela atikol, na bilong wanem? (Stori long fran pes piksa.)

² Long dispela atikol, yumi bai stori long (1) wanpela tok profet i helpim yumi long skelim gut wanem taim Kingdom i bin kirap mekim wok, (2) ol tok profet i helpim yumi long luksave olsem Jisas i kirap pinis long mekim wok king long Kingdom Bilong God, na (3) ol tok profet i kamapim klia hau ol birua bilong Kingdom Bilong God bai pinis. Yumi bai luksave olsem ol dispela tok profet i fit gut wantaim olsem olgeta wan wan hap bilong wanpela jigso pasol, na dispela bai helpim yumi long kliagut long haptaim yumi stap long en long sediul bilong Jehova long mekim ol samting.

3. Daniel 7:13, 14 i mekim wanem tok profet long King bilong Kingdom Bilong God em yumi ken bilip tru long en?

³ Tok profet long Daniel 7:13, 14 i helpim yumi long bilip tru olsem Jisas Krais bai stap gutpela King tru long Kingdom Bilong God. Ol manmeri bilong olgeta kantri bai amamas long “stap aninit long em,” na i no gat narapela king bai senisim em. Narapela tok profet long Buk Daniel i stori long Jisas bai kisim Kingdom bilong em long pinis bilong haptaim em Baibel i kolim olsem 7-pela taim. Yu ting yumi inap save long wanem taim Jisas i kamap King?

4. Stori long hau Daniel 4:10-17 i helpim yumi long save long wanem yia Krais bai mekim wok king long Kingdom. (Lukim tu futnot.)

⁴ Ritim Daniel 4:10-17. Dispela “7-pela taim” i makim 2,520 yia. Dispela haptaim i kirap long 607 B.C.E. taim ol Babilon i rausim laspela king long sia king bilong Jehova long Jerusalem. Em i pinis long 1914 C.E. taim Jehova i putim Jisas i kamap King, em “man husat i gat rait” long mekim wok olsem King bilong Kingdom Bilong God. *—Ese. 21:25-27.   

5. Taim yumi kliagut long tok profet bilong “7-pela taim,” dispela i helpim yumi olsem wanem?

⁵ Olsem wanem dispela tok profet inap helpim yumi? Taim yumi kliagut long tok profet bilong “7-pela taim,” dispela i strongim yumi olsem Jehova i save truim ol tok promis bilong em long taim stret. Wankain olsem em i makim taim stret long kamapim Kingdom bilong em, em bai mekim olgeta samting na bai olgeta narapela tok profet i kamap tru long taim em yet i makim long sediul bilong em. Yes, de bilong Jehova “bai kamap long taim stret bilong en!”​—Hab. 2:3.

6. (a) Wanem ol samting i soim olsem Krais i kirap pinis long mekim wok king long heven? (b) Olsem wanem ol dispela samting i stret wantaim tok profet i stap long Revelesen 6:2-8?

⁶ Klostu long Jisas i pinisim wok autim tok bilong em long graun, em i tok profet long ol samting bai kamap long graun na dispela bai helpim ol disaipel bilong em long save olsem em i kirap pinis long mekim wok king long heven. Sampela bilong ol samting em i kolim em ol woa, ol bikpela hangre, na ol graun i guria. Na tu, em i tok profet olsem bai i gat ol bikpela sik i “kamap long narapela narapela hap” na COVID-19 pandemik em wanpela eksampel. Baibel i kolim ol dispela samting olsem “sain” bilong soim olsem Krais i kam i stap. (Mat. 24:3, 7; Luk 21:7, 10, 11) Winim 60 yia bihain long Jisas i dai na go bek long heven, em i givim sampela tok long aposel Jon bilong kamapim klia olsem ol dispela samting em i tok long en bai kamap tru. (Ritim Revelesen 6:2-8.) Olgeta dispela samting i kamap kirap long taim Jisas i kisim wok king long Kingdom Bilong God long 1914.

7. Bilong wanem wok king bilong Jisas i kamapim hevi long graun?

⁷ Wai na ol samting long graun i go nogut moa taim Jisas i kamap King? Revelesen 6:2 i kolim wanpela bikpela samting—namba 1 wok bilong Jisas olsem nupela King em long mekim pait. Em bai pait long husat? Em bai pait long Satan na ol dimon bilong em. Olsem Revelesen sapta 12 i kamapim, Satan i lus long pait, na Jisas i tromoi em wantaim ol dimon bilong em i kam daun long graun. Satan i belhat nogut tru, na em i kamapim belhat  bilong em long ol manmeri, olsem na Baibel i tok “yu graun . . . yupela lukaut.”​—Rev. 12:7-12.

8. Taim yumi lukim truim bilong ol tok profet i stori long Kingdom, dispela inap helpim yumi olsem wanem?

⁸ Olsem wanem ol dispela tok profet inap helpim yumi? Ol samting i kamap long graun na pasin bilong ol man bai senis, dispela bai helpim yumi long save olsem Jisas i kamap King pinis. So yumi no laik bel hevi taim yumi lukim ol man i tingim ol yet na heitim narapela, yumi laik tingim olsem ol pasin ol i mekim i truim tok profet bilong Baibel. Kingdom Bilong God i mekim wok nau! (Sng. 37:1) Na yumi ken save olsem ol samting long graun bai go nogut moa taim Armagedon i wok long kam klostu moa. (Mak 13:8; 2 Tim. 3:13) Yumi amamas tru olsem gutpela Papa bilong yumi long heven i helpim yumi long save long risen na i gat planti hevi long nau!

9. (a) Tok profet long Daniel 2:28, 31-35 i stori olsem wanem long laspela strongpela gavman? (b) Wanem taim dispela gavman i kirap mekim wok?

⁹ Ritim Daniel 2:28, 31-35. Yumi lukim truim bilong dispela tok profet i wok long kamap long nau. Driman bilong Nebukatnesar i kamapim klia samting bai kamap “long taim bilong las de,” bihain long kirap bilong wok king bilong Krais. Ol birua bilong Jisas long graun i makim tu laspela strongpela gavman em Baibel i tok profet long en, em “tupela fut bilong imis em hap ain na hap graun” i makim. Dispela gavman i kirap pinis long mekim wok. Em i kirap mekim wok long Wol Woa 1 taim Briten na Amerika i kirap wok bung wantaim olsem Gavman Inglan-Amerika. Na tu, imis long driman bilong Nebukatnesar i tok profet long tupela samting dispela gavman  bai mekim na dispela i mekim na em i no wankain long ol kingdom i stap paslain long em.

10. (a) Long nau, yumi lukim wanem samting long Gavman Inglan-Amerika olsem Daniel i tok profet long en? (b) Yumi mas abrusim wanem hevi? (Lukim blok “ Was Gut Long Graun!”)

¹⁰ Namba 1, long visen ol gavman i stap paslain long Gavman Inglan-Amerika em ol strongpela metal olsem gol na silva i makim ol. Tasol hap bilong imis we ain i miks wantaim graun i makim Gavman Inglan-Amerika. Graun i makim “ol pikinini bilong ol man,” o ol man nating. (Dan. 2:43, ftn.) Olsem yumi lukim long nau, ol man i pait long raits bilong ol long eleksen, ol kempein long raits bilong ol olsem sitisen, ol bikpela protes, na ol pait em ol man i mekim long raits bilong ol long ples wok. Olgeta dispela samting i daunim strong bilong dispela gavman long mekim samting em i laik mekim.

11. Olsem wanem Gavman Inglan-Amerika i strongim bilip bilong yumi olsem yumi stap long taim bilong pinis?

¹¹ Namba 2, olsem tupela fut bilong bikpela imis i makim, Gavman Inglan-Amerika em laspela gavman Baibel i tok profet long en. I no gat narapela gavman bai kisim ples bilong em. Tasol Kingdom Bilong God bai bagarapim dispela gavman wantaim olgeta narapela gavman bilong ol man long taim bilong Armagedon. *—Rev. 16:13, 14, 16; 19:19, 20.

12. Tok profet bilong Daniel i kamapim wanem narapela samting tu i mekim isi bel bilong yumi na i helpim yumi long bilip na wet i stap?

¹² Olsem wanem dispela tok profet inap helpim yumi? Tok profet bilong Daniel i kamapim narapela samting tu i soim olsem yumi stap long taim bilong pinis. Winim 2,500 yia i go pinis, Daniel i tok profet olsem bihain long Babilon, 4-pela narapela gavman bai bosim lain bilong God. Em i tok moa olsem Gavman Inglan-Amerika em laspela bilong ol dispela gavman. Dispela i mekim isi bel bilong yumi na i helpim yumi long bilip na wet olsem klostu nau Kingdom Bilong God bai bagarapim na pinisim olgeta gavman bilong ol man na em tasol bai bosim graun olgeta.​—Dan. 2:44.

13. (a) “Namba 8 king” na “10-pela king” em Revelesen 17:9-12 i stori long en i makim wanem samting? (b) Olsem wanem dispela tok profet i kamap tru?

¹³ Ritim Revelesen 17:9-12. Wol Woa 1 i kamapim bikpela bagarap tru na dispela i truim narapela tok profet bilong Baibel we i stori long ol samting bai kamap long las de. Ol lida bilong graun i laik kamapim bel isi long graun olgeta. Olsem na long Janueri 1920, ol i kamapim Lig ov Nesen, em bihain Yunaitet Nesen i kisim ples bilong en long Oktoba 1945. Baibel i kolim dispela oganaisesen olsem “namba 8 king.” Tasol em i no wanpela strongpela gavman. Dispela oganaisesen i kisim strong long ol gavman i sapotim em. Baibel i kolim ol dispela gavman olsem “10-pela king.”

14-15. (a) Revelesen 17:3-5 i tok wanem samting bai painim “Bikpela Babilon”? (b) Ol sapota bilong ol lotu giaman i wok long mekim wanem?

¹⁴ Ritim Revelesen 17:3-5. Long visen God i kamapim long aposel Jon, em i lukim wanpela pamukmeri, em “Bikpela Babilon,” we i makim olgeta lotu giaman. Olsem wanem dispela visen i kamap tru? Inap longpela taim tru ol oganaisesen bilong ol lotu giaman i wok bung wantaim ol gavman bilong graun na sapotim ol. Tasol klostu nau, Jehova bai givim tingting long ol gavman bilong graun “long mekim samting em yet i tingting pinis long en.” Wanem samting bai kamap? Ol dispela gavman, em “10-pela king,” ol bai pait long ol oganaisesen bilong ol lotu giaman na pinisim ol olgeta.​—Rev. 17:1, 2, 16, 17.

 ¹⁵ Hau yumi save olsem klostu nau Bikpela Babilon bai pinis? Bilong bekim dispela askim, yumi ken tingim taun Babilon bilong bipo, long dispela taim bikpela Wara Yufretis i banisim hap bilong taun. Buk Revelesen i stori long planti milion sapota bilong Bikpela Babilon olsem “ol wara” i lukautim em. (Rev. 17:15) Tasol em i tok tu olsem ol wara bai “drai olgeta,” dispela i soim olsem planti manmeri bai i no moa sapotim ol lotu giaman. (Rev. 16:12) Long nau, dispela tok profet i wok long kamap tru, planti manmeri moa i lusim lotu giaman na ol i kirap long painim ol bekim bilong ol askim bilong ol long narapela hap.

16. Taim yumi kliagut long ol tok profet i stori long kirap bilong Yunaitet Nesen na pinis bilong Bikpela Babilon, dispela bai helpim yumi olsem wanem?

¹⁶ Olsem wanem ol dispela tok profet inap helpim yumi? Yunaitet Nesen i kirap mekim wok na planti manmeri moa i no moa sapotim ol lotu giaman, dispela i kamapim klia olsem yumi stap long taim bilong las de. Maski planti manmeri i no moa sapotim Bikpela Babilon, dispela i no inap bagarapim ol oganaisesen bilong ol lotu giaman, nogat. Bagarap bilong en  bai kam long narapela rot. Olsem yumi stori pinis, Jehova bai givim tingting long dispela “10-pela king”—ol gavman i sapotim Yunaitet Nesen—“long mekim samting em yet i tingting pinis long en.” I no longtaim ol gavman bai pinisim olgeta lotu giaman, em samting ol man bai kirap nogut long en. * (Rev. 18:8-10) Taim Bikpela Babilon i bagarap, dispela bai kamapim ol bikpela hevi tru na ol hatwok long graun olgeta, tasol lain bilong God bai i gat tupela risen long amamas. Lotu giaman we i bin stap olsem birua bilong God Jehova inap longpela taim bai i no stap moa, na klostu nau God bai kisim bek yumi long dispela graun i pulap long pasin nogut!​—Luk 21:28.

17-18. (a) Olsem wanem yumi ken wok yet long strongim bilip bilong yumi? (b) Bai yumi skelim wanem samting long neks atikol?

¹⁷ Daniel i tok profet olsem “stretpela save bai kamap bikpela tru.” Na tru tumas, dispela samting i kamap! Nau yumi kliagut long mining bilong ol tok profet i stori long taim bilong yumi. (Dan. 12:4, 9, 10) Ol dispela tok profet i stret olgeta na dispela i kirapim yumi long rispek tru long Jehova na long tok bilong Baibel. (Ais. 46:10; 55:11) So wok yet long strongim bilip bilong yu long rot bilong stadi gut long Baibel na helpim ol narapela long kisim pasin bilong pas gut wantaim Jehova. Em bai lukautim ol manmeri husat i trastim tru em, na “oltaim [em] bai givim bel isi long ol.”​—Ais. 26:3.

¹⁸ Long neks atikol, yumi bai skelim ol tok profet i stori long kongrigesen Kristen long taim bilong pinis. Yumi bai kisim skul olsem ol dispela tok profet i poroman gut wantaim olgeta tok profet i stori long taim bilong las de. Yumi bai stori long sampela samting moa i kamapim klia olsem Jisas, em King bilong yumi, em i wok long go pas long stiaim ol disaipel bilong em.